OSHITUKULWA SHOKUKONAKONWA 33
Jehova ota pashukile oshiwana shaye
“Eisho lOmwene otali taalele kwaava have mu tila.” — EPS. 33:18.
EIMBILO 4 ‘Jehova oye Omufita wange’
EXUKU LOSHITUKULWA *
1. Omolwashike Jesus a li a pula Jehova a pashukile ovashikuli vaye?
MOUFIKU oo wa tetekela efyo laye, Jesus okwa li a pula Xe womeulu oshinima she likalekelwa. Okwa li a pula Jehova a pashukile ovashikuli vaye. (Joh. 17:15, 20) Oshoshili kutya Jehova oha pashukile alushe oshiwana shaye, he shi file oshisho nohe shi amene. Ashike nande ongaho, Jesus okwa li e shii kutya ovashikuli vaye otava ka taalela omapataneko a kwata moiti okudilila kuSatana. Okwa li yo e shii kutya ova pumbwa ekwafo laJehova, opo va dule okufinda omaponokelo a kwata moiti Ondiaboli.
2. Metwokumwe nEpsalme 33:18-20, omolwashike tuhe na okukala twa tila ngeenge twa taalela omaupyakadi?
2 Ounyuni ou tau pangelwa kuSatana owa etela Ovakriste vashili omaupyakadi mahapu kunena. Otwa taalela omaupyakadi oo taa dulu oku tu teya omukumo, nokuyeleka nokuli oudiinini wetu kuJehova. Ashike ngaashi hatu ke shi mona moshitukulwa eshi, inatu pumbwa okukala twa tila. Jehova ote tu pashukile, oku wete omaupyakadi oo hatu piti muo, nokwe lilongekida alushe oku tu kwafela tu pite mo. Natu ka kundafaneni oihopaenenwa ivali yopaMbiibeli oyo tai ulike nghee Jehova ha pashukile ovo “have mu tila.” — Lesha Epsalme 33:18-20.
NGEENGE TU UDITE OWIKE
3. Onaini tashi dulika tu kale tu udite owike?
3 Nonande otu li oshitukulwa shoukwaneumbo munene wovamwatate novamwameme, omafimbo amwe otashi dulika tu kale tu udite owike. Pashihopaenenwa, ovanyasha otashi dulika va kale ve udite owike, ngeenge tava popile eitavelo lavo komesho yovanafikola vomongudu yavo, ile ngeenge tava tembukile keongalo limwe lipe. Vamwe vomufye otashi dulika twa nyika oluhodi, ile hatu kondjo netekomukumo, hatu diladila kutya ohatu ungaunga nomaliudo oo kufye vene. Otashi dulika tu ongaonge okulombwela vamwe nghee tu udite, molwaashi twa limbililwa kutya otashi dulika vehe ke tu ude ko. Omafimbo amwe, otashi dulika nokuli tu diladile kutya kape na oo e na ko nasha nafye shili. Okukala tu udite owike, kashi na nee mbudi kutya onetomheno lilipi, otashi dulu oku tu ningifa tu kale tu udite tuhe na oshilonga noku tu etela oshisho. Jehova ina hala tu kale tu udite ngaho. Omolwashike hatu tile ngaho?
4. Omolwashike omuprofeti Elia a popya a ti: “Aame andike nda xupa po”?
4 Natu ka kundafaneni oshihopaenenwa shomulumenhu omudiinini Elia. Elia okwa li a faduka po oule womafiku 40, opo a xupife omwenyo waye, molwaashi Isabel okwa li a tokola oku mu dipaa. (1 Eeh. 19:1-9) Xuuninwa, eshi a li mekololo oye aeke okwa lombwela Jehova a ti: “Aame andike [omuprofeti] nda xupa po.” (1 Eeh. 19:10) Moshilongo omwa li ovaprofeti vakwao. Obadja okwa li a dula okuxupifa ovaprofeti 100 momake omudipai Isabel. (1 Eeh. 18:7, 13) Ndele omolwashike Elia a li e udite owike? Mbela okwa li ta diladila kutya ovaprofeti, ovo Obadja a xupifa, aveshe ova fya? Mbela otashi dulika a li e udite owike, molwaashi paha li oo e mu waimina mokulongela Jehova, nonande Jehova okwa li a ulika kutya oye Kalunga kashili kOmhunda yaKarmel? Mbela otashi dulika a li e udite kutya kape na oo e shii kutya oku li moupyakadi u fike peni? Ile okwa li te lipula kutya kape na oo e na ko nasha naye? Ehokololo inali yelifa filufilu nghee Elia a li e udite. Ashike otu shii kutya Jehova okwa li e udite ko kutya omolwashike Elia a li e udite owike, nonokutya okwa li e shii nghee e na oku mu kwafela.
Oshilihongomwa shehekeleko shilipi hatu lihongo konghedi omo Jehova a li a kwafela Elia, ngeenge tu udite owike? (Tala okatendo 5-6
5. Ongahelipi Jehova a li a shilipaleka Elia kutya ka li oye aeke?
5 Jehova okwa li a kwafela Elia meenghedi dihapu. Okwa li a ladipika Elia a popye. Okwa pula Elia lwoikando ivali, a ti: “Oshike to ningi apa?” (1 Eeh. 19:9, 13) Pomhito keshe, Jehova okwa li a pwilikina eshi Elia te mu mbubulile omutima waye. Jehova okwa li a nyamukula Elia moku mu ulikila kutya oku li pamwe naye noku na eenghono dinenenene. Okwa li yo a shilipaleka Elia kutya ope na ovaitaveli vakwao vahapu. (1 Eeh. 19:11, 12, 18) Osha yela kutya Elia okwa li e udite a pepelelwa konima eshi a mbubulila Jehova omutima waye, naashi Jehova e mu nyamukula. Jehova okwa li a pa Elia oinakuwanifwa yonhumba ya fimana. Okwa li e mu pula a vaeke Hasael a ninge ohamba yaSiria, Jehu a ninge ohamba yaIsrael nosho yo Elisa a ninge omuprofeti. (1 Eeh. 19:15, 16) Jehova okwa li a kwafela Elia a yandje elitulemo koinima ya fimana, eshi e mu pa oinakuwanifwa oyo. Kalunga okwa li yo e mu pa omulongi pamwe naye, Elisa. Ongahelipi to dulu okumona ekwafo kuJehova, ngeenge u udite owike?
6. Oshike to dulu okwiilikana kombinga yasho, ngeenge u udite owike? (Epsalme 62:8)
6 Jehova ote ku shivi u ilikane kuye. Oku shii ashishe osho to lididimikile, nokwe ku shilipaleka kutya ota ka pwilikina komailikano oye efimbo keshe. (1 Tes. 5:17) Oha hafele okupwilikina kovalongeli vaye. (Omayel. 15:8) Oshike to dulu okwiilikana kombinga yasho, ngeenge ou udite owike? Mbubulila Jehova omutima woye, ngaashi Elia a li a ninga. (Lesha Epsalme 62:8.) Mu lombwela oisho yoye nanghee ho kala u udite. Pula Jehova e ku kwafele u dule okuungaunga nowike, ile noluhodi. Pashihopaenenwa, ngeenge oho kala u udite owike nowa tila, eshi to yandje oundombwedi kofikola, pula Jehova e ku pe ouladi oo wa pumbwa, opo u dule okupopya. Oto dulu yo oku mu pula e ku pe ounongo, opo u dule okuyelifa eitavelo loye nelungi. (Luk. 21:14, 15) Ngeenge oto kondjo nomaliudo mai, pula Jehova e ku kwafele u popye nOvakriste va pyokoka shi na sha nao. Oto dulu okupula Jehova a kwafele oo to ka kundafana naye a ude ko onghalo yoye. Mbubulila Jehova omutima woye; mona nghee ta nyamukula omailikano oye nokutambula ko ekwafo lavamwe. Ngeenge owa ningi ngaho, ito ka kala vali u udite owike.
Mbela oho kongo ngoo eenghedi u tamunune mo oukalele woye noku di lombwela vamwe? (Tala okatendo 7)
7. Oshike hatu lihongo moshihopaenenwa shaMauricio?
7 Jehova okwe tu pa atusheni oilonga tai ti sha. Oto dulu okukala noushili kutya oku wete nokwa lenga eenghendabala adishe odo to ningi, opo u wanife po oinakuwanifwa yoye meongalo nomoukalele. (Eps. 110:3) Ongahelipi okukala we lipyakidila moshilonga osho taku ku kwafele, ngeenge u udite owike? Natu ka taleni koshihopaenenwa shomumwatate omunyasha wedina Mauricio. * Diva konima eshi Mauricio a ninginifwa, umwe womookaume kaye kopofingo okwa li a hovela okufiya po oshili. Mauricio okwa ti: “Osha li sha teya nge omukumo, eshi nda mona ta fiye po Jehova. Onda li handi lipula ngeenge ohandi ka wanifa po ngoo eudaneko lange lokulongela Jehova nokukala oshitukulwa shoukwaneumbo waye. Onda li ndi udite owike nonda li handi diladila kutya kape na oo ta dulu okuuda ko onghalo yange.” Oshike sha kwafela Mauricio? Okwa ti: “Onda tamununa mo oukalele wange. Osho osha kwafela nge ndiha kale handi yandje elitulemo unene kwaame mwene nokomaliudo ange mai. Onda hafa nokandi udite vali owike, eshi handi longo pamwe navakwetu moukalele.” Nonande paife ihatu dulu vali okuudifa komudidi pamwe novaitaveli vakwetu, ohashi tu pameke eshi hatu kufa ombinga pamwe navo mokuyandja oundombwedi hatu longifa eenhumwafo neengodi. Oshike vali sha kwafela Mauricio? Okwa weda ko a ti: “Ohandi kala yo nde lipyakidila noinima yeongalo. Ohandi longo noudiinini, opo ndi lilongekidile oitukulwa yovanafikola noku ke i yandja pokwoongala. Oinakuwanifwa oyo oya ningifa nge ndi kale ndi udite nda hokiwa kuJehova nokovanhu vakwetu.”
NGEENGE TWA WILILWA PO KOMAYELEKO A KWATA MOITI
8. Ongahelipi omayeleko a kwata moiti taa dulu oku tu kuma?
8 Momafiku aa axuuninwa, otwa teelela okushakeneka omayeleko efimbo keshe. (2 Tim. 3:1) Ashike otashi dulika shi tu kumwife, ngeenge otwa shakeneke eyeleko lonhumba. Otashi dulika tu shakeneke oupyakadi wopashimaliwa, ouyahame wa kwata moiti, ile tu filwe umwe oo tu hole. Peemhito da tya ngaho, otashi dulika tu kale twa nyika oluhodi notwa wililwa po neenghono, unene tuu ngeenge omaupyakadi otae lishikulile po, ile nokuli twe a shakeneka pefimbo limwe alike. Ashike dimbuluka kutya Jehova ote tu pashukile alushe, nokekwafo laye ohatu dulu okutaalela eyeleko keshe nomupondo.
9. Hokolola omayeleko amwe oo Job a li a taalela.
9 Natu ka kundafaneni nghee Jehova a li a kwafela omulumenhu omudiinini Job. Job okwa li a shakeneka omayeleko a kwata moiti moule ashike wefimbo lixupi. Okwa li a lombwelwa kutya oimuna yaye aishe oya dipawa, ile ya vakwa po, ovapiya vaye novana vaye ova dipawa mefiku ashike limwe. (Job 1:13-19) Diva konima yaasho, ofimbo a li moluhodi linene, Job okwa li a hangwa kouyahame wa kwata moiti. (Job 2:7) Onghalo yaJob kaya li tai nuwa omeva, nokwa lila, a ti: “Nda kuta! Inandi hala okukala nomwenyo fiyo alushe.” — Job 7:16.
Opo Jehova a shilipaleke Job shi na sha nefiloshisho laYe lopahole, okwe mu lombwela kombinga yeenghedi dihapu omo ha file oshisho eshito laYe (Tala okatendo 10)
10. Ongahelipi Jehova a li a pa Job ashishe osho a li a pumbwa, opo e lididimikile omayeleko? (Tala efano kombada yoshifo.)
10 Jehova okwa li ta pashukile Job. Molwaashi Jehova okwa li e hole Job, okwa li e mu pa keshe osho a pumbwa, opo e lididimikile omayeleko nomupondo. Jehova okwa li a popya naJob, te mu dimbulukifa shi na sha nounongo waYe uhe fi kuyelekwa nosho yo nefiloshisho lopahole olo ha pe oishitwa yaye. Okwe mu lombwela yo kombinga yoinamwenyo ihapu ikumwifi. (Job 38:1, 2; 39:9, 13, 19, 27; 40:15; 41:1, 2) Jehova okwa li yo a longifa omulumenhu omudiinini omunyasha wedina Elihu a pameke nokuhekeleka Job. Elihu okwa li a shilipaleka Job kutya Jehova oha pe alushe ondjabi ovalongeli vaye, omolwelididimiko lavo. Ashike Jehova okwa li yo e linyengifa Elihu a pe Job omayele opahole. Elihu okwa li a kwafela Job a efe po okudiladila kombinga yaye mwene moku mu dimbulukifa kutya otu vanininini okuyelekanifwa naJehova, oo e li Omushiti weshito alishe. (Job 37:14) Jehova okwa li yo a pa Job oshinakuwanifwa shokwiilikanena ookaume kaye vatatu, ovo va nyona. (Job 42:8-10) Jehova ohe tu yambidida ngahelipi kunena, ngeenge twa taalela omayeleko?
11. Ombiibeli ohai tu pe ehekeleko lilipi, ngeenge twa taalela omayeleko?
11 Jehova iha popi nafye odikilila, ngaashi a li e shi ningila Job, ashike oha popi nafye okupitila mEendjovo daye, Ombiibeli. (Rom. 15:4) Ohe tu hekeleke moku tu pa eteelelo li na sha nonakwiiwa. Natu ka kundafaneni oitwa inini okudja mOmbiibeli oyo tai dulu oku tu hekeleka, ngeenge twa taalela omayeleko. Jehova okwe tu shilipaleka mOmishangwa kutya kape na nande osha, mwa kwatelwa nomayeleko a kwata moiti, tashi “dulu oku tu tukula mohole [yaye].” (Rom. 8:38, 39) Okwe tu shilipaleka yo kutya “oku li popepi naaveshe, have mu ifana” meilikano. (Eps. 145:18) Jehova okwe tu lombwela kutya ngeenge otwe lineekela muye, ohatu ke lididimikila eyeleko keshe nokukala twa hafa, nokuli nonande ohatu mono oixuna. (1 Kor. 10:13; Jak. 1:2, 12) Eendjovo daKalunga ode tu dimbulukifa yo kutya omayeleko etu oopakafimbo okuyelekanifa nondjabi tai kalele oyo e tu udanekela. (2 Kor. 4:16-18) Jehova okwe tu shilipaleka kutya ota ka hanauna po omweetifi womaupyakadi etu aeshe, Satana Ondiaboli, nosho yo ovo have mu hopaenene mokulonga oukolokoshi. (Eps. 37:10) Mbela owa koneka momutwe Eendjovo donhumba dehekeleko, odo tadi dulu oku ku kwafela u lididimikile omayeleko monakwiiwa?
12. Jehova okwa teelela tu ninge shike, ngeenge otwa hala okumona ouwa pauyadi mEendjovo daye?
12 Jehova okwa teelela tu litulile po efimbo lokukonakona Ombiibeli pandjikilile nokudilonga moule kwaasho twa lesha. Ngeenge otwa tula moilonga osho hatu lihongo, eitavelo letu otali ka pamenena nohatu ka ehena popepi elela naTate wetu womeulu. Nokungaho, ohatu ka kala twa pama, opo tu dule okulididimikila omayeleko. Jehova oha yandje yo omhepo iyapuki kwaavo ve lineekela mEendjovo daye. Omhepo ya tya ngaho, otai dulu oku tu pa “eenghono di dule dopaushitwe,” opo tu lididimikile eyeleko keshe. — 2 Kor. 4:7-10.
13. Ongahelipi eendja dopamhepo, odo “omupiya omudiinini nomunaendunge” ha yandje, tadi dulu oku tu kwafela tu lididimikile omayeleko?
13 Kekwafo laJehova, “omupiya omudiinini nomunaendunge” oha yandje eendja dihapu okupitila moishangomwa, mouvidio nosho yo momaimbilo. Noinima oyo otai dulu oku tu kwafela tu pameke eitavelo letu notu kale oupafi pamhepo. (Mat. 24:45) Otwa pumbwa okulongifa nawa omafiloshisho a tya ngaho. Omumwameme wokoUnited States okwa ulika olupandu li na sha neendja adishe odo dopamhepo. Okwa ti: “Momukokomoko womido 40 odo nda kala handi longele Jehova, oudiinini wange owa kala nokuyelekwa efimbo nefimbo.” Okwa li a shakeneka omayeleko a kwata moiti. Xekulu okwa fya a lyatwa kotuwa tai shingwa komushingi a kolwa. Ovadali vaye ova fya komukifi omudipai, nokwa li a kwatwa kokankela oikando aishe ivali. Oshike she mu kwafela e lididimike? Okwa popya a ti: “Jehova okwa kala nokufila nge oshisho. Eendja dopamhepo, odo ha yandje okupitila momupiya omudiinini nomunaendunge, oda kwafela nge ndi lididimike. Omolweendja da tya ngaho, ohandi dulu okukala ndi udite ngaashi Job, oo a popya a ti: ‘Fiyo handi ka fuda mo omufudo wange, itandi ekeleshi ouyuki wange!’” — Job 27:5.
Ongahelipi hatu dulu okukala ekwafo kuvamwe meongalo? (Tala okatendo 14)
14. Jehova oha longifa ngahelipi ovaitaveli vakwetu ve tu yambidide, ngeenge twa taalela omayeleko? (1 Ovatessalonika 4:9)
14 Jehova okwa deula ovapiya vaye va kale hava ulikilafana ohole nokuhekelekafana pomafimbo oudjuu. (2 Kor. 1:3, 4; lesha 1 Ovatessalonika 4:9.) Ngaashi Elihu, ovamwatate novamwameme ova halelela oku tu kwafela, opo tu twikile okukala ovadiinini, ngeenge twa taalela eenghalo didjuu. (Oil. 14:22) Pashihopaenenwa, diladila nghee eongalo loDiane le mu twa omukumo nole mu kwafela a kale a pama pamhepo konima eshi omushamane waye a li a mona oixuna komukifi wa kwata moiti. Okwa ti: “Osha li shidjuu. Ashike otwa li tu udite nghee Jehova a li te tu pameke noku tu yambidida peemwedi odo da li didjuu. Eongalo letu ola li la ninga oinima ihapu, opo li tu yambidide. Ova li have tu talele po, have tu dengele eengodi noku tu papatela, oinima oyo twa li twa pumbwa opo tu pule komesho. Molwaashi nghi shii ku shinga, ovamwatate novamwameme ohava shilipaleke kutya onda etwa kokwoongala noda ya moukalele.” Kashi fi tuu enangekonoupuna okukala oshitukulwa shoukwaneumbo wa tya ngaho wopamhepo unahole!
PANDULA JEHOVA OMOLWEFILOSHISHO LAYE LOPAHOLE
15. Omolwashike hatu dulu okukala twa tomhwa kutya ohatu dulu okulididimikila omayeleko nomupondo?
15 Atusheni ohatu hangwa keyeleko lonhumba. Ashike ngaashi twe lihonga nale, itatu ka taalela eyeleko ofye atuke. Ngaashi xe omunahole, Jehova ohe tu pashukile alushe. Oku li alushe pamwe nafye, e lilongekida oku tu pwilikina nokwa halelela oku tu yambidida. (Jes. 43:2) Otwa tomhwa kutya ohatu dulu okulididimikila omaupyakadi, molwaashi ohe tu pe ashishe osho twa pumbwa nehalo liwa opo tu lididimike. Okwe tu pa oshali yeilikano, Ombiibeli, eendja dopamhepo da henena nosho yo ovamwatate novamwameme ovanahole, ve tu kwafele pomafimbo madjuu.
16. Ongahelipi hatu dulu okukala koshi yepashukilo laJehova lopahole?
16 Otwa hafa neenghono, eshi tu na Tate wetu womeulu he tu pashukile. Ombiibeli oya ti: “Omutima wetu otau hafele muye.” (Eps. 33:21) Ohatu dulu okuulikila Jehova kutya otwa pandula efiloshisho laye lopahole mokulongifa pauyadi omafiloshisho aye aeshe oku tu kwafela. Otwa pumbwa yo okulonga ko ombinga yetu, opo tu kale koshi yefiloshisho laKalunga. Noitya imwe, ngeenge otwa twikile okuninga ngaashi hatu dulu tu dulike kuJehova nokuninga osho sha yuka momesho aye, ote ke tu pashukila fiyo alushe. — 1 Pet. 3:12.
EIMBILO 30 Tate, Kalunga kange nakaume kange
^ Otwa pumbwa ekwafo laJehova, opo tu finde omaupyakadi oo twa taalela kunena. Oshitukulwa eshi otashi tu shilipaleke kutya Jehova ota pashukile oshiwana shaye. Oku shii omaupyakadi aeshe oo keshe umwe womufye pauhandimwe ta piti muo, nohe tu pe ekwafo olo twa pumbwa, opo tu a finde.
^ Omadina oo hao ovanhu ovo lelalela.