1. Oho kala u uditile ngahelipi ohole yaKalunga?

OMUYAPOSTOLI Johannes okwa shanga a ti: “Kalunga oye ohole.” (1 Joh. 4:8) Eendjovo odo di li paunafangwa otadi tu dimbulukifa oshili ya fimanenena oyo kutya: Kalunga oo e li Odjo yomwenyo, oku li yo Odjo yohole. Jehova oku tu hole! Ohole yaye ohai tu ningifa tu kale tu udite tu li meameno, twa hafa notwa wanenwa.

2. Metwokumwe naMateus 22:37-40, oipango ivali inenenene oilipi, nomolwashike tashi dulika shi kale shidjuu okudulika koshitivali?

² Ovakriste kave na ehoololo ngeenge tashi uya pokuulika ohole. Okuulika ohole oshi li oshipango. (Lesha Mateus 22:37-40.) Ngeenge otwa shiiva nawa Jehova otashi ka kala shipu kufye okudulika koshipango shotete. Komesho yaaishe, Jehova okwa wanenena, he tu file oshisho noha ungaunga nafye nonghenda. Ashike otashi dulu okukala shidjuu kufye okudulika koshipango oshitivali. Omolwashike mbela? Omolwaashi ovamwatate novamwameme ovo hatu kala navo inava wanenena. Omafimbo amwe, otashi dulika va popye sha ile va ninge oinima yonhumba ihe li pahole ile inatu i panda. Jehova oku shii kutya ohatu ka shakeneka eshongo olo, nomolwaasho a nwefa mo ovashangi vamwe vOmbiibeli va popye omayele okondadalunde e na sha nanghee hatu dulu okuulika ohole. Johannes oye umwe womovashangi ovo. — 1 Joh. 3:11, 12.

3. Johannes okwa popya shike shi na sha nohole?

³ Johannes okwa divilika meendjovo daye kutya Ovakriste ove na okuulika ohole. Momahokololo aye e na sha nonghalamwenyo yaJesus, Johannes okwa popya kombinga yohole oikando ihapu e dule ovashangi vakwao vatatu vOmavaengeli. Johannes okwa li e na omido efele lwaapo eshi a shanga Evaengeli  laye nosho yo eenhumwafo daye nhatu. Eendjovo daye otadi tu lombwele kutya keshe osho hatu ningi otu na oku shi ninga hatu linyengifwa kohole. (1 Joh. 4:10, 11) Kakele kaasho, osha li sha pula Johannes efimbo opo e lihonge oshilihongomwa osho.

4. Mbela Johannes okwa kala alushe ha ulikile ovanhu ohole?

⁴ Johannes eshi a li omunyasha, ina kala alushe ha ulike ohole. Pashihopaenenwa, pomhito imwe, Jesus okwa li molweendo pamwe novahongwa vaye va finda kuJerusalem va pitila muSamaria. Opo nee Ovasamaria vamwe ova li va anya oku va tambula ko. Mbela Johannes okwa li e linyenga ngahelipi? Okwa li a pula Jesus opo a tume omundilo okudja meulu u lungwinife po ovakalimo aveshe vomomukunda oo. (Luk. 9:52-56) Pomhito imwe vali, Johannes okwa li a dopa okuulikila ovayapostoli vakwao ohole. Johannes nosho yo mumwaina Jakob ova li va pula ina, opo a indile Jesus e va pe eendodo da denga mbada eshi tava ka kala pamwe naye mOuhamba. Eshi ovayapostoli vakwao va mona osho Johannes namumwaina Jakob va ninga, ova li va fula onya neenghono. (Mat. 20:20, 21, 24) Nonande Johannes okwa li a ninga omapuko aeshe oo, Jesus okwa kala e mu hole. — Joh. 21:7.

5. Oshike hatu ka kundafana moshitukulwa eshi?

⁵ Moshitukulwa eshi ohatu ka konakona oshihopaenenwa shaJohannes nosho yo oinima imwe oyo a shanga i na sha nohole. Eshi hatu konakona oinima oyo, ohatu ke lihonga nghee hatu dulu okuulikila ovamwatate novamwameme ohole. Ohatu ke lihonga yo onghedi ya fimana omo omutwe woukwaneumbo tau dulu okuulika kutya ou hole ovanhu vambulavo.

6. Jehova okwa ulika ngahelipi kutya oku tu hole?

⁶ Luhapu ngeenge taku popiwa kombinga yohole otashi dulika tu diladila keendjovo donghenda. Ndele opo ohole i kale yashili, oi na okuulikwa pailonga. (Yelekanifa naJakob 2:17, 26.) Pashihopaenenwa, Jehova oku tu hole. (1 Joh. 4:19) Okwa longifa omautumbulilo opahole mahokwifa taa hangwa mOmbiibeli. (Eps. 25:10; Rom. 8:38, 39) Onghee hano, inatu tomhwa ashike kutya Kalunga oku tu hole kwaasho a popya, ndele nokwaasho a ninga. Johannes okwa ti: “Kalunga okwa ulika kutya oku tu hole eshi a tuma Omona waye ewifa mounyuni, opo tu mone omwenyo waalushe okupitila muye.” (1 Joh. 4:9) Jehova okwa li a efa Omona waye omuholike a mone oixuna nokufye omolwetu. (Joh. 3:16) Osho otashi ulike lela kutya Jehova oku tu hole shili.

7. Oshike Jesus a ninga osho tashi ulike kutya oku tu hole?

⁷ Jesus okwa shilipaleka ovahongwa vaye kutya oku va hole neenghono. (Joh. 13:1;  15:15) Okwa ulika kutya oku va hole shi fike peni, nafye twa kwatelwa mo, ine shi ulika ashike okupitila meendjovo, ndele okwe shi ulika yo pailonga. Jesus okwa ti: “Kape na ou e na ohole i dule yaau ta yandjele ookaume kaye omwenyo waye.” (Joh. 15:13) Mbela ohashi tu kumu ngahelipi ngeenge hatu diladila osho Jehova naJesus ve tu ningila?

8. Oshike twa lombwelwa tu ninge metwokumwe na 1 Johannes 3:18?

⁸ Ohatu ulike kutya otu hole Jehova naJesus mokudulika kuvo. (Joh. 14:15; 1 Joh. 5:3) Jesus okwe tu lombwela kondadalunde tu kale tu holafane. (Joh. 13:34, 35) Katu na ashike okulombwela ovamwatate novamwameme kutya otu va hole, ndele otu na yo oku shi ulika okupitila mwaasho hatu ningi. (Lesha 1 Johannes 3:18.) Ndele mbela oshike hatu dulu okuninga kondadalunde opo tu ulike kutya otu va hole?

9. Ohole oye linyengifa Johannes a ninge shike?

⁹ Johannes okwa li ta dulu okukala naxe nokulonga oimaliwa ihapu mongeshefa yavo yokukwata eeshi. Ndele ponhele yaasho, okwa li a longifa okukalamwenyo kwaye akushe opo a kwafele ovanhu ve lihonge oshili kombinga yaJehova naJesus. Onghalamwenyo oyo Johannes a hoolola kaya li ipu. Okwa li a hepekwa nokutulwa modolongo lwopexulilo lefelemudo lotete eshi a li omunamido. (Oil. 3:1; 4:1-3; 5:18; Eh. 1:9) Okwa li natango a ulika kutya oku hole vamwe eshi a li a tulwa modolongo molwaashi a hangwa ta udifa kombinga yaJesus. Pashihopaenenwa, eshi a li konhunhu yaPatmos, okwa li a shanga ehololo olo a li a pewa noku li tumina komaongalo, opo a shiive oinima oyo ya li “tai ka ningwa diva.” (Eh. 1:1) Opo nee eshi Johannes a mangululwa muPatmos, okwa li a shanga Evaengeli laye li na sha nonghalamwenyo yaJesus noukalele waye. Okwa li yo a shanga eenhumwafo nhatu opo a twe omukumo nokupameka ovamwaxe. Ongahelipi to dulu okuhopaenena onghalamwenyo yeliyambo yaJohannes?

10. Ongahelipi to dulu okuulika kutya ou hole shili ovanhu?

¹⁰ Oto dulu okuulika kutya ou hole shili ovanhu okupitila mwaasho wa hoolola u ninge monghalamwenyo yoye. Ounyuni waSatana owa hala u longife efimbo nosho yo eenghono doye adishe opo u likongele oimaliwa nokuliningila edina. Ponhele yaasho, ovaudifi vonghundana iwa yOuhamba mounyuni aushe ohava longifa efimbo lavo lihapu mokuudifa nokukwafela ovanhu va ehene popepi naJehova. Vamwe nokuli ohava udifa nokuhonga efimbo li yadi.

11. Ovaudifi vahapu ovadiinini ohava ulike ngahelipi kutya ove hole Jehova nosho yo ovamwaxe?

¹¹ Ovakriste vahapu ovadiinini ohava longo oilonga yokulikongela omboloto opo ve liyambidide nosho yo omaukwaneumbo avo. Ashike nande ongaho, ovaudifi ovo ovadiinini ohava yambidida ehangano laJehova monghedi keshe tava dulu. Pashihopaenenwa, vamwe ohava kwafele koshikondo shokuyandja oikwafa, shokutunga, ofimbo keshe umwe e na omhito yokuyambidida pashimaliwa oilonga yetu yomounyuni aushe. Ohava ningi oinima aishe oyo, molwaashi ove hole Kalunga nosho yo ovanhu vakwao. Oshivike keshe, ohatu ulike kutya otu hole ovamwatate novamwameme eshi hatu kala pokwoongala nokukufa ombinga muko. Ohatu kala alushe pokwoongala nonande ohatu kala twa loloka. Ohatu yandje omatyekosha nonande ohatu kala twa tila. Nonande atusheni otu na omaupyakadi, ohatu twaafana omukumo ofimbo okwoongala inaku hovela nokonima ya ko. (Heb. 10:24, 25) Ihatu kala tuu twa pandula neenghono oilonga oyo tai longwa kovaudifi vakwetu!

12. Omonghedi vali imwe ilipi Johannes a ulika kutya oku hole ovamwaxe?

 ¹² Johannes ina ulika ashike kutya oku hole ovamwaxe moku va pandula, ndele okwa kala yo he va pe omayele. Pashihopaenenwa, meenhumwafo daye, Johannes okwa pandula ovamwatate novamwameme omolweitavelo lavo noilonga yavo iwa. Ashike okwe va pa yo omayele a yukilila e na sha nokunyona. (1 Joh. 1:8–2:1, 13, 14) Sha faafana, nafye otwa pumbwa okukala hatu pupula kombuda ovamwatate novamwameme apa tave shi endifa nawa. Ashike umwe ngeenge oku na oikala ii, ile ite lihumbata nawa, ohatu dulu oku mu ulikila ohole moku mu pukulula nelungi. Ohashi pula ouladi okupa kaume koye omayele, ashike Ombiibeli oya popya kutya ookaume kashili ohava upikafana, ile tu tye ohava pukululafana. — Omayel. 27:17.

13. Oshike tu na okuhenuka okuninga?

¹³ Omafimbo amwe, ohatu ulike kutya otu hole ovamwatate novamwameme mokuhenuka okuninga oinima yonhumba. Pashihopaenenwa, ihatu handuka diva kwaasho va popya. Diladila kwaasho sha li sha ningwa po lwokuyuka lwopexulilo longhalamwenyo yaJesus yokombada yedu. Jesus okwa li a lombwela ovahongwa vaye kutya ove na okulya olutu laye nokunwa ohonde yaye opo va mone omwenyo. (Joh. 6:53-57) Eendjovo odo oda li da halula ovahongwa vaye vahapu, ndele tave mu fiye po. Ashike ookaume kaye kashili kanda li de va halula, ngaashi Johannes. Ova kala pamwe naye. Ova kala va kuminwa eendjovo odo daJesus, nonande kava li ve udite ko eityo lado. Ookaume ovo ovadiinini vaJesus kava li tava diladila kutya osho Jesus a popya osha puka, ile shi va udife nai. Ponhele yaasho, ova kala ve mu lineekela nove shii kutya osho ta popi oshoshili. (Joh. 6:60, 66-69) Itashi ka kala tuu pandunge tu henuka okuhanduka diva kwaasho ookaume ketu va popya! Ponhele yaasho, otwa pumbwa oku va pa omhito va yelife osho va hala okutya. — Omayel. 18:13; Omuud. 7:9.

14. Omolwashike tuhe na nandenande okukala tu tonde ovamwatate novamwameme?

¹⁴ Johannes okwe tu lombwela yo tuha kale tu tonde ovamwatate novamwameme. Ngeenge otwe lipwililikile omayele oo, ohatu ka ya momwiyo waSatana. (1 Joh. 2:11; 3:15) Osho osha li sha ningililwa vamwe lwopexulilo lefelemudo lotete O.P. Satana ota kendabala ngaashi ta dulu opo a xumife komesho outondwe noku tukule oshiwana shaKalunga. Pefimbo opo Johannes a shanga eenhumwafo daye, meongalo omwa li mwe livakela ovo ve  na omhepo yaSatana. Pashihopaenenwa, Diotrefes okwa li a eta olutandu meongalo. (3 Joh. 9, 10) Ka li a fimaneka ovatalelipo ovaendi ovo va li hava tumwa kolutuwiliki. Okwa li yo ha kondo mo meongalo ovanhu ovo va li hava tambula ko ovanhu ovo e tonde. Osho osha li oshinima shinyanyalifi neenghono! Nokunena, Satana ota twikile nokutukaula oshiwana shaKalunga. Onghee hano, inatu efa nandenande tu tukulwe koutondwe.

15. Oshike omutwe woukwaneumbo u na okukaleka momadiladilo?

¹⁵ Onghedi imwe ya fimana omo omutwe woukwaneumbo hau ulike kutya ou hole ovaneumbo vao omoku va wanifila po eemhumbwe davo dopainiwe. (1 Tim. 5:8) Ashike ou na yo okukaleka momadiladilo kutya oiniwe itai dulu oku va wanifila po eemhumbwe davo dopamhepo. (Mat. 5:3) Tala oshihopaenenwa osho Jesus a tulila po omitwe domaukwaneumbo. Metwokumwe nEvaengeli laJohannes, eshi Jesus a li ta udifwa omwenyo munyenye komuti womahepeko, okwa li ta diladila oukwaneumbo wavo. Johannes okwa li a fikama popepi naina yaJesus, Maria, ponhele opo Jesus a li ta dipaelwa. Nonande Jesus okwa li mouyahame munenenene, okwa li a lombwela Johannes a file oshisho ina Maria. (Joh. 19:26, 27) Jesus okwa li e na ovamwaina ovo va li tava dulu okufila oshisho Maria, ndele kapa li nande oumwe a li a ninga omuhongwa waye. Onghee hano, Jesus okwa li a fiila Maria omunhu oo a li ta dulu oku mu fila oshisho palutu nopamhepo.

16. Johannes okwa li e na oinakuwanifwa ya kwata moiti ilipi?

¹⁶ Johannes okwa li e na oinakuwanifwa ya kwata moiti. Okwa li a kufa ombinga moilonga yokuudifa e li umwe womovayapostoli. Otashi dulika yo a li a hombola, nokwa li e na okukala e na ondjele opo a file oshisho oukwaneumbo waye palutu nosho yo pamhepo. (1 Kor. 9:5) Osho otashi hongo shike omitwe domaukwaneumbo kunena?

17. Omolwashike sha fimana komitwe domaukwaneumbo okufila oshisho pamhepo ovaneumbo vado?

¹⁷ Omumwatate, oo e li omutwe woukwaneumbo, otashi dulika e na oinakuwanifwa ya kwata moiti. Pashihopaenenwa, oku na okulonga noudiinini koilonga yomboloto opo a fimanekife Jehova. (Ef. 6:5, 6; Tit. 2:9, 10) Otashi dulika e na oinakuwanifwa ya kwata moiti meongalo, ngaashi okuninga omatalelepo oufita nokukwatela komesho oilonga yokuudifa. Pefimbo opo tuu opo, osha fimana okukala ha konakona  pandjikilile Ombiibeli pamwe nomukulukadi waye nosho yo nounona vavo. Oukwaneumbo otau ke mu pandula neenghono eshi he va file oshisho palutu, pamaliudo nosho yo pamhepo. — Ef. 5:28, 29; 6:4.

18. Johannes okwa li e na oushili ulipi?

¹⁸ Johannes okwa kala momwenyo efimbo lile nokwa hafela oinima ihapu. Okwa li a shakeneka omashongo mahapu, oo a li taa dulu okunghundipaleka eitavelo laye. Ashike okwa li a ninga ngaashi ta dulu a dulike koipango yaJesus, mwa kwatelwa oshipango shokuhola ovamwatate novamwameme. Osho osha kwafela Johannes a kale e na oushili kutya Jehova naJesus ove mu hole noku mu pa eenghono opo a dule okufinda eshongo keshe. (Joh. 14:15-17; 15:10; 1 Joh. 4:16) Satana nounyuni waye inava dula okwiimba Johannes a ulikile ovamwaxe ohole okupitila meendjovo nomoilonga.

19. Ohatu ladipikwa tu ninge shike mu 1 Johannes 4:7, nomolwashike?

¹⁹ Ngaashi Johannes, nafye otu li mounyuni tau pangelwa kuSatana, oo e li kalunga omukwanyanya wonghalelo ei. (1 Joh. 3:1, 10) Nonande okwa hala tu kale tu tonde ovamwatate novamwameme, ita dulu oku shi ninga, okuninga shapo ofye hatu mu pitike. Onghee hano, natu kale twa tokola toko okukala tu hole ovamwatate novamwameme okupitila meendjovo nosho yo moilonga. Ngeenge otwa ningi ngaho, ohatu ka kala twa hafa eshi tu li oshitukulwa shoukwaneumbo waJehova, nohatu ka kala nonghalamwenyo ya denga mbada. — Lesha 1 Johannes 4:7