1. Oshike tashi dulu oku tu kwafela tu lihonge okukala hatu hafele okukonakona omaxunganeko Ombiibeli?

 OMUMWATATE omunyasha wedina Ben okwa ti: “Ondi hole okukonakona omaxunganeko Ombiibeli. Mbela oto tu kumwe naye? Ile oho kala u udite kutya omaxunganeko Ombiibeli omadjuu okuudiwa ko? Otashi dulika nokuli u kale u udite kutya okukonakona omaxunganeko Ombiibeli okufifa oudja. Kakele kaasho, ngeenge owe lihongo shihapu kutya omolwashike Jehova a shangifa omaxunganeko mEendjovo daye, otashi dulika u ka lundulule etaleko loye.

2. Oshike hatu ka kundafana moshitukulwa eshi?

² Moshitukulwa eshi, ohatu ka kundafana kutya omolwashike tu na okulihonga kombinga yomaxunganeko Ombiibeli, nonokutya ongahelipi hatu dulu oku a uda ko. Opo nee ohatu ka kundafana omaxunganeko avali, oo e li membo laDaniel, tu mone nghee tashi tu kwafele kunena, ngeenge otwe a udu ko.

3. Oshike twa pumbwa okuninga, ngeenge otwa hala okuuda ko omaxunganeko Ombiibeli?

³ Otwa pumbwa okupula ekwafo, ngeenge otwa hala okuuda ko omaxunganeko Ombiibeli. Natu ka taleni kefaneko tali shikula. Natu tye nee oto talele po onhele yonhumba oyo uhe shii nale, ashike kaume koye, oo tamu ende pamwe naye, oku shii oshitukulwa osho nawanawa. Oku shii opo mu li nosho yo kutya ondjila keshe oya finda peni. Nopehe na omalimbililo, oto ka kala wa tunhukwa, eshi kaume koye a dimina okuya pamwe naave. Sha faafana, Jehova oku shii kutya otu li  peni momukakena wefimbo nosho yo kutya oshike shi li komesho. Onghee opo tu ude ko omaxunganeko Ombiibeli, otwa pumbwa okupula ekwafo kuJehova nelininipiko. — Dan. 2:28; 2 Pet. 1:19, 20.

4. Omolwashike Jehova a shangifa omaxunganeko oo e li mEendjovo daye? (Jeremia 29:11) (Tala yo efano.)

⁴ Ngaashi omudali keshe muwa, Jehova okwa hala ovana vaye va kale ve na onakwiiwa itunhula. (Lesha Jeremia 29:11.) Mepingafano nomudali keshe wopanhu, Jehova ota dulu oku tu lombwela osho tashi ka ningwa monakwiiwa noha kala alushe e li mondjila. Okwa shangifa omaxunganeko mEendjovo daye, opo tu dule okushiiva kombinga yoiningwanima ya fimana, ofimbo inai ningwa. (Jes. 46:10) Omaxunganeko Ombiibeli oku li eeshali dopahole da dja kuTate yetu womeulu. Ndele ongahelipi to dulu okukala noushili kutya osho Ombiibeli ya xunganeka otashi ka wanifwa shili?

5. Oshike ovanyasha tava dulu okulihonga moshimoniwa shaMax?

⁵ Ovanyasha vetu luhapu ohava kala va dingililwa kofikola kwaavo va lenga ashike kanini Ombiibeli, ile inave i lenga nandenande. Osho hava popi nosho yo elihumbato lavo otai dulu okukuna omalimbililo momunyasha oo e li Ondombwedi. Didilika oshimoniwa shomumwatate wedina Max. Okwa ti: “Eshi nda li omunyasha, onda li nda hovela okukala nda limbililwa, ngeenge ovadali vange ove li ngoo melongelokalunga lashili, nongeenge Ombiibeli oya nwefwa mo ngoo shili kuKalunga.” Ovadali vaye ova li va ninga po shike? Okwa ti: “Ova li va ngungumana, nonande nokuli onda li ndi shii kutya ova limbililwa.” Ovadali vaMax ova li va nyamukula omapulo aye tava longifa Ombiibeli. Max naye okwa li a ninga po sha. Okwa ti: “Onda li nda konakona omaxunganeko Ombiibeli kwaame mwene, nonda li nda kundafana novanyasha vakwetu osho nde lihonga.” Osha li sha eta oidjemo ilipi? Max okwa ti: “Konima yaasho, onda li nda tomhwa kutya Ombiibeli oya nwefwa mo kuKalunga.”

6. Oshike wa pumbwa okuninga, ngeenge ou na omalimbililo, nomolwashike?

⁶ Ngaashi Max, ngeenge owa hovele okukala wa limbililwa kutya Ombiibeli oi li paushili, ino pumbwa okukala u udite ondjo. Ashike owa pumbwa okuninga po sha. Omalimbililo okwa fa olushu. Ngeenge olushu ole lipwililikilwa, otali dulu okunyonauna po kanini nakanini oshinima shonhumba shi na ongushu. Opo u kufe po omalimbililo, oo taa dulu okunyona po eitavelo loye, owa pumbwa okulipula kutya, ‘Mbela onda itavela ngoo osho Ombiibeli ya popya shi na sha nonakwiiwa?’ Ngeenge ku na oushili, owa pumbwa okukonakona omaxunganeko Ombiibeli oo a wanifwa nale. Ongahelipi to dulu okuninga ngaho?

7. Daniel okwa tula po oshihopaenenwa shilipi shi na sha nanghee hatu dulu okukonakona omaxunganeko? (Daniel 12:10) (Tala yo efano.)

⁷ Daniel okwa tula po oshihopaenenwa shiwa shi na sha nanghee hatu dulu okukonakona omaxunganeko. Okwa li ha konakona omaxunganeko nelinyengotomheno la yuka lokushiiva oshili. Daniel okwa li yo omulininipiki, e shii kutya Jehova oha yandje eudeko kwaavo ve mu shii nohava kala metwokumwe nomifikamhango daye da koshoka. (Dan. 2:27, 28; lesha Daniel 12:10.) Daniel okwa ulika kutya okwa li omulininipiki, molwaashi okwa li e lineekela ekwafo laJehova. (Dan. 2:18) Daniel okwa li yo ha konakona noukeka. Okwa li ha ningi omapekaapeko mOmishangwa da nwefwa mo odo a li e na. (Jer. 25:11, 12; Dan. 9:2) Ongahelipi hatu dulu okuhopaenena Daniel?

8. Omolwashike ovanhu vamwe va anya okwiitavela kutya omaxunganeko Ombiibeli otaa wanifwa shili, noshike tu na okuninga?

 ⁸ Konakona omalinyengotomheno oye. Mbela oho konakona ngoo omaxunganeko Ombiibeli nelalakano lokushiiva oshili? Ngeenge osho, Jehova ote ke ku kwafela. (Joh. 4:23, 24; 14:16, 17) Ovanhu otashi dulika va konakona omaxunganeko nelinyengotomheno vali limwe lilipi? Ovanhu vamwe otashi dulika va konakone omaxunganeko, opo va mone oumbangi oo tau ulike kutya Ombiibeli inai nwefwa mo kuKalunga. Kungaho, otashi dulika va kale ve udite kutya otava dulu okulitulila po omifikamhango davo vene daasho shi li mondjila nosho yo osho sha puka nokukala metwokumwe nado. Kakele kaasho, otwa pumbwa okukonakona tu na elinyengotomheno la yuka. Shikwao vali, otwa pumbwa oukwatya wa fimana, opo tu ude ko omaxunganeko Ombiibeli.

9. Oukwatya ulipi twa pumbwa, opo tu ude ko omaxunganeko Ombiibeli? Shi yelifa.

⁹ Kala omulininipiki. Jehova okwa udaneka okukwafela ovalininipiki. (Jak. 4:6) Onghee otwa pumbwa okwiilikana e tu kwafele tu ude ko omaxunganeko Ombiibeli. Ngeenge otu li ovalininipiki, ohatu ka tambula ko yo ekwafo olo hali di komupiya omudiinini nomunaendunge, oo Jehova ta longifa, opo e tu pe eendja dopamhepo pefimbo la wapala. (Luk. 12:42) Jehova oKalunga kelandulafano. Onghee osha yuka, eshi ta longifa ashike oupitilo umwe, opo e tu kwafele tu ude ko oshili, oyo tai hangwa mEendjovo daye. — 1 Kor. 14:33; Ef. 4:4-6.

10. Oshike hatu lihongo moshimoniwa shaEsther?

¹⁰ Konakona noukeka. Konga exunganeko olo u na ohokwe mulo nokuninga omapekaapeko kombinga yalo. Osho osho omumwameme wedina Esther a li a ninga. Okwa li e na ohokwe momaxunganeko oo a popya shi na sha nokuuya kwaMessias. Okwa ti: “Eshi nda li ndi na omido 15, onda li nda hovela okuninga omapekaapeko ndi mone oumbangi oo tau ulike kutya omaxunganeko oo okwa li a shangwa, ofimbo Jesus ine uya.” Osho e lihonga, eshi a lesha kombinga yOmishangwatonywa dopEfuta La Fya, osha li she mu tomha. Okwa popya a ti: “Omishangwatonywa dimwe oda li da shangwa ofimbo Kristus ine uya. Onghee osho shi li momaxunganeko oo, osha dja kuKalunga.” Esther okwa ti: “Onda li ndi na okulesha oinima lwoikando, opo ndi i ude ko.” Ashike okwa li a hafa, eshi a ninga eenghendabala. Konima eshi a konakona noukeka omaxunganeko Ombiibeli onhumba, okwa popya a ti, “Paife onda yelelwa filufilu kutya osho Ombiibeli ya popya oshi li paushili.”

11. Ongahelipi hatu mono ouwa mokukala twa tomhwa kutya Ombiibeli oi li paushili?

¹¹ Ngeenge hatu tale omaxunganeko amwe oo e li mEendjovo daKalunga, oo a wanifwa nale, otashi tu kwafele tu kale tu na filufilu elineekelo muJehova nomewiliko olo he tu pe. Shikwao vali, omaxunganeko Ombiibeli ohae tu kwafele tu kale tu na eteelelo la twa li na sha nonakwiiwa, kashi na nee mbudi kutya otwa taalela omayeleko a tya ngahelipi paife. Natu ka kundafaneni pauxupi omaxunganeko avali oo taa hangwa membo laDaniel, oo taa wanifwa kunena. Ngeenge otwe a udu ko, otashi dulu oku tu kwafela tu ninge omatokolo e li pandunge.

12. Eemhadi ‘doshivela sha lumbakana nelova’ otadi faneke shike? (Daniel 2:41-43)

¹² Lesha Daniel 2:41-43. Mondjodi oyo Daniel a fatululila ohamba Nebukadnesar, eemhadi doshihongwafano odo ohamba ya mona oda longwa ‘moshivela sha lumbakana nelova.’ Ngeenge otwa  yelekanifa exunganeko olo namakwao oo a popiwa membo laDaniel nosho yo lEhololo, ohatu dulu okufika pexulifodiladilo kutya eemhadi odi lile po ovayambididi vEpangelo lOpamuhanga laAmerika naBritian, epangelo enaenghono mounyuni kunena. Shi na sha nepangelo olo enaenghono mounyuni, Daniel okwa ti kutya “ombinga imwe yoshilongo oya pama, ndelenee ikwao inai pama.” Omolwashike ombinga imwe inai pama? Omolwaashi ovanhu vongaho, ovo tava fanekwa kelova, ove li ningifa liha kale li na eenghono ngaashi oshivela. b

13. Oshili ya fimana ilipi hatu lihongo mokuuda ko exunganeko olo?

¹³ Ohatu lihongo oshili ya fimana meyelifo laDaniel li na sha nondjodi yoshihongwafano, unene tuu eemhadi dasho. Tete, Epangelo lOpamuhanga Enaenghono mOunyuni laAmerika naBritain ola ulika eenghono dalo meenghedi donhumba. Pashihopaenenwa, ola dana onghandangala ya fimana mokufindana mOita Yotete yOunyuni nosho yo mOita Itivali yOunyuni. Kakele kaasho, epangelo eli enaenghono mounyuni ola enda tali nghundipala notali twikile okunghundipala, molwaashi ovapangelwa valo otava kondjifafana notava kondjifa yo epangelo. Oshitivali, epangelo olo lopamuhanga laAmerika naBritain olo tali kala epangelo laxuuninwa enaenghono mounyuni, ofimbo Ouhamba waKalunga inau xulifa po omapangelo aeshe opanhu. Nonande oiwana imwe otai kondjifa Epangelo lOpamuhanga Enaenghono mOunyuni laAmerika naBritain, kai na fiku i li pingene po. Osho otu shi shii molwaashi “emanya,” olo li lile po Ouhamba waKalunga, otali ka nyanyaula eemhadi, oshitukulwa shoshihongwafano osho shilile po ovayambididi vEpangelo lOpamuhanga Enaenghono mOunyuni laAmerika naBritain. — Dan. 2:34, 35, 44, 45.

14. Ongahelipi okuuda ko exunganeko li na sha neemhadi doshivela sha lumbakana nelova tashi tu kwafele tu ninge omatokolo opandunge?

¹⁴ Mbela owa tomhwa kutya exunganeko laDaniel li na sha neemhadi doshivela sha lumbakana nelova oloshili? Ngeenge osho, osho otashi ka kuma onghedi yoye yokukalamwenyo. Ito ka konga eameno loinima yopamaliko mounyuni ou tau ka xulifwa po mafiku. (Luk. 12:16-21; 1 Joh. 2:15-17) Ngeenge owa udu ko exunganeko olo, otashi ku kwafele u mone nghee oshilonga shokuudifa nokuhonga sha fimana. (Mat. 6:33; 28:18-20) Konima ngeenge owa konakona exunganeko olo, omolwashike ito lipula kutya, ‘Mbela omatokolo oo handi ningi, otaa ulike ngoo kutya onda tomhwa kutya Ouhamba waKalunga mafiku otau ka hanauna po omapangelo aeshe opanhu?’

15. Oolyelye ve li ‘ohamba yokoumbangalanhu’ nosho yo “ohamba yokoumbuwanhu” kunena? (Daniel 11:40)

¹⁵ Lesha Daniel 11:40. Daniel etukulwa 11 okwa popya eehamba mbali, ile omapangelo omanaenghono opapolotika, oo a kala nokukondjela eenghonopangelo mounyuni. Ngeenge otwa yelekanifa exunganeko olo namakwao mOmbiibeli, ohatu ka mona kutya ‘ohamba yokoumbangalanhu’ oRussia novayambididi vaye, ofimbo “ohamba yokoumbuwanhu,” Epangelo lOpamuhanga Enaenghono mOunyuni laAmerika naBritain. c

16. Ovo tava pangelwa ‘kohamba yokoumbangalanhu’ ova taalela omashongo elipi?

¹⁶ Oshiwana shaKalunga osho tashi pangelwa ‘kohamba yokoumbangalanhu’ otashi lididimikile omahepeko odikilila okudja kohamba oyo. Eendombwedi dimwe oda dengwa noda tulwa modolongo omolweitavelo lado. Ponhele osho shi mbadapaleke ovamwatate, eenghatu ‘dohamba yokoumbangalanhu’ oda pameka eitavelo lavo. Omolwashike mbela? Omolwaashi ovamwatate ove shii kutya omahepeko, oo taa ningilwa oshiwana shaKalunga, otaa wanifa po exunganeko olo li li muDaniel. d (Dan. 11:41) Okushiiva kombinga yaasho otashi tu kwafele tu kale tu na eteelelo la twa notu kanyatele oudiinini wetu.

17. Oshiwana shaKalunga osho shi li koshi yepangelo ‘lohamba yokoumbuwanhu’ osha taalela omashongo elipi?

 ¹⁷ Mefimbo la pita, “ohamba yokoumbuwanhu” oya li yo ya hepeka odikilila oshiwana shaJehova. Pashihopaenenwa, osho osha li sha ningwa pOita Yotete yOunyuni nosho yo pOita Itivali yOunyuni, eshi ovamwatate vahapu va li va tulwa modolongo omolwomufika wavo wokuhe na ombinga. Ounona vamwe vEendombwedi ova li va tewa mo mofikola omolwetomheno olo. Efimbo opo la di ko, oshiwana shaJehova osho tashi pangelwa kohamba oyo, osha li sha taalela omayeleko omonanguwi, oo taa yeleke oudiinini washo kOuhamba waKalunga. Pashihopaenenwa, pefimbo loikonga yomahoololo, Ovakriste otashi dulika va li va yelekwa va yambidide ongudu yonhumba yopapolotika, ile omunhu oo ta hoololwa. Otashi dulika ihava hoolola komudidi, ashike otashi dulika ve shi ninge pamadiladilo nosho yo momutima. Osha fimana kufye okuhakufa ombinga moinima yopapolotika paenghatu, pamadiladilo nosho yo pamaliudo. — Joh. 15:18, 19; 18:36.

18. Ohatu linyenge ngahelipi keenhamanana odo di li pokati ‘kohamba yokoumbangalanhu nohamba yokoumbuwanhu’? (Tala yo efano.)

¹⁸ Ovo vehe na eitavelo momaxunganeko Ombiibeli otashi dulika va kale ve na oshisho sha pitilila, ngeenge tava tale “ohamba yokoumbuwanhu” ‘tai  lu’ ‘nohamba yokoumbangalanhu.’ (Dan. 11:40) Eehamba adishe odo odi na oilwifo yolute ya wana okulefeka po sheke ovanhu aveshe kombada yedu. Ndele otu shi shii kutya Jehova ita ka efa osho shi ningwe. (Jes. 45:18) Onghee hano, ponhele outondwe oo u li pokati ‘kohamba yokoumbangalanhu nohamba yokoumbuwanhu’ u tu etele omalimbililo, otau pameke eitavelo letu. Otau ulike kutya exulilo lounyuni ou oli li poduka.

19. Otwa pumbwa okudimina shike shi na sha nomaxunganeko Ombiibeli?

¹⁹ Katu shi shii kutya omaxunganeko amwe Ombiibeli otaa ka wanifwa ngahelipi. Nokuli nomuprofeti Daniel ka li e udite ko eityo laashishe osho a shanga. (Dan. 12:8, 9) Ndele okukala tuhe udite ko pauyadi nghee exunganeko tali ka wanifwa inashi hala kutya itali ka wanifwa shili. Nopehe na omalimbililo, ohatu dulu okukala nelineekelo kutya Jehova ote ke tu hololela osho twa pumbwa okushiiva pefimbo la wapala, ngaashi ashike a li a ninga monakudiwa. — Amos 3:7.

20. Omaxunganeko Ombiibeli atunhula elipi hatu ka mona mafiku taa wanifwa, notu na okutwikila okuninga shike?

²⁰ Mafiku otaku ka ningwa eingido ‘lombili neameno.’ (1 Tes. 5:3) Opo nee omapangelo opapolotika mounyuni otaa ka pilukila po omalongelokalunga oipupulu noku a hanauna po. (Eh. 17:16, 17) Okudja opo otaa ka ponokela oshiwana shaKalunga. (Hes. 38:18, 19) Oiningwanima oyo otai ka twala fiyo opoita yaxuuninwa yaArmagedon. (Eh. 16:14, 16) Ohatu dulu okukala nelineekelo filufilu kutya oiningwanima oyo otai ka ningwa mafiku. Ofimbo twa teelela osho shi ningwe, natu twikileni okuulikila Tate yetu womeulu olupandu, mokuyandja elitulemo komaxunganeko Ombiibeli nokukwafela ovanhu vakwetu va ninge sha faafana.