1-2. (a) Jehova oha kala e uditile ngahelipi ovo va nyona enyono la kwata moiti, noinave livela ombedi? (b) Jehova okwa hala ovanyoni va ninge shike?

 JEHOVA iha tambula ko elihumbato keshe. Oku tonde owii. (Eps. 5:​4-6) Okwa teelela tu dulike komifikamhango daye douyuki, odo di li mOmbiibeli. Oshoshili kutya Jehova ina teelela ovanhu ovalunde va kale va wanenena. (Eps. 130:​3, 4) Ashike pefimbo opo tuu opo, iha hokwa ‘ovahenakalunga ovo hava longifa efilonghenda laYe li li elipopilo lokunyona vehe na ouxwenge.’ (Jud. 4) Ombiibeli oya popya kombinga ‘yehanauno lovahenakalunga’ poita yaKalunga yaArmagedon. — 2 Pet. 3:7; Eh. 16:16.

² Jehova ina hala nande oumwe a hanaunwe po. Ngaashi twa kundafana moitukulwa ya tetekela, Ombiibeli oya popya sha yela kutya “okwa hala ovanhu aveshe ve lidilulule.” (2 Pet. 3:9) Ovakulunhuongalo Ovakriste ohava hopaenene Jehova, eshi tava kendabala nelididimiko okukwafela ovanyoni va kale vali va hokiwa kuJehova. Ashike omafimbo amwe, otashi dulika vehe lidilulule. (Jes. 6:9) Vamwe ohava twikile okulonga owii, nonande ovakulunhuongalo ova kendabala oku va kwafela ve lidilulule. Oshike tashi dulu okuningwa po monghalo ya tya ngaho?

 “KUFEI MO OU TA LONGO OWII MOKATI KENI”

3. (a) Ombiibeli oya ti kutya ovanyoni, ovo inave lidilulula, nava ningilwe shike? (b) Omolwashike hatu tile kutya ngeenge umwe ine lidilulula oku na okukufwa mo meongalo?

³ Ngeenge omunyoni ine lidilulula, ovakulunhuongalo ove na okushikula osho sha popiwa mo 1 Ovakorinto 5:​13, NWT-E. Ova ti: “Kufei mo ou ta longo owii mokati keni.” Omunyoni okwa hoolola oilanduliko oyo; ota teya osho a kuna. (Gal. 6:7) Omolwashike hatu tile ngaho? Omolwaashi okwa anya okulundulula elihumbato laye, nokuli nokonima eshi ovakulunhuongalo va ninga eenghendabala lwoikando ve mu kwafele. (2 Eeh. 17:​12-15) Eenghatu daye oda ulika kutya okwa hoolola okuhadulika komifikamhango daJehova. — Deut. 30:​19, 20.

4. Omolwashike hapa ningwa eshiivifo kutya umwe oo ine livela ombedi okwa kufwa mo meongalo?

⁴ Ngeenge omunyoni, oo ine lidilulula, okwa kufwa mo meongalo, eongalo ohali shiivifilwa kutya ke fi vali Ondombwedi yaJehova. a Elalakano leshiivifo olo, kali fi okufifa ohoni omunyoni. Ndele ponhele yaasho, ohali ningwa, opo eongalo li shikule oshipango shopaMbiibeli shi na sha ‘nokuhaendafana nokuhalya naye nandenande.’ (1 Kor. 5:​9-11) Ope na omatomheno mawa kutya omolwashike Jehova a yandjela oshipango osho. Omuyapostoli Paulus okwa shanga a ti: “Efulika linini otali dulu okufulika olumbololo alishe.” (1 Kor. 5:6) Omunyoni oo ine lidilulula ota dulu okunwefa mo nai ovo tava kendabala okukala metwokumwe nomifikamhango daJehova douyuki. — Omayel. 13:20; 1 Kor. 15:33.

5. Otu na okutala ko ngahelipi omunhu oo a kufwa mo meongalo, nomolwashike?

⁵ Mbela otu na okutala ko ngahelipi omwiitaveli mukwetu oo a kufwa mo meongalo? Nonande ihatu endafana naye, otu na oku mu tala ko e li odi ya kana, ponhele yoku mu tala ko ehe na oshilonga. Odi oyo ya dja mo moufita, ohai dulu okwaalukila mo. Dimbuluka kutya, omunhu oo okwe liyapulila Jehova. Ndele ke li ashike metwokumwe neliyapulo laye pomhito opo, naasho oshe mu twala moshiponga. (Hes. 18:31) Ndele nande ongaho, Jehova okwa halelela oku mu fila onghenda, notu na elineekelo kutya ota ka lundulula elihumbato laye. Ovakulunhuongalo otava dulu ngahelipi okukwafela omunyoni, oo a kufwa mo meongalo?

NGHEE OVAKULUNHUONGALO TAVA DULU OKUKWAFELA OO A KUFWA MO MEONGALO

6. Eenghatu dilipi ovakulunhuongalo ve na okukatuka, opo va kwafele oo a kufwa mo meongalo?

⁶ Ngeenge umwe okwa kufwa mo meongalo, mbela ovakulunhuongalo ohava efa oku mu kwafela a alukile kuJehova? Ahawe. Ngeenge okomitiye yovakulunhuongalo tai lombwele omunyoni kutya ota ka kufwa mo meongalo, otave ke mu yelifila eenghatu odo ta dulu okukatuka, opo a alukile meongalo. Ashike ovakulunhuongalo otava ka ninga shihapu shi dulife pwaasho. Peemhito dihapu, otava ka lombwela omunyoni kutya ova hala okushakena naye konima yeemwedi donhumba, opo va tale ngeenge okwa lundulula oikala yaye. Ngeenge omunyoni okwa dimine okushakena novakulunhuongalo natango, ovakulunhuongalo ove na oku mu  ladipika e lidilulule nokwaalukila keongalo. Nokuli nonande ine lidilulula pefimbo opo, ovakulunhuongalo ove na okuninga eenghendabala va shune ko kuye noku mu ladipika e lidilulule.

7. Ovakulunhuongalo ohava hopaenene ngahelipi olukeno laJehova, ngeenge tava ungaunga naumwe oo a kufwa mo meongalo? (Jeremia 3:12)

⁷ Ovakulunhuongalo ohava kendabala okuhopaenena olukeno laJehova, ngeenge tava ungaunga naumwe oo a kufwa mo meongalo. Pashihopaenenwa, Jehova ka li a teelela oshiwana shaye muIsrael osho shi katuke tete onghatu. Ponhele yaasho, okwa li a katuka onghatu tete, nokuli nofimbo inashi ulika kutya oshe lidilulula. Ngaashi twa kundafana moshitukulwa oshitivali moshifo eshi, Jehova okwa ulika kutya oku na olukeno, eshi a li a lombwela omuprofeti Hosea a shune komukulukadi waye, oo a li natango ine lidilulula. (Hos. 3:1; Mal. 3:7) Ovakulunhuongalo Ovakriste ohava hopaenene Jehova mokukala va hala omunyoni a alukile meongalo, noihave shi ningifa shidjuu kuye okuninga ngaho. — Lesha Jeremia 3:12.

8. Efaneko laJesus lomumati a kanene otali tu kwafele ngahelipi tu ude ko nawa olukeno nonghenda yaJehova? (Lukas 15:7)

⁸ Dimbuluka osho xe omudali a li a ninga po, oo a popiwa mefaneko laJesus lomumati a kanene. Diva konima eshi a mona omonamati ta alukile keumbo, “okwa tondoka ndele te mu papatele noku mu xupita.” (Luk. 15:20) Didilika kutya xe omudali ina teelela omonamati e mu pule e mu dimine po. Ponhele yaasho, okwa katuka onghatu, molwaashi oku mu hole. Ovakulunhuongalo ohava kendabala okuninga sha faafana, ngeenge tava ungaunga naavo va fiya po Jehova. Ova hala, ovo va fiya po Jehova, va “alukile kuye.” (Luk. 15:​22-24, 32) Meulu nosho yo meongalo ohamu kala ehafo linene, ngeenge omunyoni a alukila kuJehova. — Lesha Lukas 15:7.

9. Jehova okwa hala ovanyoni va ninge shike?

⁹ Fiyo opapa, otwe lihonga kutya Jehova iha pitike ovo inava hala okulidilulula va kale meongalo. Ashike nande ongaho, natango okwa hala oku va kwafela. Okwa hala va alukile kuye. Didilika nghee Jehova ha kala e udite, ngeenge ovanhu ve lidilulula. Hosea 14:​4, KB-13 okwa ti: “Eliteeko leni ohandi li velula. Okehalo lange mwene ondi mu hole. Osheshi ehandu lange ole mu pilamena.” Molwaashi ovakulunhuongalo ove shii nghee Jehova ha kala e udite, ohava tale kukeshe osho tashi ulike kutya omunyoni okwa hala okulidilulula. Aveshe ovo va fiya po Jehova nava kale ve shii kutya oku va hole, nokwa hala va alukile kuye.

10-11. Ovakulunhuongalo ove na okuungaunga ngahelipi naavo va kufwa mo meongalo konima yomido dihapu?

¹⁰ Ongahelipi ovakulunhuongalo tava dulu okukwafela oohandimwe, ovo va li va kufwa mo meongalo, tashi dulika konima yomido dihapu? Ovanhu va tya ngaho, otashi dulika ihava ningi vali osho sha li she va kufifa mo meongalo. Peemhito dimwe, otashi dulika nokuli itava dimbuluka kutya omolwashike va li va kufwa mo. Kashi na nee mbudi kutya ova kala ihava endafana neongalo efimbo li fike peni, ovakulunhuongalo otava ka kendabala ve va konge noku va talela po. Pomatalelepo a tya ngaho, ovakulunhuongalo otava ka ilikana pamwe navo, noku va ladipika va alukile keongalo. Oshoshili kutya, ngeenge omunhu okwa kala iha endafana neongalo oule womido, oku na okukala a nghundipala pamhepo. Onghee hano, ngeenge okwa ti kutya okwa hala okwaalukila  keongalo, ovakulunhuongalo otashi dulika va unganeke umwe a konakone Ombiibeli naye, nokuli nonande ina alulwa. Meenghalo adishe, ovakulunhuongalo ovo ve na oku mu kongela oo ta konakona naye Ombiibeli.

¹¹ Molwaashi ovakulunhuongalo ohava kendabala okuhopaenena onghenda yaJehova, otava ka konga aveshe ovo ve mu fiya po noku va ladipika va alukile kuYe. Ngeenge omunyoni okwa ulike kutya okwe livela ombedi, nokwa efa po elihumbato laye inali koshoka, ota dulu okwaalulwa diva. — 2 Kor. 2:​6-8.

12. (a) Eenghalo dilipi tadi pula ovakulunhuongalo va kale unene va lungama? (b) Omolwashike tuhe na okudiladila kutya ovo va nyona omanyono onhumba itava ka ulikilwa onghenda kuJehova? (Tala yo eshangelo lopedu.)

¹² Meenghalo dimwe, ovakulunhuongalo ova pumbwa okukala va lungama filufilu, ofimbo inava alulila umwe meongalo. Pashihopaenenwa, ngeenge omunhu okwa li ha  hepeke ounona pamilele, omushunimonima, ile a kendabala okuteya ohombo, ovakulunhuongalo ova pumbwa okushilipaleka kutya okwe lidilulula shili. (Mal. 2:14; 2 Tim. 3:6) Ove na okwaamena oufita. Nopefimbo opo tuu opo, otwa pumbwa okukala tu shii kutya Jehova ota ka tambula ko omunyoni, oo a ulika shili kutya okwe lidilulula nokwa efa po elihumbato lii. Onghee nonande ovakulunhuongalo ova hala okushilipaleka kutya omunhu wonhumba, oo a li ha ungaunga navamwe nai, okwe lidilulula shili, kave na okudiladila kutya omunhu a tya ngaho ke na efiku a filwe onghenda kuJehova. b — 1 Pet. 2:10.

OSHO EONGALO TALI DULU OKUNINGA

13. Eyooloko lilipi li li pokati kanghee hatu ungaunga naao a handukilwa nosho yo oo a kufwa mo meongalo?

¹³ Ngaashi twa kundafana moshitukulwa sha tetekela, omafimbo amwe ohapa ningwa eshiivifo kutya umwe okwa handukilwa. Monghalo ya tya ngaho, ohatu dulu okutwikila okweendafana naye, molwaashi otu shii kutya okwe lidilulula nokwa efa po elihumbato inali koshoka. (1 Tim. 5:20) Oku li natango oshitukulwa sheongalo, nokwa pumbwa etwomukumo olo hali di mokweendafana novaitaveli vakwao. (Heb. 10:​24, 25) Ashike oo a kufwa mo meongalo, ohatu ungaunga naye monghedi imwe i lili. Ohatu ‘efa po okweendafana nokulya pamwe naye.’ — 1 Kor. 5:11.

14. Ongahelipi Ovakriste tava dulu okulongifa eliudo lavo la deulwa kOmbiibeli, eshi tava ungaunga naumwe oo a kufwa mo meongalo? (Tala yo efano.)

¹⁴ Mbela osho twa kundafana osha hala okutya ohatu ka henuka filufilu omunhu oo kufwa mo meongalo? Hasho nandenande. Oshoshili kutya itatu ka endafana naye. Ashike Ovakriste otava dulu okulongifa eliudo lavo la deulwa kOmbiibeli va tokole ngeenge otava ka shiva kokwoongala omunhu oo a kufwa mo meongalo, tashi dulika e li omupambele wavo, ile a li kaume kavo. Ongahelipi ngeenge okwe uya kokwoongala? Monakudiwa, katwa li hatu popifa omunhu oo a kufwa mo meongalo. Ashike natango Omukriste okwa  pumbwa okutokola osho ta ka ninga po, ta longifa eliudo laye la deulwa kOmbiibeli. Vamwe otashi dulika va kale ve udite kutya otava dulu oku mu popifa, ile oku mu tambula ko pokwoongala. Ndele ove na okukaleka momadiladilo kutya kave na okuya naye meenghundafana diledile, ile okweendafana naye.

15. Ovanyoni velipi va popiwa mu 2 Johannes 9-11? (Tala yo oshimhungu “ Mbela Johannes naPaulus ova li tava popi omanyono a faafana?”)

¹⁵ Vamwe otashi dulika ve lipule kutya, ‘Hano Ombiibeli inai tya kutya Omukriste oo ta popifa umwe, oo a kufwa mo meongalo, ota yambidida oilonga yaye ii?’ (Lesha 2 Johannes 9-11.) Omushangwa oo otau ulike kovashunimonima, ile kwaavo hava xumifa komesho oilonga ii. (Eh. 2:20) Onghee ngeenge omunhu ota xumifa komesho omahongo oipupulu ovashunimonima, ile oilonga imwe vali ii, ovakulunhuongalo itava ka ninga omalongekido a talelwe po. Oshoshili kutya omunhu a tya ngaho, ota dulu okulidilulula. Ashike itatu ke mu popifa, ile tu mu shive kokwoongala fiyo osheshi e lidilulula.

HOPAENENA OLUKENO NONGHENDA YAJEHOVA

16-17. (a) Jehova okwa hala ovanyoni va ninge shike? (Hesekiel 18:32) (b) Ongahelipi ovakulunhuongalo tava dulu okuulika kutya ove li ovalongi pamwe naJehova, eshi tava kendabala okukwafela ovanyoni ve lidilulule?

¹⁶ Oshike twe lihonga moitukulwa ei itano? Jehova ina hala nande oumwe a hanaunwe po. (Lesha Hesekiel 18:32.) Okwa hala ovo va nyona va alukile kuye. (2 Kor. 5:20) Nomolwaasho mondjokonona aishe, Jehova a kala nokulondwela oshiwana shaye nosho yo oohandimwe, opo ve lidilulule nokwaalukila kuye. Ovakulunhuongalo ove na oufembanghenda wokukala ovalongi pamwe naJehova, eshi tava kendabala okukwafela ovo va nyona, opo ve lidilulule. — Rom. 2:4; 1 Kor. 3:9.

¹⁷ Diladila kehafo olo hali kala meulu, ngeenge omunyoni e lidilulula! Tate yetu womeulu, Jehova, naye oha kala a hafa neenghono, ngeenge e wete odi yaye imwe tai alukile keongalo. Ohatu ka kala tu hole Jehova neenghono, eshi hatu dilonga kolukeno, konghenda nokefilonghenda laye. — Luk. 1:78.