MBELA ope na efimbo wa li wa taalela oupyakadi wonhumba nokape na oo e ku kwafela? Otu li ‘momafimbo madjuu okukaliwa muo,’ naasho ohashi tu ningifa tu kale twa teka omukumo notu udite tu li ofye atuke. (2 Tim. 3:1) Ashike ope na ovanhu ovo tava dulu oku tu kwafela, ngeenge tu li momaupyakadi. Ombiibeli oya ti kutya ookaume kashili otava dulu oku tu kwafela “pefimbo loudjuu.” — Omayel. 17:17.

Omuyapostoli Paulus okwa li ha ende pamwe nookaume kaye eshi a li molweendo loutumwa, nookaume va tya ngaho ova li ve mu kwafela neenghono. (Kol. 4:​7-11) Eshi Paulus a li e li modolongo muRoma, ookaume kaye ova li ve mu longela oilonga oyo a li ita dulu okulonga kuye mwene. Pashihopaenenwa, Epafroditus okwa li e mu etela oinima oyo a li a tuminwa kovamwatate novamwameme vokuFilippi. (Fil. 4:18) Tikikus okwa li a twala eenhumwafo daPaulus komaongalo a yoolokafana. (Kol. 4:7) Kekwafo lookaume kaye, Paulus okwa li a dula okuwanifa po oukalele waye, nokuli naashi a li ita dulu okudja mo meumbo, ile eshi a li modolongo. Ongahelipi to dulu okukala kaume kashili kunena?

Oihopaenenwa yokunena otai ulike nghee sha fimana okukala kaume kashili. Elisabet, oo e li omukokolindjila koSpain, okwa popya nghee a li a kwafelwa komumwameme umwe, eshi a li a taalela onghalo idjuu. Eshi ina yaElisabet a monika okankela, omumwameme oo okwa li ha tumine Elisabet omatumwalaka taa tu omukumo a kanghamena kOmbiibeli. Elisabet okwa ti: “Omatumwalaka oo okwa kwafela nge ndiha kale ndi udite ndi li ame andike.” — Omayel. 18:24.

Ohatu dulu okupameka oukaume wetu novamwatate novamwameme moku va yambidida momalipyakidilo eongalo. Pashihopaenenwa, ngeenge ou na otuwa, mbela ito dulu okutwala omumwatate, ile omumwameme omunamido kokwoongala, ile moukalele? Ngeenge owa ningi ngaho, amushe otamu ka twaafana omukumo. (Rom. 1:12) Ashike, Ovakriste vamwe ihava dulu okudja mo momaumbo avo. Ongahelipi hatu dulu oku va kwafela?

Ovamwatate novamwameme vamwe, ihava dulu okuya kokwoongala komudidi, molwaashi kave na oukolele. Natu ka tale koshihopaenenwa shaDavid, oo a li a monika okankela. Okwa li e li kepango lokankela leemwedi di dulife puhamano. Eshi David a li kepango, ye nomukulukadi waye ova li hava ongalele meumbo.

Ova li va kwafelwa ngahelipi kookaume kavo meongalo? Alushe konima yokwoongala, vamwe ovo ve li pOlupale lOuhamba ova li hava ningi eenghendabala va popye naDavid nosho yo Lidia okupitila paintaneta. Shikwao vali, ngeenge David naLidia va yandja omatyekosha, ovamwatate novamwameme ova  li have va tumine omatumwalaka taa tu omukumo. Oshidjemo? David naLidia kava li hava kala ve udite unene ve li ovo aveke.

Mbela ito dulu okukufa ombinga moukalele pamwe naavo ihava dulu okudja mo momaumbo? Ohatu dulu okuninga omalunduluko onhumba momalipyakidilo etu, opo tu dule okulonga pamwe navo, nokungaho ohatu ke va ulikila kutya inatu va dimbwa. (Omayel. 3:27) Otamu dulu okukala hamu shange pamwe eenhumwafo, ile mu udife okupitila pangodi. Ovakulunhuongalo otava dulu okuninga elongekido, opo ovo ihava dulu okudja mo momaumbo va dule okukala hava kala pelongekido lokuya momapya okupitila paintaneta. David naLidia ova li va pandula eshi eongalo lavo la ninga elongekido olo. David okwa ti: “Eshi twa li hatu kala pelongekido pamwe nongudu yetu, eenghundafana odo da li hadi kala pauxupi nosho yo eilikano ola li hali tu pameke neenghono.” Omafimbo amwe, ngeenge eenghalo otadi shi pitike, mbela ito dulu okuninga elongekido opo u ye pamwe nomukonakonimbiibeli mu ka konakonene keumbo lomuudifi oo iha dulu okudja mo meumbo?

Eshi hatu longo pamwe novamwatate novamwameme, ovo ihava dulu okudja mo momaumbo, ohatu didilike mo omaukwatya avo mawa nohatu pange oukaume wopofingo navo. Pashihopaenenwa, ngeenge tamu longo pamwe navo moukalele, oho mono nghee tava longifa eendjovo daKalunga, opo va hange omitima davamwe, naasho otashi dulu oku ku ningifa u pange oukaume navo. Oho mono omhito yokupanga oukaume, eshi to kwafele ovamwatate novamwameme momalipyakidilo eongalo. — 2 Kor. 6:13.

Eshi Paulus a li ta piti meenghalo didjuu, kaume kaye Titus okwa li e ke mu talela po, naasho osha li sha hekeleka Paulus. (2 Kor. 7:​5-7) Ehokololo olo otali tu dimbulukifa kutya, ohatu dulu okuhekeleka ovamwatate novamwameme, hameendjovo ashike, ndele otwa pumbwa yo okukala pamwe navo noku va kwafela apa hatu dulu. — 1 Joh. 3:18.

Ovamwatate novamwameme vokoRussia ove tu tulila po oshihopaenenwa shiwa shi na sha nokuyambididafana. Natu ka tale koshimoniwa shaSergey nosho yo omukulukadi waye, Tatyana. Konima eshi eumbo lavo la hadwa kopolifi, ova li va twalwa va ka pulwaapulwe. Tatyana oye a li a efiwa tete, ndele ta shuna keumbo. Sergey okwa ti: “Diva konima eshi [Tatyana] a fika meumbo, omumwameme umwe omuladi okwa li e uya oku mu talela po. Konima yaasho, ovamwatate novamwameme ova li ve uya oku tu kwafela mokuwapaleka eumbo letu.”

Sergey okwa weda ko a ti: “Onda kala alushe ndi hole Omayeletumbulo 17:​17, oo taa ti: ‘Kaume kashili oha ulike ohole efimbo keshe, noku li omumwaxo oo a dalwa a kwafele pefimbo loudjuu.’ Onda kala nda pumbwa ekwafo okudja kookaume pefimbo eli lomahepeko, nonda mona oushili weendjovo odo. Jehova okwa pa nge ookaume ovo ve na ouladi nova kwafela nge.”

Otwa pumbwa ookaume ovo tava dulu oku tu kwafela pomafimbo aa madjuu. Ohatu ka pumbwa yo ekwafo lavo, unene tuu poudjuu munene. Onghee natu ninge ngaashi hatu dulu, opo tu kale kaume kashili paife. — 1 Pet. 4:​7, 8.