Ehokololo olo tali hangwa muDeuteronomion 22:25-27 itali popi shi na sha nondjo yomulumenhu oo, molwaashi okwa nyona nale. Omhango oya li i lile po okuulika kutya omukainhu ke na ondjo. Natu taleni nghee oshitukulwa tashi tu kwafele.

Eevelishe da tetekela, oda popya kombinga yomulumenhu oo a ya momilele nomukainhu oo a valekwa “moshilando.” Omulumenhu oo okwa li ha monika ondjo yoluhaelo, molwaashi omukainhu oo a valekwa okwa li a talika ko onga omuhombolwa. Ongahelipi shi na sha nomukainhu? “Inaka kuwa onghuwo nande ka kala moshilando.” Ngeno okwa li a kuwa onghuwo, ngeno ovanhu ove mu uda ndele tave mu kwafele. Ashike ine shi ninga. Kungaho naye okwa li yo ta haele, onghee aveshe ove na ondjo. — Deut. 22:23, 24.

Omhango oya twikila ko nonghalo ya yooloka ko kwaayo ya ti: “Omulumenhu ngeenge ta hange omona omuvalekwa moixwa ndele te mu kwata onghonga, omulumenhu ou a nangala naye, oye aeke ta ka fya. Ndelenee kakadona ino mu ninga sha. Osheshi okakadona kake netimba lokufya. Osheshi oshilonga eshi osha faafana nomunhu, ou a nangela omunhu, nde te mu dipaa. Osheshi ye okwe mu hangele moixwa. Omona okakadona ka kuwa onghuwo, ndelenee inapa kala nande umwe e mu kwafa.” — Deut. 22:25-27.

Monghalo ya tya ngaho, ovatokoli ova li hava pwilikine komukainhu. Meityo lilipi mbela? Molwaashi okwa “kuwa onghuwo, ndelenee inapa kala nande umwe e mu kwafa.” Onghee ka li a ya moluhaelo. Omulumenhu oku na ondjo yekwatonghonga noluhaelo, molwaashi “okwa dula omukainhu eenghono, ndele ta nangala naye, NW.”

Nonande omhango oya li i lile po okuulika kutya omukainhu ke na ondjo, ehokololo ola popya sha yukilila kutya omulumenhu oku na ondjo yekwatonghonga noluhaelo. Ohatu dulu okukala noushili kutya ovatokoli otava ka ‘konakona moule onghalo’ oyo nokuninga etokolo le likolelela komifikamhango odo Kalunga a tula po noku di endulula lwoikando. — Deut. 13:14; 17:4; Ex. 20:14.