Ondiaboli inai lombwela Eva kutya ngeenge okwa li oshiimati osho Kalunga e va lombwela vaha lye ota ka fya, ndele oshitukulwa shimwe sholutu laye (osho ovanhu kunena hava ti omwenyo ihau fi) tashi ka kala nomwenyo konhele imwe i lili. Satana okwa popya okupitila meyoka kutya ngeenge Eva okwa li oshiimati shokomuti oo, ‘itaka fya’ nandenande. Okwa li a hala okutya Eva ota kala nomwenyo, ta hafele onghalamwenyo kombada yedu, nopehe na okupangelwa kuKalunga. — Gen. 2:17; 3:3-5.

Ehongo loipupulu olo kutya omwenyo ihau fi ola dja peni ngaashi hashi hongwa kunena ngeenge inali dja muEden? Katu shi shii naanaa. Otu shii kutya omalongelokalunga aeshe oipupulu okwa li a hanaunwa po pEyelu laNoa. Kape na nande ediladilo la kanghamena komahongo oipupulu la li la xupa, molwaashi Noa noukwaneumbo waye ovo va xupa po ova li ovalongelikalunga vashili.

Osha yela kutya ehongo lomwenyo ihau fi ola hovela konima yEyelu. Ediladilo lomwenyo ihau fi otashi dulika la hovela ofimbo Kalunga ina dongakanifa omalaka poshungo yaBabel novanhu inave lihanena “ounyuni aushe.” (Gen. 11:8, 9) Kashi na nee mbudi kutya ediladilo olo ola dilila peni, otu shii kutya Satana Ondiaboli, “omunaipupulu naxe yayo,” oye te li xumifa komesho nokwa hafa eshi tali tandavele. — Joh. 8:44.