1. Jehova okwe lineekelela shike ovadali?

JEHOVA okwa li a shita ovalihomboli votete ve na ehalo lokumona ounona. Ombiibeli oya ti: ‘Ounona ovo oshali yOmwene.’ (Eps. 127:3) Osho osha hala okutya ngahelipi? Natu tye nee ngeno kaume koye okwe ku pa u mu kwatele oimaliwa ihapu. Oto ka kala u udite ngahelipi? Oto ka kala wa hafa molwaashi kaume koye okwe ku lineekela. Ashike otashi dulika u kale wa tila kutya oto ke i fila oshisho ngahelipi. Jehova, Kaume ketu kopofingo, okwa pa ovadali oshinima shimwe osho ve na okufila oshisho shi na ongushu shi dule oimaliwa. Okwe ve lineekelela oshinakuwanifwa shokushilipaleka kutya ounona ova filwa oshisho nawa nova hafa.

2. Omapulo elipi hatu ka konakona?

² Olyelye e na oshinakuwanifwa shokutokola ngeenge ovalihomboli ova pumbwa okukala ve na ounona nopefimbo lilipi? Noshike ovadali ve na okuninga opo va kwafele ovana va kale va hafa monghalamwenyo? Natu ka konakoneni omafinamhango amwe taa hangika mEendjovo daKalunga oo taa dulu okukwafela ovalihomboli Ovakriste va ninge omatokolo e li pandunge.

3. (a) Olyelye e na oshinakuwanifwa shokutokola ngeenge ovalihomboli nava kale ve na ounona? (b) Omafinamhango Ombiibeli elipi ookaume kovalihomboli novapambele va pumbwa okukaleka momadiladilo?

³ Momaputuko amwe, ovalihomboli ohava kala va teelelika va mone ounona diva ashike eshi va hombola. Otashi dulika nokuli va fininikwe kovapambele ile kuvamwe va mone diva ounona. Jethro, omumwatate wokuAsia, okwa ti: “Meongalo letu, ovalihomboli ovo ve na ounona ohava fininike  ovalihomboli ovo vehe na ounona va mone ounona.” Jeffrey, omumwatate vali umwe wokuAsia, okwa ti: “Vamwe ohava lombwele ovalihomboli ovo vehe na ounona kutya ngeenge ovakulupa kape na oo te ke va fila oshisho.” Ashike nande ongaho, ovalihomboli ovo ve na oshinakuwanifwa shokutokola ngeenge ova hala ounona. (Gal. 6:5) Oshoshili kutya ookaume novapambele ohava kala va hala ovalihomboli ovo opo va hombola va kale va hafa. Ashike ove na okudimbuluka kutya ovalihomboli ovo ve na oshinakuwanifwa shokutokola ngeenge ova hala ounona ile hasho. — 1 Tes. 4:11.

4-5. Ovalihomboli ova pumbwa okukundafana kombinga yoinima ivali ilipi, nonaini ve na oku shi ninga? Shi yelifa.

⁴ Ovalihomboli ovo va hala okumona ounona ova pumbwa okulipula omapulo avali a fimana taa shikula: Lotete, onaini va hala okumona okaana? Etivali, ova hala ounona vangapi? Onaini ovalihomboli tava dulu okukundafana kombinga yomapulo oo? Nomolwashike a fimanenena?

⁵ Ofimbo ovalihomboli ovo inava hombola, ova pumbwa okupopya kombinga yokumona ounona. Omolwashike mbela? Etomheno limwe la fimana ololo kutya, aveshe ova pumbwa okukala tava tu kumwe moshinima osho. Natango ova pumbwa okutala ngeenge ove lilongekidila oshinakuwanifwa osho. Ovalihomboli vamwe ova tokola pa pite odula ile eedula mbali konima eshi va hombola opo va mone ounona, oshinakuwanifwa osho hashi pula efimbo nosho yo eenghono. Ohava efa pa pite efimbo molwaashi ova hala ve lishiive nawa ve li ovalihomboli nokupanga oukaume wopofingo. — Ef. 5:33.

6. Ovalihomboli vamwe ova tokola okuninga shike omolwomafimbo madjuu oo tu li muo?

⁶ Ovakriste vamwe ova hoolola okushikula oshihopaenenwa shovanamati vatatu vaNoa novakulukadi vavo. Ovalihomboli ovo vatatu kava li va mona ounona diva konima eshi va hombola. (Gen. 6:18; 9:18, 19; 10:1; 2 Pet. 2:5) Jesus okwa yelekanifa efimbo letu ‘nomafiku aNoa,’ nokape na omalimbililo kutya otu li ‘momafimbo madjuu okukaliwa muo.’ (Mat. 24:37; 2 Tim. 3:1) Ovalihomboli vamwe ova tokola okuhamona ounona opo va dule okulongifa efimbo lihapu moilonga yaJehova.

7. Ongahelipi omafinamhango oo e li muLukas 14:28, 29 nosho yo mOmayeletumbulo 21:5 taa dulu okukwafela ovalihomboli?

⁷ Ovalihomboli ovanaendunge, ohava “valula oitungifo” ofimbo inava tokola kutya  ounona vangapi va hala. (Lesha Lukas 14:28, 29.) Ovalihomboli ovo ve na ounona ove shii kutya okutekula ounona ihashi pula ashike oimaliwa, ndele ohashi pula yo efimbo neenghono. Ohashi pula yo efimbo neenghono. Osha fimana kovalihomboli ve lipule kutya: ‘Mbela atushe otwa pumbwa okulonga opo tu wanife po eemhumbwe doukwaneumbo wetu? Mbela atushe otu shii ngoo eemhumbwe doukwaneumbo wetu? Ngeenge atushe otu na okulonga, olyelye ta ka fila oshisho ounona vetu? Olyelye ta ka nwefa mo okudiladila neenghatu davo?’ Ngeenge ovalihomboli ova kundafana kombinga yomapulo oo, otava ka tula moilonga eendjovo odo di li mOmayeletumbulo 21:5. — Lesha.

8. Omashongo elipi ovalihomboli Ovakriste hava shakeneke, novashamane ovanahole ohava ningi po shike?

⁸ Okaana oka pumbwa efimbo neenghono domudali keshe. Onghee hano, ngeenge ounona ove lilandulila po diva, otashi dulika shi ka kale shidjuu kovalihomboli okuyandja elitulemo kokaana keshe. Ovalihomboli vamwe ovo va li ve na ounona ve lilandulila po ova popya kutya osha li she va wilila po. Omukulukadi otashi dulika a kale a loloka palutu nopamaliudo. Oha kala a loloka unene noiha kala e na eenghono dokukonakona, okwiilikana nokuya moukalele pandjikilile. Otashi dulika yo shi kale shidjuu kuye okuyandja elitulemo nokumona ouwa pokwoongala kwOpakriste. Kakele kaasho, omushamane omunahole oha ningi keshe osho ta dulu opo a yambidide omukulukadi waye ngeenge ounona va pumbwa okufilwa oshisho pokwoongala nomeumbo. Pashihopaenenwa, oha kwafele omukulukadi noilonga yomeumbo. Oha longo noudiinini opo a shilipaleke kutya keshe umwe oha mono ouwa pandjikilile mElongelokalunga lOukwaneumbo. Ovashamane Ovakriste ohava longo luhapu nomaukwaneumbo avo moukalele.

9-10. Opo ovadali va dule okutekula ovana, ove na okuninga shike?

⁹ Oinima imwe ilipi ovadali tava dulu okuninga opo va honge ovana va kale ve hole Jehova? Ongahelipi tava dulu okwaamena ovana kenwefemo lii lounyuni ou? Natu ka konakoneni eenghatu dimwe odo ovadali ve na okulandula.

¹⁰ Ilikana Jehova e ku kwafele. Diladila koshihopaenenwa shaManoah nomukulukadi waye, ovadali vaSimson. Eshi Manoah a didilika kutya ye nomukulukadi waye otava ka dala okaana okamati, okwa li a pula Jehova e va kwafele va dule oku ka tekula.

11. Ongahelipi ovadali tava dulu okushikula oshihopaenenwa shaManoah, osho tashi hangwa mOvatokolipangeli 13:8?

¹¹ Nihad naAlma vokuBosnia Herzegovina,  ove lihonga koshihopaenenwa shaManoah. Ova ti: “Ngaashi Manoah, nafye otwa li twa ilikana kuJehova e tu honge nghee hatu dulu okukala ovadali vawa. Okwa li a nyamukula omailikano etu okupitila mOmishangwa, moishangomwa yopaMbiibeli, pokwoongala nopoyoongalele.” — Lesha Ovatokolipangeli 13:8.

12. Josef naMaria ova li va tulila po ovana oshihopaenenwa shilipi?

¹² Va tulileni po oshihopaenenwa. Osho ovadali hava popi osha fimana, ashike osho hava ningi otashi dulu okunwefa mo unene ovana. Ohatu dulu okukala noushili kutya Josef naMaria ova li va tulila po ovana oshihopaenenwa shiwa, mwa kwatelwa Jesus. Josef okwa li ha longo noudiinini opo a file oshisho oukwaneumbo waye. Okwa li yo a twa omukumo oukwaneumbo waye opo u kale wa lenga okulongela Jehova. (Deut. 4:9, 10) Nonande Josef ka li a teelelika paMhango a kale ha twala oukwaneumbo waye kuJerusalem opo va ka dane Opaasa “keshe omudo,” okwa kala he shi ningi. (Luk. 2:41, 42) Otashi dulika ovashamane vamwe vopefimbo laye va li hava tale ko olweendo la tya ngaho lihe na oshilonga, hali mane po efimbo notali pula oimaliwa ihapu. Ashike Josef okwa li a lenga neenghono oinima yopakalunga, nokwa li a honga ovana va ninge sha faafana. Maria naye okwa li yo e shii nawa Omishangwa. Okwa li a honga ovana va kale ve hole Eendjovo daKalunga okupitila moilonga nomeendjovo.

13. Ongahelipi ovalihomboli vamwe va li va shikula oshihopaenenwa shaJosef naMaria?

¹³ Nihad naAlma, ovo va tumbulwa pombada, navo ova li va shikula oshihopaenenwa shaJosef naMaria. Ongahelipi sha li she va kwafela va tekule okamonamati kavo ka kale ke hole noka longele Kalunga? Ova ti: “Otwa li twa honga okamonamati ketu nghee sha fimana okukala metwokumwe nomafinamhango aJehova mokukalamwenyo kwetu.” Nihad okwa weda ko a ti: “Tulila po okaana koye oshihopaenenwa shiwa.”

14. Omolwashike ovadali va pumbwa okushiiva ovo hava endafana nounona vavo?

¹⁴ Kwafela ounona voye va hoolole eendafano liwa. Ovadali aveshe, omushamane nomukulukadi, ove na oshinakuwanifwa shokushiiva kutya ounona vavo ohava endafana noolyelye nosho yo osho tava ningi. Osho osha kwatela mo okushiiva kutya ounona vavo ohava kwatafana noolyelye kointaneta nosho yo meengodi. Okweendafana kwa tya ngaho ohaku nwefa mo okudiladila neenghatu davo. — 1 Kor. 15:33.

15. Ovadali otave lihongo shike koshimoniwa shaJessie?

¹⁵ Oshike ovadali va pumbwa okuninga ngeenge kave shii okulongifa okompiyuta ile ongodi? Jessie wokoPhilippine okwa ti: “Otu shii ashike shinini kombinga youteknologi. Ashike osho inashi tu imba tuha lombwele ovana vetu oiponga oyo hai dulu okweetifwa koikwaelektronika.” Jessie ina indika ovana vaye vaha longife oikwaelektronika molwaashi ehe i shii. Okwa ti: “Ohandi ladipike ovana vange va longife oikwaelektronika opo ve lihonge elaka lipe, ve lilongekidile okwoongala nokulesha Ombiibeli efiku keshe.” Ngeenge omu li ovadali, mbela omwa kundafana novana veni oshitukulwa shi na sha “novanyasha” osho tashi hangwa ko-jw.org^® shi na sha nanghee tava dulu okukala nondjele ngeenge tashi uya pokulongifa ongodi nosho yo okutula omafano kointaneta? Mbela omwa tala navo okavidio Olyelye te ku pangele, mbela oove ile oshikwaelektronika shoye? nosho yo Lungamena omakwatafano opaintaneta? * Oilongifo ya tya ngaho oya denga mbada ngeenge tamu hongo ovana  veni nghee ve na okulongifa pandunge oikwaelektronika. — Omayel. 13:20.

16. Ovadali vahapu ova ninga po shike, naasho osha eta oidjemo ilipi?

¹⁶ Ovadali vamwe ova ninga omalongekido opo ounona vavo va kale hava endafana novanhu ovo ve li oshihopaenenwa shiwa mokulongela Kalunga. Pashihopaenenwa, N’Déni naBomine, ovalihomboli vokoCôte d’Ivoire, ohava shivi luhapu omupashukilishikandjo e uye a dje keumbo lavo. N’Déni okwa ti: “Osho osha li sha nwefa mo nawa omonamati wetu woshiveli. Okwa li a hovela okukokola ondjila, nopaife ota longo e li omukalelipo womupashukilishikandjo.” Mbela ito dulu okuninga sha faafana mokuhoolola ovo tava endafana novana voye?

17-18. Onaini ovadali va pumbwa okuhovela okudeula ounona vavo?

¹⁷ Deula ovana voye diva ngaashi tashi dulika. Ovadali ovo hava deula ounona vavo diva, ohava mono oidjemo iwa. (Omayel. 22:6) Diladila kuTimoteus, oo a li ha i momalweendo nomuyapostoli Paulus. Ina yaTimoteus, Eunike, nosho yo inakulu, Loide, ova li ve mu deula okudja ‘kounona.’ — 2 Tim. 1:5; 3:15.

¹⁸ Natango ovalihomboli vamwe vokoCôte d’Ivoire, Jean-Claude naPeace, ova li va dula okutekula ounona aveshe vahamano va kale ve hole Jehova noku mu longela. Oshike she va kwafela va pondole? Ova li va shikula oshihopaenenwa shaEunike naLoide. Ova ti: “Otwa li twa findila Eendjovo daKalunga momitima dovana vetu okudja kounona, diva ashike eshi opo va dalwa.” — Deut. 6:6, 7.

19. Osha kwatela mo shike okufindila Eendjovo daKalunga momitima dounona?

¹⁹ Osha hala okutya ngahelipi ‘okufindila’ Eendjovo daKalunga momitima dounona? ‘Okufindila’ otashi ti “okuhonga noku va dimbulukifa lwoikando.” Opo ovadali va dule okuninga ngaho, ova pumbwa okukala hava kala efimbo lihapu nounona vavo. Otashi dulika shi kale sha fa shilolola okukala to dimbulukifa ovana voye lwoikando. Onghee hano, ovadali ova pumbwa okutala ko omhito oyo i li efimbo lokukwafela ovana va ude ko Eendjovo daKalunga noku di tula moilonga.

20. Yelifa nghee Epsalme 127:4 tali dulu okutulwa moilonga eshi ounona tava tekulwa.

²⁰ Kala u na eendunge dokuyoolola. Epsalme  127 ola yelekanifa ounona noikuti. (Lesha Epsalme 127:4.) Ngaashi ashike oikuti hai longwa moinima ya yoolokafana noihai kala i fike pamwe, okaana keshe oka yooloka ko kukakwao. Onghee ovadali ove na okutala kutya okaana keshe otave ka deula ngahelipi. Ovalihomboli vamwe vokuIsrael vopefimbo letu, ovo va tekula ounona vavali va longele Jehova, ova mona kutya ohashi pondola eshi va ti: “Okaana keshe ohatu konakona nako pauhandimwe.” Oshoshili kutya omutwe woukwaneumbo keshe ou na okutokola kutya okaana keshe oke na okukonakona monghedi ilipi.

21. Jehova oha kwafele ngahelipi ovadali?

²¹ Omafimbo amwe, ovadali otashi dulika va kale va wililwa po eshi tava tekula ounona, ashike ounona ove li oshali ya dja kuJehova. Jehova ota ka kala alushe nokuyambidida ovadali. Okwe lilongekida okupwilikina komailikano ovadali. Oha nyamukula omailikano avo okupitila mOmbiibeli, moishangomwa yetu, nosho yo moihopaenenwa nomayele ovadali ovanawino ovo ve li meongalo.

22. Oinima ya denga mbada ilipi ovadali tava dulu okupa ovana vavo?

²² Vamwe ohava ti okaana ohaka tekulwa ashike fiyo otaka wanifa omido 20, ashike okukala omudali oshinima tashi twikile. Oshinima sha denga mbada osho ovadali tava dulu okupa ounona vavo, oku va ulikila ohole, okukala navo noku va deulila ehongo lopakalunga. Okaana keshe ohaka tambula edeulo la tya ngaho monghedi ya yooloka ko kuvakwao. Vahapu ova tekulwa kovadali ovo ve hole Jehova, nohava kala ve udite ngaashi Joanna Mae, omumwameme wokuAsia oo a ti: “Edeulo olo nda pewa kovadali vange onde li pandula molwaashi ova honga nge ndi kale ndi hole Jehova. Ova kwafela nge ndi kale nonghalamwenyo i na eityo.” (Omayel. 23:24, 25) Ovamwatate novamwameme omamiliyona ove udite ngaashi Joanna Mae.