1. Ohatu hafele oshinakuwanifwa shilipi?

OSHI li oufembanghenda kufye okukala oshitukulwa sheongalo laJehova. Ohatu tyapula oparadisa yopamhepo omo mu na ovanhu ovanambili nova hafa. Ndele mbela onghandangala ilipi to dana meongalo?

2. Efaneko lilipi omuyapostoli Paulus a longifa lwoikando meenhumwafo daye da nwefwa mo?

² Ohatu dulu okulihonga shihapu kombinga yoshikundafanwa osho mokutala kefaneko olo la longifwa lwoikando komuyapostoli Paulus meenhumwafo daye da nwefwa mo. Monhumwafo keshe, Paulus okwa yelekanifa eongalo nolutu lomunhu. Okwa yelekanifa oilyo yeongalo noitukulwa yolutu. — Rom. 12:4-8; 1 Kor. 12:12-27; Ef. 4:16.

3. Oilihongomwa itatu ilipi hatu ka kundafana moshitukulwa eshi?

³ Moshitukulwa eshi, ohatu ka konakona oilihongomwa itatu ya fimana oyo hatu lihongo mefaneko laPaulus. Shotete, ohatu ke lihonga kutya keshe umwe womufye oku na onghandangala * oyo ta dana meongalo laJehova. Oshitivali, ohatu ka kundafana osho tu na okuninga po ngeenge katu shii onghandangala oyo hatu dana meongalo. Noshititatu, ohatu ka kundafana osho tu na okuninga opo tu wanife po oshinakuwanifwa osho tu na meongalo.

4. Oshike hatu lihongo mOvaroma 12:4, 5?

⁴ Oshilihongomwa shotete osho hatu lihongo mefaneko laPaulus oshosho kutya keshe umwe womufye oku na onghandangala ya fimana oyo ta dana moukwaneumbo waJehova. Paulus okwa hovela nefaneko olo ta ti: “Ngaashi ashike omalutu etu e na oilyo ihapu, ndele ihai longo oilonga ya faafana, nafye, nonande otu vahapu, otwa hanganifwa kuKristus tu kale olutu limwe, ashike atusheni otwa pumbwa okulongela kumwe.” (Rom. 12:4, 5) Paulus okwa li a hala okutya ngahelipi? Keshe umwe womufye oku na onghandangala oyo dana meongalo, nakeshe umwe womufye oku na ondilo momesho aJehova.

5. Jehova okwa pa eongalo “eeshali” dilipi?

⁵ Ngeenge to diladila shi na sha naavo tava dana onghandangala meongalo, otashi dulika u diladila diva kwaavo tava kwatele komesho. (1 Tes. 5:12; Heb. 13:17) Oshoshili kutya okupitila muKristus, Jehova okwa yandja “ovalumenhu ve li eeshali” keongalo laYe. (Ef. 4:8) ‘Ovalumenhu ovo ve li eeshali’ ova kwatela mo oilyo yOlutuwiliki, ovakwafeli vOlutuwiliki, oilyo yEekomitiye dOitaimbelewa, ovapashukilishikandjo, ovamwatate ovo ve li ovahongi veefikola dehangano, ovakulunhuongalo nosho yo ovayakuliongalo. Ovalumenhu aveshe ovo ova nangekwa po komhepo iyapuki opo va file oshisho eedi daJehova di na ondilo nova pameke ongalo. — 1 Pet. 5:2, 3.

6. Metwokumwe 1 Ovatessaloniki 2:6-8, ovamwatate ovo va nangekwa po komhepo iyapuki ohava ningi shike?

⁶ Ovamwatate ovo va nangekwa po komhepo iyapuki ove na oinakuwanifwa ya yoolokafana. Ngaashi ashike olutu alishe hali mono ouwa moitukulwa yalo ya yoolokafana ngaashi eenyala neemhadi, ovamwatate ovo va nangekwa po komhepo iyapuki ohava longo noudiinini opo eongalo alishe li mone ouwa. Ihava kongo efimano. Ponhele yaasho, ohava longo noudiinini opo va pameke nokutunga ovamwaxe. (Lesha 1 Ovatessaloniki 2:6-8.) Inatu pandula tuu Jehova eshi a nangeka po ovamwatate ovo vehe lihole vo vene okupitila momhepo yaye!

7. Ovo ve li moilonga yefimbo li yadi otava hafele omanangeko noupuna mahapu ilipi?

⁷ Vamwe meongalo otashi dulika va nangekwa po ve li ovatumwa, ovakokolindjila ve likalekelwa ile ovakokolindjila vondjikilile. Ovamwatate novamwameme mounyuni aushe ova ninga oilonga yokuudifa nokuninga ovanhu ovahongwa eifano lavo. Osho oshe va kwafela va dule okuninga ovanhu vahapu ovahongwa vaKristus Jesus. Nonande ovo ve li moilonga yefimbo li yadi kave na oiniwe ihapu, Jehova okwe va nangeka noupuna meenghedi dihapu. (Mark. 10:29, 30) Otwa lenga neenghono ovamwatate novamwameme ovo, notwa hafa eshi ve li oshitukulwa sheongalo.

8. Omolwashike omuudifi keshe wonghundana iwa e na ondilo momesho aJehova?

⁸ Mbela ovamwatate ovo va nangekwa po nosho yo ovo ve li moilonga yefimbo li yadi ovo ashike tava dana onghandangala meongalo? Hasho nandenande! Omuudifi keshe wonghundana iwa oku na ondilo momesho aJehova nosho yo keongalo. (Rom. 10:15; 1 Kor. 3:6-9) Oshilonga sha fimanenena osho tu na meongalo osho okuninga ovanhu ovahongwa vOmwene wetu Jesus Kristus. (Mat. 28:19, 20; 1 Tim. 2:4) Aveshe ovo hava endafana neongalo, kutya ovaudifi ovo va ninginifwa ile ovovo inava ninginifwa, ohava kendabala okupitifa komesho oilonga oyo. — Mat. 24:14.

9. Omolwashike twa lenga ovamwameme Ovakriste?

⁹ Jehova okwa pa ovamwameme Ovakriste oilonga ya fimana meongalo. Okwa  lenga aveshe ovo have mu longele noudiinini ngaashi ovakulukadi, ovadalakadi, ovafiyekadi nosho yo ovamwameme ovo inava hombolwa. Omishangwa oda popya lwoikando kombinga yovakainhu ovadiinini ovo va li va hafifa Kalunga. Ova popiwa ve li oihopaenenwa iwa i na sha nounongo, eitavelo, ouladi, okuyandja nosho yo oilonga iwa. (Luk. 8:2, 3; Oil. 16:14, 15; Rom. 16:3, 6; Fil. 4:3; Heb. 11:11, 31, 35) Inatu pandula tuu Jehova eshi e tu pa ovakainhu Ovakriste meongalo, ovo ve na omaukwatya mawa a fa oo!

10. Omolwashike twa lenga ovanamido vetu?

¹⁰ Otwa nangekwa yo noupuna eshi tu na ovanamido vahapu. Momaongalo amwe omu na ovamwatate novamwameme ovanamido ovo va longela Jehova noudiinini onghalamwenyo yavo aishe. Ofimbo ovanamido vamwe opo ve lihongo oshili. Kashi na nee mbudi kutya opo ve uya moshili ile ova kala mo, vamwe otashi dulika kave na oukolele omolwoukulupe. Omaupyakadi a tya ngaho otaa dulu okuninipika osho hava longo meongalo nosho yo moilonga yokuudifa. Ashike nande ongaho, ohava ningi ngaashi tava dulu opo va kufe ombinga moukalele nokulongifa eenghono davo mokutwa omukumo nokudeula vamwe. Ohatu mono ouwa moimoniwa yavo. Ovanamido ove na ondilo momesho aJehova nosho yo kufye. — Omayel. 16:31.

11-12. Ovanyasha ohava tu omukumo ngahelipi eongalo?

¹¹ Diladila yo kovanyasha ovo tu na meongalo. Ohava shakeneke omaupyakadi mahapu eshi tava ende tava kulu mounyuni ou tau pangelwa kuSatana Ondiaboli nosho yo omahongo aye opanhu. (1 Joh. 5:19) Ohatu tuwa omukumo ngeenge ovanyasha tava yandje omatyekosha pokwoongala, tava kufa ombinga moukalele notava popile nouladi eitavelo lavo. Ovanyasha, otamu dana onghandangala ya fimana meongalo laJehova! — Eps. 8:2.

¹² Ashike ovamwatate novamwameme vamwe, oshidjuu kuvo okudimina kutya ove na onghandangala ya fimana oyo tava dana meongalo. Mbela oshike tashi ka kwafela keshe umwe pauhandimwe a mone kutya oku na  onghandangala oyo ta dana meongalo? Natu ke shi taleni.

13-14. Omolwashike tashi dulika vamwe ve udite kutya kave na onghandangala oyo tava dana meongalo?

¹³ Diladila koshilihongomwa oshitivali osho hatu lihongo mefaneko laPaulus. Okwa yukifa elitulemo koupyakadi oo ovanhu vahapu ve na kunena; oshidjuu kuvo okwiitavela kutya ove na onghandangala ya fimana oyo tava dana meongalo. Paulus okwa ti: “Ngeenge omhadi oya ti, ‘Molwaashi ame kandi fi eke, kandi fi oshitukulwa sholutu,’ osho itashi i ningifa i kale ihe fi oshitukulwa sholutu. Ngeenge okutwi okwa ti, ‘Molwaashi ame kandi fi eisho, kandi fi oshitukulwa sholutu,’ osho itashi ku ningifa ku kale kuhe fi oshitukulwa sholutu.” (1 Kor. 12:15, 16) Paulus okwa li a hala okutya ngahelipi?

¹⁴ Ngeenge owe liyelekanifa navamwe meongalo, ito ka mona onghandangala oyo to dana meongalo. Vamwe meongalo otashi dulika ve na eeshali dokuhonga, ve shii nawa okuunganeka nove na owino wokulifa oufita waKalunga. Ove otashi dulika u kale u wete kutya ku na eeshali da tya ngaho. Osho otashi ulike kutya ou na elininipiko nondjele. (Fil. 2:3) Ashike kala wa lungama. Ngeenge oho liyelekanifa naavo ve na owino wa tongomana otashi ke ku nyemateka. Ngaashi Paulus a popya, otashi dulika u diladile kutya ito dana onghandangala yasha meongalo. Oshike tashi dulu oku ku kwafela opo u ungaunge nomaliudo a tya ngaho?

15. Metwokumwe 1 Ovakorinto 12:4-11, oshike tu na okudimbuluka shi na sha neeshali odo tashi dulika tu na?

¹⁵ Diladila koushili ou: Jehova okwa li a pa Ovakriste vamwe vomefelemudo lotete eeshali pashikumwifilonga okupitila momhepo iyapuki, ashike Ovakriste aveshe kava li va pewa eeshali da faafana. (Lesha 1 Ovakorinto 12:4-11.) Jehova okwa li e ve lineekelela eeshali da yoolokafana she likolelela kokudula kwavo, ashike Omukriste keshe okwa li ta dana onghandangala ya fimana. Kunena, inatu pewa eeshali pashikumwifilonga okupitila  momhepo iyapuki. Ashike efinamhango otali longo nokufye. Atusheni katu na owino wa faafana, ashike atusheni otu na ondilo momesho aJehova.

16. Omayele omuyapostoli Paulus elipi twa pumbwa okutula moilonga?

¹⁶ Ponhele yokuliyelekanifa nOvakriste vakwetu, otwa pumbwa okutula moilonga omayele omuyapostoli Paulus a nwefwa mo oo taa ti: “Keshe umwe na konakone oilonga yaye mwene kutya oya tya ngahelipi opo e i litangele, ndele hakuliyelekanifa navamwe.” — Gal. 6:4.

17. Ohatu ka mona ouwa ulipi ngeenge otwa tula moilonga omayele omuyapostoli Paulus?

¹⁷ Ngeenge otwa tula moilonga omayele omuyapostoli Paulus nokukonakona eenghatu detu, otashi dulika tu ka mone kutya otu na eeshali da tongomana nosho yo okudula kwa yoolokafana. Pashihopaenenwa, omukulunhuongalo otashi dulika ehe na owino wokuhonga ngeenge e li komutune, ndele oha pondola moilonga yokuninga ovanhu ovahongwa. Ile otashi dulika omukulunhuongalo ihe liunganeke nawa ngaashi ovakulunhuongalo vakwao meongalo. Ashike otashi dulika e li omukulunhuongalo omunahole, novaudifi ohava kala ve mu mangulukila oku mu pula omayele opaMishangwa. Ile otashi dulika e li oshihopaenenwa shiwa mokuyakula ovaenda. (Heb. 13:2, 16) Ngeenge otu shii eeshali odo tu na, ohatu ka kala twa hafa molwaashi otu shii onghandangala oyo hatu dana meongalo. Itatu ka kala yo twa twila ondubo ovamwatate ovo ve na eeshali da yooloka ko kwaado detu.

18. Ongahelipi hatu dulu okuxwepopaleka okudula kwetu?

¹⁸ Kashi na nee mbudi kutya ohatu dana onghandangala ilipi meongalo, atushe otwa hala okuxwepopaleka oilonga yetu nokudula kwetu. Jehova oha yandje edeulo la denga mbada okupitila mehangano laye opo e tu kwafele tu xwepopale. Pashihopaenenwa, pokwoongala kwomokati koshivike ohatu pewa omalombwelo e na sha nanghee hatu dulu okukala hatu pondola moukalele. Mbela ohatu mono ngoo ouwa pauyadi medeulo olo?

19. Ongahelipi to dulu okulitulila po elalakano lokuya kOfikola yOvaudifi vOuhamba?

¹⁹ Edeulo limwe la denga mbada olo tu na Ofikola yOvaudifi vOuhamba. Ovo tava dulu okuya kofikola oyo ovamwatate novamwameme ovo ve li moilonga yefimbo li yadi, nove li pokati komido 23-65. Otashi dulika u diladile kutya ito dulu okuhanga elalakano la tya ngaho. Ponhele yokuyandja elitulemo kwaasho tashi ku imbi okuya kofikola oyo, yandja elitulemo kokukala wa halelela okuya ko. Opo nee ninga omhangela oyo tai ku kwafele u kale wa wana okuya kofikola oyo. Kekwafo laJehova nosho yo koilonga yoye youdiinini oto ka dula okuninga osho wa li u wete shidjuu okuninga.

20. Oshike hatu lihongo mOvaroma 12:6-8?

²⁰ Oshilihongomwa oshititatu osho hatu lihongo mefaneko laPaulus otashi hangwa mOvaroma 12:6-8. (Lesha.) Paulus okwa popya natango kutya ovanhu ove na eeshali da yoolokafana. Ashike pomhito opo okwa divilika kutya keshe umwe na longife oshali yaye opo a tunge nokupameka eongalo.

21-22. Oshike hatu lihongo kuRobert naFelice?

²¹ Natu ka taleni koshihopaenenwa shomumwatate Robert. Konima eshi a kala ta longele koshilongo shimwe, okwa li a tuminwa koBetel yokoshilongo shavo. Nonande ovamwatate ova li ve mu shilipaleka kutya ina nyona sha, okwa ti: “Oule weemwedi dihapu onda kala nda nyemata molwaashi onda li handi diladila kutya onda dopa okuwanifa po oshinakuwanifwa shange. Omafimbo amwe onda li handi kala nda hala okufiya po oilonga yaBetel.”  Oshike sha li she mu kwafela a kale vali a hafa? Omukulunhuongalo umwe okwa li e mu lombwela kutya Jehova ohe tu deula moinakuwanifwa oyo tu na opo tu ka dule okulonga shihapu moinakuwanifwa oyo te ke tu pa monakwiiwa. Robert okwa li a mona kutya okwa pumbwa okuyandja elitulemo kwaasho ta ningi paife ponhele yokuyandja elitulemo koshinakuwanifwa shikulu.

²² Omumwatate Felice Episcopo naye okwa li a taalela eshongo la faafana. Ye nomukulukadi waye ova li va ya kOfikola yaGilead mo 1956, nova li tava longo moilonga youpashukilishikandjo moBolivia. Mo 1964 ova li va mona okaana. Felice okwa ti: “Osha li eshongo kufye okufiya po oshinakuwanifwa osho twa li tu hole. Oule wodula onda kala nda teka omukumo nonda nyemata. Ashike kekwafo laJehova, onda li nda lundulula etaleko lange nokuyandja elitulemo koshinakuwanifwa shange shipe ndi li omudali.” Mbela ou udite ngaashi Robert ile Felice? Mbela oho kala wa teka omukumo molwaashi uhe na vali oshinakuwanifwa sha faafana naasho wa li u na nale? Ngeenge osho, oto ka kala wa hafa ngeenge owa kala to yandje elitulemo kwaasho to dulu okuninga paife mokulongela Jehova nokuyakula ovamwaxo. Kala we lipyakidila nokulongifa oshali yoye nosho yo okudula kwoye mokukwafela vamwe, noto ka kala wa hafa eshi to tungu eongalo.

23. Otwa pumbwa okulongifa efimbo letu mokuninga shike, noshike hatu ka kundafana moshitukulwa tashi shikula ko?

²³ Keshe umwe womufye oku na ondilo momesho aJehova. Kalunga okwa hala tu kale oilyo youkwaneumbo waye. Ngeenge otwa kala hatu dilonga kwaasho hatu dulu okuninga opo tu pameke ovamwatate novamwameme, nokulonga noudiinini opo tu wanife po oshinakuwanifwa osho, itatu ka kala tu udite tuhe li oshitukulwa sheongalo. Mbela ongahelipi shi na sha nonghedi omo hatu tale ko vamwe meongalo? Ongahelipi hatu dulu okuulika kutya otu va hole notwe va fimaneka? Moshitukulwa tashi shikula ko, ohatu ka konakona kombinga yoshikundafanwa osho sha fimana.