1-2. Omashongo elipi tashi dulika ovapiya vaJehova ovadiinini va taalela?

 OININGWANIMA inyanyalifi otai dulu okulundulula onghalamwenyo yetu mepakumo leisho. Pashihopaenenwa, omumwatate omudiinini wedina Luis a okwa li a monika okankela. Ndokotola okwa li e mu lombwela kutya oku na ko ashike eemwedi dinini. Monika nosho yo omushamane waye ova li ve lipyakidila mokulongela Jehova pamwe. Opo nee efiku limwe, Monika okwa mona kutya omushamane waye, oo e li omukulunhuongalo, okwa kala ta nyono meholeko oule wefimbo lile. Olivia, omumwameme ina hombolwa, okwa li e na okufiya po eumbo laye omolwoshikungulu shinene, osho sha li tashi ke uya. Eshi a ka aluka, okwa hanga oshikungulu osho shinene sha hanauna po eumbo laye. Onghalamwenyo yaLuis, Monika naOlivia oya li ya lunduluka filufilu ombadilila. Mbela naave owa ningilwa oshinima shinyanyalifi sha tya ngaho, osho sha lundulula onghalamwenyo yoye ombadilila?

² Nonande otu li ovapiya vaJehova ovadiinini, ohatu shakeneke omaudjuu nosho yo omauvela, ngaashi ashike ovanhu aveshe. Otashi dulika yo hatu lididimikile omapataneko, ile omahepeko okudilila kwaavo ve tonde oshiwana shaKalunga. Nonande Jehova ihe tu amene komaudjuu aeshe oo, okwa udaneka oku tu kwafela. (Jes. 41:10) Kekwafo laye, ohatu dulu okukaleka po ehafo letu, okuninga omatokolo opandunge nokukala ovadiinini kuye, nonande ohatu piti meenghalo didjuu. Moshitukulwa eshi, ohatu ka kundafana eenghedi nhee omo Jehova he tu kwafele, ngeenge twa taalela eenghalo didjuu. Ohatu ka kundafana yo osho twa pumbwa okuninga, opo tu mone ouwa mekwafo olo ha yandje.

 JEHOVA OTE KU AMENE

3. Ngeenge hatu piti moshiningwanima shinyanyalifi, oshike tashi dulika tu mone shidjuu okuninga?

³ Eshongo. Ngeenge twa taalela oshiningwanima shinyanyalifi, otashi dulika tu mone shidjuu okudiladila nawa nokuninga omatokolo. Omolwashike? Omolwaashi omitima detu otashi dulika di kale tadi ehama neenghono. Omadiladilo etu ohaa kala a wililwa po unene koshisho. Ohatu kala twa lyalyakana noihatu kala tu shii kutya natu ninge po shike. Didilika nghee ovamwameme vavali, ovo va tumbulwa metetekelo, va li ve udite, eshi va li va taalela omayeleko. Olivia okwa ti: “Konima eshi oshikungulu sha hanauna po eumbo lange, onda li nda ngwangwana nonda wililwa po neenghono.” Monika okwa popya shi na sha nomushamane waye, oo e mu kengelela, a ti: “Omutima wange owa li wa teyauka. Osha li shidjuu kwaame okuninga oinima oyo nda li handi ningi efiku keshe. Kanda li ndi shii ngeenge ohandi dulu okuningilwa oshinima sha tya ngaho.” Jehova okwa udaneka oku tu kwafela ngahelipi, ngeenge tu udite twa wililwa po?

4. Metwokumwe nOvafilippi 4:​6, 7, Jehova okwe tu udanekela shike?

⁴ Jehova okwa udaneka oku tu ningila shike? Okwa udaneka oku tu pa osho sha popiwa mOmbiibeli, “ombili yaKalunga.” (Lesha Ovafilippi 4:​6, 7.) Ombili ya tya ngaho, otai ulike kokungungumana kwomadiladilo nosho yo kwomutima oko haku etifwa kokukala tu na ekwatafano lopofingo naye. Ombili oyo ‘oi dule eendunge adishe;’ oya denga mbada i dulife osho hatu diladila. Pashihopaenenwa, mbela ope na efiku limwe wa li wa ilikana wa mana mo kuJehova, ndele konima owa li wa kumwa, eshi wa ngungumana? Omaliudo a tya ngaho, oo “ombili yaKalunga.”

5. Ongahelipi ombili yaKalunga hai amene omadiladilo nomitima detu?

⁵ Ovafilippi 4:7 ova popya yo kutya ombili yaKalunga ‘otai ka amena omutima nomadiladilo oye.’ Oshitya shopehovelo “amena” osha li outumbulilo wopakwaita, oo wa li hau longifwa tau ulike kovakwaita ovo hava amene oshilando noku shi kaleka meameno shiha ponokelwe. Ovakalimo vomoshilando osho sha amenwa ohava kofa nombili, molwaashi ove shii kutya ovakwaita otave va amene. Sha faafana, ngeenge ombili yaKalunga tai amene omitima detu nosho yo omadiladilo etu, ohatu kala twa ngungumana, molwaashi otu shii kutya otu li meameno. (Eps. 4:8) Ngaashi Hanna, nokuli nonande onghalo yetu inai lunduluka diva, ohatu dulu okukala tu na ombili. (1 Sam. 1:​16-18) Nongeenge otwa ngungumana, luhapu ohashi shi ningifa shipu okudiladila nawa nokuninga omatokolo e li pandunge.

6. Oshike hatu dulu okuninga, opo tu mone ouwa mombili yaKalunga? (Tala yo efano.)

⁶ Osho twa pumbwa okuninga. Ngaashi ashike  ovakalimo vomoshilando hava ifana ovanangeli ve va amene, nafye ohatu dulu okupula Jehova e tu amene. Ngahelipi mbela? Omokwiilikana fiyo osheshi twa mona ombili yaKalunga. (Luk. 11:9; 1 Tes. 5:17) Luis, oo a tumbulwa metetekelo, okwa yelifa nghee ye nomukulukadi waye, Ana, va li va dula okulididimika, eshi va li va mona kutya Luis oku na ko ashike eemwedi dinini a fye. Luis okwa ti: “Monghalo ya tya ngaho, osha li shidjuu neenghono okuninga omatokolo e na sha nouhaku nosho yo noinima ikwao. Ashike eilikano ola li le tu kwafela tu kale tu na ombili pefimbo olo la li lidjuu neenghono.” Luis nomukulukadi waye ova popya kutya ova li va ilikana lwoikando va mana mo tava pula Jehova e va pe ombili yopamadiladilo, omutima wa ngungumana nosho yo ounongo, opo va ninge omatokolo opandunge. Ova li va mona kutya Jehova okwe va kwafela. Ngeenge owa taalela oudjuu wonhumba, twikila okwiilikana, opo nee oto ka mona ombili yaJehova, onga tai amene omutima nomadiladilo oye. — Rom. 12:12.

JEHOVA OTE KE KU PAMEKA

7. Otashi dulika tu kale tu udite ngahelipi, ngeenge hatu piti meyeleko lidjuu?

⁷ Eshongo. Ngeenge hatu piti meenghalo didjuu, omaliudo, omadiladilo neenghatu detu ohadi lunduluka. Ngaashi oshikepa oyo tai twalwaatwalwa komakufikufi, nafye otashi dulika tu kale tu udite hatu twalwaatwalwa komaliudo. Ana, oo a popiwa metetekelo, okwa popya kutya okwa li ha kala e na omaliudo a yoolokafana konima yefyo laLuis. Okwa ti: “Omafimbo amwe, onda li handi kala nda wililwa po, nonda li handi hovele okukala nde lietela onghenda. Onda li yo handi kala nda handuka, eshi a fiya nge po.” Peemhito dimwe, Ana okwa li ha kala e udite owike nokwa kenyanana, ngeenge ta ningi omatokolo moinima oyo Luis a li ha wanifa po. Omafimbo amwe, okwa li ha kala e udite a fa e li moshikungulu. Jehova ohe tu kwafele ngahelipi, ngeenge hatu hovele okuwililwa po komaliudo a tya ngaho?

8. Ngaashi sha popiwa muJesaja 33:​6, Jehova okwe tu shilipaleka kutya ote ke tu ningila shike?

⁸ Jehova okwa udaneka oku tu ningila shike? Okwe tu shilipaleka kutya ote ke tu pameka. (Lesha Jesaja 33:6.) Ngeenge mefuta omu na oshikungulu, oshikepa ohai hovele okutwalwaatwalwa. Opo oshikepa i kale ya ngungumana, otashi dulika ya pumbwa omilenge de likalekelwa, odo hadi kala kombinga nombinga yoshikepa koshi yomeva. Omilenge da tya ngaho, otadi dulu okukwafela oshikepa iha tengauke, kungaho, ovanhu ovo ve li moshikepa ohava kala ve li meameno, nolweendo ohali ende nawa. Ashike omilenge odo ohadi longo monghedi ya denga mbada, ngeenge oshikepa tai linyenge ya finda komesho. Sha faafana, Jehova ote ke tu pameka, ngeenge hatu twikile oku mu longela noudiinini momafimbo madjuu.

9. Ongahelipi oilongifo yokuninga omapekapeko tai dulu oku tu kwafela tu kale tu na ondjele? (Tala yo efano.)

 ⁹ Osho hatu dulu okuninga. Ngeenge wa wililwa po komaliudo, kendabala ngaashi to dulu u kale ho ilikana, ho kala pokwoongala nokuudifa. Oshoshili kutya ito dulu okuninga vali shihapu ngaashi nale, ashike dimbuluka kutya Jehova oku na ondjele. (Yelekanifa Lukas 21:​1-4.) Natango, litulila po efimbo lokukonakona paumwene nokudilonga. Omolwashike? Jehova okwe tu pa oitukulwa ya denga mbada nosho yo ouvidio okupitila mehangano laye, oyo tai dulu oku tu kwafela tu pangele omaliudo etu, ngeenge twa taalela omaudjuu. Opo u mone osho wa pumbwa, oto dulu okulongifa oilongifo yetu yokuninga omapekapeko, oyo i li melaka loye, ngaashi o-JW Library^® nosho yo Elongifwambo lokukonga omauyelele moishangomwa yEendombwedi daJehova. Monika, oo a tumbulwa metetekelo, okwa popya kutya okwa li a longifa oilongifo oyo yokuninga omapekapeko diva eshi a hovela okukala a li e udite a wililwa po neenghono. Pashihopaenenwa, okwa li a konga oshitya “ehandu.” Omafimbo amwe, okwa li a konga oshitya “oukengeleledi,” ile “oudiinini.” Opo nee oha lesha kombinga yaasho fiyo a tya po xwepo. Okwa ti: “Ngeenge handi hovele okuninga omapekapeko, onda li handi kala ndi na oshisho. Ashike eshi handi twikile okulesha, ohandi kala nda fa ndi udite Jehova ta papatele nge. Eshi handi lesha, ohandi mono kutya Jehova oku udite ko omaliudo ange a yoolokafana, nota kwafele nge.” Ekwafo laJehova la tya ngaho, otali dulu yo oku ku kwafela u pangele omaliudo oye, fiyo osheshi wa ngungumana. — Eps. 119:​143, 144.

JEHOVA OTE KU YAMBIDIDA

10. Ohatu kala tu udite ngahelipi, ngeenge twa ningilwa oshinima osho she tu nyemateka?

¹⁰ Eshongo. Ngeenge otwa ningilwa oshinima shonhumba osho she tu nyemateka, omafimbo amwe, otashi dulika tu kale tu udite twa nghundipala palutu notwa wililwa po pamaliudo. Otashi dulika tu kale tu udite ngaashi omulotoki, oo a mona oshiponga, oo a li a ika okulotoka a mana mo, ashike paife ota ende ta shongola. Otashi dulika tu mone shidjuu okuninga oinima oyo twa li hatu mono ipu okuninga, ile tu kale tuhe na ehalo lokuninga oinima oyo ya li hai tu hafifa. Ngaashi Elia, otashi dulika tu kale tu udite shidjuu okuyambuka po. Otwa hala ashike okukala twa kofa. (1 Eeh. 19:​5-7) Jehova okwa udaneka oku tu ningila shike, ngeenge tu udite twa nghundipala?

11. Jehova ohe tu kwafele monghedi imwe vali ilipi? (Epsalme 94:18)

¹¹ Jehova okwa udaneka oku tu ningila shike?  Okwa udaneka oku tu yambidida. (Lesha Epsalme 94:18.) Ngaashi ashike omulotoki a lemana a pumbwa eyambidido, opo a pule komesho, nafye otashi dulika twa pumbwa ekwafo, opo tu kale twe lipyakidila moilonga yaJehova. Momafimbo a tya ngaho, Jehova okwe tu shilipaleka, a ti: “Aame Omwene Kalunga koye handi kwata eke loye lokolulyo, Ame ou handi ku lombwele: ‘Ino kala wa tila, Ame ohandi ku kwafa.’” (Jes. 41:13) Ohamba David oya li ya mona ekwafo la tya ngaho. Eshi ya li ya taalela omayeleko nosho yo ovatondi, oya li ya lombwela Jehova ya ti: “Eke loye lokolulyo ohali yambidida nge.” (Eps. 18:​35, NWT) Ndele ongahelipi Jehova he tu yambidida?

12. Jehova otashi dulika a longife oolyelye, opo ve tu kwafele, ngeenge twa nghundipala?

¹² Luhapu Jehova ohe tu yambidida mokulinyengifa ovanhu vakwetu ve tu kwafele. Pashihopaenenwa, eshi David a li a nghundipala, kaume kaye Jonatan okwa li e mu talela po, opo e mu yambidide noku mu twa omukumo. (1 Sam. 23:​16, 17) Sha faafana, Jehova okwa li a hoolola Elisa a kwafele Elia. (1 Eeh. 19:​16, 21; 2 Eeh. 2:2) Kunena, Jehova ota dulu okulongifa ovapambele vetu, ookaume, ile ovakulunhuongalo ve tu yambidide. Ashike ngeenge twa wililwa po neenghono komaliudo, otashi dulika tu kale twa hala okulikalela. Oshi li paushitwe okuninga ngaho. Oshike hatu dulu okuninga, opo tu mone ekwafo laJehova?

13. Oshike twa pumbwa okuninga, opo tu mone ouwa mekwafo laJehova? (Tala yo efano.)

¹³ Osho twa pumbwa okuninga. Henuka okulitongola ko. Ngeenge twe litongola ko, otashi dulika tu hovele okudiladila ashike kombinga yetu vene nokomaupyakadi oo hatu piti muo. Okudiladila kwa tya ngaho, otaku dulu okukuma omatokolo oo hatu ningi. (Omayel. 18:1) Oshoshili kutya atushe otwa pumbwa efimbo lokulikalela, unene tuu ngeenge otwa taalela eenghalo dingulutila. Ashike ngeenge otwa kala twe litongola ko oule wefimbo lile, itatu ka tambula ko ekwafo lovanhu ovo Jehova ta longifa, opo e tu kwafele. Onghee kashi na nee mbudi kutya eenghalo odidjuu shi fike peni, tambula ko ekwafo lovapambele voye, lookaume nolovakulunhuongalo. Va tala ko kutya Jehova ovo ta longifa, opo e ku kwafele. — Omayel. 17:17; Jes. 32:​1, 2.

JEHOVA OTE KU HEKELEKE

14. Otashi dulika tu taalele eenghalo dilipi odo tadi tu tilifa?

¹⁴ Eshongo. Otashi dulika tu pite meenghalo odo hadi tu tilifa. MOmbiibeli, ovapiya vaKalunga ovadiinini ova popya kutya omafimbo amwe ova li va wililwa po nova tila ovatondi vavo, ile  omafininiko akwao. (Eps. 18:4; 55:​1, 5) Sha faafana, nafye ohatu dulu okutaalela omapataneko kofikola, koilonga, moukwaneumbo, ile okudilila kepangelo. Ohatu dulu nokuli okukala twa tila okufya omolwouvela wonhumba. Momafimbo a tya ngaho, otashi dulika tu kale tu udite tuhe na ekwafo, ngaashi okahanana. Jehova ohe tu kwafele ngahelipi momafimbo a tya ngaho?

15. Eshilipaleko lilipi li li mEpsalme 94:19?

¹⁵ Jehova okwa udaneka oku tu ningila shike? Ohe tu hekeleke noku tu ngungumaneka. (Lesha Epsalme 94:19.) Epsalme olo otali tu diladilifa kombinga yokakadona oko ka tila noitaka dulu okukofa omolwomipwalakato dinene. Faneka nee momadiladilo xe e uya kuko, te ka papatele nokukala e ka kwete, fiyo osheshi ka kofa. Nonande omingungumo otadi twikile okupwalakata, oke udite ke li meameno, eshi xe e ka papatela. Ngeenge twa taalela omayeleko a tilifa, otashi dulika tu kale twa pumbwa Tate yetu womeulu a kale e tu kwete, oku shi popya pafaneko, fiyo twa ngungumana. Ongahelipi hatu dulu okumona ehekeleko olo kuJehova?

16. Oshike hatu dulu okuninga, opo tu mone ouwa mehekeleko laJehova? (Tala yo efano.)

¹⁶ Osho twa pumbwa okuninga. Kala ho kala efimbo naJehova, to ilikana kuye nokulesha Eendjovo daye. (Eps. 77:​1, 12-14) Ngeenge owa kala u na onghedindjikilile ya tya ngaho, oshinima shotete osho to ka ninga ngeenge wa wililwa po, oto ka ya kuXo womeulu, opo e ku kwafele. Mu lombwela osho wa tila nosho yo osho to lipula nasho. Mu pitika a popye naave noku ku hekeleka okupitila mOmishangwa. (Eps. 119:28) Oto ka mona kutya oitukulwa imwe yOmbiibeli yokondadalunde otai dulu oku ku hekeleka, ngeenge wa tila. Pashihopaenenwa, oto dulu okumona etwomukumo membo laJob, mOmapsalme, mOmayeletumbulo nosho yo meendjovo daJesus odo tadi hangwa muMateus etukulwa 6. Eshi to ilikana kuJehova nokulesha Eendjovo daye, ote ke ku hekeleka.

17. Ohatu dulu okukala tu na elineekelo lilipi?

¹⁷ Ohatu dulu okukala tu na elineekelo kutya Jehova ote ke tu kwafela momafimbo madjuu. Itatu ka kala ofye atuke. (Eps. 23:4; 94:14) Jehova okwa udaneka oku tu amena, oku tu ngungumaneka, oku tu yambidida noku tu hekeleka. Jesaja 26:3 okwa popya shi na sha naJehova, a ti: “Ou e neendunge da pama mwoove, Ove to mu diinine mombili, heeno, ombili, osheshi okwe ku lineekela.” Onghee lineekela Jehova nokuninga ashishe osho to dulu, opo u mone ouwa mekwafo laye alishe. Ngeenge owa ningi ngaho, otashi ke ku pameka, nokuli nomomafimbo madjuu.