1-2. (a) Onaini unene hatu dimbuluka omuholike wetu, oo a fya? (b) Oshike osho Jesus a ninga moufiku oo wa tetekela efyo laye?

OHATU dimbuluka ovaholike vetu, ovo va fya, kashi na nee mbudi kutya ova fya pa pita efimbo li fike peni. Ohatu va dimbuluka, unene tuu mefiku omo va fya.

² Omudo keshe, ohatu ongala mounyuni aushe tu li omamiliyona, opo tu dimbuluke efyo laJesus Kristus, oo tu hole unene. (1 Pet. 1:8) Ohatu ongala pamwe nelalakano loku mu dimbuluka, eshi a yandja omwenyo waye u li ekuliloyambo, opo e tu xupife moulunde nefyo. (Mat. 20:28) Oshoshili kutya Jesus okwa hala ovashikuli vaye va kale hava dimbuluka efyo laye. Moufiku oo wa tetekela efyo laye, okwa dika po ouvalelo we likalekelwa nokwa yandja elombwelo a ti: “Kaleni hamu shi ningi okudimbuluka nge.” — Luk. 22:19.

3. Oshike hatu ka kundafana moshitukulwa eshi?

³ Omuvalu munini womwaavo hava kala pEdimbuluko lefyo laKristus ove na eteelelo loku ka kala meulu. Ashike ovanhu omamiliyona, ovo hava kala po, ove na eteelelo loku ka kala kombada yedu. Moshitukulwa eshi, ohatu ka kundafana kutya omolwashike eengudu odo dopavali hadi kala da halelela okukala pEdimbuluko omudo keshe. Ohatu ka konakona nghee hatu dulu okumona ouwa mokukala po. Paife natu ka hoveleni okukundafana omatomheno amwe kutya omolwashike ovavaekwa hava kala po.

4. Omolwashike ovavaekwa hava li omungome nokunwa omaviinyu pEdimbuluko?

⁴ Omudo keshe, ovavaekwa, ovo hava kala pEdimbuluko, ohava li omungome nokunwa omaviinyu. Omolwashike sha wapala kuvo okulya omungome nokunwa omaviinyu? Opo tu mone enyamukulo kepulo olo, natu ka kundafaneni osho sha ningwa po moufiku waxuuninwa waJesus wokukalamwenyo kwaye kombada yedu. Jesus okwa dika po Ouvalelo wOmwene konima yOpaasa. Okwa tambekida omungome nosho yo omaviinyu kovayapostoli vaye ovadiinini 11 nokwe va lombwela va lye nokunwa. Jesus okwe va lombwela shi na sha nomahangano opavali, ehangano lipe nosho yo ehangano lOuhamba. * (Luk. 22:19, 20, 28-30) Omahangano oo okwe shi ningifa tashi shiiva kovayapostoli nosho yo komuvalu munini waavo tava ka ninga eehamba novapristeri va ye meulu. (Eh. 5:10; 14:1) Oshixupe shovavaekwa, * osho sha kwatelwa momahangano oo opavali, osho ashike shi na okukufa ombinga mokulya omungome nokunwa omaviinyu pEdimbuluko.

5. Ovavaekwa ohava dimbuluka shike shi na sha neteelelo lavo?

⁵ Etomheno likwao kutya omolwashike ovavaekwa hava kala pEdimbuluko, ololo kutya, Edimbuluko ohali va pe omhito, opo va dilonge kombinga yeteelelo lavo. Jehova okwe va pa eteelelo likumwifi loku ka kala meulu nomwenyo ihau fi noihau nyonauka noku ka pangela pamwe nomunyumunwa Jesus Kristus nosho yo novavaekwa vakwao 144 000. Komesho yaaishe, otava ka kala moipafi yaJehova Kalunga. (1 Kor. 15:51-53; 1 Joh. 3:2) Ovavaekwa ove shii kutya ova shivwa va hafele oufembanghenda wa tya ngaho woku ka kala meulu. Ndele opo va dule okuya meulu, ove na okukala ovadiinini fiyo okefyo lavo. (2 Tim. 4:7, 8) Ovavaekwa ngeenge tava diladila keteelelo lavo loku ka kala meulu, ohashi va etele ehafo linene. (Tit. 2:13) Ndele ongahelipi shi na sha ‘needi dimwe’? (Joh. 10:16) Ohadi kala pEdimbuluko omolwomatomheno amwe elipi?

6. Omolwashike eedi dimwe hadi kala pEdimbuluko omudo keshe?

⁶ Eedi dimwe ohadi kala pEdimbuluko, ashike ihadi li omungome noihadi nu omaviinyu, ndele ohadi kala po di li onga ovatali. Mo 1938, ovo ve na eteelelo loku ka kala kombada yedu ova li va shivwa oshikando shotete va ka kale pEdimbuluko. Oshungonangelo ye 1 Marsa 1938 oya ti: “Otashi ka kala pandunge opo [eedi dimwe] di kale pokwoongala kwa tya ngaho nokutala osho tashi ningwa po. . . . Otashi ka kala efimbo litunhula nolihafifa yo kuvo.” Ngaashi ashike ovaenda hava kala va hafa ngeenge ve li poshitufi shohango, eedi dimwe nado ohadi kala da hafa okukala pEdimbuluko di li ovatali.

7. Omolwashike eedi dimwe hadi kala da teelela nodjuulufi okukala poshipopiwa shEdimbuluko?

⁷ Eedi dimwe nado ohadi dilonga keteelelo lado. Ohadi kala da teelela nodjuulufi okukala poshipopiwa shEdimbuluko. Oshipopiwa osho ohashi yukifa unene elitulemo kwaasho Kristus nosho yo 144 000, ovo tava ka pangele pamwe naye, tava ka ningila ovanhu ovadiinini momukokomoko wOmido Eyovi dOkupangela kwaye. Eshi Jesus Kristus ta ka pangela, ovo tava ka pangela meulu otava ka kwafela mokuninga edu oparadisa nokukwafela ovanhu ovaduliki va fike mewaneneno. Ovanhu omamiliyona  ovo hava kala pEdimbuluko ihava kala tuu va tunhukwa, ngeenge tava diladila konakwiiwa, eshi omaxunganeko Ombiibeli taa ka wanifwa, ngaashi olo tali hangwa muJesaja 35:5, 6; 65:21-23 nosho yo Ehololo 21:3, 4! Ngeenge tave lifaneke ve li mounyuni mupe pamwe novaholike vavo, ohashi pameke eteelelo lavo li na sha nonakwiiwa nohashi ve linyengifa va kale va tokola toko okulongela Jehova noudiinini. — Mat. 24:13; Gal. 6:9.

8. Eedi dimwe ohadi kala pEdimbuluko omolwetomheno vali likwao lilipi?

⁸ Natu ka kundafaneni vali etomheno likwao kutya omolwashike eedi dimwe hadi kala pEdimbuluko. Ohadi kala da hala okuulika kutya odi hole ovavaekwa noku va yambidida. Eendjovo daKalunga oda xunganeka kutya ovavaekwa nosho yo ovo ve na eteelelo loku ka kala kombada yedu otava ka kala ve na ekwatafano la kola. Ngahelipi mbela? Natu ka taleni koihopaenenwa inini.

9. Exunganeko olo tali hangwa muSakaria 8:23 ola ulika ngahelipi ekwatafano olo li li pokati keedi dimwe novavaekwa?

⁹ Lesha Sakaria 8:23. Exunganeko eli litunhula ola yelifa onghedi omo eedi dimwe di uditile ovamwatate novamwameme ovavaekwa. Outumbulilo “Omujuda” nosho yo “nanye” otau ulike kongudu ya faafana, oshixupe shovavaekwa. (Rom. 2:28, 29) “Ovalumenhu omulongo vomomalaka aeshe oiwana” otava ulike keedi dimwe. Outumbulilo otava ka “kwata,” otau ulike kutya otava ka kala ve na ekwatafano la kola novavaekwa notave ke va waimina melongelokalunga la koshoka. Onghee hano, ngeenge eedi dimwe da ongala pamwe novavaekwa monguloshi yEdimbuluko, ohadi ulike kutya odi na ekwatafano lopofingo novavaekwa.

10. Oshike osho Jehova a ninga po, opo a wanife po exunganeko olo tali hangwa muHesekiel 37:15-19, 24, 25?

¹⁰ Lesha Hesekiel 37:15-19, 24, 25. Jehova okwa wanifa po exunganeko olo, eshi a hanganifa ovavaekwa nosho yo eedi dimwe va kale ve na oukumwe wa kola filufilu. Exunganeko olo ola tumbula oiti ivali. Ovo ve na eteelelo loku ka kala meulu ova faafanifwa noshiti “shaJuda,” (mepata omo mwa li hamu hoololwa eehamba daIsrael), naavo ve na eteelelo loku ka kala kombada yedu fiyo alushe ova faafanifwa noshiti “shaEfraim.” * Jehova okwa li ta ka hanganifa eengudu odo dopavali, opo di ninge “oshiti shimwe.” Osho osha hala okutya ove na okukala va hangana koshi yOhamba yavo imwe, Kristus Jesus. Omudo keshe, ovavaekwa nosho yo eedi dimwe ohava kala pEdimbuluko ve li ‘oshiunda shimwe’ tava wilikwa ‘komufita umwe,’ ndele ihava kala po ve li eengudu mbali da tukuka. — Joh. 10:16.

11. Metwokumwe naMateus 25:31-36, 40, “eedi” ohadi ulike ngahelipi kutya otadi yambidida unene ovamwaxe vaKristus?

¹¹ Lesha Mateus 25:31-36, 40. “Eedi” odo da li tadi popiwa kuJesus otadi faneke ovayuki, ovo tava ka kala po pefimbo lexulilo, sha hala kutya eedi dimwe, odo di na eteelelo loku ka kala kombada yedu. Ohava yambidida noudiinini oshixupe shovamwaxe vaKristus moku va kwafela va wanife po oshinakuwanifwa sha kwata moiti shokuudifa nokuninga ovanhu ovahongwa. — Mat. 24:14; 28:19, 20.

12-13. Omeenghedi vali dilipi eedi dimwe hadi ulike kutya otadi yambidida ovamwaxe vaKristus?

¹² Omudo keshe, oivike oyo ya tetekela Edimbuluko, eedi dimwe ohadi ulike kutya otadi yambidida ovamwaxe vaKristus. Ohadi ningi ngaho mokukufa ombinga moshikonga osho hashi ningwa mounyuni aushe shokushiva ovo ve na ohokwe ve uye kEdimbuluko. (Tala oshimhungu “ Owa ninga ngoo eemhangela di na sha nEdimbuluko?”) Ohava shilipaleke yo kutya  omalongekida aeshe e na sha nEdimbuluko oku li peenhele, nokuli nonande momaongalo mahapu kamu na nande oumwe ha kufa ombinga. Eedi dimwe ohadi kala da tunhukwa, ngeenge tadi yambidida ovamwaxe vaKristus meenghedi da tya ngaho. Eedi odo odi shii kutya Jesus okwa tala ko osho hadi ningile ovamwaxe da fa oye nde shi ningila pauhandimwe. — Mat. 25:37-40.

¹³ Ohatu kala pEdimbuluko omolwomatomheno amwe a wedwa elipipo, kashi na nee mbudi kutya otu na eteelelo lilipi?

14. Jehova naJesus ove tu ulikila ngahelipi ohole inene?

¹⁴ Otwa pandula neenghono omolwohole oyo Jehova naJesus ve tu ulikila. Jehova okwe tu ulikila ohole meenghedi dihapu, ashike onghedi imwe oi dule eenghedi adishe dikwao. Kalunga ketu okwe tu ulikila ohole inenenene, eshi a tuma Omona waye e na ondilo, opo a mone oixuna noku tu fila. (Joh. 3:16) Otu shii kutya Jesus naye okwa ulika ohole inene, eshi a yandja omwenyo waye nehalo liwa omolwetu. (Joh. 15:13) Itatu dulu okushunifila sha Jehova naJesus, omolwohole oyo ve tu ulikila. Ndele ohatu dulu okuulika olupandu mokukala nonghedi yokukalamwenyo ya koshoka efiku keshe. (Kol. 3:15) Ohatu kala yo pEdimbuluko, opo tu dimbuluke ohole oyo ve tu ulikila noku va ulikila yo kutya otu va hole.

15. Omolwashike ovavaekwa nosho yo eedi dimwe da lenga neenghono oshali yekuliloyambo?

¹⁵ Otwa lenga neenghono oshali yekuliloyambo. (Mat. 20:28) Ovavaekwa ova tala ko ekuliloyambo li na ondilo, molwaashi olo le shi ningifa tashi shiiva va kale ve na eteelelo la denga mbada. Jehova okwe va tala ko ve li ovayuki nokwe va tambula ko ve li ovana vaye, omolweitavelo lavo mekuliloyambo. (Rom. 5:1; 8:15-17, 23) Eedi dimwe nado oda pandula neenghono ekuliloyambo. Molwaashi odi na eitavelo mekuliloyambo laKristus, oda koshoka koshipala shaKalunga, hadi mu longele oilonga iyapuki nodi na eteelelo kutya otadi ka “pita moudjuu munene.” (Eh. 7:13-15) Onghedi imwe omo ovavaekwa nosho yo eedi dimwe hava ulike kutya ove na olupandu omolwekuliloyambo, ohava kala pEdimbuluko omudo keshe.

16. Ohatu kala pEdimbuluko omolwetomheno vali likwao lilipi?

¹⁶ Etomheno vali likwao kutya omolwashike hatu kala pEdimbuluko ololo kutya otwa hala okudulika kuJesus. Kashi na nee mbudi kutya otu na eteelelo lilipi, keshe umwe pauhandimwe oku na okudulika koshipango shaJesus osho a yandja onguloshi omo a dika po Edimbuluko. Okwa ti: “Kaleni hamu shi ningi okudimbuluka nge.” — 1 Kor. 11:23, 24.

17. Edimbuluko ohali tu kwafele ngahelipi tu ehene popepi elela naJehova?

¹⁷ Ohatu ehene popepi elela naJehova. (Jak. 4:8) Ngaashi twa kundafana, Edimbuluko ohali tu pe omhito tu diladile keteelelo olo Jehova e tu pa nokudilonga kohole inene oyo e tu ulikila. (Jer. 29:11; 1 Joh. 4:8-10) Ngeenge otwa dilonga keteelelo letu li na sha nonakwiiwa nosho yo kohole oyo Kalunga e tu ulikila, ohatu ka kala tu mu hole neenghono nohatu ka pameka ekwatafano letu naye. — Rom. 8:38, 39.

18. Ngeenge otwa dilonga koshihopaenenwa shaJesus, otashi ke tu linyengifa tu ninge shike?

¹⁸ Otu na okushikula oshihopaenenwa shaJesus. (1 Pet. 2:21) Omafiku oo taa tetekele Edimbuluko, ohatu ka yandja elitulemo komahokololo opaMbiibeli e na sha noshivike shaxuuninwa shaJesus shokombada yedu, efyo laye nenyumuko laye. Opo nee onguloshi yEdimbuluko, oshipopiwa shEdimbuluko otashi ke tu dimbulukifa ohole oyo Jesus e tu  ulikila. (Ef. 5:2; 1 Joh. 3:16) Ngeenge otwa lesha kombinga yoshihopaenenwa shaJesus sheliyambo, nokudilonga kombinga yasho otashi ke tu linyengifa tu ‘lihumbate monghedi ya faafana noyaye.’ — 1 Joh. 2:6.

19. Ongahelipi hatu dulu okukala tu holike kuKalunga?

¹⁹ Otwa tokola toko okukala tu holike kuKalunga. (Jud. 20, 21) Otwa hala okukala tu holike kuKalunga mokuninga ngaashi hatu dulu tu dulike kuye, tu yapulife edina laye nokuhafifa omutima waye. (Omayel. 27:11; Mat. 6:9; 1 Joh. 5:3) Edimbuluko otali tu linyengifa tu kale twa tokola toko okulihumbata efiku keshe monghedi oyo hatu lombwele Jehova hatu ti: ‘Onda hala u kale u hole nge fiyo alushe!’

20. Otu na okukala pEdimbuluko omolwomatomheno a femba elipi?

²⁰ Otu na omatomheno a femba okukala pEdimbuluko, kashi na nee mbudi kutya otu na eteelelo loku ka kala nomwenyo fiyo alushe meulu, ile okombada yedu. Omudo keshe, ngeenge hatu ongala pamwe mefiku olo, ohatu dimbuluka efyo laJesus Kristus, oo tu hole. Komesho yaaishe, ohatu dimbuluka ohole inenenene, oyo Jehova e tu ulikila eshi a yandja Omona waye e li ekuliloyambo. Neudo, Edimbuluko otali ka kala ko konguloshi mEtitano, mo 15 Aprili 2022. Otu hole Jehova nosho yo Omona waye. Onghee hano, kape na vali oshinima shimwe sha fimanenena kufye shi dulife okukala pEdimbuluko lefyo laJesus.