ONDA dalwa mo 1926 modoolopa yaCrooksville, Ohio, mOilongo ya Hangana yaAmerika. Tate nameme kava li naanaa ve hole oinima yopalongelokalunga, ashike ova kala have tu lombwele atushe vahetatu tu ye kongeleka. Otwa li hatu i kongeleka yoMethodist. Eshi nda li ndi na omido 14, omufita okwa li a pange omaano molwaashi onda kala ihandi faula kongeleka Osoondaxa keshe.

Pefimbo opo, mushiinda shange umwe wOndombwedi yaJehova wedina Margaret Walker okwa li ha talele po meme nokukundafana naye kombinga yOmbiibeli. Efiku limwe onda li nda tokola ndi kale po. Meme okwa li ta diladila kutya ohandi ka piyaaneka ashike ekonakonombiibeli lavo, onghee okwa li a lombwela nge ndi ye pondje. Ndele onda kala ashike handi kendabala okupwilikina kwaasho tava kundafana. Konima eshi va kala have uya lwoikando, Margaret okwa pula nge kutya, “Ou shii kutya edina laKalunga olyelye?” Onde mu nyamukula nda ti: “Kape na oo ehe shii kutya oKalunga.” Opo nee okwa lombwela nge ta ti: “Kufa Ombiibeli yoye ndele to lesha mEpsalme 83:18.” * — Tala eshangelo lopedu. Osho nda ninga, ndele handi mono kutya edina laKalunga oJehova. Opo nee onda li nda ya kookaume kange ndele handi va lombwele kutya, “Eshi tamu i komaumbo nena, ka lesheni Epsalme 83:18 mu tale kutya edina laKalunga olyelye.” Oto hale okutya opo nda hovelela okuyandja oundombwedi opo.

Onda li nda konakona Ombiibeli ndele handi ninginifwa mo 1941. Lwanima onda ka pewa oshinakuwanifwa shokukwatela komesho Ekonakono lEmbo lEongalo. Onda li nda ladipika meme novamwameme va kale have uya kEkonakono lEmbo lEongalo olo handi kwatele komesho, nosho va ninga. Ashike tate ka li e na ohokwe.

Onda ka pewa oinakuwanifwa ihapu meongalo, nonda ka kala ndi na omambo mahapu oo a nyanyangidwa kEendombwedi daJehova. Efiku limwe tate okwa li a ulika omambo ange ndele ta ti: “Ou wete oinima aishe oyo? Onda hala ya pita mo meumbo lange ndele to i nayo.” Onda li nda tembuka mo meumbo ndele handi ka kala handi di koZanesville, moOhio, ashike onda kala handi shuna keumbo opo ndi ka ladipike vambuletu.

 Tate okwa li ha kelele meme kokwoongala. Omafimbo amwe ngeenge a i, tate ohe ke mu alula ndele te mu nanene meumbo. Ashike meme okwa li ha pitile komuvelo ukwao ndele ta i kokwoongala. Onda li nda lombwela meme handi ti: “Ino lipula unene naasho. Ta loloka shito oku ku kelela.” Mokweendela ko kwefimbo, tate okwa ka sholola okukelela meme, ndele meme ta kala a manguluka okuya kokwoongala.

Eshi Ofikola yOkudeula Ovaudifi ya hovela mo 1943, onda li nda hovela okukala handi yandje oipopiwa mofikola oyo. Omayele oo nda li handi pewa konima eshi nda yandja oshipopiwa okwa kwafela nge ndi kale omupopi muwa.

Mo 1944 pefimbo lOita Itivali yOunyuni, onda li nda twalwa moukwaita. Onda li nde lilopota kuFort Hayes moColumbus muOhio, nda konakonwa palutu ndele handi yadeke ofooloma. Onda li nda lombwela ovanambelewa kutya inandi hala okuya moukwaita. Okudja opo ova li va efa nge ndi ye keumbo. Konima yomafiku manini, omunambelewa okwa li e uya peumbo letu ndele ta lombwele nge ta ti: “Corwin Robison, onda tumwa ndi ku kwate po.”

Konima yoivike ivali fimbo nda li momhangu, omupanguli okwa li a lombwela nge ta ti: “Ngeno okwa li aame omutokoli, ngeno ohandi ku pe ehandukilo longhalamwenyo yoye aishe modolongo. Ou na eshi wa hala okutya?” Onde mu nyamukula nda ti: “Omufimanekwa, omwa li mu na okutala nge ko ngaashi omufita. Ohandi udifile eumbo keshe, nonda udifila ovanhu vahapu onghundana iwa yOuhamba waKalunga.” Omupanguli okwa li a lombwela ovatokoli vomomhangu ta ti: “Inamu uya mu tokole ngeenge omulumenhu ou omufita ile hasho. Omwe uya okutokola ngeenge okwe lilopota ngoo opo a ka ye moukwaita ile hasho.” Moule ashike wominute inadi fika nometatavili, ovatokoli ova li va tokola diva kutya ondi na ondjo. Omupanguli okwa li a tokolela nge omido nhano modolongo yaAshland moKentucky.

Pehovelo modolongo yomoColumbus, Ohio onda kala mo oivike ivali, nefiku lotete onda tulwa mokanduda aame andike. Onda li nda ilikana kuJehova handi mu lombwele kutya, “Itandi dulu okukala mokanduda omido nhano aame andike. Kandi shii kutya nandi ninge ngahelipi.”

Mefiku la landula ko, ovakeleli vodolongo ova li va pitifa nge mo. Onda li handi ende nomunadolongo woshipombolutu, ndele hatu fikama hatu tale mekende. Okwa li a pula nge ta ti: “Omolwashike u li omu Shorty?” Onde mu lombwela nda ti: “Ondi li Ondombwedi yaJehova.” Okwa ti: “Oshili? Hano omolwashike u li omu?” Onda ti: “Eendombwedi daJehova ihadi i moita di dipae ovanhu.” Opo nee ta ti: “Ove ku tula modolongo molwaashi ino hala oku ka dipaa ovanhu. Vo ova tula ovalumenhu vamwe modolongo molwaashi va dipaa ovanhu. Otashi tu ngoo kumwe osho?” Onde mu nyamukula nda ti: “Ahowe, itashi tu kumwe.”

Omunadolongo oo okwa ti, “Onda li modolongo imwe vali oule womido 15 omo nda lesha imwe yomoileshomwa yeni.” Eshi nda uda ta ti ngaho, onda ilikana kuJehova handi ti: “Kwafele nge opo omulumenhu ou a kale a ama kombinga yange.” Pefimbo opo tuu opo,  omunadolongo oo wedina Paul okwa ti: “Ngeenge umwe e ku kumu, ingida ashike. Ohandi ka ungaunga navo.” Onghee hano, ovalumenhu 50 ovo nda hanga modolongo oyo inava shinda nge.

Eshi ovanambelewa va ka lundululila nge kodolongo yokuAshland, onda hanga ko ovamwatate va pyokoka. Ova li va kwafela nge nova li yo va kwafela vamwe va ehene popepi naJehova. Ova li ve tu pa oshinakuwanifwa shokulesha Ombiibeli oshivike keshe, notwa li hatu longekida omapulo nomanyamukulo okwoongala. Modolongo omo twa li omwa li mu na eembete dihapu di li momunghulo wekuma. Omwa li omumwatate oo he tu ulikile opo tu na okulonga. Okwa li a lombwela nge ta ti: “Robison, oto kala to udifile pombete ei naai. Oto kala to udifile keshe oo te uya peembete odo. Shilipaleka kutya omunhu owe mu udifila fimbo ina ya.” Osho osho sha li hashi tu kwafele tu udife monghedi ya unganekwa nawa.

Eshi Oita Itivali yOunyuni ya xula mo 1945, onda li natango modolongo. Onda li handi lipula unene noukwaneumbo wetu molwaashi Tate okwa lombwela nge ta ti: “Ngeenge ove owa di mo meumbo lange, ava va fyaala mo ohandi ungaunga navo.” Ndele eshi nda mangululwa mo, onda li nda hafifwa koshinima shimwe inandi shi teelela. Vaheyali vomeumbo letu ova li hava i kokwoongala, naumwe womovamwamemekadona okwa li a ninginifwa nonande tate okwa li he va pataneke.

Eshi oita yOvakorea ya hovela mo 1950, onda li nda lombwelwa ndi ye moukwaita oshikando oshitivali nonda li nda lombwelwa ndi ke lilopote natango kuFort Hayes. Konima eshi a konakona okudula kwange, omunambelewa umwe okwa lombwela nge a ti: “Owa pita nawa u dule aveshe vomongudu yeni.” Onde mu nyamukula nda ti: “Oshi li nawa, ashike inandi hala okuya moita.” Onda li nda tofa eendjovo odo di li mu 2 Timoteus 2:3, ndele handi ti, “Ame omukwaita nale waKristus.” Opo nee okwa mwena po oule wokafimbo ndele ta ti: “Oto dulu okuya.”

Lwanima onda li nda ya kokwoongala kwOvabetel okwo kwa li kwa ningwa poshoongalele osho sha ningilwe moCincinnati, moOhio. Omumwatate Milton Henschel okwa li e tu lombwela kutya ope na omhumbwe yovamwatate ovo va hala oku ka longa kObetel. Onda li nda ninga eindilo loku ka longa koBetel, ndele handi tambulwa. Onda hovela okulonga koBetel yaBrooklyn muAuguste 1954 nomo ndi li fiyo onena.

Onda kala handi longo oilonga ihapu koBetel. Omido dihapu onda kala handi longo neetenga dokundjeneka omeva moshinyanyangido nometungo omo mu na eembelewa, handi longo nomashina nokupangela omakumba. Onda kala yo handi longo pOmalupale Oyoongalele moNew York City.

Ondi hole eeprograma odo hadi ningwa moBetel, ngaashi Elongelokalunga longula nEkonakono lOshungonangelo nosho yo okuudifa pamwe neongalo. Ngeenge owe shi diladila nawa, oto dulu okumona kutya oyo oinima oyo omaukwaneumbo Eendombwedi daJehova e na  okuninga pandjikilile. Ngeenge ovadali nounona ohava konakona omushangwa wefiku pamwe, hava ningi Elongelokalunga lOukwaneumbo alushe, hava kufa ombinga pokwoongala nohava longo nouladi moilonga yokuudifa onghundana iwa, aveshe moukwaneumbo otava ka kala popepi naJehova.

Onda panga oukaume novahapu koBetel nomeongalo. Vamwe vomuvo ova li ovavaekwa nova ka ya meulu. Ashike ovapiya vaJehova aveshe inava wanenena mwa kwatelwa nOvabetel. Ngeenge opa holoka okuhaudafana pokati ketu nomumwatate, ohandi kendabala alushe ndi pange ombili naye. Ohandi diladila komushangwa waMateus 5:23, 24, nonghee tu na okuungaunga nokuhaudafana. Ihashi kala shipu okutya “ombili,” ashike luhapu okuyandja ombili oko haku kandula po okuhaudafana.

Paife ihashi kala naanaa vali shipu kwaame okuudifa eumbo neumbo molwaashi onda ninga omunamido, ashike ihandi sholola. Onde lihonga Oshichina shOshimandarin nohandi hafele okupopya nOvachina mepandavanda. Omafiku amwe ohandi yandje oifo 30 ile 40 kwaavo ve na ohokwe.

Onda ninga nokuli elishuneko kOmuchina umwe. Efiku limwe fimbo ndi li pokatala kokulandifila oiimati, opa pita okakadona kamwe kanini take limemesha. Naame onda li nde limemesha, ndele handi ka pe Oshungonangelo no-Awake! mOshichina. Oka li ke i tambula ndele taka lombwele nge kutya edina lako oKatie. Konima yaasho, keshe fiku Katie ta mono nge, iha kala ine uya a popye naame. Onda li handi mu hongo omadina oiimati nosho yo oikwambidi mOshiingilisha, ye ta endulula mo noku a kopela momutwe. Onda li yo handi mu yelifile Omishangwa dOmbiibeli ndele ta tambula okambo Ombibeli otai hongo. Ashike konima yoivike yonhumba, kanda li vali handi mu mono.

Eemwedi da ka landula ko, onda li nda yandja oifo kokakadona kamwe oko ka li taka piti pwaame taka yandje oufo vomashiivifo opaipindi, ndele take i tambula ko. Oshivike sha shikula ko, oka li ka pa nge ongodi yako ndele taka ti: “Popya nomunhu e li koChina.” Onda ti: “Nghi shii ko omunhu koChina.” Ashike okwa li ta kondjifa nge, opo nee onda tambula ko ongodi, ndele handi ti: “Hallow, aame Robison.” Oo a nyamukula nge mongodi okwa ti: “Robby, oKatie ta popi. Onda shuna koChina.” Onda ti: “KoChina?” Katie okwa nyamukula a ti: “Heeno. Robby, ou wete okakadona oko ke ku pa ongodi? Okamwameme. Owa honga nge oinima iwa ihapu, nako ka honga naanaa ngaashi wa honga nge.” Onda nyamukula nda ti: “Katie, ohandi ka kendabala ngoo ngaashi handi dulu. Onda pandula eshi wa shiivifila nge apa u li.” Lwanima mumwaina waKatie onda ka popya ashike naye xuuninwa noinandi mu mona vali. Kandi shi nee kutya oukadona ovo ove li peni paife, ashike onde lineekela ove lihonga shihapu kombinga yaJehova.

Onda longela Jehova omido 73, nonda hafa eshi a kwafela nge ndiha kufe ombinga moita nondi kale omudiinini eshi nda li modolongo. Shikwao vali, ovamwameme ova lombwela nge kutya ova li va tuwa omukumo eshi nda li nde lididimikila omapataneko atate nopehe na okusholola. Mokweendela ko kwefimbo, meme novamwameme vahamano ovalumenhu novakainhu ova ka ninginifwa. Oikala yatate oya ka lunduluka kanini nokuli, nokwa li he uya kokwoongala omafimbo amwe fimbo ina fya.

Ngeenge oshi li pahalo laKalunga, ovapambele vange nosho yo ookaume kange ovo va fya nale, otava ka nyumuninwa mounyuni mupe. Itatu ka kala tuu twa hafa eshi hatu ka longela Jehova fiyo alushe pamwe novaholike vetu! * — Tala eshangelo lopedu.