1. Omolwashike twa pumbwa ewiliko laJehova? Shi faneka.

 DILADILA nee ngeno u li mofuka wa kana. Omwa nyika oshiponga neenghono, molwaashi omu na oifitukuti nosho yo oimeno noipuka i na oudiyo. Oto dulu yo okuwila melambo. Ashike oto ka kala wa hafa neenghono, ngeenge ope na umwe oo te ku wilike, oo e shii nawa oshitukulwa note ke ku kwafela u henuke oiponga. Ounyuni ou owa fa ofuka oyo. Omu na oiponga ihapu oyo tai dulu okunyona po ekwatafano letu naJehova. Ashike otu na Omuwiliki a wanenena Jehova. Ote tu kwafele tu henuke oiponga nokufika kefikilo letu, komwenyo waalushe mounyuni mupe.

2. Jehova ohe tu wilike ngahelipi?

² Jehova ohe tu wilike ngahelipi? Shotete, ohe tu wilike okupitila mEendjovo daye, Ombiibeli. Shikwao vali, oha longifa ovakalelipo vaye vopanhu. Pashihopaenenwa, oha longifa “omupiya omudiinini nomunaendunge” e tu pe eendja dopamhepo, odo hadi tu kwafele tu ninge omatokolo opandunge. (Mat. 24:45) Jehova oha longifa yo ovalumenhu vamwe ovo va pyokoka, opo ve tu wilike. Pashihopaenenwa, ovapashukilishikandjo nosho yo ovakulunhuongalo ohave tu tu omukumo noku tu pa omalombwelo, oo hae tu kwafele, tu dule okupita meenghalo didjuu. Otwa pandula neenghono, eshi Jehova he tu wilike momafimbo aa madjuu, ofimbo exulilo inali uya. Osho ohashi tu kwafele tu kale ookaume kaJehova, opo tu dule okuhafela onghalamwenyo paife nosho yo fiyo alushe.

3. Oshike hatu ka kundafana moshitukulwa eshi?

³ Omafimbo amwe, otashi dulika tu mone shidjuu okushikula ewiliko laJehova, unene tuu ngeenge otali yandjwa kovalumenhu inava wanenena. Omolwashike? Ewiliko olo tave tu pe otashi dulika halo twa hala okuuda. Ile otashi dulika tu udite kutya ewiliko olo tave tu pe kali li pandunge, nokufika pexulifodiladilo kutya inali dja kuJehova. Pomafimbo a tya ngaho, opo unene twa pumbwa okulineekela kutya Jehova oye ta wilike oshiwana shaye,  nokushikula ewiliko laye ohashi tu etele omanangeko noupuna. Moshitukulwa eshi, ohatu ka konakona oitwa oyo tai tu kwafele tu pameke elineekelo letu (1) nghee Jehova a li a wilika oshiwana shaye pefimbo lOmbiibeli, (2) nghee te tu wilike kunena nosho yo (3) nghee hatu mono ouwa mokukala hatu shikula ewiliko laye.

NGHEE JEHOVA A LI A WILIKA OSHIWANA SHAISRAEL

4-5. Jehova okwa ulika ngahelipi kutya okwa li ta longifa Moses a wilike Ovaisrael? (Tala efano kombada yoshifo.)

⁴ Jehova okwa li a nangeka po Moses a wilike oshiwana shOvaisrael shi dje mo muEgipiti. Jehova okwa li a pa Ovaisrael oumbangi wa yela kutya oye te va wilike okupitila muMoses. Pashihopaenenwa, okwa li e va pa oluudi loshilemo li va kwatele komesho omutenya, noluudi lomundilo li va kwatele komesho oufiku. (Ex. 13:21) Moses okwa li a shikula oluudi olo le mu wilika nosho yo Ovaisrael va ye kEfuta Litilyana. Oshiwana osha li sha tila neenghono, molwaashi osha li tashi diladila kutya osha fitikininwa pokati kefuta ketangakwaita laEgipiti, olo la li le va shikula. Ova li va fika pexulifodiladilo kutya Moses okwa puka, eshi e va twala kEfuta Litilyana. Ashike Moses ka li a ninga epuko. Jehova oye a longifa Moses a twale oshiwana shaye kEfuta Litilyana. (Ex. 14:2) Opo nee Kalunga okwa li e shi xupifa monghedi ididilikwedi neenghono. — Ex. 14:​26-28.

⁵ Oule weedula 40, Moses okwa twikila okulineekela kutya Jehova ota longifa oluudi loshilemo a wilike oshiwana shaye mombuwa. a Oule wefimbo, Jehova okwa kala ha tula oluudi kombada yetwali laMoses opo Ovaisrael aveshe tava dulu oku li mona. (Ex. 33:​7, 9, 10) Jehova okwa li ha popi naMoses okupitila moluudi, nolwanima Moses oha ka lombwela oshiwana, osho Jehova e mu lombwela. (Eps. 99:7) Ovaisrael ova li ve na oumbangi wa yela, oo tau ulike kutya Jehova ota longifa Moses e va wilike.

6. Ovaisrael ova li ve linyenga ngahelipi kewiliko laJehova? (Numeri 14:​2, 10, 11)

⁶ Shinyikifa oluhodi, Ovaisrael vahapu kava li va tambula ko oumbangi wa yela, oo tau ulike kutya Jehova ota longifa Moses, e li omukalelipo waye. (Lesha Numeri 14:​2, 10, 11.) Ova anya lwoikando okutambula ko kutya Jehova ota longifa Moses e va wilike. Oshidjemo, epupi olo lOvaisrael kala li la pitikwa li ye mEdu lEudaneko. — Num. 14:30.

7. Yandja oihopaenenwa yaavo va li va shikula ewiliko laJehova. (Numeri 14:24) (Tala yo efano.)

⁷ Ovaisrael vamwe ova li va shikula ewiliko laJehova. Pashihopaenenwa, Jehova okwa ti: ‘Kaleb okwa kala ha dulika kwaame nomutima aushe.’ (Lesha Numeri 14:24.) Kalunga okwa li a nangeka noupuna Kaleb, nokwa li nokuli e mu pitika a hoolole onhele opo a hala oku ka kala mEdu lEudaneko. (Jos. 14:​12-14) Epupi la ka shikula ko lOvaisrael nalo ola li yo la tula po oshihopaenenwa shiwa shokushikula ewiliko laJehova. Eshi Josua a li a pingena po Moses nokwa nangekwa po a wilike Ovaisrael, Ovaisrael ‘ove mu fimaneka neenghono onghalamwenyo yaye aishe.’ (Jos. 4:14) Oshidjemo, Jehova okwa li e va nangeka noupuna noku va twala medu olo a li e va udanekela. — Jos. 21:​43, 44.

8. Yelifa nghee Jehova a li a wilika oshiwana shaye pefimbo leehamba. (Tala yo efano.)

⁸ Omido donhumba lwanima, Jehova okwa li a nangeka po ovatokoli va wilike oshiwana shaye. Konima yaasho, pefimbo leehamba, Jehova okwa li a nangeka po ovaprofeti va wilike oshiwana shaye. Eehamba didiinini oda li hadi shikula omayele ovaprofeti. Pashihopaenenwa, ohamba David oya li ya tambula ko nelininipiko epukululo lomuprofeti Natan. (2 Sam. 12:​7, 13; 1 Omaf. 17:​3, 4) Ohamba Josafat oya li ya  shikula ewiliko, olo ya li ya pewa komuprofeti Jahasiel nokuladipika ovanhu vomuJuda ve ‘lineekele ovaprofeti vaKalunga.’ (2 Omaf. 20:​14, 15, 20) Ngeenge ohamba Hiskia ya wililwa po, oya li hai pula omuprofeti Jesaja e i kwafele. (Jes. 37:​1-6) Efimbo keshe eehamba tadi shikula ewiliko laJehova, oda li hadi nangekwa noupuna, noshiwana osha li hashi kala meameno. (2 Omaf. 20:​29, 30; 32:22) Keshe umwe okwa li a kala e shi wete filufilu kutya Jehova ota longifa ovaprofeti vaye a wilike oshiwana shaye. Ndele eehamba nOvaisrael vahapu kava li va pwilikina kovaprofeti vaJehova. — Jer. 35:​12-15.

NGHEE JEHOVA A LI A WILIKA OVAKRISTE VOTETE

9. Jehova okwa li a longifa oolyelye a wilike Ovakriste vopefimbo lovayapostoli? (Tala yo efano.)

⁹ Konima eshi Jesus a nyumunwa, Jehova okwa li a tota po eongalo lOpakriste. Ongahelipi a li a wilika Ovakriste ovo votete? Okwa li a nangeka po Jesus e li omutwe weongalo. (Ef. 5:23) Ashike Jesus ka li a popya nomuhongwa keshe paumwene, e mu lombwele osho e na okuninga. Okwa li a longifa ovayapostoli nosho yo ovalumenhu ovakulunhu vomuJerusalem va kwatele komesho. (Oil. 15:​1, 2) Okwa li yo a nangeka po ovakulunhuongalo va wilike omaongalo. — 1 Tes. 5:12; Tit. 1:5.

10. (a) Ovakriste vopefimbo lovayapostoli ova li ve linyenga ngahelipi kewiliko olo va li va pewa? (Oilonga 15:​30, 31) (b) Omolwashike vamwe vopefimbo lOmbiibeli va li va dopa okudidilika mo ovakalelipo vaJehova? (Tala oshimhungu “ Omolwashike vamwe inava tambula ko oumbangi wa yela.”)

¹⁰ Ovakriste vopefimbo lovayapostoli ova li ve linyenga ngahelipi? Vahapu ova li va shikula nehafo omalombwelo oo va li va pewa. “Ova li va hafa neenghono eshi va tuwa omukumo.” (Lesha Oilonga 15:​30, 31.) Ndele ongahelipi Jehova a kala ta wilike oshiwana shaye mefimbo opo la di ko?

NGHEE JEHOVA HE TU WILIKE KUNENA

11. Yandja oshihopaenenwa osho tashi ulike nghee Jehova a wilika ovo tava kwatele komesho mefimbo opo la di ko.

¹¹ Jehova ota twikile okuwilika oshiwana shaye kunena. Okwa kala ta ningi ngaho okupitila mEendjovo daye nosho yo mOmona waye, oo e li omutwe weongalo. Mbela otu wete ngoo oumbangi oo tau ulike kutya natango Jehova ota twikile okulongifa ovakalelipo vaye vopanhu? Heeno. Pashihopaenenwa, diladila kwaasho sha ningwa po konima yomudo wo 1800. Charles  Taze Russell nookaume kaye ova li va hovela okuuda ko kutya 1914 otau ka kala omudo wa fimana u na sha nokudikwa po kwOuhamba waKalunga. (Dan. 4:​25, 26) Osho ove shi mona, molwaashi ova ninga omapekapeko mOmbiibeli nova li ve lineekela kutya otava ka mona eshi omaxunganeko oo taa wanifwa po. Mbela Jehova okwa li te va wilike, eshi tava ningi omapekapeko mOmbiibeli? Osho lela. Osho sha ningwa po mounyuni mo 1914, osha ulika kutya Ouhamba waKalunga owa hovela okupangela. Momudo oo omo Oita yOtete yOunyuni ya hovela nokwa shikula omikifi dolutapo, omakakamo edu nosho yo ondjala. (Luk. 21:​10, 11) Osha yela filufilu kutya Jehova okwa longifa ovalumenhu ovo ovanamitimadiwa va kwafele oshiwana shaye.

12-13. Ovamwatate voshinakuwanifwa ova ninga po shike pefimbo lOita Itivali yOunyuni, opo va tamunune mo oilonga yokuudifa?

¹² Natu ka taleni vali kwaasho sha li sha ningwa po pefimbo lOita Itivali yOunyuni. Ovamwatate voshinakuwanifwa keembelewa da kula ova li va konakona Ehololo 17:8. Eshi ve i konakona, ova li va uda ko kutya Oita Itivali yOunyuni itai twala puArmagedon. Onghee ova li ve shii kutya otapa ka kala efimbo lombili konima yoita oyo, eshi Eendombwedi daJehova tadi ka dula okuudifila ovanhu vahapu. Nonande osha li tashi monika sha fa shihe li pandunge pefimbo opo, ovamwatate voshinakuwanifwa ova li va hovela ofikola yaGilead, opo i deule ovatumwa va ka udife nokuhonga moilando mounyuni aushe. Ovatumwa ovo ova li va tumwa nokuli nopefimbo loita. Shikwao vali, omupiya omudiinini okwa li a unganeka ku totwe Ofikola ye likalekelwa b momaongalo aeshe, opo i kwafele ovaudifi aveshe va kale ovaudifi novahongi vawa. Kungaho oshiwana shaKalunga osha li sha longekidilwa oilonga oyo i li komesho.

¹³ Kunena, otu shi liwetele filufilu kutya Jehova okwa kala ta wilike oshiwana shaye pefimbo olo la li lidjuu. Okudja pefimbo lOita Itivali yOunyuni, oshiwana shaJehova osha kala tashi udifa sha manguluka moilongo ihapu. Ovanhu vahapu ova shiiva Jehova, novapiya vaye otava udifa mounyuni aushe.

14. Omolwashike hatu dulu okulineekela ewiliko olo ha li di kehangano laJehova nosho yo kovakulunhuongalo ovo va nangekwa po? (Ehololo 2:1) (Tala yo efano.)

 ¹⁴ Kunena, oilyo yOlutuwiliki otai twikile okukonga ewiliko kuKristus. Oya hala omalombwelo, oo tai yandje kovamwaxe, a ulike kutya oi na etaleko la fa laJehova nosho yo laKristus li na sha noinima. Opo nee ohava longifa ovapashukilishikandjo nosho yo ovakulunhuongalo va yandje ewiliko komaongalo. c Ovakulunhuongalo ovavaekwa ove li ‘meke laKristus lokolulyo.’ (Lesha Ehololo 2:1.) Oshoshili kutya ovakulunhuongalo ovo inava wanenena nohava ningi omapuko. Moses naJosua navo omafimbo amwe ova li va ninga omapuko, ngaashi ashike ovayapostoli. (Num. 20:12; Jos. 9:​14, 15; Rom. 3:23) Ndele otu shi liwetele filufilu kutya Jesus ota wilike nawanawa omupiya omudiinini nosho yo ovakulunhuongalo ovo va nangekwa po. Ota twikile yo okuninga ngaho “alushe fiyo omomafiku axuuninwa ounyuni ou.” (Mat. 28:20) Onghee otu na omatomheno a femba okulineekela ewiliko olo te tu pe okupitila mwaavo va nangekwa po va kwatele komesho.

OHATU MONO OUWA, NGEENGE OTWA KALA HATU SHIKULA EWILIKO LAJEHOVA

15-16. Oshike to lihongo moimoniwa yaavo va shikula ewiliko laJehova?

¹⁵ Ngeenge otwa kala hatu shikula ewiliko laJehova, ohatu hafele omanangeko noupuna nokuli nopaife. Pashihopaenenwa, Andy naRobyn ova li va tula moilonga omayele omupiya omudiinini e na sha nokukaleka onghalamwenyo yavo paunafangwa. (Heb. 13:5) Oshidjemo, ova li va dula okuliyamba va longe moilonga yokutunga Omalupale Ouhamba nosho yo omatungo amwe vali ehangano. Robyn okwa ti: “Omafimbo amwe, otwa li hatu kala monhele inini neenghono nokatwa li hatu kala tu na okombifa. Onda li yo ndi na okulandifa po omafano ange mahapu okufaneka noinima yao aishe, nonande onda li ndi hole okufaneka. Onda li nda kwena, eshi nde i landifa po. Ndele ngaashi omukulukadi waAbraham, Sara, onda li nda tokola toko ndiha kale nda nyika oluhodi omolwoinima oyo nda efa po, ndele ondi kale nda hafa omolwaasho handi dulu okuningila Jehova paife.” (Heb. 11:15) Ongahelipi Andy naRobyn va mona ouwa? Robyn okwa ti: “Otwa hafa neenghono, molwaashi otu shi shii kutya ohatu pe Jehova keshe osho tu na. Ame nomushamane wange, ngeenge hatu longo oilonga oyo Jehova e tu pa, ohatu mono kutya onghalamwenyo otai ka kala ya tya ngahelipi mounyuni mupe.” Andy okwa weda ko a ti: Otwa hafa, molwaashi ohatu longifa efimbo letu alishe nosho yo eenghono detu moilonga yaJehova.”

¹⁶ Ongahelipi vali hatu dulu okumona ouwa, ngeenge otwa kala hatu shikula ewiliko laJehova?  Pashihopaenenwa, eshi Marcia a mana ofikola, okwa li a hala okutula moilonga omayele oo a li a pewa e na sha nokukokola ondjila. (Mat. 6:33; Rom. 12:11) Okwa ti: “Onda li handi dulu oku ke lihonga kouniversiti oule weedula nhee oshali. Ashike onda li nda hala okulonga shihapu moilonga yaJehova. Onghee ponhele yokuya kOuniversiti, onda li nda hoolola okulihonga oilonga yonhumba oyo tai kwafele nge ndi mone oshimaliwa sha wana, opo ndi dule okukokola ondjila. Olo ola li etokolo la denga mbada olo nda li nda ninga. Paife ohandi hafele oukokolindjila wondjikilile. Ndele molwaashi ohandi dulu okuhoolola kutya ohandi longo efimbo li fike peni, ohandi dulu okukwafela kObetel nokuninga vali oinima imwe iwa mehangano laJehova.”

17. Omauwa vali elipi hatu ka mona, ngeenge otwa kala hatu shikula ewiliko laJehova? (Jesaja 48:​17, 18)

¹⁷ Omafimbo amwe, ohatu pewa omayele okudja kehangano, oo tae tu amene koinima ngaashi ohole yokuhola omaliko nosho yo oinima oyo tai dulu oku tu ningifa tu nyone eemhango daKalunga. Ohatu ka mona ouwa, ngeenge otwa shikula ewiliko laJehova moinima oyo. Ohatu ka kala tu na eliudo la koshoka nohatu ka henuka omaupyakadi mahapu. (1 Tim. 6:​9, 10) Oshidjemo, ohatu dulu okulongela Jehova nomutima aushe, osho tashi ke tu etela ehafo linene, ombili nokukala twa wanenwa. — Lesha Jesaja 48:​17, 18.

18. Omolwashike wa tokola toko okushikula ewiliko laJehova?

¹⁸ Nopehe na omalimbililo, Jehova ota twikile okulongifa ovakalelipo vaye vopanhu e tu pe ewiliko pefimbo loudjuu munene fiyo omEpangelo lOmido Eyovi limwe. (Eps. 45:16) Mbela ohatu ka twikila ngoo okushikula ewiliko nokuli nonande otashi pula tu efe po osho tu hole? Shihapu oshe likolelela kunghee hatu linyenge kewiliko olo hatu pewa kuJehova paife. Onghee hano, natu kaleni alushe hatu shikula ewiliko olo hatu pewa kuJehova, mwa kwatelwa olo hali di kovalumenhu ovo a nangeka po ve tu pashukile. (Jes. 32:​1, 2; Heb. 13:17) Eshi hatu ningi ngaho, ohatu shikula Omuwiliki wetu, Jehova, tu na elineekelo filufilu, molwaashi ote tu amene koinima oyo tai dulu okunyona po ekwatafano letu naye note tu wilike tu ka mone omwenyo waalushe.