SYLVIANA, omukokolindjila oo e na omido 27, okwa ti: “Eshi nda pwilikina koimoniwa yookaume kange ovo va longela koitukulwa oko kwa li ku na omhumbwe inene yovakokolindjila, naame onda li nda halelela okumona ehafo olo va li va mona.” Okwa weda ko a ti: “Onda li nda tila okutembukila oko ku na omhumbwe inene.”

Mbela oho kala u udite ngaashi Sylviana? Mbela owa halelela oku ka longa koshitukulwa oko ku na omhumbwe yovaudifi vOuhamba, ndele owa limbililwa ngeenge oto ka hanga ngoo elalakano olo? Ngeenge osho, ino sholola. Ovamwatate novamwameme vahapu ova pondola okufinda omashongo oo a li tae va imbi okutamununa mo oukalele wavo kekwafo laJehova. Ohatu ka tala kuMadagascar, onhunhu onhine mounene keenhunhu domounyuni aushe, opo tu mone nghee Jehova a li a yeululila vamwe vomuvo eemhito.

Konima yomido omulongo da pita po, ovaudifi novakokolindjila ovaladi ve dulife po 70 va dja koilongo 11 * ova li va ka longela koshitukulwa osho hashi eta oidjemo iwa muAfrica, oko ku na ovanhu vahapu va fimaneka Ombiibeli. Natango, ovaudifi vahapu vomoshitukulwa ova li ve na ehalo lokukwafela mokutandaveleka etumwalaka lOuhamba moshitukulwa osho shi li monhunhu oyo inene. Natu ka kundafaneni vamwe vomuvo.

Louis naPerrine, ovalihomboli ovo ve na omido 30 nasha, ova li va tembukila koMadagascar okudja koFrance. Ova kala ta va diladila oule womido dihapu nghee ve na okutamununa mo oukalele wavo mokutembukila koshilongo shimwe, ashike Perrine okwa kala ta ongaonga. Okwa ti: “Onda li nda tila okutembukila koima oko tuhe shii nale. Onda li nda tila okufiya po ovapambele, eongalo, eumbo, eenhele adishe odo nda li ndi shii nosho yo onghedindjikilile yetu. Oumbada wange oo wa li eshongo linene olo nda li ndi na okufinda.” Mo 2012, Perrine okwa li e na ouladi, nova li va tembuka. Okwa li e uditile ngahelipi etokolo lavo? Okwa ti: “Okutala konakudiwa, onda mona kutya Jehova okwa kala te tu kwafele monghalamwenyo yetu, naasho osha li oshimoniwa tashi pameke eitavelo.” Louis okwa weda ko a ti: “Oshikando shetu shotete osho  twa li pEdimbuluko moMadagascar, ovakonakonimbiibeli vetu omulongo ova li ve uya.”

Oshike sha li sha pameka ovalihomboli ovo opo va kale tava wanifa po oshinakuwanifwa shavo eshi pa li pa holoka omaupyakadi? Ova li va pula Jehova okupitila meilikano e va pe eenghono odo va pumbwa opo ve lididimike. (Fil. 4:13) Louis okwa ti: “Otwa li twa mona kutya Jehova okwa nyamukula omailikano etu nokwe tu pa ‘ombili yaye.’ Otwa li twa dula okuyandja elitulemo kehafo olo hatu mono moilonga yetu. Natango, ookaume ketu vokoshilongo shetu ova li ve tu tumina ee-e-mail nosho yo eenhumwafo tave tu tu omukumo opo tuha sholole.” — Fil. 4:6, 7; 2 Kor. 4:7.

Jehova okwa li a nangeka noupuna eenghendabala daLouis naPerrine. Louis okwa ti: “MuOktoba 2014, otwa li twa ya kOfikola yOmbiibeli yOkudeula Ovalihomboli Ovakriste * koFrance. Osha li oshali ya dja kuJehova ihe fi okudimbiwa okuya kofikola oyo.” Eshi ovalihomboli ovo va mana ofikola oyo, ova li va tuminwa koMadagascar.

Eshi Didier naNadine, ovalihomboli va dja koFrance, va tembukila koMadagascar mo 2010, ova li ve na omido do pokati. Didier okwa ti: “Otwa kokola ondjila eshi twa li ovanyasha, nolwanima otwa ka tekula ovana vetu vatatu. Eshi va kula, otwa li twa lalakanena oku ka longa koshilongo shimwe.” Nadine okwa ti: “Nonande otwa li hatu ongaonga okufiya po ovana vetu, ova li ve tu lombwela va ti: ‘Ngeenge omwa i koshilongo oko ku na omhumbwe inene, ohatu ke mu pandula unene.’ Eendjovo davo oda li de tu twa omukumo tu tembuke. Nonande otu li kokule novana vetu, otwa hafa molwaashi ohatu popi navo pandjikilile.”

Osha li eshongo kuDidier naNadine okulihonga Oshimalagasy. Nadine okwa popya te limemesha a ti: “Katu na vali omido 20.” Mbela oshike sha li she va kwafela va pondole? Potete, ova li hava i keongalo lOshifrench. Lwanima, eshi va mona kutya ove lilongekida okulihonga elaka lomoshitukulwa, ova li va tembukila keongalo lOshimalagasy. Nadine okwa ti: “Ovanhu vahapu ovo hatu shakeneke moilonga yokuudifa ove hole okukonakona Ombiibeli. Luhapu ohave tu pandula eshi hatu va talele po. Potete, kanda li nde shi itavela. Ondi hole okukokola ondjila moshitukulwa osho. Ngeenge handi penduka ongula, ohandi lipopile handi ti, ‘Ohandi ka udifa nena.’”

Didier ohe limemesha ngeenge ta dimbuluka eshi a li a hovela okulihonga Oshimalagasy. Okwa ti: “Onda li handi kwatele komesho okwoongala, ashike kanda li handi udu ko omanyamukulo ovamwatate novamwameme. Onda li ashike handi ti, ‘Tangi’ komanyamukulo aeshe. Konima eshi nda pandula omumwameme umwe omolwenyamukulo laye, ovo va li omutumba konima yaye ova li tava udikile nge kutya enyamukulo ka li li mondjila. Onda li nda tumbula diva omumwatate oo nde lineekela kutya okwa yandja enyamukulo li li mondjila.”

Poshoongalele shomo 2005, Thierry naNadia, ova li va tala oshinyandwa shi li mOshiingilisha shoshipalanyole  “Lalakaneneni omalalakano oo taa fimanekifa Kalunga.” Oshinyandwa osho shopaMbiibeli shi na sha naTimoteus osha li sha kuma omitima davo nosha li sha kulika ehalo lavo loku ka longa oko ku na omhumbwe inene yovaudifi vOuhamba. Thierry okwa ti: “Pexulilo loshinyandwa osho, fimbo twa li hatu hakele omake, onda li nda ehena pomukulukadi wange, ndele handi mu pula kutya, ‘Fye ohatu ka longela peni?’ Omukulukadi wange okwa ti okwa li ta diladila oshinima sha faafana.” Diva konima yaasho, ova li va katuka eenghatu opo va hange elalakano lavo. Nadia okwa ti: “Mokweendela ko kwefimbo, otwa ninipika oinima yetu fiyo osheshi twa xupa po ashike naayo ya wana meekofa nhe.”

Mo 2006, ova li va fika moMadagascar nova li va hafela oukalele wavo okudja pehovelo. Nadia okwa ti: “Ovanhu ovo hatu shakeneke ohave tu hafifa unene.”

Konima yomido hamano, ovalihomboli ovo ova li va shakeneka eshongo. Ina yaNadia, Marie-Madeleine, oo a li koFrance, okwa li a punduka ndele ta teka okwooko nokwa li e limonifa oshiponga komutwe. Konima eshi ovalihomboli ovo va kwatafana nandokotola waMarie-Madeleine, ova li va pula ina e uye a kale hadi navo koMadagascar. Nonande okwa li e na omido 80 pefimbo opo, okwa li a tambula ko nehafo eshivo olo. Mbela okwa li e uditile ngahelipi oku ka kala koshilongo shimwe? Okwa ti: “Omafimbo amwe ohashi kala eshongo okwiikilila, ashike nonande okudula kwange okwa ngabekwa, ondi udite kutya otashi ti sha keongalo. Osho hashi hafifa nge unene oshosho kutya, elongekido olo ola kwafela ovana vange va twikile noukalele wavo oo hau eta oidjemo iwa.”

Riana omumwatate oo e na omido 22. Okwa putukila moAlaotra Mangoro, oshitukulwa shi li koushilo waMadagascar. Okwa li he shi endifa nawa kofikola nokwa li a hala okulalakanena ehongo lopombada. Konima eshi a konakona Ombiibeli, okwa li a lundulula omadiladilo aye. Okwa ti: “Onda li nda kendabala okumana osekundofikola yange diva nonda li nda udanekela Jehova kutya, ‘Ngeenge onda piti ekonakono lange laxuuninwa, ohandi hovele okukokola ondjila.’” Konima eshi Riana a mana ofikola, okwa li a wanifa po eudaneko laye. Okwa li a tembukila meumbo lomumwatate omukokolindjila, ta mono oilonga yetatafiku nokwa li a hovela okukokola ondjila. Okwa ti: “Olo ola li etokolo la denga mbada nda ninga.”

Ashike ovapambele vaRiana kava li ve udite ko kutya omolwashike ina lalakanena eifano lomounyuni. Okwa ti: “Tate, tatekulu nameekulu aveshe ova li va ladipika nge ndi lalakanene ehongo lopombada. Ashike kanda li nda hala okweefa po okukokola ondjila omolwoshinima shonhumba.” Inapa pita efimbo lile, Riana okwa li a halelela oku ka longa oko ku na omhumbwe inene. Oshike sha li sha pendula ohokwe muye? Okwa ti: “Eembudi oda li da teya eumbo letu, ndele tadi vake mo oinima yange ihapu. Eembudi odo oda li da ningifa nge ndi diladile keendjovo daJesus di na sha ‘nokuliongelela omamona meulu.’ Onda li nda tokola okulonga noudiinini opo ndi liongelele omamona opamhepo.” (Mat. 6:19, 20) Okwa li a tembukila koshitukulwa shi li kolukadi loshilongo oko kwa dengwa koshikukuta osho shi li kokule neekilometa 1 300 naapo a li hadi nale. Oshitukulwa osho edu lOvantandroy. Omolwashike a ya koshitukulwa osho?

Ofimbo eumbo lavo inali teywa, Riana okwa li a hovela ekonakonombiibeli novalumenhu vavali Ovantandroy. Okwa li e lihonga omautumbulilo amwe melaka lavo nokwa li a diladila shi na sha nOvantandroy ovo va li inava udifilwa natango etumwalaka lOuhamba. Okwa ti: “Onda li nda ilikana kuJehova opo a kwafele nge ndi tembukile koshitukulwa oko haku popiwa Oshitandroy.”

Riana okwa li a tembuka, nokwa li a shakeneka eshongo. Kali a mona oilonga. Omulumenhu umwe okwa li e mu pula a ti: “Omolwashike we uyila koshitukulwa oku? Opo ovanhu va mone oilonga ohave ke i konga koshitukulwa oko wa dja.” Konima yoivike ivali, Riana okwa li a ya koshoongalele shoshitukulwa ehe na nande osha, te lipula kutya na ninge po shike. Mefiku laxuuninwa loshoongalele, omumwatate umwe okwa li a tula sha mondjato yondjafa yaRiana. Okwa li a tulilwa mo omuvalu woimaliwa ya wana oku mu shunifa koAntandroy nokutota po okangeshefa kokulandifa ouyogata. Riana okwa ti: “Onda li nda mona kutya Jehova okwa kwafela nge pefimbo la wapala. Onda li nda dula okutwikila okukwafela ovo va li inava mona omhito yokulihonga kombinga yaJehova.” Natango meongalo omwa li mu na oilonga ihapu. Riana okwa weda ko vali a ti: “Onda li handi yandje oshipopiwa shomoipafi konima yoivike ivali keshe. Jehova okwa li ta deula nge okupitila  mehangano laye.” Paife, Riana ota udifile Ovatandroy vahapu etumwalaka lOuhamba ovo va hala okulihonga kombinga yaJehova.

Jehova okwe tu shilipaleka kutya “keshe ou te linangeke noupuna, oye ote linangekele noupuna muKalunga koshili.” (Jes. 65:16) Ngeenge hatu longo noudiinini tu finde omashongo opo tu tamunune mo oukalele wetu, ohatu mono omanangeko noupuna aJehova. Diladila kuSylviana oo a popiwa pehovelo loshitukulwa eshi. Dimbulukwa kutya, okwa li a tila okutembuka molwaashi ka li e wete te ke shi dula. Omolwashike a li ta diladila ngaho? Okwa ti: “Okuulu kwange kwo kolumosho okuxupi neesentimeta 9 kwaaka kwo kolulyo. Onghee ohandi ende handi shongola nohandi loloka diva.”

Mo 2014, Sylviana okwa li e limanga kumwe naSylvie Ann, omumwameme omukokolindjila omunyasha womeongalo lavo, nova li va tembukila kokamukunda ke li eekilometa 85 nodoolopa yavo. Nonande opa li omashongo, Sylviana okwa li a hanga elalakano laye naasho osha li enangeko noupuna shili. Okwa ti: “Konima yomudo eshi nda li handi wanifa po oshinakuwanifwa shange shipe, Doratine, omudali oo nda li handi konakona naye Ombiibeli, okwa li a ninginifwa poshoongalele shoshikandjo.”

Ngaashi ovo va ka longa koitukulwa oko ku na omhumbwe va ulika eitavelo, nafye ngeenge hatu kendabala okufinda eshongo opo tu tamunune mo oukalele wetu, ohatu mono pauhandimwe oushili weudaneko olo Jehova a udanekela ovapiya vaye eshi a ti: “Ame ohandi ku pameke ndele handi ku kwafa yo.” (Jes. 41:10) Oshidjemo, ekwatafano letu naJehova ohali kolo. Shikwao vali, ngeenge otwe liyambe nehalo liwa tu longe moshitukulwa shetu ile koshilongo shimwe, ohatu lilongekidile oinakuwanifwa yopamhepo oyo ye tu tuvikililwa mounyuni mupe. Didier, oo a tumbulwa pombada, okwa ti: “Okulongela koshitukulwa oko ku na omhumbwe inene oku li edeulo liwa li na sha nonakwiiwa.” Onghee hano, aveshe ovo ve na ehalo loku ka longa oko ku na omhumbwe nava hovele nedeulo olo diva.