1. Oshike tashi ulike kutya momaukwaneumbo kunena kamu na ohole?

OMBIIBELI oya xunganeka kutya momafiku axuuninwa ovanhu otava ka kala “vehe na ohole.” (2 Tim. 3:1, 3) Otu wete nghee exunganeko olo tali wanifwa kunena. Pashihopaenenwa, omaukwaneumbo omamiliyona okwa teya eehombo, naasho osha ningifa ovadali va kale ve lihandukila nosha ningifa ounona va kale ve udite vehe holike. Nokuli novanhu ovo hava di meumbo limwe ihava kala ve na ekwatafano lopofingo. Omuxungimwenyo umwe okwa ti: “Oomeme, ootate nounona ihava kala ve na ekwatafano molwaashi keshe umwe oha kala e lipyakidila, tashi dulika nokombiyuta, nokatableta, nongodi ile ta dana oudano wouvidio. Nonande ovanhu ovo ohava di meumbo limwe ihava kala ve shaafane ombaxunokavava.”

2-3. (a) Metwokumwe nOvaroma 12:10, oolyelye tu na okuulikila ohole ya xwama? (b) Oshike hatu ka kundafana moshitukulwa eshi?

² Inatu hala okuhopaenena ovanhu vomounyuni ou, ovo vehe na ohole. (Rom. 12:2) Ponhele yaasho, otwa pumbwa okuulikila oilyo yomaukwaneumbo etu nosho yo ovamwatate novamwameme meongalo ohole ya xwama. (Lesha Ovaroma 12:10.) Ohole ya xwama oshike? Ekwatafano lopofingo olo hali kala pokati koilyo youkwaneumbo oyo i holafane neenghono. Ohole ya tya ngaho oyo twa pumbwa okuulikilafana tu li ovamwatate novamwameme. Ngeenge otwa kala hatu ulikilafana ohole ya xwama, otashi ke tu kwafela tu kale twa hangana, nakeshe umwe ota ka longela Jehova a hafa. — Mika 2:12.

³ Opo tu mone nghee hatu dulu okukulika ohole ya tya ngaho noku i ulika, natu ka taleni koihopaenenwa yopaMbiibeli.

4. Jakob 5:11 ote tu kwafele ngahelipi tu ude ko ohole yaJehova yomoule?

⁴ Ombiibeli oya ulika kutya Jehova oku na omaukwatya mawa. Pashihopaenenwa, oya ti kutya “Kalunga Oye ohole.”  (1 Joh. 4:8) Ngeenge hatu lihongo kombinga yaJehova, otwa hala okuninga ookaume kaye. Natango, Ombiibeli oya popya kutya Jehova “omunalukeno.” (Lesha Jakob 5:11.) Kashi hafifa tuu eshi Jehova he tu ulikile ohole!

5. Jehova oha ulike ngahelipi kutya omunanghenda, nongahelipi hatu dulu oku mu hopaenena?

⁵ Natango Jakob 5:11 okwa popya oukwatya umwe waJehova oo hau tu ehenifa popepi naye kutya ye omunanghenda. (Ex. 34:6) Onghedi imwe omo Jehova he tu ulikile onghenda omoku tu dimina po ngeenge twa ya pomunghulo. (Eps. 51:1) PaMbiibeli, efilonghenda ola kwatela mo shihapu shihe fi ashike okudimina po. Ola kwatela mo omaliudo omeni oo ho kala u uditile umwe ngeenge e li moupyakadi nohashi ku linyengifa u kendabale oku mu kwafela. Jehova okwa popya kutya omaliudo oo, oo ha e mu linyengifa e tu kwafele. Omaliudo a tya ngaho, oku dulife oo omwalikadi ha kala e uditile okahanana kaye. (Jes. 49:15) Ngeenge tu li moudjuu, Jehova ohe linyengifwa konghenda yaye e tu kwafele. (Eps. 37:39; 1 Kor. 10:13) Nafye ohatu dulu okuulikila ovamwatate novamwameme onghenda moku va dimina po nokuhenuka oku va kwatela onghone ngeenge ve tu nyemateka. (Ef. 4:32) Onghedi imwe ya fimana omo hatu dulu okuulikila ovamwatate novamwameme onghenda, omoku va yambidida ngeenge va taalela eenghalo didjuu. Ngeenge hatu linyengifwa kohole tu ulikile vamwe onghenda, kungaho ohatu hopaenene Jehova, oo e li oshihopaenenwa sha denga mbada shokuulika ohole ya xwama. — Ef. 5:1.

6. Jonatan naDavid ova ulikilafana ngahelipi ohole ya xwama?

⁶ MOmbiibeli omu na oihopaenenwa yovanhu inava wanenena ovo va li va ulikilafana ohole ya xwama. Diladila koshihopaenenwa shaJonatan naDavid. Ombiibeli oya ti: “Omwenyo waJonatan we limanga kumwe nomwenyo waDavid, ndele Jonatan oku mu hole ngaashi omwenyo waye mwene.” (1 Sam. 18:1) Jehova okwa li a hoolola David a ninge  ohamba ponhele yaSaul. Konima yaasho, Saul okwa li a handukila neenghono David nokwa kala ta kendabala oku mu dipaa. Ashike omonamati waSaul, Jonatan, ina waimina nandenande xe moshikonga shokukendabala okudipaa David. Jonatan naDavid ova ninga eudaneko opo va kale ookaume nokuyambididafana alushe. — 1 Sam. 20:42.

7. Oshinima shimwe shilipi sha li tashi dulu okwiimba Jonatan naDavid vaha kale ookaume?

⁷ Ohole ya xwama oyo ya li pokati kaJonatan naDavid oya li i didilikwedi neenghono, molwaashi oyo ye va kwafela va kaleke po oukaume wavo. Pashihopaenenwa, Jonatan okwa li e dule David needula 30 lwaapo. Jonatan okwa li ta dulu okufika pexulifodiladilo kutya ke na ohokwe momunyasha e fike opo noke na owino. Ashike Jonatan ka li e na etaleko la tya ngaho, okwa li a fimaneka David.

8. Omolwashike hatu dulu okutya Jonatan okwa li kaume muwa waDavid?

⁸ Jonatan okwa li ta dulu okutwila ondubo David. E li omonamati wohamba Saul, Jonatan ngeno oye a li ta ka shikula ko koshipundi. (1 Sam. 20:31) Ashike Jonatan okwa li omulininipiki nokwa li omudiinini kuJehova. Onghee hano, okwa yambidida pauyadi ehoololo laJehova lokuninga David ohamba yomonakwiiwa. Okwa kala yo omudiinini kuDavid nonande osha li sha handukifa Saul neenghono. — 1 Sam. 20:32-34.

9. Otu shi shii ngahelipi kutya Jonatan ka li a twila David ondubo? Shi yelifa.

⁹ Jonatan okwa li e hole neenghono David, onghee ka li e mu twila ondubo. Jonatan okwa li omuladi, a lwa momalwoodi mahapu nokwa li omunekeka mokuumba outa. Jonatan nosho yo xe, Saul, ova li va shiivikila ve na onhapo “ve dule eenhwa” nove na ‘eenghono ve dule eenghoshi.’ (2 Sam. 1:22, 23) Onghee hano, Jonatan okwa li ta dulu okukwatwa kounhwa omolwoupenda waye. Shikwao vali, Jonatan ina kendabala okuninga efiyafanepo naDavid ile e mu twile ondubo. Mepingafano naasho, Jonatan okwa li a lenga David omolwouladi waye nosho yo eshi e lineekela muJehova. Oushili oyoo kutya, Jonatan okwa ka kala e hole David ngaashi ye mwene konima eshi David a dipaa Goliat. Ongahelipi hatu dulu okuulikila ovamwatate novamwameme ohole ya tya ngaho?

10. Osha hala okutya ngahelipi okukala tu “holafane tashi di komutima”?

¹⁰ Ombiibeli oye tu lombwela tu kale tu “holafane tashi di komutima.” (1 Pet. 1:22) Jehova okwe tu tulila po oshihopaenenwa. Ngeenge otwa kala ovadiinini kuye, ota ka kala e tu hole neenghono nokape na osho tashi ke mu imba a kale e tu hole. (Rom. 8:38, 39) Oshitya shOshigreka osho sha tolokwa “komutima,” otashi yandje ediladilo lomunhu ta ningi eenghendabala dinene opo a ulike ohole. Omafimbo amwe, ohashi kala shidjuu okuulikila ovaitaveli vakwetu ohole ya xwama. Onghee hano, ngeenge vamwe ve tu udifa nai otwa pumbwa okutwikila ‘okulididimikilafana pahole, okukala nombili nokukaleka po oukumwe oo tu na omolwomhepo iyapuki.’ (Ef. 4:1-3) Ngeenge otwa kala hatu longo noudiinini ‘tu kale tu na ombili’ novamwatate novamwameme, itatu ka yandja elitulemo komapuko avo. Ohatu ka kendabala oku va tala ko ngaashi Jehova he va tale ko. — 1 Sam. 16:7; Eps. 130:3.

11. Omolwashike omafimbo amwe hashi kala shidjuu okuulikilafana ohole ya xwama?

¹¹ Haalushe hashi kala shipu okuulikila ovamwatate novamwameme ohole ya xwama, unene tuu ngeenge otu shii omaunghundi avo. Oshinima osho osha li eshongo kOvakriste vamwe vomefelemudo lotete. Pashihopaenenwa, Euodia naSintike kava li ve na oupyakadi  eshi va kala tava longo ‘noudiinini pamwe naPaulus mokuudifa onghundana iwa.’ Ashike, omolwetomheno lonhumba ile longadi ova kala ihava tu va fife. Onghee Paulus okwa li e va ladipika “va kale ve na ediladilo limwe eshi tava longele Omwene.” — Fil. 4:2, 3.

12. Ongahelipi hatu dulu okuulikila ovamwatate novamwameme ohole ya xwama?

¹² Ongahelipi hatu dulu okuulikila ovamwatate novamwameme ohole ya xwama kunena? Ngeenge otwa kala tu shii ovaitaveli vakwetu nawa, otashi ka kala shipu kufye tu va ude ko notu va ulikile ohole ya xwama. Eedula nosho yo eputuko hayo nai kale einda. Dimbuluka kutya Jonatan okwa li e dule David nomido 30 lwaapo, ashike ova li va panga oukaume wopofingo. Mbela ope na umwe meongalo e ku dule ile munini kwoove to dulu okupanga naye oukaume? Ngeenge oho ningi ngaho, oto ulike kutya ‘ou hole ovamwatate aveshe.’ — 1 Pet. 2:17.

13. Omolwashike itatu dulu okukala tu hole ovamwatate novamwameme meongalo shi fike pamwe?

¹³ Mbela okuulikila ovaitaveli vakwetu ohole ya xwama osha hala okutya ohatu ka kala tu na ekwatafano lopofingo nakeshe umwe meongalo? Ahowe, osho itashi shiiva. Oshi li paushitwe okukala twa nanenwa kovanhu vamwe shi dulife kuvamwe, molwaashi tashi dulika ve hole oinima yonhumba oyo nafye tu hole. Jesus okwa popya kutya ovayapostoli aveshe ove li “ookaume” kaye, ndele okwa li e hole unene Johannes. (Joh. 13:23; 15:15; 20:2) Ashike Jesus ina kala ha ungaunga naJohannes monghedi ye likalekelwa e dulife vakwao. Pashihopaenenwa, eshi Johannes namumwaina Jakob ve mu pula e va pe eendodo da fimana mOuhamba waKalunga, Jesus okwe va lombwela a ti: “Okukala kolulyo nokolumosho lange haame handi ku yandje.” (Mark. 10:35-40) Opo tu hopaenene Jesus, otu na okuhenuka okuungaunga nookaume ketu kopofingo monghedi ye likalekelwa shi dulife vamwe. (Jak. 2:3, 4) Ngeenge otwa ningi ngaho, ohatu ka eta etukauko meongalo lopaKriste, oshinima osho inashi pumbiwa. — Jud. 17-19.

14. Metwokumwe nOvafilippi 2:3, oshike tashi tu kwafele tu henuke omhepo yefiyafanepo?

¹⁴ Ngeenge ohatu ulikilafana ohole ya  xwama, otashi ka kwafela eongalo liha kale li na omhepo yefiyafanepo. Dimbuluka kutya Jonatan ka li a twila David ondubo noina kendabala okuninga ohamba ponhele yaye. Atusheni ohatu dulu okuhopaenena Jonatan. Onghee hano, ponhele yokutwila ovamwaxo ondubo omolwokudula kwavo, ‘kala omulininipiki, noku va tala ko ve ku dule.’ (Lesha Ovafilippi 2:3.) Kaleka momadiladilo kutya keshe umwe meongalo oku na onghandangala oyo ta dana. Ngeenge otu li ovalininipiki, ohatu ka dula okumona omaukwatya mawa ovamwatate novamwameme nokumona ouwa moihopaenenwa yavo youdiinini. — 1 Kor. 12:21-25.

15. Oshike hatu lihongo koshihopaenenwa shomumwameme Tanya noukwaneumbo wavo?

¹⁵ Ngeenge twa hangwa koiponga yombadilila, Jehova ohe tu hekeleke moku tu ulikila ohole yaye nosho yo ekwafo tali longo olo hatu pewa kovamwatate novamwameme. Natu ka taleni osho sha li sha ningilwa oukwaneumbo umwe Olomakaya konima eshi wa li tau di koshoongalele “Ohole ihai xulu po nande”! shomo 2019. Oshoongalele osho shopaiwana osha li sha ningilwa moUnited States. Omumwameme Tanya, oo e na ounona vatatu, okwa popya a ti: “Ofimbo twa li hatu shingi hatu shuna oko twa li hatu nangala, omushingi umwe okwa li a nyengwa kohauto yaye, ndele te uya kobaana yetu nokulidenga mufye. Kape na oo a li a yahamekwa, atushe otwa li twa dja mo mohauto twa kumwa nokukala ofika popate. Umwe womovamwatate, oo naye a li tadi koshoongalele, okwa li e tu lombwela tu ka kale mohauto yaye. Haye aeke a li e tu tulila. Ovamwatate vatano va dja koSweden navo ova li yo ve tu tulila. Ovamwameme ova li va papatela nge nosho yo omonakadona wange, oshinima osho twa li twa pumbwa neenghono.  Onda li nde va shilipaleka kutya ohatu kala nawa, ashike kava li ve tu fiya po. Ova kala nafye fiyo osheshi ovo hava kwafele poiponga va fika nova shilipaleka kutya otwa pewa ekwafo alishe olo twa pumbwa. Pefimbo olo la li lidjuu, otwa li twa mona nghee Jehova e tu ulikila ohole. Oshimoniwa osho osha pameka ohole yetu yokuhola ovamwatate novamwameme, noshe tu kwafela yo tu kale tu hole Jehova neenghono noku mu pandula.” Mbela oto dimbuluka oshikando shimwe omo wa li wa pumbwa ekwafo nowa li wa ulikilwa ohole ya xwama kovaitaveli vakweni?

16. Otu na omatomheno elipi oo tae tu linyengifa tu kale hatu ulikilafana ohole ya xwama?

¹⁶ Natu diladile koidjemo iwa oyo tai dulu okuholoka po ngeenge otwa kala hatu ulikilafana ohole ya xwama. Ohatu hekeleke ovamwatate novamwameme ngeenge ve li momaudjuu. Ohatu pameke oukumwe wetu tu li ovapiya vaKalunga. Ohatu ulike kutya otu li ovahongwa vaJesus, naasho ohashi nanene ovanamitimadiwa kelongelokalunga lashili. Komesho yaaishe, ohatu fimanekifa “xe yefilonghenda naKalunga kehekeleko alishe,” Jehova. (2 Kor. 1:3) Onghee hano, atusheni natu twikileni okukulika nokuulikilafana ohole ya xwama.