MBELA oho pandula ngoo? Atusheni otwa pumbwa okulipula epulo olo. Ombiibeli oya xunganeka kutya ovanhu vahapu vopefimbo letu otava ka kala “vehe shii kupandula.” (2 Tim. 3:2) Otashi dulika wa shakeneka ovanhu ovo hava kala ashike va hala okuningilwa sha ile okupewa sha kuvamwe. Otashi dulika va kale ve udite kutya inava pumbwa okupandula omolwouwa oo va ningilwa kuvamwe. Mbela oto ka kala ngoo wa hala okukala novanhu ve na oikala ya tya ngaho?

Mepingafano naasho, ovapiya vaJehova ova ladipikwa va kale ve “shii okupandula.” Ohatu ‘pandula mwaaishe.’ (Kol. 3:15; 1 Tes. 5:18) Ohashi tu etele yo ouwa ngeenge ohatu pandula. Otu na omatomheno mahapu okuninga ngaho.

Etomheno la fimana lokukala tu na olupandu ololo kutya ohashi tu kwafele tu kale tu udite nawa. Omunhu oo a pandula oha kala e udite nawa nohashi kwafele yo naao a pandulwa a kale e udite nawa. Omolwashike olupandu hali etele ovanhu aveshe ouwa? Diladila kwaashi: Ngeenge owa didilike kutya ovanhu ova hala oku ku ningila ouwa, mbela oho kala u udite kutya owe lilongela osho tave ku ningile? Omolwaashi ove na ko nasha naave. Ngeenge owa didilike kutya ove na ko nasha naave, oto ka kala u udite nawa. Otu wete kutya Rut naye osho a li e udite ngaho. Boas okwa li a ulikila Rut olukeno. Kape na omalimbililo kutya Rut okwa li a hafa neenghono eshi a didilika kutya ope na oo e na ko nasha naye. — Rut 2:10-13.

Otwa pumbwa yo okukala hatu pandula Kalunga. Ohe tu longekidile eeshali dihapu dopamhepo nodopalutu, noha twikile okuninga ngaho. (Deut. 8:17, 18; Oil. 14:17) Ponhele ashike yokwiitavela muKalunga, otwa pumbwa okukonga efimbo, ndele hatu diladila moule omapuniko aeshe oo Kalunga e tu ningila novaholike vetu. Ngeenge otwa diladila koinima aishe oyo Omushiti wetu e tu ningila, otashi ke tu kwafela tu mu pandule, nokumona kutya oku na ko nasha nafye. — 1 Joh. 4:9.

Otwa pumbwa okukala hatu diladila kwaasho Jehova e tu ningila nokukala yo hatu mu pandula. (Eps. 100:4, 5) Okwa tiwa kutya “okupandula vamwe okwa fimana molwaashi ohaku weda ko kehafo lavo.”

Etomheno limwe lokukala tu na olupandu ololo kutya ohaku pameke ekwatafano lookaume. Atushe otwa pumbwa okukala hatu pandulwa. Ngeenge owa pandula umwe mwaasho e ku ningila, ohashi pameke oukaume weni. (Rom. 16:3, 4) Shikwao vali, omunhu oo e na olupandu oha kala a halelela okukwafela vamwe. Ngeenge okwa didilike kutya omunhu wonhumba ohe mu ulikile olukeno, naye ohe mu ulikile yo olukeno. Onghee hano, okukwafelafana ohaku eta ehafo. Osho oshi li metwokumwe neendjovo odo da popiwa kuJesus eshi a ti: “Okuyandja oku nelao komesho yokutambula.” — Oil. 20:35.

Robert Emmons, omuyandjimayele wokoUnivesiti yaCalifornia okwa ti: “Lokwooko ohali shikula lokaulu. Ngeenge ohatu yandje, nafye ohatu ka pewa.” Opo tu dule okukala nomwenyo nokukala twa hafa, atushe otwa pumbwa okuyambididafana. Pashihopaenenwa, otashi dulika vakweni ve ku longekidile oikulya ile ouhaku. (1 Kor. 12:21)  Omunhu oo e na olupandu, oha didilike osho vakwao have mu ningile. Mbela owe shi ninga ngoo onghedindjikilile yokupandula vakweni mwaasho have ku ningile?

Etomheno limwe lokukala tu na olupandu ololo kutya ohaku tu kwafele tu yandje elitulemo komaukwatya mawa, ponhele yomaukwatya mai. Omadiladilo etu okwa fa okadindifo. Okadindifo ohaka piti ashike oinima oyo ya pumbiwa, ko taka kelele oyo inai pumbiwa. Ngeenge otu na olupandu, ohatu ka yandja ashike elitulemo komaukwatya mawa, ponhele yokuyandja elitulemo komaukwatya mai. Otashi ke tu kwafela tu yandje elitulemo koinima oyo iwa, naasho otashi ka weda ko yo kolupandu letu. Okupandula ohaku ku kwafele u ninge ngaashi omuyapostoli Paulus e tu ladipika, eshi a ti: “Hafeni alushe mOmwene!” — Fil. 4:4.

Okukala tu na olupandu ohaku tu kwafele tuha diladile oinima ii. Otashi ka kala shidjuu okukala tu na olupandu nopefimbo opo tuu opo otu na ondubo, twa nyika oluhodi ile twa handuka. Ovanhu ovo ve na olupandu ohava kala ashike ve na oinima inini yopamaliko. Ohava kala va wanenwa kwaasho ve na, noihave likongele oinima ihapu. — Fil. 4:12.

Tu li Ovakriste, otwa pumbwa okukaleka momadiladilo kutya Satana okwa hala tu kale twa nyika oluhodi notwa teka omukumo eshi twa taalela eenghalo didjuu momafiku aa axuuninwa. Ota ka kala a hafa ngeenge otu na oikala ii nohatu ngongota mukeshe shimwe. Ngeenge otu na omikalo da tya ngaho, ovanhu itava ka pwilikina ketumwalaka olo hatu va udifile. Olupandu ola pambafana noiimati yomhepo yaKalunga. Pashihopaenenwa, ohatu mono ehafo omolwoinima itunhula oyo twa pewa kuKalunga nosho yo eshi tu na eitavelo momaudaneko aye omonakwiiwa. — Gal. 5:22, 23.

Ngeenge ou li umwe vomovapiya vaJehova, oto tu kumwe naasho sha popiwa moshitukulwa eshi. Ashike ihashi kala shipu okuulika olupandu nokuyandja elitulemo komaukwatya mawa avamwe. Ashike ino efa osho shi ku teye omukumo. Oto dulu okukulika olupandu noku li ulika. Ngahelipi mbela? Efiku keshe, diladila koinima imwe omo to dulu okuulika olupandu. Eshi ngoo to ende to shi ningi pandjikilile, osho ngoo to ende to kulike oukwatya wolupandu. Osho otashi ke ku kwafela u kale wa hafa neenghono u dule ovanhu ovo hava yandje elitulemo komaupyakadi. Oto ka kala wa hafa ngeenge owa dilonga koinima itunhula oyo wa ningilwa kuKalunga nosho yo kuvamwe. Oto dulu okukala ho i shange. Efiku keshe, oto dulu okushanga oinima ivali ile itatu oyo wa pandula.

Ovalafululi vomauyelele ova popya kutya “okupandula vamwe pandjikilile ohashi nwefa mo ouluvi wetu, naasho ohashi tu ningifa tu kale tu na onghalamwenyo i li nawa.” Omunhu oo ha kala a hafa, oye oo ha pandula vamwe. Onghee hano, kala ho dilonga komanangeko noupuna oye, hafela oinima itunhula oyo wa ningilwa nokukala alushe ho pandula. Omolwoinima aishe iwa oyo mwa ningilwa, “hambeleleni Omwene, osheshi Oye omuwa.” Heeno, “kaleni nokupandula mwaaishe.” — 1 Omaf. 16:34; 1 Tes. 5:18.