Owa lesha ngoo nawanawa Eeshungonangelo dodula ei? Tala ngeenge oto mono omanyamukulo omapulo taa shikula:

Oshike sha kwatelwa ‘mokulundulula onghedi yoye yokudiladila’? (Rom. 12:2)

Omwa kwatelwa shihapu shihe fi ashike okulonga oilonga iwa. Omwa kwatelwa okukonakona ounhu wetu womeni nokuninga omalunduluko oo twa pumbwa okuninga, opo tu dulike komifikamhango daJehova ngaashi hatu dulu. — w23.01, ep. 8-9.

Ongahelipi hatu dulu okuulika kutya otu na ondjele, eshi hatu tale oiningwanima yomounyuni?

Otu na ohokwe shi na sha nanghee oiningwanima oyo tai ningwa paife mounyuni tai wanifa po omaxunganeko. Ponhele yokutengeneka, osho tashi dulu okweeta etukauko, otwa pumbwa okukanghamekela eenghundafana detu kouyelele oo wa nyanyangidwa kehangano laJehova (1 Kor. 1:10) — w23.02, ep. 16.

Eninginifo laJesus ola yooloka ko ngahelipi kwaalo lovashikuli vaye?

Jesus ka li a pumbwa okuliyapulila Jehova, molwaashi okwa dja moshiwana she liyapulila Kalunga. Ka li a pumbwa okulivela ombedi omolwomatimba aye, molwaashi okwa li a wanenena noka li a nyona sha. — w23.03, ep. 5.

Ongahelipi hatu dulu okukwafela vakwetu va yandje omatyekosha pokwoongala?

Ohatu dulu okukaleka omatyekosha etu e li pauxupi, nokungaho ohatu ka pa vakwetu omhito va kufe ombinga. Ohatu ka henuka yo okupopya oitwa ihapu. Nokungaho vakwetu otava ka kala ve na sha shokutya. — w23.04, ep. 23.

“Ondjila iyapuki,” oyo ya popiwa muJesaja 35:​8, otai ulike kushike?

Ondjila oyo yopafaneko yakula tete oya li tai ulike kolweendo lOvajuda okudja muBabilon va finda keduumbo lavo. Mbela otai ulike kushike kunena? Omido omafele da tetekela 1919, oilonga yokulongekida oya li ya pwa, mwa kwatelwa oilonga yokutoloka nosho yo okunyanyangida Eembiibeli. Oshiwana shaKalunga osha kala tashi ende ‘mOndjila iyapuki’ sha finda moparadisa yopamhepo oyo tai twala komanangeko noupuna Ouhamba. — w23.05, ep. 15-19.

Omayeletumbulo etukulwa 9 okwa yandja omayele oo a kanghamena kovakainhu vavali vopafaneko velipi?

Omayeletumbulo okwa popya omukainhu ‘elai’ oo eshivo laye tali twala “moshovafi” nosho yo “ounongo,” u lile po omukainhu oo eshivo laye tali twala ‘mondjila yeendunge’ nosho yo komwenyo. (Omayel. 9:​1, 6, 13, 18) — w23.06, ep. 22-24.

Elininipiko nolukeno laKalunga oli liwetikile ngahelipi monghedi omo a ungaunga naLot?

Jehova okwa li a lombwela Lot a dje muSodom a ye onhapo koshitukulwa shokeemhunda. Eshi Lot a li a pula a pitikwe a ye kuSoar, Kalunga okwa li e mu pitika. — w23.07, ep. 21.

Omukulukadi ota dulu okuninga po shike, ngeenge kaume kaye kopahombo oha tale omafano oipala?

Oku na okudimbuluka kutya haye ta pewa ombedi. Oku na okuyandja elitulemo kekwatafano laye naKalunga nokudilonga komahokololo opaMbiibeli ovakainhu ovo va li ve na omaupyakadi nova mona ehekeleko, eshi va ilikana kuJehova. Omukulukadi ota dulu okukwafela kaume kaye kopahombo a henuke eenghalo da nyika oshiponga. — w23.08, ep. 14-17.

Ngeenge umwe te tu pula shi na sha neitavelo letu, ongahelipi eendunge tadi ke tu kwafela tu kale twa ngungumana?

Ohatu dulu okutala ko epulo olo, ile eshongo li li onghedi yokulihonga kutya oshike sha fimana komunhu oo. Kungaho, ohatu ka dula okunyamukula monghedi iwa. — w23.09, ep. 17.

Oshike hatu lihongo kuMaria shi na sha nokukonga eenghono?

Eshi Maria a mona kutya ota ka kala ina yaMessias, Maria okwa li a konga ekwafo kuvamwe. Gabriel naElisabet ova li va longifa Omishangwa va twe omukumo Maria. Nafye ohatu dulu okupamekwa kovalongelikalunga vakwetu. — w23.10, ep. 15.

Ongahelipi Jehova ta dulu okunyamukula omailikano etu?

Jehova okwa udaneka kutya ota ka pwilikina komailikano etu nota ka tala nghee a pambafana nelalakano laye. (Jer. 29:12) Otashi dulika a nyamukule omailikano a faafana meenghedi da yoolokafana, ndele ote ke tu yambidida alushe. — w23.11, ep. 21-22.

Ovaroma 5:2 ova popya “eteelelo,” ndele omolwashike la ka kundafanwa vali movelishe 4?

Omunhu ngeenge a udu onghundana iwa, otashi dulika a kale e na eteelelo loku ka kala nomwenyo fiyo alushe moparadisa kombada yedu. Ndele eshi ta shakeneke omaudjuu, te e lididimikile nokumona kutya okwa hokiwa kuKalunga, eteelelo laye ohali kala la twa nohali ningi oshinima sholela kuye. — w23.12, ep. 12-13.