OTWA lenga omaano mahapu oo twa pewa kuJehova, mwa kwatelwa emanguluko lokutokola nghee hatu dulu oku a hafela. Shihokwifa, Ombiibeli oya popya omaviinyu e li omaano a dja kuKalunga, eshi ya ti: “Oitelekela tai telekelwa okuhafifa, nomaviinyu taa hafifa omwenyo.” (Omuud. 10:19; Eps. 104:15) Otashi dulika wa mona kutya ovanhu vamwe ova etelwa omaupyakadi koikunwa yoalkoholi. Shimwe vali, ovanhu mounyuni aushe ove na omataleko a yoolokafana shi na sha nokunwa oikunwa yoalkoholi. Oshike tashi dulu okukwafela Ovakriste va ninge omatokolo a yuka e na sha nokunwa oikunwa yoalkoholi?

Kashi na nee mbudi kutya ohatu di peni, ile otwa dja meputuko la tya ngahelipi, ngeenge hatu ningi omatokolo, otwa pumbwa okuwilikwa ketaleko laKalunga, ndele hakwaasho ovanhu ovo ve tu dingilila tava diladila. Kungaho ohatu ka kala twa hafa monghalamwenyo.

Otashi dulika wa didilika kutya ovanhu vahapu mounyuni ohava nu oikunwa yoalkoholi luhapu nosho yo sha pitilila. Vamwe ohava nu oikolwifa, molwaashi ohai va ningifa va kale ve udite nawa. Ofimbo vamwe hava nu oikolwifa, opo va dimbwe omaupyakadi avo. Moitukulwa imwe, ovanhu ohava diladila kutya ngeenge umwe oha nu oikunwa yoalkoholi ihapu, oha talika ko e li omulumenhuelela.

Ovakriste ove na omayele opandunge a dja kOmushiti wavo omunahole. Pashihopaenenwa, okwe tu lombwela kombinga yoidjemo inyikifa oluhodi oyo hai etifwa kokunwa sha pitilila. Otashi dulika twa lesha mOmayeletumbulo 23:​29-35 ouyelele u na sha nongholwe nosho yo omaupyakadi amwe oo haa etifwa kokunwa sha pitilila. a Daniel, omukulunhuongalo umwe moEuropa, ota dimbuluka nghee onghalamwenyo yaye ya li, ofimbo ine lihonga kombinga yaJehova nokutula moilonga omayele aye. Okwa ti: “Onda li handi nu sha pitilila, naasho osha ningifa nge ndi ninge omatokolo ehe li pandunge. Osho osha etela nge oilanduliko ii oyo hai udifa nge nai, ngeenge handi diladila kombinga yayo.”

Ongahelipi Ovakriste tava dulu okuninga omatokolo e li pandunge, ngeenge tashi uya pokunwa oikolwifa nanghee tava dulu okuhenuka omaupyakadi oo haa etifwa kokunwa sha pitilila? Otwa pumbwa okupitika omadiladilo aKalunga e tu wilike, ngeenge hatu ningi omatokolo.

Natu ka taleni kwaasho Ombiibeli ya popya kombinga yoikunwa yoalkoholi nosho yo omatomheno amwe oo haa ningifa ovanhu va nwe oikolwifa.

Eendjovo daKalunga inadi tokola okunwa oikunwa yoalkoholi pandjele. Ombiibeli oya popya kutya okunwa omaviinyu otaku dulu okweeta ehafo. Oya ti: ‘Lya nehafo omungome woye, ndele nwa omaviinyu oye nomutima wa nyakukwa.’ (Omuud. 9:7) Jesus nosho yo ovapiya vaJehova vamwe ovadiinini ova nwa omaviinyu pomhito imwe. — Mat. 26:​27-29; Luk. 7:34; 1 Tim. 5:23.

Nonande Eendjovo daKalunga inadi tokola okunwa oikolwifa, oda tokola oukolwe. Oda ti: “Inamu kolwa komaviinyu.” (Ef. 5:18) Oda ti yo kutya ‘eengholwe itadi ka fyuulula Ouhamba waKalunga.” (1 Kor. 6:10) Jehova okwa tokola filufilu okunwa sha pitilila nosho yo oukolwe. Ponhele yokushikula osho ovanhu ve tu dingilila tava ningi, otwa pumbwa okuninga omatokolo she likolelela kwaasho tashi hafifa Jehova.

Ovanhu vamwe ohava kala ve udite kutya otava dulu okunwa oikunwa yoalkoholi ihapu nopehe na okukolwa. Ashike osho osha nyika oshiponga neenghono. Omishangwa ode shi yelifa nawa kutya ‘okukala omupika vomaviinyu,’ otaku dulu okuningifa  omunhu a ninge omapuko a kwata moiti nokunyona kuJehova. (Tit. 2:3; Omayel. 20:1) Jesus okwa londwela kutya ‘okunwa sha pitilila’ otaku dulu okwiimba omunhu a ye mounyuni mupe waKalunga. (Luk. 21:​34-36) Oshike tashi dulu okukwafela Omukriste a henuke omaupyakadi oo taa dulu okuholoka po noupu omolwokunwa oikunwa yoalkoholi?

Ngeenge hatu ningi omatokolo e na sha nokunwa oikunwa yoalkoholi, osha nyika oshiponga okutambula ko ashike osho ovanhu vahapu meputuko letu hava ningi. Ovakriste ohava ningi pandunge osho tashi hafifa Jehova, ngeenge tashi uya pokulya nokunwa. Ombiibeli oye tu dimbulukifa ya ti: “Ngeenge tamu li ile tamu nu ile keshe tuu eshi tamu shi ningi, aishe i ningeni okufimanekifa Kalunga.” (1 Kor. 10:31) Natu ka taleni komapulo nosho yo omafinamhango Ombiibeli amwe taa shikula:

Mbela ohandi nu oikunwa yoalkoholi, molwaashi nda hala okukala nda hokiwa kuvamwe? Exodus 23:2 okwa ti: “Ino shikula ouhapu weemhunga.” Jehova okwa li ta lombwele Ovaisrael vaha hopaenene ovanhu ovo ihave mu hafifa. Elondwelo olo otali longo yo kOvakriste kunena. Ngeenge otwa pitike ovanhu vakwetu va nwefe mo omadiladilo nomatokolo etu e na sha noikolwifa, itatu ka kala tu li metwokumwe nomifikamhango daJehova notashi ka nyona po ekwatafano letu naye. — Rom. 12:2.

Mbela ohandi nu oikunwa yoalkoholi, opo ovanhu va diladile kutya ondi na eenghono? Momapuko amwe, okunwa oikolwifa luhapu nosho yo sha pitilila osha sha nosha tambulwa ko. (1 Pet. 4:3) Ashike didilika osho 1 Ovakorinto 16:13 tave tu ladipike tu ninge, va ti: “Kaleni oupafi, kaleni mwa pama meitavelo, kaleni ovaladi nokukala mwa pamenena.” Mbela okunwa oikolwifa otaku dulu ngoo okukwafela omunhu a kale a pamenena? Ahowe. Oikolwifa ohai nghundipaleke okudiladila kwomunhu nosho yo okudula okuninga omatokolo e li pandunge. Onghee hano, okunwa oikolwifa ihapu itashi ulike kutya omunhu oku na eenghono, ile okwa pamenena, ponhele yaasho, otashi ulike kutya ke na eendunge. Jesaja 28:7 okwa popya kutya omunhu ota pungaukifwa koikolwifa nota punduka.

Eenghono odo twa pumbwa, opo tu longe osho sha yuka, ohadi di kuJehova notadi pula tu kale oupafi notwa pama meitavelo. (Eps. 18:32) Osho ohatu shi ningi noukeka, opo tu henuke oiponga notu ninge omatokolo oo itaa nyono po ekwatafano letu  naJehova. Jesus okwa li e na ekwatafano la pama naJehova novanhu vahapu ova li ve mu fimaneka, molwaashi okwa li e na ouladi nokwa li a tokola toko okuninga osho sha yuka.

Mbela ohandi nu oikolwifa, opo ndi dimbwe omaupyakadi ange? Omupsalme okwa nwefwa mo a shange ta ti: ‘Ngeenge ndi noshisho shoudjuu meni lange, omahekeleko oye [Jehova] oo a hekeleka omwenyo wange.’ (Eps. 94:19) Ngeenge ou udite wa wililwa po, konga ekwafo kuJehova, ndele hakunwa oikolwifa. Onghedi iwa yoku ku kwafela, opo uha kale u udite wa wililwa po, okwiilikana kuJehova. Vahapu ova mona kutya okukonga omayele kukaume a pyokoka meongalo ohashi eta ouwa. Ashike okunwa oikolwifa, opo u dulu okuungaunga nomaupyakadi otaku dulu okuningifa omunhu aha longe osho sha yuka. (Hos. 4:11) Daniel, oo a popiwa metetekelo, okwa ti: “Onda li handi kala ndi na oshisho nondi udite ondjo. Onda li handi nu oikolwifa, opo ndi kale ndi udite xwepo, ashike osho osha li sha etela nge omaupyakadi mahapu, nda kanifa ookaume nokanda li nde lifimaneka.” Oshike sha li sha kwafela Daniel? Okwa ti: “Onda mona kutya onda li nda pumbwa ekwafo laJehova, ndele haikolwifa. Kekwafo laJehova, onda li nda dula okuungaunga nomaupyakadi ange nomupondo.” Oshitwa oshi li apa kutya Jehova oha kala alushe e lilongekida oku tu kwafela, nonande onghalo yetu otai monika ya fa itai nuwa omeva. — Fil. 4:​6, 7; 1 Pet. 5:7.

Ngeenge oho nu oikolwifa omafimbo amwe, oto dulu okutala ngeenge owa pumbwa okuninga omalunduluko amwe oo kutya oho nu lungapi noshi fike peni. Lipula kutya: ‘Mbela ope na umwe meumbo letu, ile kaumwe kange kopofingo a ulika kutya okwa limbililwa okunwa kwange?’ Ngeenge osho, osho otashi ulike kutya oto ende to pikwa koikolwifa ino shi didilika. ‘Mbela ohandi nu shihapu shi dulife nale?’ Osho otashi dulu okukala onghalo yomunhu oo ina pikwa koikolwifa, ashike ota endele ko. ‘Mbela ohandi mono shidjuu okukala inandi nwa oikunwa yoalkoholi oule womafiku manini, ile mahapu?’ Ngeenge osho, otashi dulika wa pikwa nowa pumbwa ekwafo lovanawino, opo u dule okufinda oupyakadi oo.

Molwaashi okunwa oikolwifa ohaku eta omaupyakadi mahapu, Ovakriste vamwe ova hoolola okukala ihava nu. Vamwe ova hoolola okuhanwa oikunwa yoalkoholi, molwaashi kave hole omulyo wayo. Ngeenge  kaume koye umwe okwa ningi ehoololo li li ngaho, ulika kutya ou na olukeno nokufimaneka etokolo laye nopehe na oku mu kembaula.

Otashi dulika wa mona kutya oshi li pandunge okulitulila po ongaba kutya oto kala to nu shi fike peni. Ile u litulile po ongaba kutya oto kala to nu lungapi, ngaashi tashi dulika lumwe moshivike, ile u nwe pandjele ngeenge to li. Vamwe ove litulila po kutya oikunwa yoludi lilipi tava kala tava nu, ngaashi okunwa omaviinyu, ile obiila pandjele, ndele haikunwa yoalkoholi oyo ya lumbakanifwa, ile oyo ilula neenghono. Ngeenge omunhu okwe litulile po ongaba shi na sha nokunwa oikunwa yoalkoholi, otashi ka kala shipu kuye oku i diinina. Omukriste a pyokoka ina pumbwa okukala a limbililwa kutya vamwe otava diladila shike shi na sha netokolo olo a ninga nokwa tokola oku li diinina.

Ngeenge hatu ningi omatokolo e na sha nokunwa oikunwa yoalkoholi, otwa pumbwa yo okudiladila kutya vamwe ove shi uditile ngahelipi. Ovaroma 14:21 ova ti: “Oshiwa okuhalya ombelela, ile okuhanwa omaviinyu ile okuninga oshinima shonhumba ngeenge otashi pundukifa omumwaxo.” Ongahelipi to dulu okutula moilonga omayele oo? Ulika ohole. Ngeenge ou udite kutya okunwa oikunwa yoalkoholi otaku dulu okupundukifa umwe, ohole otai ke ku linyengifa uha nwe oikolwifa pomhito oyo. Ngeenge owa ningi ngaho, oto ka ulika kutya ou hole nowa fimaneka omaliudo avamwe nonokutya ou na ko nasha navo shi dulife ove mwene. — 1 Kor. 10:24.

Epangelo oli na yo eemhango di na sha nokunwa oikunwa yoalkoholi, nOmukriste oku na okudulika keemhango odo. Eemhango odo otadi dulu okutya omunhu weedula donhumba ina pumbwa okunwa oikunwa yoalkoholi, ile otadi dulu okukelela ovanhu vaha nwe oikolwifa ngeenge tava shingi, ile tava longifa omashina onhumba. — Rom. 13:​1-5.

Jehova okwe tu pa omaano mahapu, naamwe omuo emanguluko lokutokola kutya ohatu a longifa ngahelipi. Osho osha kwatela mo okulongifa emanguluko letu lokuhoolola kutya ohatu li nohatu nu shike. Omahoololo etu naa ulike kutya okwa lenga emanguluko olo moku li longifa tu hafife Tate yetu womeulu.