1-2. Metwokumwe naMateus 5:11, otu na okutala ko ngahelipi omayeleko?

JESUS okwa udanekela ovashikuli vaye kutya otava ka kala va hafa. Okwa londwela ovo ve mu hole kutya otava ka shakeneka omayeleko. (Mat. 10:22, 23; Luk. 6:20-23) Ohatu mono ehafo eshi tu li ovahongwa vaKristus. Ndele ohatu kala tu udite ngahelipi ngeenge hatu fininikwa kovapambele vetu, hatu hepekwa komapangelo, ile hatu fininikwa tu longe osho sha puka kovanailonga pamwe fye ile kovanafikola vakwetu? Oshi shii okuudiwa ko eshi oinima oyo hai tu etele oisho.

² Ohashi kala shidjuu kovanhu vahapu okwiitavela kutya otava dulu okukala va hafa nonande otava hepekwa. Ashike Eendjovo daKalunga ode tu lombwela kondadalunde tu ninge ngaho. Pashihopaenenwa, omuhongwa Jakob okwa popya kutya ponhele yokukala twa wililwa po, otu na okukala twa hafa ngeenge tu li momayeleko. (Jak. 1:2, 12) Jesus naye okwa popya kutya otu na okukala twa hafa ngeenge hatu hepekwa. (Lesha Mateus 5:11.) Ongahelipi hatu dulu okukaleka po ehafo letu nonande otu li momayeleko? Ohatu dulu okulihonga shihapu mokukonakona eendjovo odo di li monhumwafo yaJakob, oyo a li a shangela Ovakriste votete. Tete natu ka kundafaneni omashongo oo Ovakriste ovo va li va taalela.

3. Oshike sha li sha ningwa po diva konima eshi Jakob a ninga omuhongwa waJesus?

³ Diva konima eshi Jakob ondenge yaJesus a ninga omuhongwa, Ovakriste vomuJerusalem ova li va hangwa komahepeko. (Oil. 1:14; 5:17, 18) Eshi omuhongwa Stefanus a dipawa, Ovakriste vahapu ova li va fiya po oshilando nova li “ve lihanena moitukulwa yaJudea naSamaria,” nomokweendela ko kwefimbo ova ka fika kuKipro nokuAntiokia.  (Oil. 7:58–8:1; 11:19) Otu wete kutya ovahongwa ova li tave lididimikile omaudjuu mahapu. Kakele kaasho, ovahongwa ova li va udifa onghundana iwa nehafo keshe apa va ya, nopa li pa totwa omaongalo moitukulwa ihapu yaRoma. (1 Pet. 1:1) Konima yaasho, Ovakriste ovo ova ka taalela omaudjuu amwe vali.

4. Omaudjuu amwe vali elipi Ovakriste votete va li tave lididimikile?

⁴ Ovakriste vonale ova li ve lididimikila omayeleko e lili noku lili. Pashihopaenenwa, mo 50 O.P. lwaapo, omupangeli waRoma Klaudius okwa li a lombwela Ovajuda aveshe va dje mo muRoma. Osho osha li sha fininika Ovajuda ovo va li va ninga Ovakriste va fiye po omaumbo avo nokutembukila koitukulwa imwe. (Oil. 18:1-3) Mo 61 O.P. lwaapo, omuyapostoli Paulus okwa ka shanga kutya Ovakriste vakwao ova kala tava shekwa moipafi, tava tulwa modolongo nokunyekwa oinima yavo. (Heb. 10:32-34) Ngaashi ashike ovanhu vakwao, Ovakriste ovo ova li tave lididimikile ondjala nosho yo omikifi. — Rom. 15:26; Fil. 2:25-27.

5. Omapulo elipi hatu ka nyamukula?

⁵ Eshi Jakob a shanga onhumwafo yaye komesho yomudo 62 O.P., okwa li e shii nawa omayeleko oo a li a shakenekwa kovamwaxe. Jehova okwa li a nwefa mo Jakob a shangele Ovakriste ovo opo e va pe omayele, oo a li tae ke va kwafela va kale va hafa nonande ova taalela omayeleko. Paife natu ka konakoneni onhumwafo yaJakob nokunyamukula omapulo aa: Jakob okwa shanga kombinga yehafo lilipi? Oshike tashi dulu okunyona po ehafo lOmukriste? Ongahelipi ounongo, eitavelo nouladi tai tu kwafele tu kaleke po ehafo letu kashi na nee mbudi kutya ohatu shakeneke omayeleko a tya ngahelipi?

6. Metwokumwe naLukas 6:22, 23, omolwashike Omukriste ta dulu okukala a hafa nonande ota mono oixuna?

⁶ Ovanhu otashi dulika va diladile kutya otava  ka kala ashike va hafa ngeenge ove na oukolele muwa, ve na oimaliwa ihapu nove na omaukwaneumbo a hafa. Ashike ehafo olo Jakob a shanga kombinga yalo oli li oshiimati shomhepo yaKalunga, nehafo olo inali kanghamena keenghalo. (Gal. 5:22) Omukriste ota dulu okukala a hafa, ile okumona ehafo lashili ngeenge oku shii kutya ota hafifa Jehova nota shikula oshihopaenenwa shaJesus. (Lesha Lukas 6:22, 23; Kol. 1:10, 11) Ngaashi ashike omundilo hau kala wa tema nawa ngeenge u li meni lekende lolamba, nafye ohatu kala twa hafa momitima detu kashi na nee mbudi kutya ohatu shakeneke eenghalo da tya ngahelipi. Ihatu kanifa ehafo letu ngeenge hatu vele ile ngeenge tu na oimaliwa inini. Ohatu kala twa hafa ngeenge hatu shekwa, ile hatu patanekwa kovapambele ile kuvamwe vali. Ngaashi ashike olamba ihai dimi, hai kala ya tema nawa, nafye ngeenge hatu patanekwa ohatu kala twa hafa neenghono. Omayeleko oo hatu shakeneke omolweitavelo letu otaa ulike kutya otu li ovahongwa vashili vaKristus. (Mat. 10:22; 24:9; Joh. 15:20) Nomolwaasho Jakob a shanga a ti: “Ovamwatate, kaleni mwa hafa ngeenge tamu shakeneke omayeleko e lili noku lili.” — Jak. 1:2.

7-8. Omolwashike eitavelo letu hali kala la kola ngeenge hatu yelekwa?

⁷ Jakob okwa tumbula vali etomheno limwe kutya omolwashike Ovakriste hava kala va halelela okulididimikila omayeleko nokuli naao a kwata moiti. Okwa ti: “Ngeenge eitavelo leni tali yelekwa, eshi tamu piti meenghalo didjuu, otashi mu kwafele mu lididimike.” (Jak. 1:3) Omayeleko otaa dulu okufaafanifwa nomundilo oo hau longifwa kovahambuli voitenda ngeenge tava xwike oitenda. Ngeenge oshitenda osha ndjenekwa, ndele tashi talalekwa ohashi kala sha kola neenghono. Sha faafana, ngeenge hatu lididimikile omayeleko, eitavelo letu ohali kala la kola. Nomolwaasho Jakob a shanga a ti: “Eshi tamu lididimike, otamu lideula nye vene, opo mu kale muhe na oshipo nomu kale hamu shi endifa nawa moinima aishe.” (Jak. 1:4) Ngeenge otu shii kutya omayeleko otaa pameke eitavelo letu, ohatu e lididimikile nehafo.

⁸ Jakob okwa tumbula yo oinima imwe monhumwafo yaye, oyo tai dulu okunyona po ehafo letu. Omashongo oo oelipi, nongahelipi hatu dulu oku a finda?

9. Omolwashike twa pumbwa ounongo?

⁹ Eshongo: Ngeenge tuhe shii osho tu na okuninga po. Ngeenge tu li momayeleko otwa hala okukala hatu kongo ekwafo kuJehova opo tu ninge omatokolo oo tae mu a fifa, oo taa hafifa ovamwatate novamwameme, notae tu kwafele tu kanyatele oudiinini wetu. (Jer. 10:23) Otwa pumbwa ounongo opo tu shiive osho tu na okuninga nosho yo osho tu na okulombwela ovapataneki vetu. Ngeenge katu shii osho tu na okuninga po, otashi dulika shi tu teye omukumo, ndele hatu kanifa diva ehafo letu.

10. Jakob 1:5 okwe tu lombwela tu ninge shike opo tu mone ounongo?

 ¹⁰ Ekandulepo: Pula Jehova e ku pe ounongo. Opo tu lididimikile omaudjuu nehafo, tete otwa pumbwa okupula Jehova okupitila meilikano e tu pe ounongo oo twa pumbwa opo tu ninge omatokolo e li mondjila. (Lesha Jakob 1:5.) Oshike tu na okuninga po ngeenge otwa didilike kutya Jehova ina nyamukula omailikano etu diva? Jakob okwa ti kutya otu na ‘okukala hatu indile’ kuKalunga. Jehova iha kala a handuka ngeenge hatu mu indile e tu pe ounongo. Tate yetu womeulu oha “yandje nehalo liwa” ngeenge hatu mu indile ounongo opo tu lididimikile omayeleko. (Eps. 25:12, 13) Oha kala e wete omaudjuu etu, ha kala e tu uditile oukwao wananghali noha kala a halelela oku tu kwafela. Naasho osho hashi tu etele ehafo! Ndele ongahelipi Jehova he tu pe ounongo?

11. Oshike vali twa pumbwa okuninga opo tu mone ounongo?

¹¹ Jehova ohe tu pe ounongo okupitila mEendjovo daye. (Omayel. 2:6) Opo tu mone ounongo oo, otwa pumbwa okukonakona Eendjovo daKalunga nosho yo oishangomwa oyo ya kanghamena kOmbiibeli. Ndele otwa pumbwa okuninga shihapu shihe fi ashike okukonakona. Otu na okutula moilonga osho Kalunga te tu lombwele tu ninge. Jakob okwa ti: “Kaleni ovawanifi veendjovo, ndele havapwilikini ashike vongaho.” (Jak. 1:22) Ngeenge otwa tula moilonga omayele aKalunga, otashi ke tu kwafela tu kale ovanambili, tu na ondjele nonghenda. (Jak. 3:17) Omaukwatya oo otae ke tu kwafela tu ungaunge nomayeleko nopehe na okukanifa ehafo letu.

12. Omolwashike sha fimana okukala tu shii nawa Ombiibeli?

¹² Eendjovo daKalunga oda fa esipili, olo hali tu kwafele tu didilike mo osho tu na okuxwepopaleka nonghee hatu dulu oku shi ninga. (Jak. 1:23-25) Pashihopaenenwa, konima eshi twa konakona Eendjovo daKalunga, otashi dulika tu mone kutya otwa pumbwa okupangela ehandu letu. Kekwafo  laJehova, otwe lihonga nghee hatu dulu okukala ovanambili ngeenge hatu ungaunga novanhu ile nomaupyakadi oo taa dulu oku tu handukifa. Molwaashi otu na omwenyo muwa, ohatu lididimikile omayeleko oo hatu shakeneke. Ohashi tu kwafele tu diladile nawa nokuninga omatokolo e li mondjila. (Jak. 3:13) Inashi fimana tuu okukala tu shii nawa Ombiibeli!

13. Omolwashike tu na okukonakona oihopaenenwa yovanhu ovo va tumbulwa mOmbiibeli?

¹³ Omafimbo amwe ohatu ka mona ashike kutya oshike twa li tu na okuhenuka konima eshi twa ninga epuko. Ndele oyo oi li onghedi idjuu nokulihonga. Onghedi ya denga mbada omo hatu dulu okumona ounongo, omokukonakona oihopaenenwa yavamwe ovo va li va pondola nove lihonga komapuko avo. Nomolwaasho Jakob e tu ladipika tu konakone oihopaenenwa oyo i li mOmbiibeli ngaashi shaAbraham, Rahab, Job noshaElia. (Jak. 2:21-26; 5:10, 11, 17, 18) Ovapiya ovo ovadiinini vaJehova ova li va dula okulididimikila omayeleko, oo a li taa dulu okunyona po ehafo lavo. Oihopaenenwa yavo yelididimiko otai ulike kutya nafye ohatu dulu okuninga sha faafana kekwafo laJehova.

14-15. Omolwashike tuhe na okukala twa limbililwa?

¹⁴ Eshongo: Ngeenge twa limbililwa shi na sha neitavelo letu. Omafimbo nomafimbo, otashi dulika hatu mono shidjuu okuuda ko oshinima shonhumba mEendjovo daKalunga. Ile otashi dulika Jehova aha nyamukule omailikano etu monghedi oyo twa li twa teelela. Osho otashi dulu oku tu etela omalimbililo. Ngeenge otwe lipwililikile omalimbililo, otaa dulu okunghundipaleka eitavelo letu nokunyona po ekwatafano letu naJehova. (Jak. 1:7, 8) Omalimbililo a tya ngaho otaa dulu nokuli okunyona po eteelelo letu li na sha nonakwiiwa.

¹⁵ Omuyapostoli Paulus okwa faafanifa eteelelo letu li na sha nonakwiiwa nekanghamifo. (Heb. 6:19) Ekanghamifo ohali kwafele oshikepa iha tengauke pefimbo loshikungulu nohali i kelele opo ihe lidenge momamanya. Ndele ekanghamifo ohali kala ashike li na oshilonga, ngeenge elyenge olo hali kwatakanifa ekanghamifo noshikepa ola kola. Ngaashi ashike olushu hali nghundipaleke elyenge lekanghamifo, omalimbililo nao otaa dulu okunghundipaleka eitavelo letu. Omunhu oo e li momaudjuu, ngeenge okwa kala a limbililwa, ota dulu okukanifa eitavelo olo kutya Jehova ota ka wanifa po omaudaneko aye. Ngeenge otwa efa po eitavelo letu, kungaho otwa efa po eteelelo letu. Jakob okwa popya kutya omunhu oo e na omalimbililo “okwa fa ekufikufi lomefuta tali telaanifwa komhepo.” (Jak. 1:6) Omunhu a tya ngaho iha kala a hafa nandenande!

16. Oshike tu na okuninga po ngeenge otu na omalimbililo?

¹⁶ Ekandulepo: Henuka omalimbililo; pameka eitavelo loye. Ino kala omutengauki. Pefimbo lomuprofeti Elia, oshiwana shaJehova osha li hashi tengauka. Elia okwa li e shi lombwela a ti: “Fiyo onaini tamu tengaukile kombinga nombinga? Omwene ngeenge Oye Kalunga, mu shikuleni, ndelenee Baal ngeenge oye kalunga, mu shikuleni.” (1 Eeh. 18:21) Kunena nafye otwa pumbwa okukatuka meendelelo. Otwa pumbwa okuninga omapekapeko opo tu koleke oumbangi oo kutya Jehova oye Kalunga, Ombiibeli oi li Eendjovo daye, nonokutya Eendombwedi daJehova odi li oshiwana shaye. (1 Tes. 5:21) Ngeenge otwa ningi oinima aishe oyo, itatu ka kala vali twa limbililwa notashi ka pameka eitavelo letu. Ngeenge otwa pumbwa ekwafo opo tu henuke omalimbililo ohatu dulu okukonga ekwafo kovakulunhuongalo. Ohatu dulu okukatuka eenghatu meendelelo opo tu kaleke po ehafo letu eshi hatu longele Jehova.

17. Oshike tashi ka ningwa po ngeenge otwa teka omukumo?

¹⁷ Eshongo: Ngeenge twa teka omukumo. Eendjovo daKalunga oda ti: “Ngeenge wa monika wa fya ounye, efiku loluhepo eenghono doye tadi ka ninipala.” (Omayel. 24:10) Oshitya shOshiheberi osho sha tolokwa ‘okufya ounye,’ osha hala yo okutya “okuteka omukumo.” Ngeenge owa teka omukumo, oto ka kanifa diva ehafo loye.

18. Osha hala okutya ngahelipi okulididimika?

 ¹⁸ Ekandulepo: Lineekela muJehova opo e ku pe ouladi u dule okulididimika. Otwa pumbwa ouladi opo tu dule okulididimikila omaudjuu. (Jak. 5:11) Oshitya ‘elididimiko’ osho sha longifwa kuJakob otashi yandje ediladilo lomunhu oo e li ofika a mwena ite linyenge. Otashi dulika tu diladila komukwaita oo e li ofika, noita faduka po omutondi waye, kashi na nee mbudi kutya olwoodi ola kwata moiti shi fike peni.

19. Oshike hatu lihongo koshihopaenenwa shomuyapostoli Paulus?

¹⁹ Omuyapostoli Paulus okwa tula po oshihopaenenwa sha tongomana shi na sha nouladi nosho yo nelididimiko. Omafimbo amwe okwa li ha kala e udite a nghundipala. Ashike okwa li a dula okulididimika, molwaashi okwa kala e lineekela muJehova opo e mu pe eenghono odo a pumbwa. (2 Kor. 12:8-10; Fil. 4:13) Ohatu ka mona eenghono nosho yo ouladi wa tya ngaho ngeenge otwa dimine nelininipiko kutya otwa pumbwa ekwafo laJehova. — Jak. 4:10.

20-21. Ohatu dulu okukala noushili ulipi?

²⁰ Ohatu dulu okukala noushili kutya omayeleko oo hatu shakeneke kae fi ehandukilo la dja kuJehova. Jakob okwa ti: “Ngeenge umwe ta yelekwa, ina tya: ‘Ohandi yelekwa kuKalunga.’ Osheshi Kalunga iha dulu okuyelekwa nowii, noiha yeleke omunhu nowii.” (Jak. 1:13) Ngeenge otwa tomhwa koushili oo, ohatu ka ehena popepi elela naTate yetu womeulu omunahole. — Jak. 4:8.

²¹ Jehova ‘iha lunduluka.’ (Jak. 1:17) Ngaashi ashike a li a kwafela Ovakriste vomefelemudo lotete va pite momaudjuu, nafye ote ke tu kwafela yo tu pite mo kunena. Konga ekwafo kuJehova wa mana mo opo e ku pe ounongo, eitavelo nosho yo ouladi. Ota ka nyamukula omailikano oye. Opo nee oto ka kala noushili kutya ote ke ku kwafela u kale wa hafa nonande oto lididimikile omaudjuu!