1. Omulumenhu Omukriste oku na okuninga shike, opo a pondole?

 OHAMBA David oya lombwela Salomo ya ti: “Kala wa pama, omulumenhwelela.” (1 Eeh. 2:​1-3) Osha fimana kovalumenhu Ovakriste aveshe va tule moilonga omayele oo. Opo va pondole, ove na okulihonga okudulika keemhango daKalunga, nokutula moilonga omafinamhango Ombiibeli monghalamwenyo yavo. (Luk. 2:52) Omolwashike sha fimana kovamwatate ovanyasha va kale Ovakriste va pyokoka?

2-3. Omolwashike sha fimana komumwatate omunyasha a ninge Omukriste a pyokoka?

² Omulumenhu Omukriste oha wanifa po oinakuwanifwa ya fimana moukwaneumbo nomeongalo. Ovalumenhu ovanyasha, kape na omalimbililo kutya ohamu diladila kombinga yoinakuwanifwa oyo tamu dulu oku ka kala mu na monakwiiwa. Otashi dulika mwe litulila po omalalakano okuya moilonga yefimbo li yadi, okuninga ovayakuliongalo, nolwanima ovakulunhuongalo. Otashi dulika yo mwa hala okuhombola nokukala mu na ounona. (Ef. 6:4; 1 Tim. 3:1) Opo mu hange omalalakano oo, nokupondola, omu na okukala Ovakriste va pyokoka. b

³ Oshike tashi dulu oku mu kwafela mu kale Ovakriste va pyokoka? Ope na oinima ya fimana, oyo tamu dulu okulihonga nokuxwepopala muyo. Ndele mbela oshike mwa pumbwa okuninga paife, opo mu lilongekidile oinakuwanifwa, oyo tamu dulu okukala mu na monakwiiwa nomu pondole?

4. Openi to dulu okuhanga oihopaenenwa iwa nokushikula? (Tala yo efano.)

⁴ Hoololeni oihopaenenwa iwa oyo tamu dulu okushikula. MOmbiibeli omu na oihopaenenwa ihapu iwa yovalumenhu ovanyasha, oyo tamu dulu okuhopaenena. Ovalumenhu ovo vomonakudiwa ova li ve hole Kalunga nova li ve na oinakuwanifwa i lili nai  lili, eshi va li tava file oshiwana shaye oshisho. Nanye otamu dulu okumona oihopaenenwa iwa mokati kovalumenhu Ovakriste, ovo va pyokoka, momaumbo eni nosho yo momaongalo eni. (Heb. 13:7) Omu na yo oshihopaenenwa sha denga mbada shaJesus Kristus. (1 Pet. 2:21) Eshi tamu konakona noukeka oihopaenenwa oyo, didilikeni omaukwatya avo a denga mbada. (Heb. 12:​1, 2) Opo nee tamu diladila nghee tamu dulu okuhopaenena ovalumenhu ovo.

5. Ongahelipi to dulu okulihonga okukala ho diladila pandunge, nomolwashike osho sha fimana? (Epsalme119:9)

⁵ Kulika ‘nokudiinina eendunge.’ (Omayel. 3:21) Omunhu oo e na eendunge oha diladila nawa, ofimbo ina katuka onghatu. Onghee hano, longa noudiinini u lihonge nghee to dulu okuninga ngaho, nokutwikila oku shi ninga. Omolwashike? Omolwaashi mounyuni ou omu yadi ovalumenhu ovanyasha ovo hava wilikwa komadiladilo avo vene, ile hava efa omaliudo avo a nwefe mo eenghatu davo. (Omayel. 7:7; 29:11) Omakwatafano opaintaneta nao otaa dulu oku ku nwefa mo neenghono. Ndele mbela ongahelipi to dulu okukala ho diladila pandunge? Shotete, lihonga omafinamhango Ombiibeli nokudiladila kunghee taa dulu oku ku etela ouwa. Opo nee longifa omafinamhango Ombiibeli e ku kwafele u ninge omatokolo oo taa hafifa Jehova. (Lesha Epsalme 119:9.) Ngeenge owa kulike oukwatya oo wa fimana, kungaho owa katuka onghatu ya fimana yokuninga omulumenhu Omukriste a pyokoka. (Omayel. 2:​11, 12; Heb. 5:14) Diladila nghee eendunge tadi dulu oku ku etela ouwa meenghedi edi dopavali: (1) mokuungaunga novamwameme nosho yo (2) mokuninga omatokolo e na sha neholokepo loye.

6. Okudiladila pandunge otaku dulu okukwafela ngahelipi omumwatate omunyasha a kale a fimaneka ovamwameme?

⁶ Okudiladila pandunge otaku ke ku kwafela u kale wa fimaneka ovakainhu. Oshi li paushitwe nosha yuka komumwatate omunyasha a kale e na ohokwe momumwameme, notashi dulika a hala oku mu shiiva nawa, naasho inashi puka. Ashike omulumenhu omunyasha, oo ha diladila pandunge, ita ka tya sha, a shange sha, ile a ninge sha osho tashi dulu okuningifa omumwameme a diladile kutya okwa hala okweendelafana naye, ngeenge ke na elalakano loku mu  hombola. (1 Tim. 5:​1, 2) Ngeenge ota endelafana nomumwameme, ota ka kaleka po edina liwa lomumwameme oo, mokuhakala pamwe ovo aveke okuninga ve na ongoleka. — 1 Kor. 6:18.

7. Okudiladila pandunge otaku dulu okukwafela ngahelipi omumwatate omunyasha, eshi ta ningi omahoololo e na sha nokudjala nokuliwapeka?

⁷ Onghedi imwe omo omulumenhu omunyasha ta dulu okuulika kutya oha diladila pandunge, omokuhoolola pandunge oikutu oyo ta djala nonghedi omo he liwapeke. Luhapu, oikutu oyo i li momoode oya longwa kovanhu ovo ihava fimaneke Jehova nove na onghalamwenyo inai koshoka. Onghedi yavo yokudiladila inai koshoka oi liwetikile moikutu oyo ya ponda kolutu, oyo hai ningifa ovalumenhu va kale va fa ovakainhu. Omulumenhu omunyasha oo a pyokoka, ngeenge ta hoolola osho ta djala oha wilikwa komafinamhango Ombiibeli nosho yo koihopaenenwa iwa yavamwe meongalo. Ota dulu okulipula kutya: ‘Mbela omahoololo ange otaa ulike ngoo kutya ohandi diladila pandunge, nonda fimaneka omaliudo avamwe? Mbela onghedi omo handi djala otai shi ningifa ngoo shipu kuvamwe va itavele kutya ohandi longele Kalunga?’ (1 Kor. 10:​31-33; Tit. 2:6) Omulumenhu omunyasha oo ha diladila pandunge ita ka kala ashike a fimanekwa kovamwatate novamwameme, ndele ota ka kala yo a hokiwa kuXe womeulu.

8. Ongahelipi omumwatate omunyasha ta dulu okulihonga okukala omulineekelwa?

⁸ Kala omulineekelwa. Omulumenhu omulineekelwa oha wanifa po oinakuwanifwa yaye filufilu. (Luk. 16:10) Diladila koshihopaenenwa sha denga mbada shaJesus. Ka li ha ningi oinima shimha ta ningi. Ponhele yaasho, okwa li ha wanifa po nawanawa oinakuwanifwa oyo a pewa kuJehova nokuli nonande osha li shidjuu okuninga ngaho. Okwa li e hole ovanhu, unene tuu ovahongwa vaye, nokwe va yandjela nokuli omwenyo waye nehalo liwa. (Joh. 13:1) Longa noudiinini u hopaenene Jesus mokuwanifa po oshinakuwanifwa osho to pewa. Ngeenge ku na oushili nghee u na oku shi ninga, kala omulininipiki nokupula ekwafo kovamwatate ovo va pyokoka. Ino kala ashike wa wanenwa kukanini oko to ningi. (Rom. 12:11) Ponhele yaasho, wanifa po oshinakuwanifwa shoye, to “longele Jehova, ndele havanhu.” (Kol. 3:23) Oshoshili kutya ino wanenena, onghee kala omulininipiki nokukala ho dimine omapuko oye. — Omayel. 11:2.

9. Omolwashike omumwatate omunyasha e na okulihonga ounghulungu wonhumba?

⁹ Opo u kale Omukriste a pyokoka, owa pumbwa okulihonga oinima oyo tai dulu oku ku kwafela monghalamwenyo. Oinima ya tya ngaho otai ke ku kwafela u wanife po oinakuwanifwa yoye meongalo, u kaleke po oilonga yoye yokulikongela omboloto, opo u liyambidide ove mwene, ile oukwaneumbo woye, nou kaleke po ekwatafano loye liwa navamwe. Natu ka taleni koinima imwe oyo tai dulu oku ku kwafela.

10-11. Ongahelipi okushanga nokulesha nawa taku dulu okweetela omumwatate ouwa nosho yo eongalo? (Epsalme 1:​1-3) (Tala yo efano.)

¹⁰ Lihonga okulesha nokushanga nawa. Ombiibeli oya ti, omunhu oo a hafa noha pondola,  oye oo ha kongo efimbo efiku keshe, opo a leshe Eendjovo daKalunga nokudilonga kudo. (Lesha Epsalme 1:​1-3.) Mokulesha Ombiibeli efiku keshe, ota ka shiiva nghee Jehova ha diladila, naasho otashi ke mu kwafela e lihonge okutula moilonga Omishangwa. (Omayel. 1:​3, 4) Ovalumenhu va tya ngaho ovo va pumbiwa meongalo. Omolwashike?

¹¹ Ovamwatate novamwameme ova pumbwa ekwafo lovalumenhu va tya ngaho, ovo tava dulu oku va honga noku va pa omayele okudja mOmbiibeli. (Tit. 1:9) Ngeenge oto dulu okushanga nokulesha nawa, oto ka dula okulilongekidila oipopiwa nomatyekosha oo taa dulu okweetela vamwe ouwa nokupameka eitavelo lavo. Oto ka dula yo okuninga omadidilikoshango taa ti sha, eshi to konakona, naashi to pwilikine koipopiwa meongalo nosho yo poyoongalele inini naayo ya kula. Omadidilikoshango a tya ngaho otaa dulu oku ku kwafela u pameke eitavelo loye nou twe vamwe omukumo.

12. Oshike tashi dulu oku ku kwafela u kale ho pwilikine noho popi monghedi ya yela?

¹² Lihonga okupwilikina nokukala ho popi monghedi ya yela. Omulumenhu Omukriste oku na okulihonga okukala ha pwilikine nokupopya monghedi ya yela. Omulumenhu oo ha ningi ngaho, oha pwilikine noha udu ko omadiladilo nomaliudo avamwe. (Omayel. 20:5) Ota dulu okudidilika omutono wewi, omalinyengo okoshipala nosho yo omalinyengo amwe vali olutu. Ito dulu okulihonga oinima oyo, ngeenge iho kala efimbo la wana novanhu. Ngeenge oho longifa omakwatafano opaelektronika oule wefimbo, ngaashi ee-email nokushanga omatumwalaka, osho otashi ka nghundipaleka onghedi yoye yokupwilikina nokupopya navamwe monghedi ya yela. Onghee hano, konga eemhito u popye navo komudidi. — 2 Joh. 12.

13. Oshike vali osho omulumenhu omunyasha e na okulihonga? (1 Timoteus 5:8) (Tala yo efano.)

¹³ Lihonga nghee to dulu okulifila oshisho ove mwene. Omulumenhu Omukriste oo a pyokoka oku na okukala ta dulu okulifila oshisho ye mwene nosho yo ovaneumbo laye. (Lesha 1 Timoteus 5:8.) Moilongo imwe, ovamwatate ovanyasha otashi dulika ve lihonge ounghulungu wonhumba kooxe, ile kuumwe womovapambele vavo. Ofimbo moilongo imwe, omulumenhu omunyasha otashi dulika e lihonge ounghulungu, ile oilonga vali imwe, ofimbo e li mofikola. Kashi na nee mbudi kutya onghalo yoye oya tya ngahelipi, oshiwa okulihonga ounghulungu wonhumba oo tau dulu oku ku kwafela u mone oilonga. (Oil. 18:​2, 3; 20:34; Ef. 4:28) Kala wa shiivika ho longo noudiinini noho longo oshilonga fiyo sha pwa. Ngeenge owa ningi ngaho, oto dulu okumona oilonga noku i diinina. Omaukwatya nosho yo omaunghulungu oo twa dja nokukundafana okwa fimana komulumenhu Omukriste, opo a  dule oku ka wanifa po oinakuwanifwa yaye yomonakwiiwa. Natu ka kundafaneni imwe yomoinakuwanifwa oyo.

14. Ongahelipi omumwatate omunyasha ta dulu okulilongekidila oilonga yefimbo li yadi?

¹⁴ Oilonga yefimbo li yadi. Ovalumenhu Ovakriste vahapu ovo va pyokoka ova hovela oilonga yefimbo li yadi mounyasha wavo. Okukokola ondjila ohaku kwafele omulumenhu omunyasha e lihonge nghee ta dulu okulonga novanhu va yoolokafana. Otaku dulu yo oku mu kwafela a kale ha kwata nawa oshimaliwa nokuhe shi longife moinima oyo ina pumbwa. (Fil. 4:​11-13) Onghedi iwa yokuhovela oilonga yefimbo li yadi, okukufa oukwafelikokolindjila. Vahapu ova longa ve li ovakwafelikokolindjila oule wefimbo lonhumba, osho she ke va kwafela va ninge ovakokolindjila vondjikilile. Oukokolindjila otau dulu yo oku ku yeululila eemhito doilonga ikwao yefimbo li yadi, mwa kwatelwa oilonga yokutunga omatungo ehangano, ile okuninga Omubetel.

15-16. Ongahelipi omumwatate omunyasha ta dulu okukala a wana okuyakula meongalo?

¹⁵ Omuyakuliongalo, ile omukulunhuongalo. Ovalumenhu Ovakriste ove na okulitulila po elalakano lokuyakula ovamwatate novamwameme meongalo ve li ovakulunhuongalo. Ombiibeli oya ti ovalumenhu ovo tava lalakanene oshilonga osho ove “lihalela oshilonga shiwa.” (1 Tim. 3:1) Ofimbo omumwatate ina ninga omukulunhuongalo, oku na okuninga omuyakuliongalo. Ovayakuliongalo ohava kwafele ovakulunhuongalo meenghedi dihapu. Ovakulunhuongalo novayakuliongalo ohava yakula ovamwatate novamwameme nelininipiko, nohava kufa ombinga moilonga yokuudifa nouladi. Ovamwatate ovanyasha otava dulu okuninga ovayakuliongalo nonande ove na eedula omulongo nasha. Omuyakuliongalo oo a pyokoka, noku na eedula omilongo mbali nasha, ota dulu okunangekwa po e li omukulunhuongalo.

¹⁶ Ongahelipi to dulu okukala wa wana okuwanifa po oinakuwanifwa oyo? Kape na onghedi yokondadalunde. Ashike oiteelelwa oyo ya pumbiwa, aishe oya kanghamena kOmbiibeli, kohole yokuhola Jehova, ovaneumbo leni nosho yo eongalo. (1 Tim. 3:​1-13; Tit. 1:​6-9; 1 Pet. 5:​2, 3) Kendabala okuuda ko oshiteelelwa keshe. Ilikana kuJehova e ku kwafele u wanife po oiteelelwa oyo. c

17. Ongahelipi omumwatate omunyasha ta dulu okulilongekida a ninge omushamane nomutwe woukwaneumbo? (Tala yo efano.)

¹⁷ Omushamane nosho yo omutwe woukwaneumbo. Ngaashi Jesus e shi ulika, ovalumenhu vamwe Ovakriste ovo va pyokoka ova hoolola okukala  inava hombola. (Mat. 19:12) Ashike ngeenge owa hoolola okuhombola, oto weda ko oinakuwanifwa yokukala omushamane nosho yo omutwe woukwaneumbo. (1 Kor. 11:3) Jehova okwa teelela omushamane a kale e hole omukulukadi waye, noku mu fila oshisho palutu, pamaliudo nosho yo pamhepo. (Ef. 5:​28, 29) Omaukwatya nomaunghulungu oo twa kundafana metetekelo moshitukulwa eshi, ngaashi okudiladila pandunge, okukala wa fimaneka ovakainhu nosho yo okukala omulineekelwa, otaa dulu oku mu kwafela mu li ovalihomboli. Oto ka kala we lilongekida okuwanifa po oinakuwanifwa yoye u li omushamane nosho yo omutwe woukwaneumbo.

18. Ongahelipi omumwatate omunyasha ta dulu okulilongekida a kale xe omudali?

¹⁸ Okukala xe omudali. Ngeenge owa hombola, otashi dulika u ka ninge xe omudali. Oshike to dulu okulihonga kuJehova shi na sha nokukala xe omudali muwa? Ope na oilihongomwa ihapu. (Ef. 6:4) Jehova okwa lombwela omonamati waye, Jesus, sha yukilila kutya oku mu hole nokwe mu hokwa. (Mat. 3:17) Ngeenge owa ningi xe omudali, shilipaleka alushe kutya oho lombwele ovana voye kutya ou va hole. Kala ho va pandula omolwoinima iwa oyo tava ningi. Ooxe ovadali ovo tava shikula oshihopaenenwa shaJehova, ohava kwafele ovana vavo va kale ovakainhu novalumenhu Ovakriste va pyokoka. Oto dulu okulilongekidila oshinakuwanifwa osho paife, mokukala ho file oshisho pahole ovaneumbo leni nosho yo vamwe meongalo moku va ulikila ohole noku va pandula. (Joh. 15:9) Osho otashi ke ku kwafela u dule oku ka wanifa po oinakuwanifwa yomonakwiiwa yokukala omushamane nosho yo xe omudali. Mopaife, kala oshilongifo sha denga mbada kuJehova, kovaneumbo leni nosho yo meongalo.

19-20. Oshike tashi dulu okukwafela ovamwatate ovanyasha va ninge Ovakriste va pyokoka? (Tala efano kombada yoshifo.)

¹⁹ Ovamwatate ovanyasha, itamu ka fikila mwa ninga Ovakriste va pyokoka. Omwa pumbwa okuhoolola oihopaenenwa iwa, oyo tamu dulu okushikula, okukala hamu diladila pandunge, mu shii okulineekelwa, okulihonga omaunghulungu onhumba nokulilongekidila oinakuwanifwa yomonakwiiwa.

²⁰ Omafimbo amwe, otashi dulika mu kale mu udite mwa wililwa po, ngeenge tamu diladila koinakuwanifwa oyo i li komesho. Ashike otamu dulu okupondola. Dimbulukweni kutya Jehova okwa halelela oku mu kwafela. (Jes. 41:​10, 13) Ovamwatate novamwameme meongalo navo otave mu kwafele yo. Ngeenge omwa ningi Ovakriste va pyokoka, onghalamwenyo yeni otai ka kala i na eityo noihafifa. Otu mu hole ovamwatate ovanyasha! Jehova ne mu nangeke noupuna, eshi tamu longo, opo mu kale ovalumenhu Ovakriste va pyokoka. — Omayel. 22:4.