1-2. (a) Oshike Jehova ha tale kusho ngeenge ovanhu vahapu mounyuni aushe ve li pOuvalelo wOmwene? (Tala efano kombada yoshifo.) (b) Oshike hatu ka kundafana moshitukulwa eshi?

DILADILA kwaasho Jehova ha tale kusho ngeenge eemhunga dovanhu mounyuni aushe di li pOuvalelo wOmwene. Iha tale ashike keemhunga dovanhu, ndele oha didilike keshe umwe pauhandimwe oo e li po. Pashihopaenenwa, oha didilike ovo hava kala po omudo keshe. Mokati kavo omwa kwatelwa ovo have uya nonande ova taalela omahepeko a kwata moiti. Vamwe ihava kala pokwoongala pandjikilile, ashike ova tala ko okukala pEdimbuluko ku li oshinima sha fimana osho ve na okuninga. Jehova oha didilike yo ovo tashi dulika ve li pEdimbuluko oshikando shotete, tashi dulika ashike molwokatalekonawa.

² Jehova oha kala a hafa okumona ovanhu vahapu ve li pEdimbuluko. (Luk. 22:19) Ashike nande ongaho, Jehova iha yandje elitulemo komuvalu wovanhu ovo hava kala po. Oha kala unene e na ko nasha nelinyengotomheno lavo lokukala po. Moshitukulwa eshi, ohatu ka kundafana epulo la fimanenena kutya: Omolwashike ihatu kala ashike pEdimbuluko olo hali danwa lumwe momudo, ndele ohatu kala yo pokwoongala kwomokati koshivike oko Jehova a longekidila ovo ve mu hole?

3-4. (a) Omolwashike hatu kala pokwoongala? (b) Okukala kwetu pokwoongala ohaku ulike shike kombinga yetu? (c) She likolelela ko 1 Ovakorinto 11:23-26, omolwashike tu na okukala pEdimbuluko?

³ Ohatu i kokwoongala molwaashi oku li oshitukulwa shelongelokalunga letu. Ohatu kala po yo molwaashi Jehova ohe tu hongo okupitila pokwoongala. Ovanhu ovo ovalinenepeki inava  itavela kutya ova pumbwa okuhongwa sha. (3 Joh. 9) Mepingafano navo, fye otwa halelela okuhongwa kuJehova nokehangano olo ta longifa. — Jes. 30:20; Joh. 6:45.

⁴ Okukala kwetu pokwoongala ohaku ulike kutya otu va lininipiki, twe lilongekida notwa hala okuhongwa. Moufiku wEdimbuluko lefyo laJesus, ohatu kala poshiningwanima osho sha fimana ndele ihatu kala po ashike shadila, ndele omolwaashi ohatu dulika nelininipiko koshipango shaJesus osho tashi ti: “Shi ningeni nokudimbulukwa nge.” (Lesha 1 Ovakorinto 11:23-26.) Okwoongala oko ohaku pameke eteelelo letu li na sha nonakwiiwa nohaku tu dimbulukifa nghee Jehova e tu hole. Ashike Jehova oku shii kutya otwa pumbwa etwomukumo nokupamekwa unene shi dulife ashike lumwe momudo. Onghee okwe tu longekidila okwoongala oshivike keshe note tu ladipike tu kale hatu kala po. Elininipiko ohali tu linyengifa tu dulike. Ohatu longifa efimbo lihapu oshivike keshe hatu lilongekidile okwoongala oko nokukala puko.

5. Omolwashike ovanhu ovalininipiki hava tambula ko eshivo laJehova?

⁵ Omudo keshe, ovanhu vahapu ovalininipiki ohava tambula ko eshivo laJehova lokuhongwa kuye. (Jes. 50:4) Ohava hafele okukala pEdimbuluko nohava hovele okukala pokwoongala kwokoshivike. (Sak. 8:20-23) Atushe ohatu hafele okuhongwa nokuwilikwa kuJehova e li “omukwafi nomuxupifi” wetu. (Eps. 40:17) Oshike tashi dulu okukala shihafifa ile sha fimanenena shi dulife okuhongwa kuJehova naJesus, Omona waye oo e hole unene? — Mat. 17:5; 18:20; 28:20.

6. Ongahelipi elininipiko la kwafela omulumenhu umwe a kale pEdimbuluko?

⁶ Omudo keshe, ohatu ningi eenghendabala tu shive ovanhu vahapu ngaashi tashi shiiva ve uye kEdimbuluko lefyo laJesus. Ovanhu vahapu ovalininipiki ova mona ouwa eshi va tambula ko eshivo letu. Natu ka tale koshihopaenenwa. Omido da ka lupuka, omulumenhu umwe okwa li a pewa okafo kokushiva ovanhu kEdimbuluko, ashike okwa li a lombwela omumwatate oo a li e ke mu pa kutya ita dulu oku ka kala po. Ashike oufiku wEdimbuluko, omumwatate okwa li a tunhukwa eshi a mona omulumenhu oo te uya mOlupale lOuhamba. Omulumenhu oo okwa li a kuminwa onghedi omo ovamwatate va li ve mu popifa nokwa li a hovela okukala pokwoongala kwokoshivike. Momudo wa shikula ko, okwa faula ashike okwoongala oikando itatu. Oshike sha li she mu kwafela a kale ha kala pokwoongala keshe? Elininipiko olo la li le mu kwafela. Omumwatate oo a li e mu shiva okwa ti: “Oku li omulumenhu omulininipiki.” Nopehe na omalimbililo, Jehova oye a nana omulumenhu oo e mu longele, nopaife oku li omumwatate a ninginifwa. — 2 Sam. 22:28; Joh. 6:44.   

7. Ongahelipi osho hatu lihongo pokwoongala naasho hatu lesha mOmbiibeli tashi tu kwafele tu kale ovalininipiki?

⁷ Osho hatu lihongo pokwoongala naasho hatu lesha mOmbiibeli otashi dulu oku tu kwafela tu kale ovalininipiki. Moivike oyo hai tetekele Edimbuluko, luhapu pokwoongala ohatu yandje elitulemo koshihopaenenwa shaJesus nosho yo elininipiko olo a ulika eshi a yandja omwenyo waye u li ekulilo. Momukokomoko womafiku oo a tetekela Edimbuluko, ohatu ladipikwa tu leshe omahokololo mOmbiibeli e na sha noiningwanima oyo ya ningwa eshi Jesus a li pokufya nosho penyumuko laye. Osho hatu lihongo pokwoongala kwa tya ngaho naasho hatu lesha momahokololo Ombiibeli oo ohashi kulike olupandu letu li na sha nekuliloyambo olo Jesus e tu yandjela. Ohatu linyengifwa tu hopaenene elininipiko laye  nokuwanifa po ehalo laJehova nokuli nande oshidjuu kufye. — Luk. 22:41, 42.

8. Ongahelipi Jesus a li a ulika ouladi?

⁸ Ohatu kendabala yo okuhopaenena Jesus mokuulika ouladi. Diladila kouladi oo a li a ulika momafiku oo a tetekela efyo laye. Okwa li e shii filufilu kutya mafiku ovatondi vaye otave ke mu monifa oixuna, tave mu denge noku mu dipaa. (Mat. 20:17-19) Natango, ka li a tila efyo. Eshi efimbo la fika, okwa li a lombwela ovayapostoli vaye ovadiinini ovo va li pamwe naye muGetsemane, a ti: “Fikameni, tu yeni, tala, ou ta kengelele nge oku li popepi.” (Mat. 26:36, 46) Eshi ongudu yovakwaita va homata ve uya oku mu kwata po, okwa pita mo, e liholola ye mwene, ndele ta lombwele ovakwaita va efe ovayapostoli vaye va ye. (Joh. 18:3-8) Jesus ka li tuu a ulika ouladi wa tongomana! Kunena, Ovakriste ovavaekwa nosho yo eedi dimwe ohava kendabala okuhopaenena Jesus mokuulika ouladi. Ngahelipi mbela?

9. (a) Omolwashike tashi dulika twa pumbwa ouladi opo tu kale hatu kala pokwoongala pandjikilile? (b) Ongahelipi oshihopaenenwa shetu tashi dulu okukuma ovamwatate ovo va tulwa modolongo omolweitavelo lavo?

⁹ Opo tu kale hatu kala pokwoongala pandjikilile, otashi dulika twa pumbwa okuulika ouladi ngeenge twa taalela eenghalo didjuu. Ovamwatate nosho yo ovamwameme vamwe ohava kala pokwoongala nokuli nonande ova nyika oluhodi, va teka omukumo ile tave liyave. Vamwe ohava kala pokwoongala nonande otava patanekwa nonyanya kovapambele ile kovakwanepangelo. Diladila kunghee oihopaenenwa yetu hai kumu ovamwatate ovo va tulwa modolongo omolweitavelo lavo. (Heb. 13:3) Ngeenge va udu kutya ohatu twikile okulongela Jehova nonande otwa taalela omayeleko, ohava pamekwa va kanyatele eitavelo, ouladi nosho yo oudiinini wavo. Omuyapostoli Paulus okwa li e na oshimoniwa sha yukila oko. Eshi a li modolongo muRoma, okwa li ha kala a hafa ngeenge a udu kutya ovamwaxe otava longele Kalunga noudiinini. (Fil. 1:3-5, 12-14) Diva ashike eshi a dja mokakuma, okwa shangela Ovaheberi onhumwafo. Monhumwafo oyo okwa ladipika Ovakriste ovadiinini va ‘twikile okukala ve hole ovamwatate’ novaha efe po okwoongala pamwe. — Heb. 10:24, 25; 13:1.

10-11. (a) Oolyelye twa pumbwa okushiva kEdimbuluko? (b) She likolelela kOvaefeso 1:7 omolwashike tu na okushiva ovanhu ovo?

¹⁰ Ohatu ulike ouladi ngeenge hatu shivi ovapambele, ovanailonga pamwe nafye nosho yo ovashiinda shetu kEdimbuluko. Omolwashike hatu shivi ovanhu ovo? Otwa pandula unene kwaasho Jehova naJesus ve tu ningila noinatu hala okwoongaonga okushiva ovanhu kEdimbuluko. Otwa hala yo navo va mone ouwa ‘monghenda’ yaJehova okupitila mekulilo. — Lesha Ovaefeso 1:7; Eh. 22:17.

¹¹ Eshi hatu ulike ouladi mokukala pokwoongala, ohatu ulike yo oukwatya umwe u na  ondilo, oo Kalunga nosho yo Omona va ulika monghedi ya tongomana.

12. (a) Ongahelipi okwoongala haku tu kwafele tu kale tu ohole Jehova nosho yo Jesus? (b) 2 Ovakorinto 5:14, 15 otave tu ladipike ngahelipi tu hopaenene Jesus?

¹² Molwaashi otu hole Jehova nosho yo Jesus ohatu kala pokwoongala. Osho hatu lihongo pokwoongala ohashi tu kwafele tu kale tu hole Jehova nOmona waye. Ohatu dimbulukifwa alushe pokwoongala osho ve tu ningila. (Rom. 5:8) Edimbuluko lovene ohali tu dimbulukifa kutya ove tu hole unene mwa kwatelwa naavo inava lenga ekuliloyambo. Omolwolupandu, ohatu kendabala okuhopaenena Jesus mokukalamwenyo kwetu kwa keshe efiku. (Lesha 2 Ovakorinto 5:14, 15.) Shikwao vali, ohashi tu linyengifa tu hambelele Jehova omolwekuliloyambo olo e tu pa. Onghedi imwe hatu dulu oku mu hambelela omokuyandja omatyekosha taa di komutima pokwoongala.

13. Ongahelipi hatu dulu okukala tu hole unene Jehova nosho yo Omona waye? Shi yelifa.

¹³ Ohatu dulu okukala tu hole unene Jehova nosho yo Omona waye mokukala twa halelela okuninga omaliyambo. Luhapu ohatu ningi omaliyambo opo tu kale pokwoongala. Omaongalo mahapu ohaa ningi okwoongala mokati koshivike ngeenge ovanhu va dimbuka koilonga yavo yokulikongela omboloto omo luhapu hava kala va loloka. Okwoongala kumwe ohaku ningwa mexuliloshivike eshi ovanhu vamwe tava fuwa po. Mbela Jehova oha didilike ngoo kutya ohatu i kokwoongala nokuli nonande otwa loloka? Heeno. Jehova oha mono nokwa lenga eenghendabala odo hatu ningi opo tu kale pokwoongala. — Mark. 12:41-44.

14. Ongahelipi Jesus e tu tulila po oshihopaenenwa shokuninga omaliyambo nehalo liwa?

¹⁴ Jesus okwe tu tulila po oshihopaenenwa shokuninga omaliyambo nehalo liwa. Ka li ashike a fila ovahongwa vaye, ndele okwa li yo a pitifa komesho ouwa wavo efiku keshe. Pashihopaenenwa, okwa li ha kala novashikuli vaye nokuli nongeenge a li a loloka palutu ile a wililwa po pamaliudo. (Luk. 22:39-46) Okwa li ha yandje elitulemo kwaasho ta dulu okuyandja, ndele hakwaasho a li ta dulu okupewa. (Mat. 20:28) Ngeenge otu hole unene Jehova nosho yo ovamwatate, ohatu ka kala twa hala  okukala pOuvalelo wOmwene nosho yo pokwoongala oko haku ningwa pandjikilile.

15. Ohatu yandje unene elitulemo mokukwafela oolyelye?

¹⁵ Otu li oshitukulwa shoumwainafana washili wopaKriste, nohatu hafele okulongifa efimbo letu mokushiva vamwe vetu waimine. Ashike ohatu yandje unene elitulemo mokukwafela “oovakwetu vomeitavelo,” ndele ovovo inave lipyakidila vali. (Gal. 6:10) Ohatu va ulikile ohole moku va ladipika va kale pokwoongala, unene tuu pEdimbuluko. Ngaashi Jehova naJesus, ohatu kala twa tunhukwa ngeenge ovo inave lipyakidila va alukila kuJehova, Tate yetu nOmufita wetu omunahole. — Mat. 18:14.

16. (a) Ongahelipi hatu dulu okuladipikafana, nokwoongala otaku ke tu kwafela tu ninge shike? (b) Omolwashike eli olo efimbo liwa nokudimbuluka eendjovo daJesus odo tadi hangwa muJohannes 3:16?

¹⁶ Moivike oyo twa taalela, shiva ovanhu vahapu ngaashi tashi shiiva va ka kale pEdimbuluko mEtitano komatango mo 19 Aprili 2019. (Tala oshimhungu “Mbela oto ke va shiva?”) Momukokomoko womudo tau uya, otwa hala okuladipikafana mokukala pandjikilile pokwoongala oko twa longekidilwa kuJehova. Eshi exulilo lounyuni ou tali ende tali ehene popepi, otwa hala okwoongala ku tu kwafele tu kale ovalininipiki, ovaladi novanahole. (1 Tes. 5:8-11) Nomutima wetu aushe, natu ulike kutya otwa lenga Jehova nOmona molwaashi ove tu hole. — Lesha Johannes 3:16.