Vamwe ova kulila momaputuko omo ovalumenhu vahapu va tala ko ovakainhu inava fimana. Pashihopaenenwa, Hans, omupashukilishikandjo wokoBolivia, okwa popya kutya ovalumenhu vamwe ova kulila momaputuko omo ovalumenhu hava ladipikwa va kale ve na ounhwa. Ovalumenhu va tya ngaho ova itavela kutya ove dule kokule ovakainhu, naluhapu ihava ungaunga navo nefimaneko.” Shengxian, omukulunhuongalo wokoTaiwan, okwa ti: “Moshitukulwa shetu, ovalumenhu vahapu ove udite kutya ovakainhu kave na okulidopa moinima yavo. Ngeenge omulumenhu okwa tumbula omadiladilo omukainhu e na sha noshinima shonhumba, vakwao ohave mu dini.” Ovalumenhu vamwe ohava ungaunga nokatongo novakainhu meenghedi dikwao vali. Pashihopaenenwa, otashi dulika va ninge omashendjo oo taa ulike kutya inava fimaneka ovakainhu.

Shihafifa, kashi na nee mbudi kutya omulumenhu okwa putukila meputuko lilipi, ota dulu okulundulula. Ota dulu okufinda omaliudo oo okukala a tala ko ovalumenhu ve dule ovakainhu. (Ef. 4:​22-24) Osho otashi dulu okuningwa mokushikula oshihopaenena shaJehova. Moshitukulwa eshi, ohatu ka kundafana nghee Jehova a ungaunga novakainhu, nghee ovamwatate tava dulu okulihonga okuungaunga novakainhu ngaashi Jehova. Ohatu ka kundafana yo nghee ovakulunhuongalo tava dulu okutula po oshihopaenena mokuulika kutya ova fimaneka ovamwameme.

JEHOVA OHA UNGAUNGA NGAHELIPI NOVAKAINHU?

Jehova okwa tula po oshihopaenenwa dingi shanghee tu na okuungaunga novakainhu. Oku li Xe omunalukeno, oo e hole oludalo laye alishe. (Joh. 3:16) Ovamwameme ovadiinini ove li ovanakadona ovo ve na ondilo kuye. Natu ka taleni keenghedi tadi shikula omo Jehova ha ulike kutya oku hole nokwa fimaneka ovakainhu.

 Oha ungaunga navo nopehe na okatongo. Jehova okwa shita ovalumenhu novakainhu oshifeka shaye. (Gen. 1:27) Ina shita omulumenhu e na eendunge dihapu, ile ounghulungu u dule wovakainhu, ile a lenga ovalumenhu shi dulife ovakainhu. (2 Omaf. 19:7) Okwa shita ovalumenhu novakainhu ve na okudula kwa faafana kokuuda ko oshili yOmbiibeli nokuhopaenena omaukwatya aye a denga mbada. Jehova okwa lenga yo ovalumenhu novakainhu ovo ve na eitavelo muye. Okwa pa ovalumenhu nosho yo ovakainhu eteelelo loku ka kala nomwenyo fiyo alushe kombada yedu, ile loku ka kala eehamba novapristeri meulu. (2 Pet. 1:1) Osha yela kutya Jehova ke na okatongo novakainhu.

Oha pwilikine kuvo. Jehova okwa li a ulika kutya oku na ko nasha nanghee ovakainhu hava kala ve udite nosho yo omaupyakadi oo ve na. Pashihopaenenwa, okwa li a pwilikina nokunyamukula omailikano aRakel nosho yo aHanna. (Gen. 30:22; 1 Sam. 1:​10, 11, 19, 20) Jehova okwa li yo a nwefa mo ovashangi vOmbiibeli va kwatele mo omahokololo ovalumenhu ovo va li va pwilikina kovakainhu. Pashihopaenenwa, Abraham okwa li a shikula elombwelo laJehova lokupwilikina komukulukadi waye Sara. (Gen. 21:​12-14) Ohamba David oya li ya pwilikina kuAbigail. David okwa li e udite kutya Jehova oye a tuma Abigail a popye naye. (1 Sam. 25:​32-35) Jesus, oo a li a ulika omaukwatya a fa aXe monghedi ya denga mbada, okwa li a pwilikina kuina Maria. (Joh. 2:​3-10) Oihopaenenwa oyo oya divilika kutya onghedi imwe omo Jehova ha ulike kutya okwa fimaneka ovakainhu, omokupwilikina kuvo.

Okwe ve lineekela. Pashihopaenenwa, Jehova okwa li e lineekela Eva, opo a kwafele mokufila oshisho edu alishe. (Gen. 1:28) Kungaho, Jehova okwa ulika kutya ine mu tala ko e dulike komushamane waye, Adam, ndele oku li ekwafo linene kuye. Jehova okwa li yo e lineekela ovaprofeti ovakainhu Debora naHulda, opo va yandje omayele koshiwana shaye, mwa kwatelwa omutokolipangeli nohamba. (Ovatok. 4:​4-9; 2 Eeh. 22:​14-20) Kunena, Jehova okwe lineekela ovakainhu Ovakriste, opo va wanife po oilonga yaye. Ovamwameme ovo ovadiinini ohava longo ve li ovaudifi, ovakokolindjila novatumwa. Ohava kwafele mokuduta, mokutunga, mokukaleka monghalo iwa Omalupale Ouhamba nosho yo omatungo oshitaimbelewa. Vamwe vomuvo ohava longo koBetel, ofimbo vamwe okeembelewa dokutoloka. Ovamwameme va tya ngaho ove li ngaashi etangakwaita la kula olo Jehova ta longifa, opo a wanife po ehalo laye. (Eps. 68:11) Osha yela kutya Jehova ina tala ko ovakainhu ve li ovanghundi, ile itava dulu sha.

ONGAHELIPI OVAMWATATE TAVA DULU OKULIHONGA OKUUNGAUNGA NOVAKAINHU NGAASHI JEHOVA?

Ovamwatate, opo tu mone ngeenge ohatu ungaunga novamwameme ngaashi Jehova, otwa pumbwa okukonakona paushili omadiladilo neenghatu detu. Opo tu ninge ngaho, otwa pumbwa ekwafo. Ndokotola ota dulu okulongifa oilongifo yonhumba, opo a tale ngeenge omutima womunhu ou na oukolele, ile otau vele. Monghedi ya faafana, ookaume vawa nosho yo Eendjovo daKalunga otadi dulu oku tu kwafela tu mone ngeenge etaleko letu li na sha novakainhu otali hafifa Jehova, ile hasho. Oshike hatu dulu okuninga, opo tu mone ekwafo la tya ngaho?

Pula kaume muwa. (Omayel. 18:17) Ohatu dulu okupula kaume ketu oo twe lineekela, omunalukeno noku na ondjele omapulo aa: “Ohandi ungaunga ngahelipi novamwameme? Mbela ove udite ngoo kutya onde va fimaneka? Mbela onda pumbwa okuninga oshinima shonhumba, opo ndi ungaunge navo nawa?” Ngeenge kaume koye okwa tumbula eenghedi donhumba, omo wa pumbwa okuxwepopala, henuka okulipopila. Ponhele yaasho, kala wa halelela okuninga omalunduluko.

Konakona Eendjovo daKalunga. Onghedi ya denga mbada omo hatu dulu okumona ngeenge ohatu ungaunga nawa novamwameme omokulongifa Eendjovo daKalunga, opo di tu kwafele tu konakone omadiladilo neenghatu detu. (Heb. 4:12) Eshi hatu konakona Ombiibeli, ohatu lihongo shi na sha novalumenhu ovo va li va ungaunga novakainhu nawa nosho yo ovo inave shi ninga. Ohatu dulu okuyelekanifa oihopaenenwa oyo nonghedi omo hatu ungaunga novakainhu. Shikwao vali, ovamwatate ove na okukala va lungama vaha yandje ashike elitulemo kovelishe imwe yOmbiibeli noku i longifa, opo va yambidide etaleko lavo la puka li na sha novakainhu. Ponhele yaasho, otava dulu okutala keevelishe dihapu dOmbiibeli odo da kundafana nghee omulumenhu e na okuungaunga nomukainhu. Kungaho, otava ka uda ko etaleko laKalunga li na sha novakainhu. Pashihopaenenwa, metwokumwe na 1 Petrus 3:​7, omukulukadi okwa popiwa e li ‘oshiyuma inashi pama.’ b Mbela osho osha hala okutya ina fimana, ke na eendunge, ile owino e dulike komulumenhu? Hasho nandenande! Okuyelekanifa eendjovo  daPetrus naasho Ovagalati 3:​26-29 va popya, otadi ulike kutya Jehova okwa hoolola ovakainhu nosho yo ovalumenhu va ka pangele pamwe naJesus meulu. Ngeenge hatu konakona Eendjovo daKalunga nokupula kaume muwa kutya ohatu ungaunga ngahelipi novakainhu, ohatu ke lihonga nghee tu na okuulika kutya otwa fimaneka ovamwameme.

ONGAHELIPI OVAKULUNHUONGALO TAVA DULU OKUULIKA KUTYA OVA FIMANEKA OVAMWAMEME?

Ovamwatate meongalo otava dulu yo okulihonga okuungaunga novamwameme nefimaneko mokushikula oshihopaenenwa shovakulunhuongalo ovanahole. Ongahelipi ovakulunhuongalo tava dulu okutula po oshihopaenenwa mokuulika kutya ova fimaneka ovamwameme? Natu ka taleni keenghedi dimwe dokondadalunde.

Ovakulunhuongalo ohava pandula ovamwameme. Omuyapostoli Paulus okwa tula po oshihopaenenwa shiwa osho ovakulunhuongalo tava dulu okushikula. Okwa li a pandula moipafi ovamwameme vonhumba monhumwafo oyo a li a shangela eongalo lokuRoma. (Rom. 16:12) Diladila kehafo olo ovamwameme va tya ngaho va li ve na, eshi onhumwafo yaPaulus ya li ya leshwa meongalo! Sha faafana, ovakulunhuongalo ohava pandula ovamwameme tashi di komutima omolwomaukwatya avo mawa nomolwoilonga yavo oyo tava longele Jehova. Osho ohashi kwafele ovamwameme va shiive kutya eongalo ole va fimaneka nole va lenga. Eendjovo detwomukumo domukulunhuongalo otashi dulika odo ovamwameme ovo va pumbwa filufilu, eshi tava twikile okulongela Jehova noudiinini. — Omayel. 15:23.

Ngeenge ovakulunhuongalo tava pandula ovamwameme, ove na oku shi ninga paushili nokondadalunde. Omolwashike? Omumwameme wedina Jessica okwa ti: “Ohashi kala shiwa, ngeenge ovamwatate tava lombwele omumwameme kutya ‘owa ninga nawa.’ Ashike ohatu pandula unene ngeenge ovamwatate tave tu pandula tava popi oshinima shonhumba shokondadalunde, ngaashi okuhonga ounona vetu va kale omutumba va ngungumana mokwoongala, ile ngeenge twa longifa efimbo letu tu ka tale omukonakonimbiibeli e uye kokwoongala.” Ngeenge ovakulunhuongalo tava  pandula ovamwameme moshinima shonhumba shokondadalunde, ovamwameme ohava kala ve udite va pumbiwa nova fimanekwa meongalo.

Ohava pwilikine kovamwameme. Ovakulunhuongalo ovalininipiki ove shii kutya havo ashike ve na omadiladilo mawa. Ovakulunhuongalo va tya ngaho, ohava pula ovamwameme va ninge omaetepo avo nohava pwilikine noukeka, ngeenge tava popi. Kungaho, ovakulunhuongalo ohava tu omukumo ovamwameme nohava mono ouwa vo vene. Ngahelipi? Omukulunhuongalo wedina Gerardo, oo ha longo mObetel, okwa ti: “Ohandi mono kutya okupula ovamwameme omaetepo ohashi kwafele nge ndi longe oilonga yange nawanawa. Luhapu, ovamwameme ovo ova longa oilonga ya tya ngaho efimbo lile ve dule ovamwatate.” Meongalo, ovamwameme vahapu ohava longo ve li ovakokolindjila, onghee ove shii shihapu shi na sha novanhu vomoshitukulwa. Omukulunhuongalo wedina Bryan okwa ti: “Ovamwameme ove na omaukwatya mahapu mawa omaunghulungu oo a pumbiwa mehangano. Onghee mona ouwa mounghulungu wavo.”

Ovakulunhuongalo ovanaendunge ihave lipwililikile omaetepo ovamwameme. Omolwashike? Omukulunhuongalo wedina Edward okwa ti: “Omadiladilo omumwameme nosho yo owino waye otau dulu okukwafela omumwatate a ude ko oshinima shonhumba pauyadi noku ude ko nawa omaliudo avamwe.” (Omayel. 1:5) Nokuli nonande omukulunhuongalo ita dulu okutula moilonga eetepo lomumwameme, ota dulu oku mu pandula, eshi a ninga eetepo laye, naashi a tukulilafana naye eshiivo neudeko laye.

Ohava deula ovamwameme. Ovakulunhuongalo ovanaendunge ohava kongo eemhito va deule ovamwameme. Pashihopaenenwa, otava dulu okuhonga ovamwameme nghee ve na okukwatela komesho elongekido loilonga yomomapya, ngeenge kape na omumwatate a ninginifwa. Otava dulu oku va deula va longife oilongifo nosho yo omashina, opo va dule okukwafela moilonga yokuwapekulula nokutunga omatungo ehangano. KObetel, ovapashukili ohava deula ovamwameme va wanife po oinakuwanifwa i lili noku lili, mwa kwatelwa okuwapekulula, okulanda, okuvalula, okuungaunga noikwakompiuta nosho tuu. Ngeenge ovakulunhuongalo tava deula ovamwameme, ohava ulike kutya ova tala ko ovamwameme tava dulu sha novalineekelwa.

Ovamwameme vahapu ohava longifa edeulo olo va pewa kovakulunhuongalo, opo va etele vamwe ouwa. Pashihopaenenwa, ovamwameme vamwe ohava longifa edeulo li na sha nokutunga, opo va kwafele vamwe mokutungulula omaumbo avo konima yoshiponga shopaushitwe. Ovamwameme vakwao ohava longifa ounghulungu wavo oo va likola moilonga yokuudifa meenhele daaveshe, opo va kwafele mokudeula ovamwameme vahapu navo va kufe ombinga moukalele woludi olo. Ovamwameme ohava kala ve udite ngahelipi shi na sha novakulunhuongalo ovo have va deula? Omumwameme wedina Jennifer okwa ti: “Eshi nda longa moilonga yokutunga Olupale lOuhamba limwe, omupashukili woilonga okwa kufa efimbo a deule nge. Okwa didilika oilonga oyo nda longa nokwa pandula nge omolwayo. Ondi hole okulonga naye, molwaashi ohandi kala ndi udite ndi na oshilonga nonde lineekelwa.”

OMAUWA OO HAA DI MOKUUNGAUNGA NOVAKAINHU MEONGALO NGAASHI OVAMWAMEME

Ngaashi Jehova, otu hole ovamwameme ovadiinini. Onghee ohatu ungaunga navo ngaashi ovaneumbo letu. (1 Tim. 5:​1, 2) Otwe va lenga nohatu hafele okulonga pamwe navo. Ohatu kala twa hafa neenghono, ngeenge va didilika kutya otu va hole nohatu va yambidida. Omumwameme wedina Vanessa okwa ti: “Ohandi pandula neenghono Jehova, eshi ndi li oshitukulwa shehangano laye, omo mu yadi ovamwatate ovo hava tunge omukumo neenghono.” Omumwameme umwe wokoTaiwan okwa ti: “Ohandi pandula neenghono Jehova nosho yo ehangano laye, eshi va lenga ovakainhu nova fimaneka omaliudo avo. Osho ohashi pameke eitavelo lange nohashi ningifa nge nokuli ndi kale ndi na olupandu lokukala ndi li oshitukulwa shehangano laJehova.”

Jehova iha kala tuu e udite etumba, ngeenge ta tale ovalumenhu Ovakriste ovadiinini tava kendabala okutala ko nokuungaunga novakainhu ngaashi ye! (Omayel. 27:11) Omukulunhuongalo wokoScotland wedina Benjamin okwa ti: “Ovalumenhu vahapu mounyuni kunena inava fimaneka ovakainhu nandenande. Onghee ngeenge ovamwameme ve li pOlupale lOuhamba, otwa hala okushilipaleka kutya ove udite va fimanekwa nove holike.” Atusheni natu ninge eenghendabala tu hopaeneneni Jehova mokuungaunga novamwameme ovaholike pahole nonefimaneko olo ve lilongela. — Rom. 12:10.