1. Jehova okwa pa shike ovapiya vaye ovadiinini?

OMUPIYA keshe omudiinini waJehova oku na onghandangala oyo ta dana meongalo. Nonande oinakuwanifwa oyo tu na oya yoolokafana, atusheni otu na ondilo momesho aJehova notwa pumbwafana. Omuyapostoli Paulus okwe tu kwafela tu ude ko nawa oshilihongomwa osho sha fimana. Ngahelipi mbela?

2. Metwokumwe nOvaefeso 4:16, omolwashike twa pumbwa okukala twa fimanekafana nokulongela kumwe?

² Ngaashi sha popiwa momushangwa wenenediladilo loshitukulwa eshi, Paulus okwa ulika kutya kape na nande umwe womufye ta ka tya komupiya mukwao waJehova ta ti: “Inandi ku pumbwa.” (1 Kor. 12:21) Ngeenge otwa hala ombili i kunguluke meongalo, otwa pumbwa okukala twa fimanekafana nokulongela kumwe. (Lesha Ovaefeso 4:16.) Ngeenge ohatu longele kumwe, keshe umwe meongalo ota ka kala e udite e holike, neongalo otali ka kala la pama.

3. Oshike hatu ka kundafana moshitukulwa eshi?

³ Omeenghedi dimwe dilipi hatu ka ulika kutya otwa fimaneka Ovakriste vakwetu meongalo? Moshitukulwa eshi, ohatu ka tala nghee ovakulunhuongalo tava dulu okuulika kutya ova fimaneka ovakulunhuongalo vakwao. Opo nee, ohatu ka kundafana nghee atusheni hatu dulu okuulika kutya otwa fimaneka ovamwatate novamwameme ovo inava ya mohombo. Xuuninwa, ohatu ka kundafana nghee hatu dulu okuulika kutya otwa fimaneka ovo ihava popi nawa elaka letu.

4. Ongahelipi ovakulunhuongalo tava dulu okutula moilonga omayele aPaulus oo ta hangwa mOvaroma 12:10?

⁴ Ovakulunhuongalo aveshe meongalo ovanangekwa po komhepo iyapuki yaJehova. Ashike aveshe ove na eeshali nokudula kwa yoolokafana. (1 Kor. 12:17, 18) Vamwe otashi dulika opo va nangekwa po nokave na owino. Vamwe ove na omangabeko ngaashi oukulupe nokuhe na oukolele. Onghee hano, kape na omukulunhuongalo ta ka lombwela omukulunhuongalo mukwao ta ti, “Inandi ku pumbwa.” Ponhele yaasho, omukulunhuongalo keshe oku na okutula moilonga omayele aPaulus oo e li mOvaroma 12:10. — Lesha.

5. Ongahelipi ovakulunhuongalo tava dulu okuulika kutya ova fimaneka ovakulunhuongalo vakwao, nomolwashike sha fimana okuninga ngaho?

⁵ Ovakulunhuongalo ohava ulike kutya ova fimaneka ovakulunhuongalo vakwao mokukala hava pwilikine kuvo nelitulemo. Osho osha fimanenena unene tuu ngeenge ovakulunhuongalo va ongalo ve li olutu tava kundafana oinima ya kwata moiti. Omolwashike mbela? Didilika osho Oshungonangelo yOshiingilisha ye 1 Oktoba 1988, ya ti: “Ovakulunhuongalo ove shii kutya Kristus ota dulu okuwilika omukulunhuongalo keshe okupitila momhepo iyapuki opo a ete po omafinamhango Ombiibeli oo taa dulu oku va kwafela monghalo keshe ile opo va ninge etokolo la fimana. (Oil. 15:6-15) Omhepo iyapuki ohai kwafele ovakulunhuongalo aveshe, ndele hamukulunhuongalo ashike umwe.”

6. Ovakulunhuongalo ohava longo ngahelipi moukumwe, neongalo ohali mono ngahelipi ouwa ngeenge tava ningi ngaho?

⁶ Omukulunhuongalo oo a fimaneka ovakulunhuongalo vakwao haye ashike ha hovele okupopya ngeenge ve li pokwoongala kwavo. Haye ashike ha kala ta dana onghandangala meenghundafana, noku shii kutya omaetepo aye haalushe haa kala mondjila. Ponhele yaasho, oha popi omadiladilo aye te shi ningi nelininipiko nosho yo pandjele. Oha pwilikine nelitulemo komatyekosha avakwao. Naasho sha fimanenena, oha kala a halelela okutala omafinamhango nokupwilikina kewiliko olo la dja ‘komupiya omudiinini nomunaendunge.’ (Mat. 24:45-47) Ngeenge ovakulunhuongalo ohava kundafana pahole nosho yo nefimaneko, omhepo iyapuki  yaKalunga otai ka kala pokwoongala oko, notai ke va wilika va ninge omatokolo oo taa pameke eongalo. — Jak. 3:17, 18.

7. Jesus okwa li a tala ko ngahelipi ovo inava ya mohombo?

⁷ Momaongalo kunena omu na ovalihomboli nomaukwaneumbo. Ashike omu na ovamwatate novamwameme vahapu inava ya mohombo. Otu na okutala ko ngahelipi ovo inava ya mohombo? Otu na okuhopaenena onghedi omo Jesus a li e va tala ko. Eshi Jesus a li ta wanifa po oukalele waye wokombada yedu ka li a hombola. Okwa kala ina hombola opo a dule okuyandja elitulemo koshinakuwanifwa shaye. Jesus ka li a honga nandenande kutya oshi li oshiteelelwa okuya mohombo ile okuhaya mohombo. Ashike okwa popya kutya Ovakriste vamwe ova hoolola okuhaya mohombo. (Mat. 19:11, 12; tala ouyelele wokukonakona mo-nwtsty wa pamba Mateus 19:12.) Jesus okwa kala a fimaneka ovo inava hombola ile inava hombolwa. Ka li e va tala ko ve li pedu, ile va kambela sha monghedi yonhumba ile yongadi.

8. Metwokumwe 1 Ovakorinto 7:7-9, Paulus okwa li a ladipika Ovakriste va ninge shike?

⁸ Ngaashi Jesus, omuyapostoli Paulus naye okwa kala ina hombola eshi a kala ta wanifa po oukalele waye. Paulus ka li a honga nandenande kutya osha puka kOmukriste okuya mohombo. Okwa li e shii kutya oshinima osho etokolo lopaumwene. Ashike, Paulus okwa li a ladipika Ovakriste va longele Jehova inava hombola ile inava hombolwa ngeenge otava dulu. (Lesha 1 Ovakorinto 7:7-9.) Paulus ka li a dina Ovakriste ovo inava ya mohombo. Ndele okwa li a hoolola omunyasha Timoteus, omumwatate oo a li ina hombola, opo a wanife po oinakuwanifwa ya kwata moiti. * (Fil. 2:19-22) Onghee hano, otashi ka kala sha puka okudiladila kutya omumwatate okwa wana ile ina wana okunangekwa po she likolelela kutya okwa hombola ile ina hombola. — 1 Kor. 7:32-35, 38.

9. Oshike hatu dulu okupopya shi na sha nohombo nosho yo okuhaya mohombo?

⁹ Jesus naPaulus inava lombwela Ovakriste kutya nava ye mohombo ile inava ya mohombo. Ndele oshike hatu dulu okupopya shi na sha nohombo nokuhaya mohombo? Oshungonangelo yOshiingilisha ye 1 Oktoba 2012, oya yandja enyamukulo kepulo olo ya ti: “Ohombo nosho yo okuhaya mohombo, aishe oi li oshali yandja kuKalunga. . . . Jehova ina tala ko ovo inava  hombola ile inava hombolwa va etifa onghenda ile va nyika oluhodi.” Tu na osho momadiladilo, otwa pumbwa okufimaneka ovamwatate novamwameme ovo ve li meongalo, ovo inava hombola ile inava hombolwa.

10. Ongahelipi hatu dulu okufimaneka ovamwatate novamwameme ovo inava ya mohombo?

¹⁰ Ongahelipi hatu dulu okuulika kutya otwa fimaneka omaliudo ovamwatate novamwameme ovo inava ya mohombo? Otu na okudimbuluka kutya Ovakriste vamwe ovo inava ya mohombo ova ninga etokolo lopaumwene va kale inava hombola ile inava hombolwa. Ovakriste vamwe ova hala okuya mohombo, ashike inava mona omunhu ta wapalele. Vamwe otashi dulika va filwa ookaume kavo kopahombo. Kashi na nee mbudi kutya oshike, mbela osha pumbiwa ngoo okupula Ovakriste ovo inava ya mohombo kutya omolwashike inava hombola ile inava hombolwa ile tu va kongele? Oshoshili kutya Ovakriste vamwe ovo inava ya mohombo otashi dulika va pule ekwafo la tya ngaho. Ndele ngeenge inave tu pula tu va kongele, ovamwatate novamwameme ovo inava ya mohombo otava ka kala ve udite ngahelipi? (1 Tes. 4:11; 1 Tim. 5:13) Natu ka taleni komatyekosha ovamwatate novamwameme vamwe ovadiinini ovo inava ya mohombo.

11-12. Ongahelipi hatu dulu okuteya omukumo ovo inava ya mohombo?

¹¹ Omupashukilishikandjo umwe oo ina hombola noha wanifa po nawa oinakuwanifwa yaye okwa mona omauwa mahapu eshi ina ya mohombo. Okwa popya a ti: “Ohashi teya nge omukumo ngeenge ovamwatate novamwameme ovo tashi dulika ve na omalinyengotomheno mawa tava pula nge kutya, “Omolwashike ino hombola?” Omumwatate umwe ina hombola, oo ha longo koshitaimbelewa, okwa ti: “Omafimbo amwe ovamwatate novamwameme ohava ningifa nge ndi kale nde lietela onghenda eshi inandi hombola. Okukala inandi hombola ohashi ningifa nge ndi kale ndi wete shi li omutengi, ponhele yoku shi tala ko shi li oshali.”

¹² Omumwameme umwe oo ina hombolwa, ha longo kObetel, okwa ti: “Ovaudifi vamwe ohava diladila kutya ovanhu ovo inava ya mohombo ohava kongo ookaume kopahombo ngeenge ve li peemhito de likalekelwa. Pomhito imwe onda li nda ya koshilongo shimwe omolwoilonga yange yaBetel, nonda li nda ya kokwoongala onguloshi yefiku olo. Omumwameme oo twa li hatu di pamwe naye okwa li a lombwela nge kutya meongalo lavo omu na ovamwatate vavali vepupi lange. Okwa li a shilipaleka nge kutya ita kongele nge kaume kopahombo. Ndele diva eshi twa fika mOlupale lOuhamba okwa li a twala nge kovamwatate ovo vavali opo ndi ke va shiive. Osha li shi fifa ohoni kwaame nosho yo kovamwatate ovo vavali.”

13. Oihopaenenwa ilipi ya li ya twa omukumo omumwameme umwe oo ina hombolwa?

¹³ Omumwameme umwe ina hombolwa, oo ha longo kObetel, okwa ti: “Ondi shii ovamwameme ovakulunhu ovakokolindjila ovo va pama pamhepo, hava yandje elitulemo, ve na omhepo yeliyambo, va wanenwa moilonga yavo nove li ekwafo linene keongalo. Ove na etaleko li li pandjele li na sha nokukala inava hombolwa, ihava diladila kutya ove li xwepo ve dule vamwe molwaashi inava hombolwa, ile kutya itava dulu okukala va hafa molwaashi inava hombolwa nokave na ounona.” Onghee hano, ohashi kala shitunhula okukala meongalo omo keshe umwe e udite a fimanekwa. Ou shii kutya ovamwaxo ihava kala ve ku etela onghenda, ile ve ku twile ondubo, ile ve ku lidimbike, noihava diladila kutya ou li xwepo u va dule. Ndele oho kala u shii kutya ove ku hole.

14. Ongahelipi hatu dulu okuulika kutya otwa fimaneka ovo inava ya mohombo?

¹⁴ Ovamwatate novamwameme ovo inava ya mohombo otave ke shi pandula ngeenge otwa kala twa lenga omaukwatya avo mawa ponhele  yokukala twe va etela onghenda eshi inava ya mohombo. Ponhele yokukala tu va uditile onghenda, otwa pumbwa okukala hatu va pandula omolwoudiinini wavo. Oshidjemo, ovamwatate novamwameme ovo inava ya mohombo itava ka kala ve udite hatu ti kuvo: ‘Inatu mu pumbwa.’ (1 Kor. 12:21) Ponhele yaasho, otava ka mona kutya otwe va fimaneka notwa lenga onghandangala oyo tava dana meongalo.

15. Vamwe ova ninga omalunduluko elipi opo va tamunune mo oukalele wavo?

¹⁵ Omido opo da di ko, ovaudifi vahapu ove litulila po elalakano lokulihonga elaka limwe opo va tamunune mo oukalele wavo. Ova li ve na okuninga omalunduluko opo va ninge ngaho. Ovamwatate novamwameme ovo ova fiya po omaongalo oko haku popiwa omalaka oo va nyama nokutembukila komaongalo oko ku na omhumbwe inene yovaudifi vOuhamba. (Oil. 16:9) Ovakriste ovo ova ninga etokolo olo, opo va longele Jehova pauyadi. Nonande ohashi kwata efimbo opo ve lihonge elaka lipe, ohava kwafele eongalo meenghedi dihapu. Omaukwatya avo mawa nosho yo owino wavo ohau pameke ovamwatate novamwameme meongalo. Otwa lenga neenghono omhepo yeliyambo yovamwatate novamwameme va tya ngaho.

16. Oshike hashi ufa kutya omumwatate okwa wana okunangekwa po e li omukulunhuongalo ile omuyakuliongalo?

¹⁶ Olutu lovakulunhuongalo kali na okuongaonga okupopila omumwatate a ninge omukulunhuongalo ile omuyakuliongalo molwaashi iha popi nawa elaka leongalo. Ovakulunhuongalo ove na okutala ngeenge omumwatate okwa wana okunangekwa po e li omukulunhuongalo ile omuyakuliongalo tave shi ninga metwokumwe noiteelelwa yopaMishangwa, ndele hanghee ha popi elaka olo hali popiwa meongalo. — 1 Tim. 3:1-10, 12, 13; Tit. 1:5-9.

17. Omapulo amwe elipi omaukwaneumbo amwe a taalela ngeenge a tembukile koshilongo shimwe?

¹⁷ Omaukwaneumbo amwe opaKriste ohaa tembukile koshilongo shimwe opo a ka konge eameno ile oilonga. Meenghalo da tya ngaho, ounona vavo otashi dulika va hongwe elaka olo hali popiwa unene moshilongo omo va tembukila. Ovadali otashi dulika ve lihonge elaka olo hali popiwa unene moshilongo osho opo va mone oilonga. Ndele ongahelipi ngeenge ope na eongalo lomoshitukulwa ile ongudu oyo hai popi elaka lovadali? Oukwaneumbo oo otau ka kala meongalo lilipi? Mbela omeongalo olo hamu popiwa unene elaka olo hali popiwa moshilongo osho ile omeongalo omo hamu popiwa elaka lovadali?

18. Metwokumwe nOvagalati 6:5, ongahelipi hatu dulu okuulika kutya otwa fimaneka etokolo lomutwe woukwaneumbo?

¹⁸ Omutwe woukwaneumbo oo u na okutokola kutya otava ka kala meongalo lilipi. Molwaasho osho oshi li etokolo lopaumwene, omutwe woukwaneumbo ou na okudiladila kwaasho tashi dulu okweetela oukwaneumbo wavo ouwa. (Lesha Ovagalati 6:5.) Otu na okukala twa fimaneka etokolo lomutwe woukwaneumbo.  Kashi na nee mbudi kutya etokolo ola tya ngahelipi, otu na okukala twa fimaneka etokolo laye, oukwaneumbo waye noku u ulikila ohole meongalo. — Rom. 15:7.

19. Omitwe domaukwaneumbo odi na okudiladila kushike pamwe neilikano?

¹⁹ Peemhito dimwe, omaukwaneumbo amwe otashi dulika haa ongala momaongalo omo hamu popiwa elaka lovadali, ndele otashi dulika ounona vehe shii nawa elaka olo. Ngeenge eongalo oli li moshitukulwa omo hamu popiwa elaka lopambelewa, otashi dulika ounona vaha kale ve udite ko osho tashi kundafanwa pokwoongala noitava ka ninga exumokomesho lopamhepo. Omolwashike mbela? Omolwaashi otashi dulika ounona hava i kofikola oyo hai popi elaka lopambelewa, ndele halaka lovadali. Peemhito da tya ngaho, omitwe domaukwaneumbo odi na okudilonga pamwe neilikano osho di na okuninga po, opo di kwafele ounona va ehene popepi elela naJehova nosho yo noshiwana shaye. Ovadali otava dulu okuhonga ovana vavo va kale hava popi nawa elaka lavo, ile va tembukile keongalo olo hali popi elaka olo li uditike nawa kounona vavo. Kashi na nee mbudi kutya omutwe woukwaneumbo owa ninga etokolo lilipi, eongalo olo a hoolola oli na okukala le mu fimaneka nosho yo oukwaneumbo waye.

20. Ongahelipi hatu dulu okuulika kutya otwa fimaneka ovamwatate novamwameme ovo tave lihongo elaka limwe?

²⁰ Omolwomatomheno aeshe oo twa kundafana, momaongalo mahapu omu na ovamwatate novamwameme ovo tava kendabala okulihonga elaka limwe. Otashi dulika shi kale shidjuu okuyelifa omadiladilo avo. Ndele ngeenge otwa henuka okudiladila komushingo omo hava popi elaka olo tave lihongo, ohatu ka mona kutya ove hole Jehova nova halelela oku mu longela. Ngeenge otwa mono omaukwatya avo mawa, ohatu ka kala twe va lenga notwe va fimaneka neenghono. Itatu ka tya kuvo, “Inatu mu pumbwa,” molwaashi ihava popi nawa elaka letu.

21-22. Otu na oufembanghenda wa denga mbada ulipi?

²¹ Jehova okwe tu pa oufembanghenda wa denga mbada eshi tu na onghandangala oyo hatu dana meongalo. Kashi na nee mbudi kutya otu valumenhu ile ovakainhu, tu li mohombo ile hasho, ovanyasha ile ovanamido, hatu popi nawa elaka lonhumba ile hasho, atusheni otu na ondilo momesho aJehova nokovamwatate. — Rom. 12:4, 5; Kol. 3:10, 11.

²² Natu twikileni okutula moilonga oilihongomwa ya fimana ihapu oyo twe lihonga mefaneko laPaulus li na sha nolutu lomunhu. Osho otashi ke tu kwafela tu mone osho tu na okuninga opo tu twe omukumo ovamwatate novamwameme, oku va ulikila ohole nokukala twe va fimaneka.