Ahowe, Ombiibeli nosho yo ondjokonona inai popya shi na sha naasho.

Onghedi omo eendjovo edi da tolokwa mEembiibeli dihapu oya ningifa ovanhu va diladile kutya Ovakriste vamwe vopefimbo laPaulus ova li hava ninginifwa ponhele yovafi. Pashihopaenenwa, o-New International Version oya ti: “Paife ngeenge kaku na enyumuko, oshike hano tava ninginifilwa ponhele yovafi?”

Kakele kaasho, didilika osho ovahongwanhu vavali vOmbiibeli va popya. Omuhongwanhu umwe wOmbiibeli Gregory Lockwood okwa ti kutya “mOmbiibeli ile mondjokonona kamu na oumbangi oo tau ulike kutya umwe okwa li a ninginifwa ponhele yaao a fya.” Sha faafana, Omuprofesa wedina Gordon D. Fee okwa shanga a ti: “Mondjokonona ile mOmbiibeli inamu shangwa eninginifo la tya ngaho. Etestamenti Lipe inali popya nandenande kombinga yoshinima sha tya ngaho, nonokutya kape na oumbangi oo tau ulike kutya osha li sha ningwa kOvakriste votete ile momalongelokalunga oo e ke uya diva konima yefyo lovayapostoli.”

Ombiibeli oya popya kutya ovashikuli vaJesus ove na oku ka ‘ninga ovanhu vomoiwana aishe ovahongwa, noku va ninginifa noku va honga okudiinina oinima aishe oyo e va lombwela.’ (Mat. 28:19, 20) Ofimbo omunhu ina ninga omuhongwa a ninginifwa, oku na tete okulihonga, okwiitavela nokudulika kuJehova nosho yo kOmona waye. Ovo va hangwa nale va fya nove li meembila itava dulu okuninga ngaho, nokape na Omukriste e na omwenyo ta dulu oku shi ninga ponhele yavo. — Omuud. 9:5, 10; Joh. 4:1; 1 Kor. 1:14-16.

Mbela Paulus okwa li ta popi kombinga yashike?

Ovakorinto vamwe kava li va itavela kutya oonakufya otava ka nyumuka. (1 Kor. 15:12) Paulus okwa li e va ulikila kutya osho osha puka. Ngahelipi mbela? Okwa popya kutya okwa kala a “taalela efyo efiku keshe.” Oshoshili kutya pefimbo opo okwa li natango e li momwenyo. Nonande okwa li ha shakeneke oiponga, okwa li e na elineekelo kutya ngeenge okwa fi ota ka nyumunwa e li oshishitwa shopamhepo oshinaenghono, ngaashi ashike Jesus. — 1 Kor. 15:30-32, 42-44.

Ovakorinto ova li ve na okuuda ko kutya okukala Omukriste omuvaekwa osha hala okutya ou na okushakeneka omaupyakadi efiku keshe nokunyumunwa konima yefyo. ‘Okuninginifwa nokuhanganifwa naKristus Jesus’ osha kwatela mo ‘okuninginifwa mefyo laye.’ (Rom. 6:3) Osho osha hala okutya ngaashi Jesus, navo ove na okushakeneka omaupyakadi nove na okufya opo va nyumuninwe meulu.

Omido di dulife pumbali konima eshi Jesus a ninginifwa momeva, okwa lombwela ovayapostoli vaye vavali kutya navo ove na ‘okuninginifwa neninginifo olo a ninginifwa.’ (Mark. 10:38, 39) Jesus ka li ta popi shi na sha nokuninginifwa momeva. Okwa li a hala okutya okudulika kwaye kuKalunga otaku twala fiyo omefyo. Paulus okwa popya a ti kutya ovavaekwa otava ka ‘hepekwa pamwe naKristus, nokutumbalekwa yo pamwe naye.’ (Rom. 8:16, 17; 2 Kor. 4:17) Onghee hano, navo ove na okufya opo va nyumuninwe omwenyo womeulu.

Eendjovo daPaulus otadi dulu okutolokwa paushili kutya: “Ngeenge oonakufya itava ka nyumunwa, ongahelipi shi na sha naavo va ninginifilwa okufya? Nongeenge oonakufya itava ka nyumunwa, omolwashike va ninginifwa eninginifo la tya ngaho?”