1. Omolwashike hatu dulu okutya Abraham ka li a teelela epwanga?

 JEHOVA okwa li a udanekela kaume kaye Abraham kutya oiwana aishe kombada yedu otai ka nangekwa noupuna okupitila moludalo laye. (Gen. 15:5; 22:18) Molwaashi Abraham okwa li e na eitavelo muKalunga, okwa li a tomhwa kutya Kalunga ota ka wanifa po eudaneko laye. Ndele nande ongaho, nokuli naashi Abraham a li e na omido 100, nomukulukadi waye a li e na omido 90, ovalihomboli ovo ovadiinini kava li ve na natango okaana. (Gen. 21:​1-7) Ashike Ombiibeli oya ti: ‘Abraham okwa li e na eteelelo neitavelo kutya ota ka ninga xe yoiwana ihapu, ngaashi sha popiwa.’ (Rom. 4:18) Ou shii kutya osho Abraham a li a teelela osha ka wanifwa po. Okwa ka dala omonamati, Isak, oo a kala a teelela oule wefimbo. Omolwashike Abraham a li e na elineekelo kutya Jehova ota ka wanifa po eudaneko laye?

2. Omolwashike Abraham a li a tomhwa kutya eudaneko laJehova otali ka wanifwa po?

² Molwaashi Abraham okwa li e na ekwatafano lopofingo naJehova, Abraham “okwa li a tomhwa filufilu kutya osho Kalunga a udaneka” otashi ka wanifwa po. (Rom. 4:21) Jehova okwa li a hokwa Abraham, nokwa popya kutya omuyuki omolweitavelo laye. (Jak. 2:23) Ngaashi tashi hangwa mOvaroma 4:​18, Abraham okwa li e na eitavelo nosho yo eteelelo. Paife natu ka taleni osho omuyapostoli Paulus a popya shi na sha neteelelo, ngaashi tashi hangwa mOvaroma etukulwa 5.

3. Paulus okwa yelifa shike shi na sha neteelelo?

³ Paulus okwa yelifa kutya omolwashike hatu dulu okukala noushili kutya ‘eteelelo letu itali ke tu nyemateka.’ (Rom. 5:5) Okwe tu kwafela yo tu ude ko nghee eteelelo letu, tu li Ovakriste, tali dulu okukala la twa. Eshi hatu kundafana Ovaroma  5:​1-5, diladila kunghee eteelelo loye li na sha nonakwiiwa la enda tali ningi lolela mokweendela ko kwefimbo. Eenghundafana detu otadi ka ulika yo nghee to dulu okukaleka eteelelo loye la twa shi dulife paife. Tete natu ka kundafaneni eteelelo letu litunhula, olo Paulus a popya kutya itali ke tu nyemateka.

4. Oshike sha kundafanwa mOvaroma 5:​1, 2?

⁴ Lesha Ovaroma 5:​1, 2. Paulus okwa shangela eongalo lomuRoma eendjovo odo. Ovamwatate novamwameme vomuRoma ove lihonga kombinga yaJehova naJesus, va li ve na eitavelo nova ninga Ovakriste. Onghee Kalunga ‘okwe va tala ko ovayuki’ omolweitavelo, nokwe va vaeka nomhepo iyapuki. Kungaho, ova li tava dulu okuteelela nodjuulufi ondjabi itunhula nova li ve na oushili kutya otave ke i pewa.

5. Ovavaekwa ove na eteelelo lilipi?

⁵ Lwanima, Paulus okwa ka shangela Ovakriste ovavaekwa vomuEfeso kombinga yeteelelo olo Kalunga e va pa. Eteelelo olo ola kwatela mo osho sha ‘udanekelwa ovayapuki.’ (Ef. 1:18) Paulus okwa li yo a lombwela Ovakolossi kutya openi tava ka mona ondjabi yavo. Okwa ti kutya ova ‘teelela ondjabi oyo va tuvikililwa meulu.’ (Kol. 1:​4, 5) Eteelelo lOvakriste ovavaekwa ololo kutya otava ka nyumuninwa omwenyo waalushe meulu, omo tava ka pangela pamwe naKristus. — 1 Tes. 4:​13-17; Eh. 20:6.

6. Oshike osho omumwatate umwe omuvaekwa a popya kombinga yeteelelo laye?

⁶ Ovakriste ovavaekwa ova lenga eteelelo olo neenghono. Umwe womuvo, omumwatate Frederick Franz, okwa popya tashi di komutima, a ti: “Eteelelo letu oshinima sholela, notali ka wanifilwa lela oshilyo keshe shokangudu 144 000 nokuli shi dulife osho twa diladila.” Konima eshi omumwatate Franz a kala ta longele Kalunga noudiinini oule womido dihapu, mo 1991, okwa ti: “Inatu efa okulenga eteelelo olo. . . . Ohatu li pandula unene, eshi hatu li teelele efimbo lile.  Ola wana okuteelelwa, nande ngeno okwa li tali pula omido emiliyona. Ame onda lenga eteelelo letu neenghono shi dulife nale.”

7-8. Eteelelo lilipi ovanhu vahapu ve na? (Ovaroma 8:​20, 21)

⁷ Kunena, ovanhu vahapu ovo tava longele Jehova, ove na eteelelo limwe li lili. Ove na eteelelo olo Abraham a li e na lokukala nomwenyo fiyo alushe kombada yedu koshi yOuhamba waKalunga. (Heb. 11:​8-10, 13) Paulus okwa shanga kombinga yoinima itunhula oyo tai ka hafelwa kwaavo ve na eteelelo olo. (Lesha Ovaroma 8:​20, 21.) Oshikando shotete, eshi we lihonga kombinga yeudaneko lOmbiibeli li na sha nonakwiiwa, shilipi po sha li she ku kuma neenghono? Mbela osheshi we lihonga kutya efiku limwe oto ka kala wa wanenena noito ka longa vali oulunde? Ile owa li wa tunhukwa, eshi we lihonga kutya ovanhu ovo u hole, ovo va fya, otava ka kala vali nomwenyo moparadisa kombada yedu? ‘Omolweteelelo’ olo Kalunga e tu pa, ou na oinima ihapu itunhula, oyo wa teelela nodjuulufi.

⁸ Kutya nee otu na eteelelo loku ka hafela okukala nomwenyo fiyo alushe meulu, ile okombada yedu, otu na eteelelo litunhula, olo tali tu pe etomheno lokukala twa hafa. Eteelelo letu litunhula otali ka kala la twa. Paulus okwa yelifa nghee osho tashi dulu okuningwa. Natu ka konakoneni osho a popya shi na sha neteelelo letu. Ngeenge otwa ningi ngaho, eendjovo daye otadi ke tu kwafela tu kale tu na omukumo lela kutya osho twa teelela otashi ka wanifwa.

9-10. Ngaashi sha ulikwa moshihopaenenwa shaPaulus, Ovakriste otava dulu okuteelela shike? (Ovaroma 5:3) (Tala yo omafano.)

⁹ Lesha Ovaroma 5:3. Paulus okwa popya kutya ngeenge hatu shakeneke omaudjuu, eteelelo letu ohali kala la twa. Osho otashi dulu oku tu kumwifa. Ashike ovashikuli aveshe vaKristus otava dulu okushakeneka omaudjuu. Natu ka taleni koshihopaenenwa shaPaulus. Okwa shangela Ovatessalonika, a ti: “Eshi  twa li punye, otwa li hatu mu lombwele kutya ohatu ka hangwa komaudjuu, naasho osho tashi ningwa paife.” (1 Tes. 3:4) Okwa shangela yo Ovakorinto, a ti: ‘Ovamwatate, otwa hala mu shiive omaudjuu oo twa shakeneka nokatwa li nokuli tu shii ngeenge ohatu ka xupa ngoo.’ — 2 Kor. 1:8; 11:​23-27.

¹⁰ Kunena, Ovakriste navo otava dulu okushakeneka omaudjuu onhumba. (2 Tim. 3:12) Mbela owa hepekwa, molwaashi wa itavela Jesus nowa hovela oku mu shikula? Ookaume koye nosho yo ovapambele otashi dulika ve ku sheke. Otashi dulika nokuli va ungaunge naave nai. Ile otashi dulika omuyandji woye woilonga, ile ovanailonga pamwe naave ve ku hepeke, molwaashi u li omunashili. (Heb. 13:18) Mbela oto patanekwa kepangelo, molwaashi to udifile vamwe kombinga yeteelelo loye? Kashi na nee mbudi kutya otwa taalela omaudjuu a tya ngahelipi, Paulus okwa ti kutya otu na okukala twa hafa. Omolwashike mbela?

11. Omolwashike tu na okukala twa tokola toko okulididimikila eyeleko keshe?

¹¹ Ohatu dulu okukala twa hafa nokuli ngeenge hatu mono oixuna, molwaashi otu shii kutya otashi tu kwafele tu kulike oukwatya wa fimana. Ngaashi sha popiwa mOvaroma 5:​3, “omaudjuu otae tu kwafele tu lididimike.” Ovakriste aveshe ohava shakeneke omaudjuu, onghee ove na okulididimika. Otu na okukala twa tokola toko okulididimikila eyeleko keshe, olo tashi dulika tu shakeneke. Ohatu ka pewa ashike ondjabi yaasho twa teelela, ngeenge otwe lididimike nokutwikila okulongela ashike Jehova. Inatu hala okukala twa fa ovanhu ovo Jesus a li e na momadiladilo, eshi a li ta popi shi na sha neembuto odo da wila momamanya. Potete ohava tambula ko eendjovo nehafo, “ndele shimha pa holoka oudjuu, ile ehepeko” ohava punduka. (Mat. 13:​5, 6, 20, 21) Ihatu kala twa hafa ngeenge hatu patanekwa, ile hatu yelekwa, ndele ohatu mono ouwa, eshi hatu lididimike nokutwikila okulongela Jehova. Omonghedi ilipi mbela?

12. Ohatu mono ouwa ngahelipi mokulididimikila omayeleko?

¹² Omuhongwa Jakob okwa divilika omauwa oo haa di mokulididimikila omayeleko. Okwa ti: “Eshi tamu lididimike, otamu lideula nye vene, opo mu kale muhe na oshipo nomu kale hamu shi endifa nawa moinima aishe.” (Jak. 1:​2-4) Jakob okwa popya elididimiko la fa li na oshilonga osho tali longo. Oshilonga shilipi elididimiko tali longo? Otali dulu oku ku kwafela u kulike monghedi ya denga mbada omaukwatya ngaashi onheni, eitavelo nosho yo okulineekela muKalunga. Ashike ohatu dulu okumona vali ouwa umwe wa denga mbada melididimiko.

13-14. Elididimiko ohali etifa shike, naasho osha pambafana ngahelipi neteelelo? (Ovaroma 5:4)

¹³ Lesha Ovaroma 5:4. Paulus okwa popya kutya elididimiko otali tu kwafele tu kale “twa hokiwa kuKalunga.” Elididimiko loye otali ku ningifa u kale wa hokiwa kuJehova. Osho inashi hala okutya Jehova oha kala a hafa, ngeenge to shakeneke omayeleko, ile omaupyakadi. Kalunga oove a hokwa. Elididimiko loye otali ku ningifa u kale wa hokiwa kuKalunga. Olo kali fi tuu enangeko noupuna la denga mbada! — Eps. 5:12.

¹⁴ Dimbuluka kutya Abraham okwa li a shakeneka omayeleko, naashi e lididimikila nomupondo, okwa li a hafifa Jehova. Jehova okwa li e mu tala ko e li kaume kaye nosho yo omuyuki. (Gen. 15:6; Rom. 4:​13, 22) Nafye ota dulu oku tu tala ko ngaho. Kalunga iha kala e tu hokwa she likolelela kouhapu woilonga oyo hatu mu longele, ile komaufembanghenda oo tu na. Oha kala e tu hokwa, molwaashi ohatu lididimike nomupondo. Kashi na nee mbudi kutya otu na eedula ngapi, otu li meenghalo da  tya ngahelipi, ile otu na okudula kwa tya ngahelipi, atushe ohatu dulu okulididimika. Mbela oto lididimikile eshongo paife nou li omudiinini kuJehova? Ngeenge osho, shiiva kutya oto hafifa Jehova. Okukala tu shii kutya otwa hokiwa kuJehova, otashi dulu oku tu kuma neenghono. Otashi dulu okupameka eteelelo letu.

15. Paulus okwa popya vali oshitwa shimwe shilipi, nomolwashike tashi dulika sha kumwifa vamwe?

¹⁵ Ngaashi Paulus a yelifa, ohatu kala twa hokiwa kuKalunga, ngeenge otwe lididimikile omayeleko nomupondo. Didilika nghee Paulus a twikila neenghundafana daye, a ti: ‘Okukala twa hokiwa kuKalunga, otashi tu pe eteelelo, neteelelo itali ke tu nyemateka.’ (Rom. 5:​4, 5) Metetekelo, mOvaroma 5:​2, Paulus okwa hangwa a popya kutya Ovakriste vomuRoma ove na eteelelo olo kutya “Kalunga ote ke va pa ondodo ya tumbala.” Oshidjemo, otashi dulika umwe e lipule kutya, ‘Ngeenge Ovakriste ovo ove na nale eteelelo, omolwashike Paulus a ka popya eteelelo lwanima meenghundafana daye?’

16. Ongahelipi eteelelo laumwe hali hovele okukala la twa? (Tala yo omafano.)

¹⁶ Ohatu ka uda ko osho Paulus a li a hala okutya, ngeenge otwa kaleke momadiladilo kutya eteelelo oshinima osho hashi dulu okukala sha twa. Pashihopaenenwa, mbela oto dimbuluka oshikando shotete eshi wa uda eteelelo litunhula olo tali hangwa mEendjovo daKalunga? Otashi dulika pomhito oyo wa li to diladila kutya ediladilo loku ka kala nomwenyo fiyo alushe kombada yedu oliwa, ashike oshinima sha tya ngaho kashi na efiku shi ningwe. Ndele eshi wa enda to lihongo shihapu kombinga yaJehova nosho yo omaudaneko Ombiibeli, paife owa tomha filufilu kutya osho otashi ka ningwa shili.

17. Ongahelipi eteelelo loye hali twikile okukala la twa, konima eshi we liyapulila Jehova nokuninginifwa?

¹⁷ Konima eshi wa ninginifwa, owa twikila okushiiva nawa Jehova, nokukala u mu hole shi  dulife nale, naasho oshe ku ningifa u kale u na elineekelo kutya oinima oyo wa teelela otai ka wanifwa shili. (Heb. 5:13–6:1) Otashi dulika wa mona osho sha popiwa mOvaroma 5:​2-4. Owa shakeneka omaudjuu e lili noku lili, ndele owe e lididimikila, nowa mona kutya Jehova okwe ku hokwa. Molwaashi ou shii kutya Jehova oku ku hole nokwe ku hokwa, paife ou na etomheno la femba lokuteelela oku ka mona oinima oyo a udaneka. Eteelelo loye ola twa shi dulife nale. Paife ololela kwoove. Ole ku kuma neenghono, tali nwefa mo onghalamwenyo yoye aishe notali lundulula onghedi omo ho ungaunga novanhu vambuleni, nghee ho ningi omatokolo nanghee ho longifa efimbo loye.

18. Jehova okwa yandja eshilipaleko lilipi?

¹⁸ Omuyapostoli Paulus okwa weda ko oshitwa sha fimana shi na sha neteelelo olo u na, konima eshi Kalunga a ulika kutya okwe ku hokwa. Kalunga okwe ku shilipaleka kutya osho wa teelela otashi ka wanifwa po. Omolwashike to dulu okukala noushili filufilu? Paulus okwa nwefwa mo a yandje eshilipaleko eli kOvakriste, a ti: ‘Eteelelo itali ke tu nyemateka, molwaashi omitima detu oda yadifwa ohole yaKalunga okupitila momhepo iyapuki oyo twa pewa.’ (Rom. 5:5) Ou na etomheno lokukala noushili u na sha neteelelo olo Jehova e ku pa.

19. Oushili ulipi to dulu okukala u na u na sha neteelelo loye?

¹⁹ Diladila keudaneko olo Kalunga a udanekela Abraham, kunghee a ulika kutya okwe mu hokwa nokwe mu tala ko e li kaume kaYe. Osho Abraham a li a teelela osha li sha wanifwa po. Ombiibeli oya ti: “Abraham okwa li a wanifilwa eudaneko olo omolwelididimiko laye.” (Heb. 6:15; 11:​9, 18; Rom. 4:​20-22) Ka li a nyematekwa nandenande. Naave yo oto dulu okukala noushili kutya, ngeenge owa kala omudiinini oto ka pewa ondjabi oyo wa teelela. Ou na omatomheno mahapu okukala wa hafa, molwaashi ou shii kutya oto ka wanifilwa po osho wa teelela, noito ka nyematekwa. (Rom. 12:12) Paulus okwa ti: “Ndele molwaashi omwe lineekela muKalunga ou ha yandje eteelelo, ne mu pe ehafo nombili opo mu kale mu na eteelelo la twa kekwafo lomhepo iyapuki.” — Rom. 15:13.