1, 2. Omolwashike Ovaroma etukulwa 8 la fimana kOvakriste ovavaekwa?

MBELA owa leshele ngoo nande onale Ovaroma 8: 15-17 pedimbuluko lefyo laJesus olo hali ningwa omudo keshe? Otashi dulika we u lesha. Omushangwa oo owa yelifa nghee Ovakriste hava shiiva kutya ove li ovavaekwa; omhepo oyo vene hai hepaulula pamwe nomhepo yavo. Ovelise yotete metukulwa olo otai ulike kwaavo ve li “ovafyuululi pamwe naKristus.” Mbela Ovaroma etukulwa 8 ola popya ashike kombinga yovavaekwa? Ile ola popya yo kombinga yOvakriste ovo ve na eteelelo loku ka kala kombada yedu?

² Ovakriste ovavaekwa ovo unene va popiwa metukulwa olo. Ova pewa “omhepo” nova teelela ‘okutambulwa moudalwa womalutu avo opambelela.’ (Rom. 8:23) Oshoshili kutya onakwiiwa yavo oku ka ninga ovana vaKalunga vomeulu. Osho otashi shiiva molwaashi ngeenge va ninginifwa, Kalunga ohe va dimine po pakanghameno lekulilo nokwe va tambula ko ve li ovayuki novana vopamhepo. — Rom. 3:23-26; 4:25; 8:30.

3. Omolwashike hatu dulu okufika pexulifodiladilo kutya Ovaroma etukulwa 8 nalo ola fimana kwaavo ve na eteelelo loku ka kala kombada yedu?

³ Ashike nande ongaho, etukulwa 8 lOvaroma ola fimana yo kwaavo ve na eteelelo loku ka kala kombanda yedu molwaashi Kalunga okwe va tala ko ve li ovayuki. Osho osha ulikwa monhumwafo oyo  yashangwa kuPaulus. Metukulwa 4 omwa kundafanwa kombinga yaAbraham. Omulumenhu oo weitavelo la kola okwa li ko manga Jehova ina yandja omhango kOvaisrael nofimbo Jesus ina fya omolwomatimba etu. Natango, Jehova ina dimbwa eitavelo laAbraham lididilikwedi nokwe mu tala ko eli omuyuki. (Lesha Ovaroma 4:20-22.) Sha faafana, Jehova ota dulu okutambula ko Ovakriste ovo ve na eitavelo nove na eteelelo la kanghamena koMbiibeli loku ka kala kombada yedu. Natango otava dulu okumona ouwa momayele oo taa hangwa mOvaroma etukulwa 8 olo la shangelwa ovayuki.

4. Ovaroma 8:21 otave tu kwafele tu lipule epulo lilipi?

⁴ MOvaroma 8:21 ohatu hange mo eshilipaleko olo kutya eudaneko lounyuni mupe otali ka wanifwa shili. Ovelishe ei oya udaneka kutya “oishitwa yovene otai ka mangululwa moupika wenyonauko i ye memanguluko loshinge shovana vaKalunga.” Epulo oli li apa kutya: Otu na ngoo elineekelo kutya ohatu ka pewa ondjabi oyo nokukala mounyuni mupe? Ovaroma etukulwa 8 otali tu pe omayele oo taa dulu oku tu kwafela tu ka pewe ondjabi oyo.

5. MOvaroma 8: 4-13, Paulus okwa popya oshinima shilipi sha kwata moiti?

⁵ Lesha Ovaroma 8:4-13. Ovaroma etukulwa 8 ola popya kombinga yaavo hava “ende pambelela,” mepingafano naavo hava ‘ende pamhepo.’ Vamwe otashi dulika va fike pexulifodiladilo kutya omushangwa oo otau popi kombinga yaavo ve li moshili naavo vehe li moshili, ile kombinga yaavo ve li Ovakriste naavo vehe fi Ovakriste. Ashike, Paulus okwa li ta shangele “ovaholike vaKalunga, ovaifanwa vayapuki muRoma.” (Rom. 1:7) Okwa li ta yelekanifa Ovakriste ovo hava ende pambelela nOvakriste ovo hava ende pamhepo. Mbela eyooloko lilipi la li pokati kavo?

6, 7. (a) Omeenghedi dimwe dilipi Ombiibeli ya longifa outumbulilo “pambelela”? (b) MOvaroma 8:4-13, Paulus okwa longifa outumbulilo “pambelela” meityo lilipi?

⁶ Natu ka konakoneni outumbulilo “pambelela.” Mbela Paulus okwa li ta ulike kushike? Ombiibeli ohai longifa outumbulilo oo meenghedi da yoolokafana. Omafimbo amwe, oya longifa outumbulilo oo tai ulike komalutu etu opambelela. (Rom. 2:28; 1 Kor. 15:39, 50) Otau dulu yo okulongifwa okuulika kekwatafano lovapambele. Jesus okwa dja “moludalo laDavid kombinga yombelela,” naPaulus okwa li a tala ko Ovajuda onga ‘ovamwaxe vomoludi laye pambelela.’ — Rom. 1:3; 9:3.

⁷ Onghee hano, osho Paulus a shanga metukulwa 7 otashi tu pe ediladilo la yela kutya outumbulilo  “pambelela,” oo wa popiwa mOvaroma 8:4-13, otau ulike kushike. Okwa kwatakanifa outumbulilo ‘eshi mwa kala mombelela nouhalu woulunde, oo kwa li wa mona eenghono moinhimbu yavo.’ (Rom. 7:5) Osho otashi tu pe eityo la yela li na sha noutumbulilo oo kutya ‘ava ve li pambelela,’ Paulus okwe va popya kutya ‘ohava diladila eshi shopambelela.’ Okwa li ta ulike kovanhu ovo hava pangelwa komahalo avo vene, have li ameke keendunge davo nohava dulika komahalo avo opamilele ile amwe e lili.

8. Omolwashike sha li sha fimana okulondwela Ovakriste ovavaekwa kombinga ‘yokudiladila pambelela’?

⁸ Otashi dulika u lipule kutya omolwashike Paulus a li a ladipika Ovakriste ovavaekwa kombinga yanghee sha nyika oshiponga okudiladila “pambelela.” Mbela kunena nasho osha nyika ngoo oshiponga kOvakriste ovo Kalunga a tambula ko ve li ookaume kaye nokwe va tala ko ve li ovayuki? Shi nyikifa oluhodi, Omukriste keshe ota dulu okuhovela okweenda paulunde wopambelela. Pashihopaenenwa, Paulus okwa shanga kutya mokati kovamwatate vokuRoma omwa li vamwe ovo va li ovapika ‘vomadimo avo vene,’ tashi dulika va li ovapika vomilele, voikulya, voikunwa ile voinima imwe i lili. Vamwe vomuvo ova li hava ‘pukifa omalai.’ (Rom. 16:17, 18; Fil. 3:18, 19; Jud. 4, 8, 12) Pefimbo opo, opa li yo pe na omumwatate umwe womuKorinto oo kwa li ‘a kufa po omukainhu waxe.’ (1 Kor. 5:1) Onghee hano, oshi shi okuudiwa ko eshi Kalunga a longifa Paulus a londwele Ovakriste kombinga ‘yokudiladila oinima yopambelela.’ — Rom. 8:5, 6.

9. Elondwelo laPaulus olo lili mOvaroma 8:6 itali ulike koolyelye?

⁹ Elondwelo olo otali longo yo nokunena. Omukriste oo a kala ta longele kaKalunga omido dihapu, otashi dulika a hovele okudiladila oinima yopambelela. Osho itashi ulike kOmukriste oo ha diladila omafimbo amwe kombinga yoikulya, yoilonga, yomalihafifo ile nokuli yoihole. Oinima oyo oi li oshitukulwa shonghalamwenyo kovapiya vaKalunga aveshe. Jesus okwa li a mona nghee omalihafifo a fimana, naye okwa li ha tyapula eendja, noha palula vamwe. Paulus okwa popya kutya inashi puka kovalihomboli okuulikilafana ohole nokuliudifa nawa, shimha tashi ningwa pandjele.

10. Outumbulilo ‘okudiladila,’ oo wa popiwa mOvaroma 8:5, 6, owa kwatela mo shike?

¹⁰ Paulelalela, Paulus okwa li a hala okutya shike eshi a popya kombinga ‘yokudiladila pambelela’? Oshitya shOshigreka osho Paulus a  longifa otashi ti “okudiladila ile okutula oshinima shonhumba komutima, okukala to ningi eemhangela u shi lalakanene, naasho osha kwatela mo okukulika oikala ile omahalo onhumba.” Ovo hava diladila pambelela ohava efa onghalamwenyo yavo i nwefwe mo komahalo avo oulunde. Omuhongwanhu umwe okwa popya kombinga yeendjovo odo dili mOvaroma 8:5 a ti: Ovanhu ohava diladila unene kombinga yaasho ve na ohokwe musho, osho hava popi, osho hava ningi ile va fimaneka, ile oinima ashike yopambelela.

11. Oinima ilipi tashi dulika i kale ya fimana unene kufye?

¹¹ Osha li sha fimana kOvakriste ovo va li muRoma ve likonakone kutya ohava yandje unene elitulemo kushike monghalamwenyo yavo. Mbela ova li tava yandje unene elitulemo ‘koinima yopambelela’ monghalamwenyo yavo? Nokunena, osha fimana yo nafye tu likonakone. Natu lipule kutya: Oshike hatu yandje unene elitulemo kusho, neendjovo detu ohadi holola shike? Mbela oshike naanaa hatu lalakanene monghalamwenyo yetu yakeshe efiku? Vamwe otashi dulika va didilike kutya ohava yandje elitulemo kokunwa omaludi omalodu, kokuwapaleka omaumbo avo, kokukonga oikutu oyo i li momoode, kokwoongela oimaliwa, kokuunganeka omafudo nosho tuu. Oinima ya tya ngaho mu yoo vene inai puka, otai dulu okukala i li oshitukulwa shonghalamwenyo. Pashihopaenenwa, oshikando shimwe Jesus okwa li a ninga omaviinyu, naPaulus okwa li a lombwela Timoteus a nwe “omaviinyu manini.” (1 Tim. 5:23; Joh. 2:3-11) Mbela Jesus naPaulus ‘ova kala alushe hava popi kombinga yokunwa omaviinyu’? Mbela oo va li ve hole unene, nohava popi alushe kombinga yao? Ahowe. Ongahelipi kombinga yetu? Oshike osho tu na ohokwe musho monghalamwenyo?

12, 13. Omolwashike osho hatu diladila shi li oshinima sha kwa ta moiti?

¹² Osha fimana okulikonakona fye vene. Omolwashike mbela? Paulus okwa shanga a ti: “Omadiladilo ombelela oo efyo.” (Rom. 8:6) Osho osha kwata moiti molwaashi omunhu oo ha diladila pambelela ota dulu okufya pamhepo nokufya omwenyo womomayulu. Ashike, Paulus ka li a hala kutya ngeenge umwe okwa hovele okukala ta ‘diladila oinima yopambelela’ exulilo laye efyo, molwaashi omunhu oha dulu okulundulula. Diladila komulumenhu umwe omuhaeli womuKorinto, oo kwa li a efa omahalo aye “opambelela” e mu pangele nokwa li e na okukondwa mo meongalo. Ashike lwanima okwa ka lunduluka. Okwa li a efa po okweenda pambelela nokwaalukila mondjila ya yuka. — 2 Kor. 2:6-8.

¹³ Ngeenge omunhu oo okwa li a dula okulundulula, nokunena Omukriste ota dulu okulundulula, unene tuu ngeenge ina efa a pangelwe komahalo opambelela ngaashi omulumenhu womuKorinto. Elondwelo olo Paulus a yandja kombinga yovanhu ovo hava ‘diladila oinima yopambelela’ oli na okulinyengifa Ovakriste va ninge omalunduluko opo sha pumbiwa.

14, 15. (a) Ponhele ‘yokudiladila pambelela,’ oshike tu na okudiladila kusho? (b) ‘Okudiladila pamhepo’ inashi hala okutya shike?

¹⁴ Konima eshi omuyapostoli e tu londwela tuha ‘diladile pambelela,’ okwa yandja eshilipaleko liwa olo kutya: ‘Okudiladila pamhepo otashi ti omwenyo nombili.’ Kashi fi tuu ondjabi iwa okukala nomwenyo nombili! Ongahelipi hatu dulu okumona ondjabi oyo?

¹⁵ ‘Okudiladila pamhepo’ inashi hala kutya okukala hatu tu eendjodi omutenya ile hatu diladila nokupopya ashike efimbo keshe kombinga yOmbiibeli ile kombinga yohole yetu yokuhola Kalunga neteelelo letu lomonakwiiwa. Natu ka taleni nghee Paulus nosho yo vamwe ovo va li va hokiwa kuKalunga va li ve na onghalamwenyo yakwalukeshe. Ova li hava li nokunwa;  vahapu ova li va hombola nokuhafela onghalamwenyo ve li oukwaneumbo nohava longo opo ve li yambidide. — Mark. 6:3; 1 Tes. 2:9.

16. Nonande Paulus okwa li ha kufa ombinga moinima yakwalukeshe yonghalamwenyo, okwa li ha yandje elitulemo kushike?

¹⁶ Ovapiya vaKalunga ovo kava li va pitifa komesho oinima yakwalukeshe monghalamwenyo yavo. Paulus okwa li omutungi weefaila, ashike ondjokonona oya ulika kutya okwa li ha kala alushe ta yandje elitulemo koilonga yokuudifa nokuhonga vamwe. (Lesha Oilonga 18:2-4; 20:20, 21, 34, 35.) Okwa li a ladipika ovamwaxe vomuRoma va longe oilonga oyo. Paulus okwa li ha yandje elitulemo komafiloshisho opamhepo nosho yo koilonga yokuudifa monghalamwenyo yaye. Ovaroma ova li va pumbwa okuhopaenena oshihopaenenwa shaye, nafye otu na okuninga sha faafana. — Rom. 15:15, 16.

17. Ngeenge otwa kala hatu ‘diladila pamhepo,’ ohatu ka kala nonghalamwenyo ya tya ngahelipi?

¹⁷ Ngeenge otwa kala hatu yandje elitulemo koinima yopamhepo, ohatu ka mona ondjabi ilipi? Ovaroma 8:6 otava yandje enyamukulo la yela kutya: ‘Okudiladila pamhepo otashi ti omwenyo nombili.’ Osho osha kwatela mo okweefa omadiladilo etu a nwefwe mo nokuwilikwa komhepo iyapuki, notu kale metwokumwe nomadiladilo aKalunga. Ohatu dulu okukala nonghalamwenyo iwa noina eityo paife ngeenge otwa kala twa pitifa komesho ‘oinima yopamhepo,’ nohatu ka pewa ondjabi yomwenyo waalushe kutya nee omeulu ile okombada yedu.

18. ‘Okudiladila pamhepo’ ohaku tu kwafele ngahelipi tu kale tu na ombili?

¹⁸ Natu yandje elitulemo keshilipaleko olo kutya ‘okudiladila pamhepo otashi ti ombili.’ Ovanhu vahapu ohava kala ve wete shidjuu okumona ombili yopamadiladilo. Ashike fye ohatu i hafele. Opo tu kale tu na ombili ya tya ngaho otu na okukendabala tu kale tu na ombili noilyo yomaukwaneumbo etu naavo ve li meongalo. Tu li ovamwatate novamwameme otu shii kutya inatu wanenena. Omolwokuhawanenena omafimbo amwe otashi dulika pa holoke omaupyakadi, ashike ngeenge okwa holoka po otu na okushikula omayele aJesus oo taa ti: ‘Pafaneni ombili nomumwanyoko.’ (Mat. 5:24) Okukala tu shii kutya omumwatate ile omumwameme naye ota longele “Kalunga kombili” ohashi shi ningifa shipu okupanga ombili naye. — Rom. 15:33; 16:20.

19. She likolelela kwaasho hatu diladila, ombili ilipi ye likalekelwa hatu dulu okuhafela?

¹⁹ Natango ope na ombili inene oyo itai dulu okuyelekwa. Eshi hatu ‘diladila pamhepo’ ohatu hafele ombili nOmushiti wetu. Jesaja okwa shanga eendjovo odo da li tadi longo pefimbo laye, ashike nokunena otadi wanifwa po, odo tadi ti: “Ou e neendunge da pama mwoove, Ove [Jehova] to mu diinine mombili, heeno, ombili osheshi okwe ku lineekela.” — Jes. 26:3; lesha Ovaroma 5:1.

20. Omolwashike wa pandula omayele oo e li mOvaroma etukulwa 8?

²⁰ Kashi na nee mbudi kutya otu li ovavaekwa ile otu na eteelelo loku ka kala nomwenyo fiyo alushe moParadisa kombanda yedu, ohatu dulu okuulika olupandu komayele oo taa hangwa mOvaroma 8. Inatu pandula tuu ketwomukumo olo twa pewa opo tuha efe omadiladilo “opambelela” a kale taa pangele monghalamwenyo yetu! Ohatu mono ouwa wokukala metwokumwe neshilipaleko olo tali ti: ‘Okudiladila pamhepo otashi ti omwenyo nombili.’ Ngeenge otwa ningi ngaho ohatu ka mona ondjabi yaalushe. Paulus okwa shanga a ti: “Ondjabi youlunde oyo efyo, ndelenee oshalinghenda yaKalunga oyo omwenyo waalushe muKristus Jesus, Omwene wetu.” — Rom. 6:23.