1. Ouwa ulipi hatu mono, ngeenge ohatu kala pEdimbuluko lefyo laKristus omudo keshe?

 KAPE na omalimbililo kutya naave oto tu kumwe kutya ekuliloyambo oli li oshali ya denga mbada. (2 Kor. 9:15) Molwaashi Jesus okwe tu fila, ohatu dulu okupanga oukaume wopofingo naJehova Kalunga. Ohatu dulu yo okukala neteelelo li na sha nomwenyo waalushe. Otu na omatomheno mahapu e na sha nokupandula Jehova oo a yandja ekulilo, molwaashi oku tu hole neenghono. (Rom. 5:8) Opo tu kale tu na olupandu nokuha dimbwa osho Jehova naJesus ve tu ningila, Jesus okwe tu lombwela tu kale hatu dimbuluka efyo laye omudo keshe. — Luk. 22:​19, 20.

2. Oshike hatu ka kundafana moshitukulwa eshi?

² Neudo, Edimbuluko otali ka kala ko mOlomakaya momafiku 12 Aprili 2025. Kape na omalimbililo kutya atusheni ohatu ningi omalongekido oku ka kala po. Ohatu ka mona ouwa, ngeenge pefimbo lEdimbuluko otwa dilonga a kwaasho Jehova nOmona ve tu ningila. Moshitukulwa eshi, ohatu ke lihonga osho ekuliloyambo tali tu hongo kombinga yaJehova nosho yo Omona waye. Oshitukulwa tashi landula ko, otashi ke tu kwafela tu ude ko nghee hatu dulu okumona ouwa mekuliloyambo nanghee hatu dulu okuulika olupandu.

OSHO EKULILOYAMBO TALI TU HONGO KOMBINGA YAJEHOVA

3. Ongahelipi efyo lomunhu umwe la dula okumangulula ovanhu omamiliyona koulunde nefyo? (Tala yo efano.)

³ Ekuliloyambo otali tu hongo kombinga youyuki waJehova. (Deut. 32:4) Ngahelipi mbela? Molwaashi Adam ka li a dulika,  otwa fyuulula oulunde oo hau twala mefyo. (Rom. 5:12) Opo tu mangululwe ko koulunde nefyo, Jehova okwa li a ninga elongekido, opo Jesus a yandje ekuliloyambo. Ndele ongahelipi efyo laumwe, oo a wanenena, la dula okumangulula ovanhu vahapu koulunde nefyo? Omuyapostoli Paulus okwa ti: “Omolwokuhadulika kwomunhu umwe [Adam], vahapu ova ninga ovalunde, nomolwokudulika kwomunhu umwe [Jesus], vahapu otava ka ninga ovayuki.” (Rom. 5:19; 1 Tim. 2:6) Onghee Paulus okwa li ta ti kutya ovanhu aveshe ovalunde nove na okufya, molwaashi omunhu umwe, oo a li a wanenena, ina dulika kuKalunga. Opo ovanhu va tya ngaho va mangululwe koulunde nefyo, opa li pa pumbwa omunhu a wanenena a dulike kuKalunga.

4. Omolwashike Jehova ina pitika ashike oludalo laAdam, olo la dulika kuye, li kale nomwenyo fiyo alushe?

⁴ Mbela Jesus okwa li ngoo e na okufya shili, opo tu xupifwe? Omolwashike Jehova ina pitika oludalo laAdam olo la dulika kuye li kale nomwenyo fiyo alushe? Otashi dulika tu diladile kutya, ngeno Jehova okwa ningile ashike ngaho, opo a kandule po oupyakadi. Ashike kuJehova kasha li pauyuki okuninga ngaho. Molwaashi Jehova omuyuki, ka li ta dulu okulipwililikila okuhadulika kwaAdam.

5. Omolwashike hatu dulu okukala noushili kutya Jehova ota ka ninga alushe osho sha yuka?

⁵ Ongahelipi ngeno Jehova ka li a yandja ekuliloyambo, ndele te lipwililikile ouyuki waye mokupitika oludalo laAdam inali wanenena li kale nomwenyo fiyo alushe? Ovanhu otashi dulika va kale va limbililwa, ngeenge Kalunga ota ka ulika ngoo vali ouyuki moinima ikwao. Pashihopaenenwa, otashi dulika ve lipule kutya, mbela ota ka wanifa po ngoo omaudaneko aye? Inatu pumbwa okukala hatu lipula naasho. Omolwashike? Omolwaashi Jehova okwa ninga osho sha yuka, nokuli nonande okuninga ngaho oshe mu pula a yambe po Omona waye. Onghee ohatu dulu okukala noushili kutya ota ka ninga alushe osho sha yuka.

6. Oukwatya umwe ulipi wa li we linyengifa Jehova a tume Omona waye? (1 Johannes 4:​9, 10)

⁶ Nonande ekuliloyambo otali tu kwafele tu ude ko kutya Jehova omuyuki, otali tu kwafele yo tu mone kutya Jehova oku tu hole. (Joh. 3:16; lesha 1 Johannes 4:​9, 10.) Ekuliloyambo ola ulika kutya Jehova ina hala ashike tu ka kale nomwenyo fiyo alushe, ndele okwa hala yo tu kale oshitukulwa shoukwaneumbo waye. Diladila kwaashi: Eshi Adam a nyona ka li vali oshitukulwa shoukwaneumbo waJehova. Noshidjemo, atushe ka twa li oshitukulwa shoukwaneumbo waJehova, eshi twa dalwa. Ashike  omolwekanghameno lekuliloyambo, Jehova okwe tu dimina po omatimba etu, nota ka eta moukwaneumbo waye ovanhu ovo ve na eitavelo muye nohava dulika kuye. Nokuli nopaife ohatu dulu okukala nekwatafano lopofingo naJehova nosho yo ovamwatate novamwameme. Jehova oku tu hole shili! — Rom. 5:​10, 11.

7. Okumona oixuna kwaJesus okwe tu kwafela ngahelipi tu ude ko kutya Jehova oku tu hole shi fike peni?

⁷ Ohatu dulu okuuda ko nawa kutya Jehova oku tu hole shi fike peni, ngeenge otwa diladila kutya ekuliloyambo ole mu pula shi fike peni. Satana okwa ti kutya kape na omupiya waKalunga ta ka kala omudiinini kuye, ngeenge e li moupyakadi. Opo Jehova a ulike kutya Satana omunaipupulu, okwa li a efa Jesus a mone oixuna, ofimbo ina fya. (Job 2:​1-5; 1 Pet. 2:21) Jehova okwa li a mona nghee Jesus ta shekwa, ta dengwa kovakwaita nokuvalelwa komuti womahepeko. Opo nee, okwa li a mona nghee Omonamati waye omuholike ta fi efyo linyanyalifi. (Mat. 27:​28-31, 39) Jehova okwa li ta dulu okukelela oinima aishe oyo iha ningwe. Pashihopaenenwa, eshi ovanhu va li tava ti: “[Kalunga] ne mu xupife ngeenge okwe mu hokwa,” Jehova okwa li ta dulu okuninga ngaho. (Mat. 27:​42, 43) Ashike ngeno Jehova okwa ile mo olunyala, ngeno itapa kala ekuliloyambo noitatu kala tu na eteelelo la sha. Onghee Jehova okwa li a efa Omonamati waye e lididimikile okumona oixuna, fiyo osheshi a fya.

8. Omolwashike tu na oushili kutya Jehova okwa li a uda nai, eshi a mona Omonamati waye ta hepekwa? Shi yelifa. (Tala yo efano.)

⁸ Inatu diladila kutya molwaashi Kalunga omunaenghono adishe, ke na omaliudo. Otwa shitwa oshifeka shaJehova, tu na omaliudo, onghee osha yela kutya naye oku na omaliudo. Ombiibeli oya ti kutya ‘okwa li a uda nai nokwa nyika oluhodi.’ (Eps. 78:​40, 41) Diladila kehokololo laAbraham naIsak. Jehova okwa li a lombwela Abraham a yambe po omona waye ewifa. (Gen. 22:​9-12; Heb. 11:​17-19) Diladila kunghee Abraham a li a nyika oluhodi, eshi a li te lilongekidile oku ka dipaa omona waye. Ngeenge Abraham okwa li a nyika oluhodi, ongahelipi shi na sha naJehova, oo a li a mona nghee Omonamati waye ta hepekwa nokudipawa kovahenakalunga! Tala okavidio ko-jw.org Natu hopaeneneni eitavelo lavo — Abraham — Oshitukulwa 2.

9. Oshike to lihongo mOvaroma 8:​32, 38, 39 kombinga yanghee Jehova e ku hole nosho yo ovaitaveli vakwetu?

⁹ Ekuliloyambo otali tu hongo kutya kape na umwe e tu hole unene e dulife Jehova. (Lesha Ovaroma 8:​32, 38, 39.) Ohatu dulu filufilu okukala noushili kutya Jehova oku tu hole shi dulife eshi tu lihole fye vene. Mbela owa hala oku ka kala nomwenyo fiyo alushe? Jehova okwa halelela unene u ka kale fiyo alushe.  Mbela owa hala okudiminwa po omatimba oye? Jehova okwa halelela oku ku dimina po. Okwa hala atushe tu ulike olupandu laasho e tu ningila, okukala tu na eitavelo muye nokudulika kuye. Ekuliloyambo oli li shili oshali ya denga mbada, oyo tai ulike ohole yaJehova. Mounyuni mupe, ohatu ke lihonga shihapu kombinga yohole yaJehova. — Omuud. 3:11.

OSHO EKULILOYAMBO TALI TU HONGO KOMBINGA YAJESUS

10. (a) Oshike unene sha li sha udifa nai Jesus shi na sha nokudipawa kwaye? (b) Omeenghedi dilipi Jesus a yapulifa edina laJehova? (Tala yo oshimhungu “ Jesus okwa yapulifa edina laJehova mokukala omudiinini.”)

¹⁰ Jesus oku na ko nasha filufilu nanghee ovanhu hava diladila kombinga yaXe. (Joh. 14:31) Eshi Jesus a li a tokolwa kutya ota sheke Kalunga noku li omukolokoshi, osha li she mu udifa nai, molwaashi osha li tashi dulu okunyona po edina liwa laXe. Nomolwaasho a ilikana a ti: “Tate, ngeenge otashi dulika, eholo eli nali pitilile nge po.” (Mat. 26:39) Molwaashi Jesus okwa kala omudiinini kuJehova fiyo omefyo, okwa li a yapulifa filufilu edina laXe.

11. Jesus okwa ulika ngahelipi kutya oku hole ovanhu? (Johannes 13:1)

¹¹ Ekuliloyambo otali tu hongo kutya Jesus oku na ko nasha novanhu, unene tuu ovahongwa vaye. (Omayel. 8:31; lesha Johannes 13:1.) Pashihopaenenwa, Jesus okwa li e shii kutya oinima imwe oyo ta ka ninga kombada yedu, otai ka kala idjuu, ngaashi okufya efyo linyanyalifa. Ashike Jesus okwa li a ninga oinima aishe oyo, hamolwaashi ashike a tumwa kuJehova, ndele okwa li e hole unene ovanhu. Jesus okwa ulika kutya oku hole ovanhu moku va udifila, oku va honga, nomoku va kwafela. Nokuli nomefiku olo a fya, okwa li a kosha eemhadi dovayapostoli vaye, e va honga, e va twa omukumo noku va hekeleka. (Joh. 13:​12-15) Opo nee, eshi a  li komuti womahepeko, okwa li a lombwela omukolokoshi, oo a li a valelwa pamwe naye, kutya ota ka kala mOparadisa, nokwa unganeka oo a li ta ka fila oshisho ina. (Luk. 23:​42, 43; Joh. 19:​26, 27) Jesus okwa ulika kutya oku hole ovanhu neenghono, hamefyo laye ashike, ndele nomonghedi oyo a li a ungaunga novanhu, eshi a li kombada yedu.

12. Omeityo lilipi Jesus ta twikile oku tu ningila oinima ihapu?

¹² Oshoshili kutya Jesus okwa fya “lumwe aluke,” ashike natango ote tu ningile oinima ihapu. (Rom. 6:10) Ngahelipi mbela? Ota twikile okulonga, opo e tu pe oinima ihapu iwa, oyo hatu mono omolwekuliloyambo. Diladila kwaasho ta ningi paife. Oku li Ohamba yetu, Omupristeri Munene nosho yo omutwe weongalo. (1 Kor. 15:25; Ef. 5:23; Heb. 2:17) Oye ta wilike oilonga yokwoongela ovavaekwa nosho yo ongudu inene, oilonga oyo tai ka pwa ofimbo oudjuu munene inau xula. b (Mat. 25:32; Mark. 13:27) Natango oha shilipaleke kutya ovapiya vaye ovadiinini ova palulwa nawa pamhepo, momafiku aa axuuninwa. (Mat. 24:45) Momukokomoko womido eyovi daye dokupangela, ota ka twikila noku tu kwafela. Eshi Jehova e tu pa Omona waye, ine mu tu pa ashike e tu file, ndele oku tu ningile oinima ihapu.

TWIKILA OKULIHONGA OINIMA IPE

13. Ongahelipi okudilonga taku tu kwafele tu twikile okulihonga kombinga yohole oyo Kalunga naKristus ve tu ulikila?

¹³ Oto dulu okutwikila okulihonga kombinga yohole oyo Jehova Kalunga nosho yo Kristus Jesus ve tu ulikila, ngeenge owa twikile okudilonga kombinga yoinima oyo ve tu ningila. Neudo, pefimbo lEdimbuluko, oto dulu okulesha Evaengeli limwe, ile e dulife po. Ino kendabala okulesha ouyelele muhapu pefimbo limwe. Ponhele yaasho, lesha to ende kanini nokukonga omatomheno a wedwa po, kutya omolwashike tu na okukala tu hole Jehova naJesus. Lombwela yo vamwe kombinga yaasho we lihonga.

14. Metwokumwe nEpsalme 119:​97, ongahelipi okuninga omapekapeko taku tu kwafele tu twikile okulihonga kombinga yekuliloyambo nosho yo omahongo amwe vali? (Tala yo efano.)

¹⁴ Ngeenge owa kala moshili omido dihapu, otashi dulika u lipule ngeenge ope na ngoo vali oinima imwe ipe, oyo to dulu okulihonga kombinga youyuki waKalunga, ohole yaye nosho  yo ekuliloyambo. Oushili oyoo kutya, ope na alushe oinima ipe oyo hatu lihongo kombinga yoinima oyo. Onghee, oshike to dulu okuninga po? Lesha nokukonakona ouyelele utunhula moishangomwa yetu. Ngeenge owa lesha oshinima shonhumba mOmbiibeli, ndele ku shi udite ko, ninga omapekapeko. Opo nee, momukokomoko wefiku, dilonga kwaasho wa lesha nokutala kutya otashi ku hongo shike kombinga yaJehova, Omona waye nosho yo ohole yavo yoku ku hola. — Lesha Epsalme 119:97.

15. Omolwashike twa pumbwa okutwikila okulihonga oinima ipe mOmbiibeli?

¹⁵ Ino teka omukumo, ngeenge ino mona oshinima shipe, ile shitunhula, eshi to lesha, ile eshi to konakona. Litala ko wa fa omunhu oo ta kendabala okukonga oshingoli. Luhapu ohashi pula elididimiko, opo omunhu a mone oshingoli osho ta kongo. Ashike oha twikile noku shi konga, molwaashi oshingoli keshe, nokuli nonande oshinini, oshi na ongushu kuye. Naasho shi na ongushu shi dulife oshingoli, ongeenge to lihongo oshinima shipe mOmbiibeli. (Eps. 119:127; Omayel. 8:10) Onghee kala omulididimiki nokutwikila okulesha Ombiibeli. — Eps. 1:2.

16. Ongahelipi hatu dulu okuhopaenena Jehova naJesus?

¹⁶ Eshi to konakona, konga eenghedi omo to dulu okutula moilonga osho we lihonga. Pashihopaenenwa, hopaenena ouyuki waJehova mokuungaunga navamwe uhe na okatongo. Hopaenena Jesus, oo a li e hole Xe nosho yo vamwe, mokukala wa halelela okulonga ehalo laJehova nokukwafela vamwe, nokuli nonande omafimbo amwe ohashi kala shidjuu. Natango, hopaenena Jesus mokuudifila vamwe, opo navo va kale ve na omhito yokutambula ko oshali yaJehova i na ondilo.

17. Oshike hatu ka kundafana moshitukulwa tashi shikula ko?

¹⁷ Ngeenge otwa twikile okulihonga kombinga yekuliloyambo, ohatu ka kala tu hole neenghono Jehova naJesus. Navo otava ka kala ve tu hole, molwaashi otu va hole. (Joh. 14:21; Jak. 4:8) Onghee natu longife omafiloshisho oo Jehova e tu pa, opo tu twikile okulihonga kombinga yekuliloyambo. Moshitukulwa tashi shikula ko, ohatu ka kundafana eenghedi dimwe omo hatu dulu okumona ouwa mekuliloyambo, nanghee hatu dulu okuulikila Jehova olupandu omolwohole yaye.