1. Omolwashike Jehova a shita ovanhu?

POMHITO imwe Jehova okwa li e li oye aeke, ashike ka li a fya oudja. Kalunga ka li a pumbwa ovanhu opo a dule okukala a hafa. Ashike nande ongaho, okwa li a hala ovanhu va kale nomwenyo nove u hafele. Jehova okwe linyengifwa kohole, ndele ta hovele okushita. — Eps. 36:9; 1 Joh. 4:19.

2. Jesus novaengeli ova li ve uditile ngahelipi oilonga yaJehova yokushita?

² Tete, Jehova okwa shita omulongi pamwe naye. ‘Oinima aishe oya shitwa’ okupitila mOmona waye woshiveli, mwa kwatelwa novaengeli omamiliyona. (Kol. 1:16) Jesus okwa li a hafela omhito oyo yokulonga pamwe naXe. (Omayel. 8:30) Ovaengeli navo ova li yo va hafa. Ova li hava kala omutumba koipundi yokomesho eshi Jehova nOmulongi pamwe naye Onghulungu, Jesus, va shita eulu nedu. Ovaengeli ova li ve linyenga ngahelipi? Ova hovela ‘okwiingida va nyakukwa’ eshi edu la shitwa, nokape na omalimbililo kutya ova twikila okuhambelela Jehova eshi a shita oinima aishe, unene tuu eshi a shita ovanhu ovo ve li oshilonga shaxuuninwa shomake aye. (Job 38:7; Omayel. 8:31) Oinima aishe oyo Jehova a shita otai ulike kutya omunahole nomunongo. — Eps. 104:24; Rom. 1:20.

3. Metwokumwe 1 Ovakorinto 15:21, 22, ekuliloyambo laJesus ola ningifa shike tashi shiiva?

³ Jehova okwa li a hala ovanhu va kale nomwenyo fiyo alushe ve li koplaneta iwa oyo e va shitila. Ashike eshi Adam naEva va tukululila oshibofa Xe omunahole, oshe va etela nosho yo oludalo lavo oulunde nefyo. (Rom. 5:12) Jehova okwa ninga po shike? Okwa katuka onghatu meendelelo opo a dule okuxupifa ovanhu. (Gen. 3:15) Jehova okwa yandja Omona waye Jesus e li ekuliloyambo opo a dule okumangulula oludalo laAdam naEva koulunde nefyo. Ota ka pa omunhu keshe omwenyo waalushe,  oo a hoolola oku mu longela. — Joh. 3:16; Rom. 6:23; lesha 1 Ovakorinto 15:21, 22.

4. Omapulo elipi hatu ka kundafana moshitukulwa eshi?

⁴ Eudaneko laKalunga li na sha nokunyumuna ovafi ola pendula omapulo mahapu. Pashihopaenenwa, otashi dulika tu lipula kutya enyumuko otali ka ningwa ngahelipi? Mbela ohatu ka dula okudimbuluka oonakufya vetu ngeenge ova nyumunwa? Omeenghedi dilipi enyumuko tali ke tu etela ehafo? Ongahelipi ngeenge otwa dilonga kenyumuko tashi ke tu kwafela tu kale twa pandula ohole yaJehova, ounongo nelididimiko laye? Natu ka kundafaneni omapulo oo koolimwe.

5. Omolwashike shi li pandunge okwiitavela kutya ovanhu otava ka nyumunwa palandulafano, ndele itava ka nyumuninwa oshita?

⁵ Eshi Jehova ta ka longifa Omona waye a nyumune ovanhu omamiliyona, itatu ka teelela oonakufya aveshe va nyumunwe oshita. Omolwashike mbela? Omolwaashi kombada yedu otaku ka kala edundakano ngeenge ova nyumuninwa oshita. Ashike oinima yaJehova alushe ohai ningwa palandulafano. Oku shii kutya opo pa kale ombili tai kalelele, oinima oi na okukala palandulafano. (1 Kor. 14:33) Jehova Kalunga okwa ulika kutya omunaendunge nomulididimiki eshi a li ta longo pamwe naJesus opo va longekide edu ofimbo inava shita ovanhu. Jesus naye ota ka ulika omaukwatya a faafana pefimbo lEpangelo lOmido Eyovi eshi ta ka longa pamwe naavo tava ka xupa puArmagedon eshi tava ka wapeka edu nokuhambelela ovanyumunwa.

6. Metwokumwe nOilonga 24:15, oolyelye va kwatelwa mo mwaavo tava ka nyumunwa kuJehova?

⁶ Osho sha fimanenena mwaaishe, oshosho kutya ovo tava ka xupa puArmagedon otava ka honga ovanyumunwa kombinga yOuhamba waKalunga nosho yo oiteelelwa yaYe.  Omolwashike mbela? Omolwaashi ovanhu vahapu ovo tava ka nyumunwa ‘ovalunde.’ (Lesha Oilonga 24:15.) Otava ka ninga omalunduluko mahapu opo va ka mone ouwa mekuliloyambo laKristus. Diladila ashike kutya oilonga oyo otai ka kala i fike peni eshi hatu ka honga ovanhu omamiliyona ovo vehe shii Jehova! Mbela keshe umwe ota ka kala e na ou te mu hongo ngaashi hatu konakona Ombiibeli novanhu kunena? Mbela ovo tava ka nyumunwa tete otava ka tuminwa komaongalo nokudeulwa, opo va dule oku ka honga ovo tava ka nyumunwa konima yavo? Ohatu ka teelela nokutala osho tashi ka ningwa po. Ashike otu shii kutya pexulilo lEpangelo lOmido Eyovi laKristus, “edu alishe otali ka kala li yadi eshiivo lokushiiva Omwene.” (Jes. 11:9) Itatu ka kala tuu tu na oilonga itunhula pefimbo olo lomido eyovi!

7. Omolwashike oshiwana shaKalunga tashi ka kala shi na oukwao wananghali eshi tashi hongo ovanyumunwa?

⁷ Pefimbo lEpangelo lOmido Eyovi laKristus, ovapiya vaJehova aveshe vokombada yedu otava ka ninga omalunduluko opo va dule oku mu hafifa. Aveshe otava ka kala ve na oukwao wananghali eshi tava ka kwafela ovanyumunwa va efe po oikala youlunde nova kale metwokumwe nomifikamhango daJehova. (1 Pet. 3:8) Kape na omalimbililo kutya ovanyumunwa otava ka nanenwa kovapiya vaJehova ovalininipiki, ovo navo tava ‘longo noudiinini opo va ka xupifwe.’ — Fil. 2:12.

8. Omolwashike hatu dulu okukala noushili kutya ohatu ka dula okudimbuluka ovapambele vetu nosho yo ookaume ketu ovo tava ka nyumuka?

⁸ Ope na omatomheno mahapu oo tae tu kwafele tu mone kutya ohatu ka dula okudimbuluka ovapambele vetu nookaume ketu eshi tava ka nyumuka. Pashihopaenenwa, okutala komanyumuko oo a ningwa monakudiwa, osha fa shi li ngaha kutya Jehova ota ka shitulula ovo tava ka nyumuka va kale tava monika, tava popi nokudiladila monghedi ya faafana ofimbo va li momwenyo. Dimbuluka kutya Jesus okwa faafanifa efyo neemhofi nosho yo enyumuko nokupendula omunhu meemhofi. (Mat. 9:18, 24; Joh. 11:11-13) Ngeenge ovanhu va penduka meemhofi ohava kala ve na omalupe a faafana, neendaka davo ihadi lunduluka nohava dimbuluka okanima keshe oko ve shii ofimbo va li oupafi. Diladila koshihopaenenwa shaLasarus. Okwa hangwa a fya pa pita omafiku ane, noshimhu shaye osha li sha hovela okwoola. Ndele eshi Jesus e mu nyumuna, ovamwainakadona vaye ova li ve mu dimbuluka diva, na Lasarus okwa li e va dimbuluka. — Joh. 11:38-44; 12:1, 2.

9. Omolwashike ovo tava ka nyumunwa itava ka kala nomadiladilo nosho yo omalutu a wanenena?

⁹ Diladila ketomheno etivali. Jehova okwa udaneka kutya kape na umwe ta ka kala koshi yepangelo laKristus ta ka tya: “Aame oshingone.” (Jes. 33:24; Rom. 6:7) Ovo tava ka nyumunwa otava ka kala ve na oukolele. Ashike itava ka fika mewaneneno diva. Ngeenge hasho, otashi dulika ovapambele nookaume itave ke va dimbuluka noupu. Osha fa shi li ngaha kutya ovanhu aveshe otava ka enda va finda mewaneneno pefimbo lEpangelo lOmido Eyovi laKristus. Jesus ota ka shunifa Ouhamba kuXe pexulilo lomido eyovi. Ouhamba otau ka wanifa po oilonga yao filufilu, mwa kwatelwa okufikifa ovanhu mewaneneno. — 1 Kor. 15:24-28; Eh. 20:1-3.

10. Enyumuko otali ke ku kuma ngahelipi?

¹⁰ Diladila nghee tashi ka kala eshi to ka hambelela ovaholike voye. Mbela oto ka kala to liyoleifa ile oto ka lila kehafo? Mbela ehafo  otali ke ku linyengifa u tange Jehova nomaimbilo? Ohatu dulu okukala noushili kutya ohatu ka pandula Tate yetu omunefiloshisho nosho yo Omona waye omuholike ovo ve shi ningifa tashi shiiva opo pa kale eteelelo lenyumuko, olo li li oshali ya denga mbada.

11. Metwokumwe neendjovo daJesus odo di li muJohannes 5:28, 29, oshike tashi ka ningilwa ovo va li hava dulika kuKalunga?

¹¹ Diladila nghee ovo tava ka nyumuka eshi tava ka kala va hafa eshi tava ka efa po ounhu wavo mukulu nokukala metwokumwe nomifikamhango daKalunga douyuki. Ovo tava ka ninga omalunduluko a tya ngaho otava ka nyumukila omwenyo. Mepingafano naasho, ovo tava ka tukululila Kalunga ounashibofa itava ka pitikwa va nyone po ombili mOparadisa. — Jes. 65:20; lesha Johannes 5:28, 29.

12. Omonghedi ilipi aveshe ovo tava ka kala kombada yedu tava ka kala va punikwa kuJehova?

¹² Koshi yOuhamba, ovapiya aveshe vaKalunga otava ka mona oushili waasho sha popiwa mOmayeletumbulo 10:22, oo taa ti: “Enangeko noupuna lOmwene, olo tali likolifa, noshilonga shidjuu itashi wedele ko sha.” Kekwafo lomhepo yaJehova, oshiwana shaye otashi ka punapala pamhepo, sha hala okutya otashi ka enda tashi fiki mewaneneno shi kale ngaashi Kristus. (Joh. 13:15-17; Ef. 4:23, 24) Efiku keshe oukolele wavo otau ka enda tau xwepopala nokukala ovanhu vawa. Ovanhu itava ka kala tuu va hafa! (Job 33:25) Ndele ongahelipi okudilonga kenyumuko tashi ku kwafele paife?

13. Metwokumwe nEpsalme 139:1-4, enyumuko otali ka ulika ngahelipi kutya Jehova oku tu shii nawa?

¹³ Ngaashi twa kundafana pehovelo, Jehova eshi ta ka nyumuna ovanhu ote ke va nyumuna ve na omadiladilo nosho yo omaukwatya oo tae tu kwafele tu va dimbuluke. Mbela osho osha hala okutya ngahelipi? Jehova oku ku hole neenghono noku shii osho to diladila, osho u udite, osho to popi naasho to ningi. Onghee hano, eshi te ke ku nyumuna oto ka kala ngaashi wa li nale ofimbo ino fya. Ohamba David oya li i shii kutya Jehova oku shii nawanawa keshe umwe womufye. (Lesha Epsalme 139:1-4.) Mbela otu udite ngahelipi eshi tu shii kutya Jehova oku tu shii nawanawa?

14. Ohatu kala tu udite ngahelipi eshi tu shii kutya Jehova oku tu shii nawanawa?

¹⁴ Ngeenge hatu dilonga kunghee Jehova e tu shii nawa, inatu pumbwa okukala hatu lipula nasha. Omolwashike mbela? Dimbuluka kutya Jehova oku na ko nasha nafye neenghono. Okwa lenga omaukwatya etu oo e tu ningifa tu kale tu na ondilo momesho aye. Oha kala e shii keshe osho hashi tu nwefa mo monghalamwenyo yetu. Osho itashi tu hekeleke tuu! Inatu diladila kutya otu li ofye atuke. Efimbo alishe Jehova oha kala pufye, nota kongo eemhito e tu kwafele. — 2 Omaf. 16:9.

15. Enyumuko otali ulike ngahelipi kutya Jehova omunongo?

¹⁵ Oumbada wokutila efyo ou li oshilwifo oshinaenghono. Ovanhu ovo ve li koshi yenwefemo laSatana ohava fininike vamwe va ninge oinima oyo ve shii kutya oya puka. Ndele itava dulu oku tu fininika tu ninge oinima oyo. Ashike otu shii kutya ngeenge ovatondi vetu ove tu dipaa, Jehova ote ke tu nyumuna. (Eh. 2:10) Otwa tomhwa kutya kape na osho tashi tu efifa po okulongela Jehova. (Rom. 8:35-39) Jehova ina ulika tuu kutya omunaendunge a shiya ko eshi e tu pa eteelelo lenyumuko! Omolweteelelo lenyumuko, ihatu kala twa tila ovashikuli vaSatana, ovo have tu ningile  omatilifo oku tu dipaa ngeenge tave tu pula tu ninge osho va hala, naasho ohashi tu pe ouladi tu kale ovadiinini kuJehova.

16. Omapulo elipi wa pumbwa okulipula, nongahelipi omanyamukulo tae ku kwafele u shiive kutya owe lineekela Jehova shi fike peni?

¹⁶ Mbela oto ka kala ngoo u na elineekelo kutya Jehova ote ku nyumuna ngeenge ovatondi vaye tave ku ningile omatilifo oku ku dipaa? Ou shi shii ngahelipi? Onghedi imwe omokulipula kutya, ‘Mbela omatokolo oo handi ningi efiku keshe ohaa ulike ngoo kutya onde lineekela muJehova?’ (Luk. 16:10) Epulo likwao olo to dulu okulipula ololo kutya, ‘Mbela onghedi yange yokukalamwenyo otai ulike ngoo kutya onde lineekela muJehova kutya ota ka fila oshisho eemhumbwe dange ngeenge onda pitifa komesho tete Ouhamba?’ (Mat. 6:31-33) Ngeenge omanyamukulo komapulo oo oheeno, osho osha yela kutya owe lineekela muJehova nowe lilongekidila eshongo keshe olo to ka shakeneka. — Omayel. 3:5, 6.

17. (a) Enyumuko otali ulike ngahelipi kutya Jehova omulididimiki? (b) Ongahelipi hatu dulu okuulika olupandu li na sha nelididimiko laJehova?

¹⁷ Jehova okwa tokola nale kutya onaini ta ka hanauna po ounyuni ou wa kolokosha. (Mat. 24:36) Ite ke u hanauna po omanga efimbo olo inali fika. Okwa djuulukwa okunyumuna ovafi, ashike okwe lididimika. (Job 14:14, 15) Okwa teelela fiyo efimbo la wapala la fika opo a ka nyumune oonakufya. (Joh. 5:28) Onghee hano, otu na omatomheno mawa okupandula Jehova omolwelididimiko laye. Diladila kwaashi: Molwaashi Jehova omulididimiki, ovanhu vahapu, mwa kwatelwa nafye, otu na efimbo ‘lokulidilulula.’ (2 Pet. 3:9) Jehova okwa hala ovanhu vahapu ngaashi tashi dulika va ka mone omwenyo waalushe. Onghee natu ulike kutya otwa pandula elididimiko laye. Ngahelipi mbela? Omokukonga twa mana mo ovo va “halelela shili omwenyo waalushe” noku va kwafela va kale ve hole Jehova noku mu longela. (Oil. 13:48) Nokungaho, otava ka mona ouwa melididimiko laJehova ngaashi fye.

18. Omolwashike twa pumbwa okulididimikila vamwe?

¹⁸ Jehova okwa teelela nelididimiko fiyo opexulilo lomido eyovi opo tu kale twa wanenena. Jehova ota kala noku tu dimina po omatimba etu ofimbo inatu fika mewaneneno. Onghee hano, otwa pumbwa okushikula oshihopaenenwa shaye mokuyandja elitulemo komaukwatya mawa avamwe. Diladila koshihopaenenwa shomumwameme umwe, oo omushamane  waye a li e na oshisho sha pitilila nokwa efa po okuya kokwoongala. Omumwameme oo okwa ti: “Onghalo oyo oya li idjuu kwaame. Onghalamwenyo youkwaneumbo wetu oya li ya lunduluka ombadilila nokatwa li hatu dulu okulonga oinima oyo twa li twa hala.” Nonande ova li va taalela onghalo ya tya ngaho, omukulukadi waye omuholike okwa kala nokulididimikila omushamane waye. Okwa kala e lineekela muJehova, noka li a sholola. Ngaashi Jehova, ka li a yandja elitulemo komaupyakadi omonakudiwa, ndele okwa kala ta yandje elitulemo koinima iwa yomushamane waye. Omumwameme oo okwa weda ko a ti: “Omushamane wange oku na omaukwatya a denga mbada, nokwa kala ta ningi eenghendabala opo a xwepopale kanini nakanini.” Kashi li tuu pandunge okulididimikila ovo ve li momaukwaneumbo etu ile ovo ve li meongalo tava kendabala okufinda omashongo!

19. Otwa tokola toko okuninga shike?

¹⁹ Jesus novaengeli ova li va hafa eshi edu la shitwa. Diladila nghee tava ka kala va hafa eshi kombada yedu taku ka kala ovanhu va wanenena, ovo ve hole Jehova notave mu longele. Diladila kunghee ovo tava ka pangela pamwe naKristus meulu tava ka kala va hafa eshi ve wete ovanhu tava mono ouwa moilonga yavo. (Eh. 4:4, 9-11; 5:9, 10) Diladila nghee ovanhu tava ka kala va hafa eshi omahodi taa ka fetwa po, noitaku ka kala vali ouyahame, oluhodi nosho yo efyo fiyo alushe. (Eh. 21:4) Onghee hano, natu kale twa tokola toko okuhopaenena ohole, ounongo nosho yo elididimiko laTate yetu. Ngeenge otwa ningi ngaho ohatu ka kala twa hafa, kashi na nee mbudi kutya ohatu shakeneke omashongo a tya ngahelipi. (Jak. 1:2-4) Inatu hafa tuu eshi Jehova a udaneka kutya ‘otaku ka kala enyumuko’! — Oil. 24:15.