▪ Moshitukulwa osho, otwe lihonga kutya ope na ashike omhata imwe aike oyo ya taalelwa koishitwa aishe inaendunge: okuyapulifa edina laJehova linene. Omhata i na sha nounamapangelo, sha hala okutya onghedi yaJehova yokupangela oya denga mbada, oi li oshitukulwa shomhata oyo inene. Sha faafana, omhata i na sha noudiinini wovanhu oi li oshitukulwa shikwao shomhata oyo inene.

Omolwashike paife hatu divilike kutya omhata inenenene oi na sha nedina laJehova nosho yo okuyapulifwa kwalo? Natu ka konakoneni omatomheno atatu.

Lotete, moshikunino shaEden Satana okwa nyateka edina laJehova, ile e li nyona po. Epulo olo Satana a pula Eva otali ulike kutya Jehova iha yandje nosho yo kutya omalombwelo oo a pa Adam naEva kae li pauyuki. Opo nee Satana okwa li a popya sha osho tashi kondjifafana filufilu naasho Jehova a li a popya, nokungaho okwa li a ulika kutya Kalunga omunaipupulu. Onghee Satana okwa li a nyateka edina laJehova. Okudja opo okwa ninga “Ondiaboli,” olo tali ti “omulundili.” (Joh. 8:44) Molwaashi Eva okwa li a itavela oipupulu yaSatana, ka li a dulika kuKalunga nokwa tukulila ounamapangelo waye oshibofa. (Gen. 3:1-6) Fiyo okunena, Satana ota sheke edina laKalunga mokutandavelifa oipupulu kombinga yaye. Ovo va itavela oipupulu oyo ihava dulika kuJehova. Oshiwana shaJehova osha tala ko okunyatekwa kwedina laJehova liyapuki ku li okuhe na ouyuki kwa kwata moiti. Osho osho sha ningifa mounyuni mu kale mu na okumona oixuna nosho yo oukolokoshi.

Etivali, omolwouwa weshito alishe, Jehova okwa tokola, opo a yapulife edina laye, te likoshola komalundilo aeshe. Osho osho sha fimanenena kuJehova. Nomolwaashi a ti: “Ame ohandi ka yapula edina lange linene.” (Hes. 36:23) Jesus okwa ulika kutya oshike osho shi na okukala sha fimanenena momailikano ovapiya vaJehova ovadiinini, eshi a ti: “Edina loye nali yapulwe.” (Mat. 6:9) Ombiibeli oya divilika lwoikando efimano lokuyapulifa edina laJehova. Natu ka taleni oihopaenenwa inini tai shikula: “Peni Omwene efimano ledina laye.” (1 Omaf. 16:29; Eps. 96:8) “Imbileni efimano ledina laye ehambelelo.” (Eps. 66:2) ‘Ohandi ka fimaneka edina loye fiyo alushe.’ (Eps. 86:12) Pomhito imwe, opo Jehova a popya okudja meulu osha ningwa motembeli muJerusalem, eshi Jesus a popya, a ti: “Tate, fimanekifa edina loye.” Jehova okwa nyamukula, a ti: “Onde li fimanekifa nale, nohandi ke li fimanekifa vali.” — Joh. 12:28. a

Etitatu, elalakano laJehova ola pambafana nedina laye. Diladila kwaashi: Konima yeyeleko laxuuninwa olo tali ka shikula Epangelo lOmido Eyovi laKristus, oshike tashi ka shikula ko? Mbela oishitwa inaendunge otai ka twikila okukala ya tukaulwa komhata oyo inene i na sha nokuyapulifa edina laJehova? Opo tu mone enyamukulo kepulo olo, natu dimbulukweni oinima ivali oyo ya pamba omhata oyo, oudiinini wovanhu nosho yo ounamapangelo  womeshito alishe. Mbela ovanhu ovo va ulika kutya ovadiinini otava ka twikila okutaalela eshongo li na sha nokukanyatela oudiinini wavo? Ahawe. Otava ka kala va wanenena notava ka yelekwa pauyadi. Opo nee otava ka mona omwenyo waalushe. Mbela oishitwa inaendunge otai ka twikila okukala tai kundafana shi na sha nounamapangelo womeshito alishe nokukala ya tukaulwa kuo? Ahawe. Pefimbo opo, ovanhu aveshe meulu nokombada yedu otava ka kala va hangana notava ka tambula ko onghedi yaJehova yokupangela. Ndele ongahelipi shi na sha nedina laJehova?

Pefimbo opo, keshe umwe ota ka shiiva oshili kombinga yaJehova, nedina laye otali ka yapulwa filufilu. Ashike edina laJehova otali ka twikila okukala oshinima sha fimanenena kovapiya vaye aveshe meulu nokombada yedu. Omolwashike? Omolwaashi otava ka mona Jehova ta twikile okuninga oinima ikumwifi. Diladila kwaashi: Molwaashi Jesus ota ka yandja nelininipiko epangelo alishe kuJehova, Kalunga ota “ka kala Omupangeli woinima aishe.” (1 Kor. 15:28) Konima yaasho, ovanhu kombada yedu otava ka hafela “emanguluko loshinge shovana vaKalunga.” (Rom. 8:21) Opo nee Jehova ota ka wanifa po filufilu elalakano laye lokuhanganifa oishitwa aishe inaendunge meulu nokombada yedu i kale oukwaneumbo umwe munene wa hangana. — Ef. 1:10.

Ngeenge oinima oyo oya ningwa, oukwaneumbo waJehova meulu nokombada yedu otau ka kala u udite ngahelipi? Osha hala okutya ohatu ka kala twa halelela okutanga edina laJehova la denga mbada. Omupsalme David okwa nwefwa mo a shange ta ti: ‘Kalunga Omwene na fimanekwe. Edina laye liwa la fimana nali pandulwe fiyo alushe.’ (Eps. 72:18, 19) Ohatu ka twikila okumona omatomheno mape nomatunhula okuninga ngaho fiyo alushe.

Edina laJehova oli lile po oinima aishe i na sha naye. Ngeenge otwa diladila kombinga yedina laJehova, otashi tu dimbulukifa ohole yaye. (1 Joh. 4:8) Ohatu ka dimbuluka alushe kutya Jehova okwe tu shita omolwohole, okwa yandja ekuliloyambo omolwohole nonokutya onghedi yaye yokupangela oi li pauyuki nosho yo pahole. Ohatu ka twikila okumona nghee Jehova ta ulikile eshito laye ohole. Ohatu ke linyengifwa, opo tu ehene popepi naye e li Tate yetu nohatu ka tanga edina laye la tumbala fiyo alushe. — Eps. 73:28.