Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

Omolwashike ovadali ovo va tembukila koilongo imwe ve na okukonakona oshinima shi na sha nelaka eshi tava kwafele ovana vavo pamhepo?

Ounona otashi dulika ve ke lihonge elaka lomoshitukulwa kofikola nosho yo momudingonoko. Oshiwa kokaana ka shiive omalaka e dulife pulimwe. Ovadali ove na okutala kutya omeongalo lilipi ovana vavo tava dulu okutambula ko oshili nokuninga exumokomesho lopamhepo, kutya nee omeongalo olo hali longifa elaka lomoshitukulwa ile ololo hali longifa elaka loshinailongo. Ovadali Ovakriste ohava pitifa komesho oupamhepo wovana vavo ponhele yokuyandja elitulemo koinima yopaumwene. — w17.05, ep. 9-11.

Eshi Jesus a pula Petrus kutya, ‘ou hole nge tuu, u dule ava?’ okwa li ta popi oolyelye eshi a ti “ava”? (Joh. 21:15)

Osha fa shi li ngaha kutya Jesus okwa li ta ulike keeshi odo da li popepi navo ile kongeshefa yokukwata eeshi. Konima yefyo laJesus, Petrus okwa li a shuna koilonga yaye yokukwata eeshi. Ovakriste ove na okukala ve na ondjele ngeenge tashi uya poilonga yokulikongela omboloto. — w17.05, ep. 22-23.

Omolwashike Abraham a lombwela omukulukadi waye a tye kutya ye omumwaina? (Gen. 12:10-13)

Oshoshili kutya Sara okwa li omumwaina waAbraham. Ngeno Sara okwa tile kutya ye omwalikadi waye, otashi dulika ngeno Abraham a dipawa, ndele ta kala ehe na oludalo olo Kalunga e mu udanekela. — wp17.3, ep. 14-15.

Elias Hutter okwa li a longifa onghedi ilipi opo a kwafele ovo va li va hala okulihonga Oshiheberi?

Okwa li a hala ovalihongi va yoolole pokati koitya yOshiheberi oyo i li mOmbiibeli noitetekelitya ile noixuuninitya. Okwa li a pilinda oitya yopefina neendada da twa, ofimbo oitetekeli noixuunini ya li inai twa. O-New World Translation of the Holy Scriptures—With References oya longifa onghedi ya faafana momashangelo opedu. — wp17.4, ep. 11-12.

Oinima ilipi hai kumu etaleko lOvakriste li na sha nokukala ve na oshilwifo shokuliamena kovanhu vakwao?

Oinima imwe ongaashi: Kalunga oha tale ko omwenyo uyapuki. Jesus kali a ladipika ovashikuli vaye va kale ve na omaongamukonda okuliamena. (Luk. 22:36, 38) Ohatu ka hambula omaongamukonda etu omatemo. Omwenyo owa fimana u dule oinima yopamaliko. Otwa fimaneka eliudo lavamwe, notwa hala okukala oshihopaenenwa shiwa. (2 Kor. 4:2) — w17.07, ep. 31-32.

Omolwashike omahokololo oo e li membo laMateus nosho yo membo laLukas, e na sha nonghalamwenyo yaJesus yopehovelo, a yoolokafana?

Ehokololo laMateus otali yandje unene elitulemo kuJosef, nghee a li e linyenga koufimba waMaria nosho yo ketumwalaka la fimanenena li na sha nokuya onhapo kuEgipti nokushuna kuIsrael. Ehokololo laLukas otali yandje unene elitulemo kuMaria; pashihopaenenwa, eshi a li a ka talela po Elizabeth nanghee a li e linyenga eshi Jesus a li kotembeli fimbo a li okamatyona. — w17.08, ep. 32.

Omoinima ilipi Ombiibeli ya li ya dula okuxupa?

Eityo loitya nosho yo lomautumbulilo oo a longifwa mOmbiibeli ola enda tali lunduluka efimbo nefimbo. Omalunduluko moinima yopapolotika okwa kuma elaka olo hali longifwa unene. Opa kala omapataneko e na sha nokutolokwa kwOmbiibeli momalaka oo haa longifwa unene. — w17.09, ep. 19-21.

Otu na ngoo shili omweengeli he tu amene?

Ahowe. Jesus okwa popya shi na sha novaengeli vovahongwa vaye kutya ohava tale alushe oshipala shaKalunga. (Mat. 18:10) Okwa li ta ti kutya ovaengeli ove na ko nasha novahongwa vaye, ndele ka li ta ti kutya ohave va amene pashikumwifilonga. — wp17.5, ep. 5.

Ohole yoludi lilipi ya shiya ko?

Agape oyo oludi lohole la shiya ko, ngeenge oya kanghamena komafinamhango ouyuki. Oya kwatela mo ohole yomoule nosho yo ehalo liwa. Ohai ulike omafinamhango ouyuki, ngaashi eenghatu dokuheliholamwene omolwouwa wavamwe. — w17.10, ep. 7.