OSHITYA shomelaka lopehovelo osho sha tolokwa ‘etemba’ mOmbiibeli — Etoloko lOunyuni mupe lOmishangwa dopaKriste dOshigreka otashi dulu okuyukifwa komaludi omatemba a yoolokafana. (Oil. 8:​28, 29, 38) Ashike osha fa shi li ngaha kutya Omuetiopia okwa li a londa metemba la kula li dule etemba linini olo la li hali longifwa moita, ile momafiyafanepo. Natu ka taleni komatomheno amwe, oo e tu ningifa tu fike pexulifodiladilo olo.

Omuetiopia, oo a li a enda oshinano shile, okwa li e na ondodo ya kula. Okwa li “omulumenhu oo a li e na ondodo ya kula mepangelo laKandake, ohambakainhu yaEtiopia, nokwa li ha pashukile emona layo alishe.” (Oil. 8:27) Etiopia shonale osha li sha kwatela mo Sudan shokunena nosho yo oshitukulwa sha kula shokolukadi laEgipiti shokunena. Nonande omulumenhu oo otashi dulika ka li a londa metemba la faafana molweendo laye alishe, oku na okukala a li a enda noinima ihapu oyo ya li ya pumbiwa molweendo olo lile. Imwe yomoyeendifo oyo ya li hai longifwa mefelemudo lotete O.P., oyo ya li hai humbata ovatwaalelwa, oya li etemba lomalola ane. Embo limwe ledina Acts—An Exegetical Commentary, ola ti: “Etemba loludi olo ola li li na onhele ya kula yokuhumbata eendjato nosho yo oinima ikwao. Osho osha li she shi ningifa tashi shiiva kovanhu va ende oinano ile.”

Omuetiopia okwa li ta lesha, eshi Filippus e uya puye. Ehokololo ola popya kutya “Filippus okwa tondokela ko nokwa uda elenga tali lesha mokule embo lomuprofeti Jesaja.” (Oil. 8:30) Omatemba kaa li a longwa haa endelele. Molwaashi okwa li haa ende kanini, osho kasha li ashike sha ningifa elenga li dule okulesha, ndele osha li yo sha kwafela Filippus a dule oku li hanga kolupadi.

Omuetiopia okwa ‘lombwela Filippus a londe, ndele ta kala omutumba puye.’ (Oil. 8:31) Metemba lefiyafanepo, ovalondi ohava kala ofika. Ashike metemba olo la longwa lomolweendo omwa li mu na oshipundi omo Omuetiopia nosho yo Filippus va li omutumba.

Metwokumwe naasho sha popiwa mOilonga etukulwa 8 nosho yo komaumbangi makwao ashili e na sha nondjokonona, oishangomwa yetu efimbo opo la di ko, oya ulika elenga lokuEtiopia la londa metemba la kula, ndele hametemba linini olo hali longifwa moita, ile mefiyafanepo.