Owa lesha ngoo nawanawa Eeshungonangelo dodula ei? Tala ngeenge oto mono omanyamukulo omapulo taa shikula:

Eshilipaleko lilipi tali hangwa muJakob 5:11, eshi a ti kutya Jehova “omunalukeno nomunanghenda”?

Otu na oushili kutya Jehova ohe tu dimine po, ngeenge twa nyona kuye omolwonghenda yaye. Jakob 5:11 ote tu shilipaleke yo kutya Jehova oha kala a halelela oku tu kwafela omolwolukeno laye. Nafye ohatu dulu oku mu hopaenena. — w21.01, ep. 21.

Omolwashike Jehova a tula po oukwamutwe?

Okwe shi ninga omolwohole yaye. Elongekido loukwamutwe ole shi ningifa tashi shiiva, opo oukwaneumbo waye u kale nombili nopalandulafano. Oukwaneumbo keshe, oo hau kala metwokumwe nelongekido olo, ohau kala u shii kutya olyelye e na okuninga omatokolo axuuninwa nokushilipaleka kutya okwa tulwa moilonga. — w21.02, ep. 3.

Omolwashike Ovakriste ve na okukala va lungama, ngeenge tava longifa eeprograma dokutuma nokuyakula omatumwalaka paelektronika?

Ngeenge omunhu okwa hoolola okulongifa eeprograma odo, osha fimana okukala a lungama, ngeenge ta hoolola ookaume. Naasho ihashi kala shipu okuninga, unene tuu ngeenge wa waimina eengudu dinene. (1 Tim. 5:13) Ohapa dulu yo okuholoka omaupyakadi e na sha nokuholola eelaporta, odo inadi pita natango, nosho yo okulongifa ovamwatate moinima yopangeshefa. — w21.03, ep. 31.

Omolwashike Kalunga a efa Jesus a mone oixuna nokufya?

Shotete, Jesus okwa li e na okweendjelelifwa komuti, opo a mangulule Ovajuda mefingo. (Gal. 3:10, 13) Etomheno etivali ololo kutya Jehova okwa li ta deulile Jesus onghandangala oyo a li ta ka dana monakwiiwa, eshi ta ka kala Omupristeri wetu Munene. Etomheno etitatu ololo kutya Jesus okwa kala a kanyatela oudiinini waye nokwa ulika kutya Satana omunaipupulu. (Job 1:9-11) — w21.04, ep. 16-17.

Oshike u na okuninga po, ngeenge oshidjuu okumona ovanhu moukalele?

Oto ka popya novanhu vahapu, ngeenge owa kala ho udifa pefimbo olo ovanhu hava kala momaumbo. Oto dulu yo okukala ho udifile moitukulwa ya yoolokafana. Ile u kendabale eenghedi da yoolokafana dokuudifa ngaashi okushanga eenhumwafo. — w21.05, ep. 15-16.

Omuyapostoli Paulus okwa li a hala kutya ngahelipi eshi a ti: “Onda fya mo momhango okupitila momhango”? (Gal. 2:19)

Omhango oyo Kalunga a li a pa Moses oya kwafela ovanhu ovalunde noinava wanenena va mone kutya ova nyona nova tambule ko Kristus. (Gal. 3:19, 24) Oya kwafela Paulus a tambule ko Kristus. Onghee hano, Paulus okwa li a “fya mo momhango,” sha hala kutya ka li vali ta wilikwa kOmhango. — w21.06, ep. 31.

Ongahelipi Jehova e tu tulila po oshihopaenenwa shi na sha nelididimiko?

Jehova okwa kala te lididimikile okushekwa kwedina laye, omapataneko e na sha nounamapangelo waye, ounashibofa wavamwe vomoludalo laye, omalundilo akeshe fiku Ondiaboli nokumona oixuna kwovapiya vaye. Ke na vali ekwatafano nookaume kaye ovo va fya. Ote lididimikile yo ovanhu ovakolokoshi, ovo hava ehameke vakwao, nosho yo okunyonwa kweshito laye. — w21.07, ep. 9-12.

Ongahelipi Josef e tu tulila po oshihopaenenwa shiwa shokuteelela nelididimiko?

Okwa li e lididimika, eshi ovamwaxe va li tava ungaunga naye shihe li pauyuki. Okwa li a monika ondjo omolwoshinima osho i na ninga nokwa kala modolongo oule womido muEgipiti. — w21.08, ep. 12.

Haggai 2:6-9, 20-22 ota popi ekakamo lopafaneko lilipi?

Oiwana inai tambula ko etumwalaka lOuhamba, ashike ovanhu vahapu ova tambula ko oshili. Mafiku, oiwana otai ka kakama lwaxuuninwa, eshi tai ka hanaunwa po. — w21.09, ep. 15-19.

Omolwashike tuhe na okweefa po okuudifa?

Jehova oha kala e wete eenghendabala detu nohashi mu hafifa. Ohatu ka mona omwenyo waalushe, ngeenge inatu loloka. — w21.10, ep. 25-26.

Leviticus etukulwa 19 ote tu kwafele ngahelipi tu tule moilonga omayele aa taa ti: “Kaleni ovayapuki moinima aishe”? (1 Pet. 1:15)

Eendjovo odo tadi hangwa movelishe oyo otashi dulika da tofwa muLeviticus 19:2. Etukulwa 19 omu na oihopaenenwa ihapu oyo tai tu kwafele tu tule moilonga 1 Petrus 1:15 mokukalamwenyo kwetu kwakeshe fiku. — w21.12, ep. 3-4.