Natu ka taleni kutya ovelishe oyo oya hala okutya ngahelipi. Ovelishe oyo oya yukifwa komunhu oo a shakeneka omaupyakadi mahapu, ndele ohe lididimike fiyo osheshi onghalo ya tya po xwepo.

Oshikalimo shovelishe oyo otashi ti ngaha: “Omuhenakalunga ove, ino nangela eumbo lomuyuki, ino hanauna po onhele yaye yetulumuko. Osheshi luheyali omuyuki ta punduka ndele ta penduka vali, ndelenee ovahenakalunga tava ka wila momupya. Ino hafa, omutondadi woye ngeenge ta wile po. Ndele ino kuwilila komwenyo, ye ngeenge ta punduka.” — Omayel. 24:15-17.

Vamwe ove wete kutya ovelishe 16 otai popi kombinga yomunhu oo a nyona, ndele ta kala vali e na ekwatafano liwa naKalunga. Ovakwatelikomesho vavali vomalongelokalunga muBritain ova shanga va ti kutya “ovaudifi vonale nosho yo vokunena osho ve udite ko ngaho omushangwa oo.” Ovakwatelikomesho ovo ova weda ko tava ti: “Omunhu muwa ota dulu okuwila . . . menyono la kwata moiti lwoikando, ndele ngeenge natango oku hole Kalunga nokwe livele ombedi ota dulu okukala e na ekwatafano liwa naKalunga ngeenge okwa kala nokulivela ombedi lwoikando oyo a punduka.” Ediladilo la tya ngaho ola yukifwa komunhu oo ina hala okweefa po enyono la tya ngaho. Oha diladila kutya Kalunga ota kala noku mu dimina po nonande oku endulule enyono la faafana lwoikando.

Ashike ovelishe 16 hasho ya hala okutya ngaho.

Oshitya shOshiheberi osho sha tolokwa “punduka” movelishe 16 nosho yo 17 ohashi longifwa meenghedi di lili noku lili. Otashi dulu okuyukifwa kongobe yomhedi ya wila mondjila, komunhu a wa pombada yetungo ile emanya la wila pedu. (Deut. 22:4, 8; Amos 9:9, NW) Oshitya osho otashi dulu yo okulongifwa meityo lopafaneko, ngaashi tashi shikula: “Omanha omulumenhu muwa taa yukifwa kOmwene, ndele ta hafele mondjila yaye. Ngeenge ta punduka, ita wililile po, osheshi Omwene ote mu yakele.” — Eps. 37:23, 24; Omayel. 11:5; 13:17; 17:20.

Omuprofesa Edward H. Plumptre okwa popya a ti: “Oshitya shOshiheberi [“punduka”] ihashi longifwa nandenande tashi ulike kenyono.” Natango omuhongwanhu umwe okwa ngonga ovelishe 16 ta ti: “Osha nyika oulai okuungaunga nai novapiya vaKalunga molwaashi alushe ohava pondola, ofimbo ovahenakalunga hava xulile kekwena la fita!”

Okutala kouyelele aushe oo, omunhu oo ta popiwa a “punduka” mOmayeletumbulo 24:16 oye oo a shakeneka omaupyakadi ile omaudjuu, tashi dulika nokuli lwoikando, ndele haye oo a wila menyono. Pefimbo longhalelo ei yoinima, omuyuki otashi dulika a kale ehe na oukolele ile e na omaupyakadi vali amwe. Otashi dulika nokuli a kale ta hepekwa kepangelo omolweitavelo laye. Ashike oha kala e na elineekelo kutya Kalunga ote mu yambidida noku mu kwafela a ungaunge nonghalo oyo fiyo a pita mo. Lipula kutya, ‘Mbela oikando ingapi handi mono ovapiya vaKalunga tave shi endifa nawa?’ Omolwashike mbela? Ohatu dulu okukala noushili kutya “Omwene, omuyakeli waaveshe tava punduka, naava va nyongamekwa koufiye, ohe va nyongamununa.” — Eps. 41:1-3; 145:14-19.

“Omuyuki” iha kala a hafa ngeenge ovanhu vakwao tava shakeneke omaupyakadi. Ponhele yaasho, oha kala e shii kutya “ava hava tila Kalunga, otava ka ningilwa nawa, shaashi tava tila koshipala shaye.” — Omuud. 8:11-13; Job 31:3-6; Eps. 27:5, 6.