1. Oukwaneumbo waJehova owa hangana omolwetomheno lilipi?

OTWA hafa eshi tu li oshitukulwa shoukwaneumbo waJehova. Omolwashike oukwaneumbo wetu u na ombili nowa hangana? Etomheno ololo kutya atusheni ohatu ningi ngaashi hatu dulu opo tu fimaneke elongekido loukwamutwe olo Jehova a tula po. Onghee hano, ngeenge otu udite ko nawa elongekido li na sha noukwamutwe, ohatu ka kala twa hangana.

2. Omapulo elipi hatu ka nyamukula moshitukulwa eshi?

² Moshitukulwa eshi ohatu ka kundafana kutya olye e na eenghonopangelo meongalo. Ohatu ka mona yo omanyamukulo komapulo taa shikula: Onghandangala ilipi ovamwameme tava dana? Mbela omumwatate keshe oku li omutwe womumwameme keshe? Mbela ovakulunhuongalo ove na eenghonopangelo dokupangela ovamwatate novamwameme ngaashi omutwe woukwaneumbo hau pangele omukulukadi nounona vao? Tete natu ka taleni nghee tu na okuungaunga novamwameme.

3. Oshike tashi tu kwafele tu kale twa lenga neenghono oilonga oyo hai longwa kovamwameme?

³ Otwa lenga neenghono ovamwameme ovo hava longo noudiinini opo va file oshisho omaukwaneumbo avo, va udife onghundana iwa nokuyambidida eongalo. Ohatu ka kala twe va lenga neenghono mokutala nghee Jehova naJesus have va tale ko. Ohatu dulu yo okumona ouwa mokutala nghee omuyapostoli Paulus a li ha ungaunga novakainhu.

4. Ombiibeli oya ulika ngahelipi kutya Jehova okwa lenga ovakainhu nosho yo ovalumenhu?

⁴ Ombiibeli oya ulika kutya Jehova okwa lenga ovakainhu nosho yo ovalumenhu. Pashihopaenenwa, oya popya kutya mefelemudo  lotete, Jehova okwa li a pa ovakainhu novalumenhu omhepo iyapuki nosho yo eenghono opo va longe oikumwifilonga, ngaashi okupopya omalaka e lili noku lili. (Oil. 2:1-4, 15-18) Aveshe ova tililwa omhepo iyapuki notava ka pangela pamwe naKristus. (Gal. 3:26-29) Ovakainhu novalumenhu aveshe otava ka pewa ondjabi yoku ka kala nomwenyo fiyo alushe kombada yedu. (Eh. 7:9, 10, 13-15) Natango aveshe ove lineekelelwa oshilonga shokuudifa nokuhonga onghundana iwa. (Mat. 28:19, 20) Shikwao vali, embo lOilonga ola popya shi na sha noilonga yomumwameme wedina Priskila nomushamane waye Akwila, ovo va li va yelifila nawa omuhongwanhu Apollos oshili. — Oil. 18:24-26.

5. Lukas 10:38, 39, 42 okwa ulika ngahelipi kutya Jesus okwa li a lenga ovakainhu?

⁵ Jesus okwa li a fimaneka ovakainhu. Ka li a shikula eenghulunghedi dOvafarisai ovo va li inava fimaneka ovakainhu nokava li hava popi navo mokati kovanhu noihava kundafana navo Omishangwa. Ponhele yaasho, Jesus okwa li ha kundafana eeshili da fimana novakainhu nosho yo novalumenhu. * (Lesha Lukas 10:38, 39, 42.) Okwa li ha i pamwe novakainhu eshi ta udifa. (Luk. 8:1-3) Jesus okwa li yo a pa ovakainhu oufembanghenda woku ka shiivifila ovayapostoli kutya okwa nyumunwa koufi. — Joh. 20:16-18.

6. Omuyapostoli Paulus okwa ulika ngahelipi kutya okwa li a fimaneka ovakainhu?

⁶ Omuyapostoli Paulus okwa lombwela Timoteus a kale a lenga ovakainhu. Paulus okwe mu lombwela a ungaunge ‘novakainhu ovakulunhu ngaashi ooina, novakainhu ovanyasha ongaashi ovamwainakadona.’ (1 Tim. 5:1, 2) Nonande Paulus okwa li a ninga shihapu opo a kwafele Timoteus a kale Omukriste a pyokoka, okwa li e shii kutya ina nosho yo inakulu yaTimoteus ovo ve mu honga tete “omishangwa diyapuki.” (2 Tim. 1:5; 3:14, 15) Paulus okwa kundila po ovamwameme te va tumbula komadina monhumwafo oyo a li a shangela Ovaroma. Paulus ka li ashike a didilika oilonga yovamwameme ovo, ndele okwa li yo e va pandula eshi ve li Ovakriste ovadiinini. — Rom. 16:1-4, 6, 12; Fil. 4:3.

7. Omapulo elipi hatu ka kundafana paife?

⁷ Ngaashi twe shi mona moutendo va tetekela, kape na etomheno lopaMishangwa olo tali ulike kutya ovamwameme ove na okutalika ko inava fimana oku va yelekanifa novamwatate. Ovamwameme ovo ovanahole nohava yandje ove li ekwafo linene keongalo, nohava kwafele ovakulunhuongalo va xumife komesho ombili noukumwe meongalo. Ashike otwa pumbwa okumona omanyamukulo komapulo amwe. Pashihopaenenwa: Omolwashike Jehova a teelela omumwameme a djale sha komutwe ngeenge ta kwatele komesho peemhito dimwe? Molwaashi ovamwatate ovo ashike hava nangekwa po ve li ovakulunhuongalo nosho yo ovayakuliongalo, mbela osho osha hala okutya omumwatate keshe oku li omutwe womumwameme keshe meongalo?

8. Metwokumwe nOvaefeso 5:23, mbela omumwatate keshe oku li omutwe womumwameme keshe? Shi yelifa.

⁸ Enyamukulo li li pauxupi, ahowe. Omumwatate ke fi omutwe wovamwameme aveshe meongalo, Kristus oye omutwe weongalo. (Lesha Ovaefeso 5:23.) Omushamane oku na eenghonopangelo e dule omukulukadi moukwaneumbo. Omonamati a ninginifwa ke fi oukwamutwe waina. (Ef. 6:1, 2) Meongalo, eenghonopangelo dovakulunhuongalo oda ngabekwa. (1 Tes. 5:12; Heb. 13:17) Ovakainhu inava hombolwa, ovo ihava di vali pamwe novadali vavo, ove na okutwikila okufimaneka  ovadali vavo novakulunhuongalo. Ngaashi ashike ovalumenhu meongalo, ovakainhu ovo inava hombolwa navo ove na ashike oukwamutwe umwe, Jesus.

9. Omolwashike ovamwameme omafimbo amwe va pumbwa okudjala sha komutwe?

⁹ Oshoshili kutya Jehova okwa tula po ovalumenhu va kwatele komesho mokuhonga nokukwatela komesho meongalo, ashike inapa ovakainhu eenghonopangelo da tya ngaho. (1 Tim. 2:12) Omolwashike mbela? Omolwaashi okwa nangeka po Jesus e li omutwe womulumenhu opo a dule okukwatela nawa komesho moukwaneumbo waye. Omumwameme ota dulu okudana onghandangala oyo hai danwa komumwatate omolweenghalo donhumba, ashike pomhito opo Jehova okwa teelela a djale sha komutwe. * (1 Kor. 11:4-7) Jehova ina teelela ovamwameme va ninge ngaho molwaashi ngeno kutya ine va fimaneka, ndele okwa hala va ulike kutya ova fimaneka elongekido loukwamutwe olo a tula po. Tu na oushili oo momadiladilo, natu ka nyamukule epulo olo kutya: Mbela omitwe domaukwaneumbo nosho yo ovakulunhuongalo ove na eenghonopangelo di fike peni?

10. Omolwashike tashi dulika omukulunhuongalo a kwatwe keamo lokutulila po eongalo eemhango?

¹⁰ Ovakulunhuongalo ove hole Kristus nosho yo “eedi” odo va pewa kuJehova naJesus ve di file oshisho. (Joh. 21:15-17) Molwaashi omukulunhuongalo oku hole eongalo, otashi dulika a diladile kutya oku li xe keongalo. Otashi dulika a tomhafane kutya molwaashi omutwe woukwaneumbo ou na oufemba wokutula po eemhango opo u amene oukwaneumbo  wao, omukulunhuongalo naye oku na okutula po eemhango opo a amene eedi daKalunga. Ovamwatate novamwameme vamwe otashi dulika va pule ovakulunhuongalo ve va ningile ko omatokolo, naasho ohashi va ningifa va kale va fa oukwamutwe wavo. Ndele mbela ovakulunhuongalo meongalo nosho yo omitwe domaukwaneumbo ove na eenghonopangelo di fike pamwe?

11. Ongahelipi onghandangala oyo omitwe domaukwaneumbo novakulunhuongalo tava dana ya faafana?

¹¹ Omuyapostoli Paulus okwa popya kutya ope na omafaafano pokati konghandangala oyo omutwe woukwaneumbo nomukulunhuongalo ta dana. (1 Tim. 3:4, 5) Pashihopaenenwa, Jehova okwa hala oilyo youkwaneumbo i dulike komutwe woukwaneumbo. (Kol. 3:20) Okwa hala yo ovo ve li meongalo va dulike kovakulunhuongalo. Jehova okwa teelela omitwe domaukwaneumbo novakulunhuongalo va shilipaleke kutya ovo ve li koshi yepashukilo lavo ova filwa oshisho pamhepo. Aveshe ove na okufila oshisho pamaliudo ovo ve li koshi yeenghonopangelo davo. Ngaashi ashike omutwe woukwaneumbo muwa, ovakulunhuongalo navo ove na okushilipaleka kutya ovo ve li koshi yepashukilo lavo ova kwafelwa ngeenge ve li moudjuu. (Jak. 2:15-17) Shimwe vali, Jehova okwa teelela ovakulunhuongalo nosho yo  omitwe domaukwaneumbo di xumife komesho omifikamhango daye, ndele haku “koyelela osho sha shangwa” mOmbiibeli. — 1 Kor. 4:6.

12-13. Ngaashi sha ulikwa mOvaroma 7:2, ongahelipi onghandangala yomitwe domaukwaneumbo noyovakulunhuongalo ya yoolokafana?

¹² Ope na yo eyooloko lididilikwedi pokati konghandangala yomukulunhuongalo nosho yo yomutwe woukwaneumbo. Pashihopaenenwa, Jehova okwa nangeka po ovakulunhuongalo ve li ngaashi ovatokoli nokwe va pa oshinakuwanifwa shokukonda mo ovanyoni ovo inave livela ombedi meongalo. — 1 Kor. 5:11-13.

¹³ Mepingafano naasho, Jehova okwa yandja eenghonopangelo komitwe domaukwaneumbo odo ina pa ovakulunhuongalo. Pashihopaenenwa, okwa pitika omitwe domaukwaneumbo di tule po eemhango nokushilipaleka kutya otadi wanifwa po meumbo. (Lesha Ovaroma 7:2.) Otashi dulika omutwe woukwaneumbo u tulile po ounona omhango kutya ove na okuuya meumbo efimbo peni ngeenge kwa toka. Ou na yo oufemba okupa ounona outekuduliko ngeenge itava dulika komhango oyo. (Ef. 6:1) Oshoshili kutya omutwe woukwaneumbo unahole ohau kundafana tete nomukulukadi wao, ofimbo inau tula po eemhango moukwaneumbo, molwaashi aveshe vavali ove li “onhumba imwe.” * — Mat. 19:6.

14. (a) Metwokumwe naasho sha popiwa muMarkus 10:45, omolwashike tashi wapalele eshi Jehova a nangeka po Jesus e li omutwe weongalo? (b) Olutuwiliki otali dana onghandangala ilipi? (Tala oshimhungu “ Onghandangala oyo Olutuwiliki tali dana.”)

¹⁴ Omolwekuliloyambo, Jehova okwe lilandela keshe umwe oo e li meongalo nosho yo  oo e na eitavelo muJesus. (Lesha Markus 10:45; Oil. 20:28; 1 Kor. 15:21, 22) Onghee hano, otashi wapalele eshi a nangeka po Jesus a kale omutwe weongalo, molwaashi okwa yandja omwenyo waye u li ekulilo. Jesus e li omutwe weongalo oku na oufemba woku tu tulila po eemhango nokushilipaleka kutya keshe umwe pauhandimwe ote di tula moilonga, momaukwaneumbo nosho yo meongalo alishe. (Gal. 6:2) Ashike Jesus okwa ninga shihapu shihe fi ashike okutula po eemhango. Oha palula, ha file oshisho noku hole keshe umwe womufye. — Ef. 5:29.

15-16. Oshike we lihonga kwaasho sha popiwa komumwameme Marley nosho yo komumwatate Benjamin?

¹⁵ Ovamwameme ohava ulike kutya ova fimaneka Kristus mokushikula ewiliko olo tava pewa kovalumenhu ovo a nangeka po ve va file oshisho. Omumwameme wedina Marley wokoUnited States okwa popya shi na sha netaleko lovamwameme vahapu. Okwa ti: “Onda lenga ondodo yange ndi li omukulukadi nomumwameme meongalo. Ondi na okukala handi longo noudiinini opo ndi fimaneke elongekido li na sha noukwaneumbo olo Jehova a tula po. Ashike omushamane wange nosho yo ovamwatate meongalo ove shi ninga shipu kwaame, molwaashi ova fimaneka nge nohava pandula nge omolwoilonga oyo handi longo.”

¹⁶ Ovamwatate ohava ulike kutya ove udite ko elongekido li na sha noukwamutwe mokukala va lenga nova fimaneka ovamwameme. Omumwatate Benjamin wokoEngland okwa ti: “Ohandi lihonga shihapu momatyekosha ovamwameme mokwoongala, meenghedi odo hava longifa ngeenge tava konakona, nanghee hava pondola moukalele. Ondi wete kutya oilonga oyo hava longo oya fimana neenghono.”

17. Omolwashike tu na okufimaneka efinamhango li na sha noukwamutwe?

¹⁷ Eongalo otali ka kala li na ombili ngeenge aveshe ovo ve li mo, ovalumenhu, ovakainhu, omitwe domaukwaneumbo nosho yo ovakulunhuongalo ove udite ko nova fimaneka efinamhango li na sha noukwamutwe. Naasho sha fimanenena, ohatu fimanekifa Tate yetu womeulu omunahole, Jehova. — Eps. 150:6.