1. Oshike twa pumbwa okuninga, opo tu kale Ovakriste va pyokoka?

 OHATU kala twa kumwa okumona nghee okaana haka kulu meendelelo nokuninga omukulunhu. Osha fa shi li ngaha kutya okaana ohaka kulu nopehe na okuninga eenghendabala dasha. Ashike ngeenge otwa hala okushikula oshihopaenenwa shaJesus filufilu, otwa pumbwa okuninga po sha. b (1 Kor. 13:11; Heb. 6:1) Opo tu hange elalakano olo, otwa pumbwa okukala tu na ekwatafano lopofingo naJehova. Otwa pumbwa yo omhepo yaye iyapuki, opo i tu kwafele tu kulike omaukwatya oo taa hafifa Kalunga, tu kulike ounghulungu nokulilongekidila oinakuwanifwa yomonakwiiwa. — Omayel. 1:5.

2. Oshike twe lihonga muGenesis 1:​27, noshike hatu ka kundafana moshitukulwa eshi?

² Jehova okwa shita ovanhu va kale ovalumenhu nosho yo ovakainhu. (Lesha Genesis 1:27.) Oshipu okumona kutya ovalumenhu nosho yo ovakainhu ova yoolokafana palutu, ashike ova yoolokafana yo momikalo dikwao vali. Pashihopaenenwa, Jehova okwa shita ovalumenhu nosho yo ovakainhu va wanife po oinakuwanifwa yonhumba yokondadalunde. Onghee ova pumbwa omaukwatya nosho yo ounghulungu oo tau va kwafele va wanife po oinakuwanifwa ya tya ngaho. (Gen. 2:18) Moshitukulwa eshi, ohatu ka kundafana osho omumwameme omunyasha ta dulu okuninga, opo a ninge omukainhu Omukriste a pyokoka. Moshitukulwa tashi landula ko, ohatu ka kundafana osho ovamwatate ovanyasha tava dulu okuninga.

3-4. Openi ovamwameme ovanyasha tava dulu okumona oihopaenenwa iwa, oyo tava dulu okushikula? (Tala yo efano.)

³ Ombiibeli oya tumbula ovakainhu vahapu va didilikwedi, ovo va li ve hole Jehova nova li have mu longele. (Tala oshitukulwa ko-jw.org, shi na oshipalanyole “Oshike hatu lihongo kovakainhu ovo  va popiwa mOmbiibeli?”) Ova li va ulika omaukwatya, oo a tumbulwa momushangwa wetu wenenediladilo, ‘va li ve na ondjele novadiinini moinima aishe.’ Kakele kaasho, ovamwameme otava dulu okumona oihopaenenwa yovakainhu meongalo lavo, ovo ve hole Jehova neenghono nosho yo ovo tava dulu okulihonga kuvo oinima ihapu.

⁴ Ovamwameme ovanyasha, diladileni shi na sha novamwameme ovo mu shii, ovo ve li oshihopaenenwa shiwa, osho tamu dulu okushikula. Didilikeni omaukwatya avo mawa, opo nee tamu diladila shi na sha nanghee tamu dulu okuulika omaukwatya a faafana. Moutendo tava shikula, ohatu ka kundafana omaukwatya atatu a fimana, oo ovamwameme va pumbwa okukulika.

5. Omolwashike elininipiko la fimana komukainhu Omukriste oo a pyokoka?

⁵ Otwa pumbwa okukala ovalininipiki, opo tu kale Ovakriste va pyokoka. Ngeenge omukainhu omulininipiki, ota ka kala e na ekwatafano lopofingo naJehova nosho yo novanhu vakwao. (Jak. 4:6) Pashihopaenenwa, omukainhu oo e hole Jehova ota ka hoolola nelininipiko okuyambidida efinamhango li na sha noukwamutwe, olo la tulwa po kuXe womeulu. (1 Kor. 11:3) Mefinamhango olo, Jehova okwa yelifa kutya olyelye a pa oshinakuwanifwa shokukwatela komesho meongalo nosho yo meumbo. c

6. Ovamwameme ovanyasha oshike tave lihongo shi na sha nelininipiko kuRebeka?

⁶ Natu ka taleni koshihopaenenwa shaRebeka. Okwa li omukainhu omunaendunge, oo monghalamwenyo yaye aishe a li ha katuka nouladi nokwa li e shii opo paluwa naapo paiwa onhapo. (Gen. 24:58; 27:​5-17) Ashike okwa li e na efimaneko nokwa li ha shikula ewiliko nehalo liwa. (Gen. 24:​17, 18, 65) Ngeenge naave oho yambidida omalongekido aJehova nelininipiko, ngaashi Rebeka, oto ka kala oshihopaenenwa shiwa meongalo nosho yo meumbo leni.

7. Ongahelipi ovamwameme ovanyasha tava dulu okuhopaenena Ester mokukala ve na ondjele?

⁷ Ondjele oi li oukwatya umwe oo Ovakriste aveshe va pumbwa. Ombiibeli oya ti kutya ‘ounongo otau kala pwaava ve lininipika.’ (Omayel. 11:2)  Ester okwa li e na ondjele, nokwa li omupiya waKalunga omudiinini. Molwaashi okwa li e na ondjele, ka li a kwatwa kounhwa, eshi a ninga omumbada wohamba. Okwa li a pwilikina komayele omupambele waye Mordekai noku a tula moilonga. (Est. 2:​10, 20, 22) Naave oto dulu okuulika ondjele monghedi ya faafana, mokupula vamwe omayele mawa noku a tula moilonga. — Tit. 2:​3-5.

8. Metwokumwe na 1 Timoteus 2:​9, 10, ongahelipi ondjele tai kwafele omumwameme a ninge omahoololo e li pandunge e na sha nokudjala nosho yo okuliwapeka?

⁸ Ester okwa ulika ondjele monghedi vali ikwao. Okwa li e na ‘ondjelo iwa,’ ashike ka li a yandja elitulemo lihapu kuye mwene. (Est. 2:​7, 15) Ongahelipi omukainhu Omukriste ta dulu okumona ouwa moshihopaenenwa shaEster? Onghedi imwe oya popiwa mu 1 Timoteus 2:​9, 10. (Lesha.) Omuyapostoli Paulus okwa lombwela ovakainhu Ovakriste va djale oikutu tai wapalele noi li pandjele. Oitya yOshigreka oyo ya longifwa apa otai ulike kutya omidjalo domukainhu Omukriste odi na okukala di shii okufimanekwa, notadi ulike kutya oha diladila kunghee vamwe ve uditile omidjalo daye. Otu mu uditile etumba ovamwameme ovaholike ovo hamu djala pandjele.

9. Oshike hatu lihongo koshihopaenenwa shaAbigail?

⁹ Eendunge dokuyoolola odi li oukwatya vali mukwao, oo ovamwameme Ovakriste va pumbwa okukulika, opo va kale va pyokoka. Eendunge dokuyoolola oshike? Odo okudula okushiiva osho sha yuka nosho yo osho sha puka, nokuhoolola okulonga osho sha yuka. Natu ka taleni koshihopaenenwa shaAbigail. Omushamane waye okwa li a ninga etokolo lihe li pandunge, olo la li tali ka kuma ovaneumbo laye aveshe. Abigail okwa li a katuka onghatu meendelelo. Molwaashi okwa li e na eendunge dokuyoolola, okwa li a xupifa eemwenyo. (1 Sam. 25:​14-23, 32-35) Eendunge dokuyoolola otadi tu kwafele yo tu shiive kutya onaini tu na okupopya, nonaini tu na okumwena. Otadi ke tu kwafela yo tu kale tu na ondjele, ngeenge hatu ulikile vamwe kutya otu na ko nasha navo. — 1 Tes. 4:11.

10-11. Ongahelipi to dulu okumona ouwa nosho yo vamwe mokukala u shii okulesha nokushanga nawa? (Tala yo efano.)

¹⁰ Omukainhu Omukriste okwa pumbwa okukulika ounghulungu wonhumba. Omaunghulungu amwe, oo okakadona take lihongo okudja kounona, otaa ka twikila oku ka etela ouwa monghalamwenyo yako. Natu ka kundafaneni oihopaenenwa inini.

¹¹ Lihonga okulesha nokushanga nawa. Momaputuko amwe, okulesha nokushanga inaku talika ko ku li ounghulungu wa fimana, oo ovakainhu ve na okulihonga. Ashike oshiwa nosha fimana kOvakriste aveshe okulihonga okulesha nokushanga. d (1 Tim. 4:13) Onghee ino efa nande osha shi ku imbe okulihonga okulesha nokushanga nawa.  Ondjabi ilipi to ka mona? Ounghulungu wa tya ngaho otashi dulika u ke ku kwafele u mone oilonga noku i kaleka po. Otashi ka kala yo shipu kwoove okukonakona Ombiibeli noku i honga vamwe. Komesho yaaishe, oto ka ehena popepi elela naJehova, eshi to lesha Eendjovo daye nokudilonga kudo. — Jos. 1:8; 1 Tim. 4:15.

12. Ongahelipi Omayeletumbulo 31:26 tae ku kwafele u kale ho popi nawa navamwe?

¹² Lihonga okupopya monghedi iwa novanhu. Ovakriste ova pumbwa okukala hava popi monghedi iwa. Omuhongwa Jakob okwe tu pa omayele aa mawa, taa ti: “Omunhu keshe na kale ha endelele okupwilikina, he liteelele mokupopya.” (Jak. 1:19) Ngeenge oho pwilikine noukeka, eshi vakweni tava popi, oto ke va udila “oukwao wananghali.” (1 Pet. 3:8) Ngeenge ku na oushili waasho omunhu a hala okutya, ile nghee e udite, pula omapulo taa wapalele. Opo nee diladila oule wokafimbo, fimbo ino popya. (Omayel. 15:28) Lipula kutya: ‘Mbela osho ndi li pokupopya oshoshili tuu notashi tungu ngoo? Mbela otashi ulike ngoo efimaneko nonghenda?’ Lihonga kovamwameme ovo hava pwilikine noukeka, nohava popi nonghenda. (Lesha Omayeletumbulo 31:26.) Yandja elitulemo kwaasho tava popi, nanghee tave shi popi. Ngeenge owe lihongo oinima oyo, otashi ka kala shipu kwoove okupanga oukaume navamwe, nokukala navo nombili.

13. Ongahelipi to dulu okulihonga okuungaunga nawa noinima yomeumbo? (Tala yo efano.)

¹³ Lihonga okuungaunga nawa noinima yomeumbo. Meenhele dihapu, ovakainhu ohava longo oilonga ihapu meumbo. Meme woye, ile omumwameme umwe a pyokoka, ota dulu oku ku kwafela u lihonge ounghulungu oo wa pumbiwa. Omumwameme wedina Cindy okwa ti: “Oshinima shimwe shomoinima oyo nde lihonga kumeme, oshosho kutya okulonga noudiinini ohaku eta ehafo. Molwaashi okwa honga nge nghee ndi na okuteleka, okuwapaleka, okuhondja nosho yo okulongifa oimaliwa noukeka, ngeenge handi lande oinima, osho osha kwafela nge ndi lifile oshisho, nokulonga shihapu moilonga yaJehova. Meme okwa honga nge yo nghee ndi na okuyakula ovanhu, nokungaho, onda shakeneka ovamwatate novamwameme va denga mbada ovo ve li oihopaenenwa oyo handi dulu okushikula.” (Omayel. 31:​15, 21, 22) Omukainhu oo ha longo noudiinini noha yakula vamwe, oo e lihonga okuungaunga nawa noinima yomeumbo, oku li enangeko noupuna kukeshe umwe meumbo lavo nosho yo meongalo. — Omayel. 31:​13, 17, 27; Oil. 16:15.

14. Oshike to dulu okulihonga moshimoniwa shaCrystal, noshike u na okukaleka momadiladilo?

¹⁴ Lihonga okulonga oilonga kwoove mwene. Osho osha fimana kOvakriste aveshe okulihonga okulonga oinima kuvo vene. (Fil. 4:11) Omumwameme wedina Crystal okwa ti: “Ovadali vange ova li va ladipika nge ndi hoolole ounghulungu mofikola, oo wa li tau ka kwafela nge lwanima monghalamwenyo yange. Tate okwa ladipika nge ndi ye meetundi odo tadi kwafele nge ndi lihonge nghee ndi na okuungaunga noimaliwa, nokuninga omadidiliko e na sha nelongifo loimaliwa mokaambani, naasho osha kwafela nge neenghono.”  Kakele kokulihonga ounghulungu oo wa pumbiwa, opo u mone oilonga yomboloto, kendabala yo okulihonga nghee u na okulongifa oimaliwa noukeka. (Omayel. 31:​16, 18) Ngeenge owa kala wa wanenwa koinima inini oyo u na, noiho kala wa hala oinima oyo ito dulu okufuta, osho otashi ke ku kwafela u hange omalalakano oye okulonga shihapu moilonga yaJehova. — 1 Tim. 6:8.

15-16. Omolwashike ovamwameme ovo inava hombolwa ve li emona li na ondilo? (Markus 10:​29, 30)

¹⁵ Ngeenge owa kulike omaukwatya oo taa hafifa Jehova, nokulihonga ounghulungu tau ti sha, otashi ke ku kwafela momahoololo oo to ka ninga lwanima monghalamwenyo. Natu ka taleni koihopaenenwa inini yaasho to dulu okuninga.

¹⁶ Oto dulu okuhoolola okuhahombolwa oule wefimbo. Metwokumwe neendjovo daJesus, ovakainhu vamwe ova hoolola okuhahombolwa, nokuli nonande okuninga ngaho inashi tambulwa ko meputuko lavo. (Mat. 19:​10-12) Vamwe otashi dulika va kale inava hombolwa omolweenghalo donhumba. Oto dulu okukala noushili kutya Jehova naJesus ihava diladila kutya ku na oshilonga, molwaashi ino hombolwa. Mounyuni aushe, ovamwameme ovo inava hombolwa ove li oshihopaenenwa shiwa momaongalo. Molwaashi ove hole ovanhu vakwao nohave va file oshisho, ove li ngaashi ovamwaina nosho yo ooina kuvahapu. — Lesha Markus 10:​29, 30; 1 Tim. 5:2.

17. Ongahelipi omumwameme omunyasha ta dulu okulilongekida paife okuya moilonga yefimbo li yadi?

¹⁷ Oto dulu okuya moilonga yefimbo li yadi. Ovamwameme ohava ningi shihapu moilonga yokuudifa yomounyuni aushe. (Eps. 68:11) Mbela ito dulu okuninga eemhangela paife u ye moilonga yefimbo li yadi? Oto dulu okuninga omukokolindjila, omuliyambi wokutunga, ile Omubetel. Ilikana kombinga yelalakano loye. Popya navamwe ovo va hanga elalakano olo, nokumona kutya oshike wa pumbwa okuninga, opo u kale wa wana okuya moilonga yefimbo li yadi. Ninga eemhangela tadi dulu oku ku kwafela u hange elalakano olo. Ngeenge owa i moilonga yefimbo li yadi, oto ka dula okulonga oilonga ihapu itunhula moilonga yaJehova.

18. Omolwashike omumwameme e na okuhoolola omushamane waye noukeka? (Tala yo efano.)

¹⁸ Oto dulu okuhoolola okuhombolwa. Omaukwatya nosho yo omaunghulungu oo twa kundafana, otae ke ku kwafela u ninge omukulukadi muwa. Ngeenge owa hala okuhombolwa, ou na okuhoolola kaume kopahombo noukeka. Olo oli li etokolo limwe lomomatokolo oo a fimana oo to ka ninga. Dimbuluka kutya oto ka pumbwa okushikula ewiliko lomulumenhu oo wa hoolola e ku  hombole. (Rom. 7:2; Ef. 5:​23, 33) Lipula kutya: ‘Mbela okwa pyokoka ngoo? Okwa pitifa ngoo komesho Jehova monghalamwenyo yaye? Oha ningi ngoo omatokolo pandunge? Oha dimine ngoo omapuko aye? Mbela okwa fimaneka ngoo ovakainhu? Mbela oku na ngoo ounghulungu oo wa pumbiwa, opo a kwafele nge ndi kale ndi na ekwatafano liwa naJehova, a yambidide nge palutu nosho yo pamaliudo? Oha wanifa po ngoo oinakuwanifwa yaye nawa? Pashihopaenenwa, oinakuwanifwa ilipi e na meongalo nohe i wanifa po ngahelipi?’ (Luk. 16:10; 1 Tim. 5:8) Ngeenge owa hala okumona omushamane muwa, ou na yo okukulika omaukwatya oo tae ku ningifa u ka kale omukulukadi muwa.

19. Omolwashike onghandangala yomukulukadi e li “ekwafo” tai mu fimanekifa?

¹⁹ Ombiibeli oya popya kutya omukulukadi muwa oku li “ekwafo” komushamane waye ‘notali mu wapalele.’ (Gen. 2:18) Mbela osho osha hala okutya omukulukadi ke na oshilonga? Hasho nandenande. Onghandangala oyo omukulukadi ta dana e li ekwafo otai mu fimanekifa. Ombiibeli oya popya Jehova e li “omukwafi.” (Eps. 54:4; Heb. 13:6) Omukulukadi oku li ekwafo lashili komushamane waye, ngeenge ohe mu yambidida nohe mu kwafele a tule moilonga omatokolo oo a kuma ovaneumbo lavo. Molwaashi omukulukadi oku hole Jehova, oha ningi ngaashi ta dulu, opo a kwafele vamwe va mone omaukwatya mawa momushamane waye. (Omayel. 31:​11, 12; 1 Tim. 3:11) Oto dulu okulilongekida paife u ka ninge omukulukadi muwa, mokukala u hole Jehova nohole ya xwama, nokukala u li ekwafo kuvamwe meumbo nomeongalo.

20. Ouwa ulipi omudalakadi ta dulu okuningila ovanhu vambulavo?

²⁰ Oto dulu okuninga omudalakadi. Konima eshi wa hombolwa, ove nosho yo omushamane woye otamu dulu okukala mu na ounona. (Eps. 127:3) Onghee oshiwa okudiladila shi na sha naasho sha pumbiwa, opo u kale omukulukadi muwa. Omaukwatya nosho yo ounghulungu oo twa kundafana moshitukulwa eshi, otae ke ku kwafela, ngeenge owa ningi omukulukadi nosho yo omudalakadi. Ngeenge owa kala omunahole, omunalukeno nosho yo omulididimiki, oto ka kwafela oukwaneumbo woye u kale wa hafa nosho yo ounona voye va kale meameno. — Omayel. 24:3.

21. Otu uditile ngahelipi ovamwameme, nomolwashike? (Tala efano kombada yoshifo.)

²¹ Otu mu hole ovamwameme omolwoilonga oyo tamu longele Jehova nosho yo oshiwana shaye. (Heb. 6:10) Ohamu longo noudiinini, opo mu kulike omaukwatya oo taa hafifa Jehova nosho yo ounghulungu oo tau mu kwafele mu kale mwa hafa nosho yo ovo ve mu dingilila. Omu li shili emona li na ondilo mehangano laJehova.