Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

Momayele oo a popiwa muMateus 18:15-17, Jesus okwa li ta popi kombinga yenyono lilipi?

Okwa li ta popi omaupyakadi oo haa holoka pokati kOvakriste notaa dulu okukandulwa po paumwene. Ashike ngeenge inau kandulwa po otau dulu okukondifa mo omunhu meongalo. Pashihopaenenwa, enyono otali dulu okukwatela mo oinima ngaashi oukengeleledi ile okulundila.— w16.05, ep. 7.

Oshike to dulu okuninga opo elesho lOmbiibeli loye li kale tali ti sha?

Oto dulu okuninga oinima tai shikula: Kala ho lesha to yandje elitulemo, didilika osho wa pumbwa okutula moilonga; lipula omapulo ngaashi ‘Ongahelipi handi dulu okulongifa ouyelele ou ndi kwafele vamwe?’; kala ho longifa oilongifo oyo tu na u ninge omapekapeko kombinga yoikundafanwa oyo wa lesha.— w16.05, okat. 24-26.

Mbela osha puka kOmukriste okukala a nyika oluhodi nonande okwa itavela menyumuko?

Okukala neitavelo menyumuko ihaku kufa po oluhodi olo Omukriste ha kala e udite. Abraham okwa li a nyika oluhodi omolwefyo laSara. (Gen. 23:2) Mokweendela ko kwefimbo, omunhu oha ende ta xwepopala.— wp16.3, ep. 4.

Omulumenhu ou e na oshishangifo a popiwa muHesekiel etukulwa 9 e li pamwe novalumenhu va 6 ve na oilwifo momake avo, ota faneke lyelye?

Otwa li tu shi udite ko kutya omatangakwaita omeulu oo a li a kufa ombinga mokuhanauna po Jerusalem notaa ka kufa natango ombinga mehanauno lounyuni woukolokoshi waSatana puHarmagedon. Ashike kunena memoniko olo, omulumenhu ou e na oshishangifo ota faneke Jesus Kristus, ou ta didilike ova tava ka xupa.— w16. 06, ep. 31-32.

Ombiibeli oya xupa momashongo elipi?

Ombiibeli (1) oya xupa nonande oinima oko ya li ya shangwa oya enda tai kulupa, ngaashi omanenge nosho yo opergamenti (oipa ya shikwa); (2) oya xupa nonande opa li omapataneko ovawiliki vomalongelokalunga nosho yo vopapolitika ovo va li va ninga eemhangela ve i hanaune po; (3) oya xupa nonande vamwe ova li tava kendabala okulundulula etumwalaka layo.— wp16.4, ep. 4-7.

Omeenghedi dilipi Omukriste ta dulu okuninga onghalamwenyo yaye yanafangwa?

Shiiva eemhumbwe doye odo da fimana ndele ino landa oinima inai fimana. Ninga elandulafano lelongifo loimaliwa li li pandjele. Kupula shi ile u yandje po oinima oyo iho longifa ndele to futu eendjo adishe odo u na. Henuka oilonga tai ku manene po efimbo ndele to kongo eemhito dokutamununa mo oukalele woye.— w16.07, ep. 10.

Ombiibeli oya popya shike shi na ongushu i dule yoshingoli ile oshisiliveli?

Job 28:12, 15 ota ulike kutya ounongo wopombada ou dule oshingoli ile oshisiliveli. Eshi to u kongo, kendabala u twikile okukala omulininipiki nowa pama meitavelo.— w16.08, ep. 18-19.

Mbela osha wapala ngoo komumwatate a kale e na eendjedi?

Momaputuko amwe, osha tambulwa ko ngeenge omulumenhu oku na eendjedi da yela noda kululwa nawa, notashi dulika ihashi imbi ovanhu va pwilikine ketumwalaka lOuhamba. Ndele ovamwatate vamwe otashi dulika va hoolole okukulula ko eendjedi davo filufilu. (1 Kor. 8:9) Momihoko ile momidingonoko dimwe okukala neendjedi kashi fi omukalondjikilile noinashi tambulwa ko ovalumenhu Ovakriste va kale ve na eendjedi.— w16.09, ep. 21.

Omolwashike tu na okukala twe lineekela ehokololo lOmbiibeli li na sha naDavid eshi a li a finda Goljat?

Goljat okwa li e na oule u dule womulumenhu oo taku dulu okutiwa kutya omule, neesentimeta 15. David okwa li omunhu wolela ngaashi sha popiwa meshangelo lonale olo la tumbula eumbo laye naasho Jesus a popya. Omusholondodo womapata wopavali oo u li mOmbiibeli otau shi koleke.— wp16.5, ep. 13.

Ongahelipi eshiivo, eudeko nounongo ya yoolokafana?

Omunhu ou e na eshiivo oha kala e na ouyelele ile oumbangi. Ou e na eudeko oha kala e wete nghee omaumbangi a yooloka fana haa kala a pambafana. Ofimbo omunhu oo e na ounongo oha tula kumwe eshiivo neudeko ndele te i tula moilonga.— w16.10, ep. 18.