1. Ovanhu vahapu kunena ohava yandje elitulemo kushike?

 MBELA owa didilika ngoo kutya ovanhu vahapu kunena ohava yandje elitulemo lihapu kuvo vene? Pashihopaenenwa, vamwe ohava longifa omakwatafano opaintaneta, opo ve liulike vo vene nosho yo oinima oyo tava ningi. Ashike, ovanhu vanini kunena ohava yandje efimano kuJehova Kalunga. Moshitukulwa eshi, ohatu ka kundafana kutya osha hala okutya shike okuyandja efimano kuJehova nosho yo osho shi na oku tu linyengifa, opo tu ninge ngaho. Ohatu ke lihonga yo nghee hatu dulu okufimaneka Kalunga nanghee ta ka yapulifa edina laye monakwiiwa i li popepi.

OSHA HALA OKUTYA SHIKE OKUFIMANEKA JEHOVA?

2. Jehova okwa li a holola ngahelipi eenghono daye kOmhunda yaSinai? (Tala yo efano kombada yoshifo.)

² Efimano oshike? MOmbiibeli, oshitya “efimano” otashi dulu okuyukifwa kukeshe osho tashi ningifa omunhu a kale a tumbala. Jehova okwa li a ulika eenghono daye diva konima eshi a li a mangulula oshiwana shaIsrael moupika waEgipiti. Diladila kwaashi: Ovaisrael omamiliyona ova li va ongala pefina lOmhunda yaSinai, opo va shakene naKalunga kavo. Oshilemo shilaula osha li sha uvika omhunda. Opo nee, okwa li kwa ningwa ekakamo ledu linene, nokwa li yo ku na oushelu, omingungumo nosho yo ewi lenghuma li li mokule. (Ex. 19:​16-18; 24:17; Eps. 68:8) Diladila kunghee Ovaisrael va li va kumwa, eshi va mona Jehova a holola eenghono daye.

3. Osha hala okutya shike okufimaneka Jehova?

³ Ongahelipi shi na sha novanhu? Mbela ohatu dulu ngoo okufimaneka Jehova? Heeno, ohatu dulu. Onghedi imwe hatu dulu okufimaneka Jehova, omokulombwela vamwe kombinga yeenghono daye nosho yo omaukwatya aye mawa. Ohatu fimaneke yo Kalunga, ngeenge hatu mu pandula omolwoinima  oyo twa pondola muyo kekwafo laye. (Jes. 26:12) Ohamba David oya li oshihopaenenwa sha denga mbada shaavo va li va fimaneka Jehova. Eshi David a li ta ilikana meongalo lOvaisrael, okwa lombwela Kalunga a ti: “Jehova, ounene, eenghono, ewapalo, etumbalo nefimano oyoye, molwaashi oinima aishe, oyo i li meulu naayo i li kombada yedu, oyoye.” Konima eshi a mana okwiilikana, “eongalo alishe ola tanga Jehova.” — 1 Omaf. 29:​11, 20.

4. Jesus okwa li a fimanekifa ngahelipi Jehova?

⁴ Jesus okwa li a fimanekifa Xe eshi a li kombada yedu, mokulombwela ovanhu kutya oye a li e mu pa eenghono dokulonga oikumwifilonga. (Mark. 5:​18-20) Jesus okwa li yo a fimanekifa Jehova okupitila monghedi omo a li ha popi kombinga yaYe nomonghedi omo a li ha ungaunga navamwe. Pomhito imwe, Jesus okwa li ta hongo moshinagoga. Umwe womwaavo va li tava pwilikine, okwa li omukainhu oo a li ta hepekwa kondemoni oule womido 18. Ondemoni oyo oya li ye mu ningifa a kale ha ende a petama, noka li ha dulu okuyukilila nandenande. Osho kasha li tuu shi ehameka! Olukeno laJesus ola li le mu linyengifa a kwafele omukainhu oo, nokwe mu lombwela nonghenda a ti: “Owa velulwa koudu woye.” Opo nee, okwe mu tenheka omake, nombuda yomukainhu oya yukilila diva, nokwa “hovela okutanga Kalunga,” molwaashi okwa li vali e na oukolele. (Luk. 13:​10-13) Ngaashi omukainhu oo, nafye otu na omatomheno okutanga Jehova.

OSHIKE HASHI TU LINYENGIFA TU TANGE JEHOVA?

5. Omolwashike tu na okufimaneka Jehova?

⁵ Ohatu tange Jehova, molwaashi otwe mu fimaneka neenghono. Ohatu mu fimaneke omolwomatomheno mahapu. Jehova omunaenghono adishe; eenghono daye inadi ngabekwa. (Eps. 96:​4-7) Ounongo waye wa denga mbada ou liwetikile filufilu moinima oyo a shita. Oku li Odjo yomwenyo, nohe tu pe keshe osho twa pumbwa, opo tu kale nomwenyo. (Eh. 4:11) Jehova omudiinini. (Eh. 15:4) Oha pondola mukeshe osho ta ningi, noha wanifa po alushe omaudaneko aye. (Jos. 23:14) Nomolwaasho omuprofeti Jeremia a popya kombinga yaJehova a ti: “Ove u neshushu, osheshi movanongondunge aveshe vomoiwana nomomauhamba avo kamu na nande umwe e ku fa.” (Jer. 10:​6, 7, KB-13) Otu na omatomheno mahapu kutya omolwashike twa fimaneka Tate yetu womeulu. Inatu fimaneka ashike Jehova, ndele otu mu hole yo.

6. Omolwashike tu hole Jehova?

⁶ Ohatu tange Jehova, molwaashi otu mu hole neenghono. Otu mu hole, molwaashi oku na omaukwatya mahapu mawa. Omunanghenda nomunalukeno. (Eps. 103:13; Jes. 49:15) Ngeenge twa udifwa nai, naye oha kala e udite nai. (Sak. 2:8) Okwe shi ningifa shipu kufye okweehena popepi naye, tu li ookaume kaye. (Eps. 25:14; Oil. 17:27) Jehova omulininipiki; “oha nyongama, opo a tale eulu nosho yo edu, ta fikameke omudinwa mondwi.” (Eps. 113:​6, 7) Omolwomatomheno aeshe oo, otwa hala okutanga Kalunga ketu. — Eps. 86:12.

7. Otu na omhito ye likalekelwa yokuninga shike?

⁷ Ohatu tange Jehova, molwaashi otwa hala vamwe ve mu shiive. Vahapu kave shii oshili kombinga yaJehova. Omolwashike? Omolwaashi Satana okwa twikifa omadiladilo avo, moku va lombwela oipupulu kombinga yaJehova. (2 Kor. 4:4) Satana okwa ningifa ovanhu va itavele kutya, Jehova oha kala alushe a handuka, ehe na ko nasha nafye noha  etifa okumona oixuna mounyuni. Ashike otu shii oshili kombinga yaKalunga ketu. Otu na omhito yokulombwela vamwe kombinga yaKalunga noku va kwafela ve mu tange yo. (Jes. 43:10) Epsalme 96 otali popi kombinga yokutanga Jehova. Eshi hatu kundafana eendjovo dimwe domepsalme olo, diladila keenghedi omo to dulu okutanga Jehova.

ONGAHELIPI HATU DULU OKUTANGA JEHOVA?

8. Omonghedi imwe ilipi hatu dulu okutanga Jehova? (Epsalme 96:​1-3)

⁸ Lesha Epsalme 96:​1-3. Ohatu dulu okutanga Jehova okupitila mwaasho hatu popi kombinga yaye. Meevelishe odo, oshiwana shaJehova otashi shivwa shi ‘imbile Jehova,’ shi ‘tange edina laye,’ shi ‘udife exupifo laye’ noshi ‘hepaulule oshinge shaye mokati koiwana.’ Ohatu dulu okutanga Tate yetu womeulu meenghedi adishe odo. Ovajuda ovadiinini nosho yo Ovakriste vopefimbo lovayapostoli, kava li va ongaonga okulombwela vamwe kombinga yoinima iwa oyo Jehova e va ningila nokupopila edina laye. (Dan. 3:​16-18; Oil. 4:29) Ongahelipi hatu dulu okuninga sha faafana?

9-10. Oshike hatu lihongo moshimoniwa shaAngelena? (Tala yo efano.)

⁹ Natu ka taleni koshimoniwa shaAngelena, a omumwameme oo ha di moUnited States. Okwa li a popila nouladi edina laJehova mokaambani omo a li ha longo. Molwaashi Angelena okwa hangika opo a tameke okulonga mokaambani oyo, okwa li a shivwa pomutumba opo hapa kala ovo vape mokaambani, opo va dule okulombwela ovanailonga pamwe navo shi na sha nonakudiwa yavo. Angelena okwa li a longekida omafano, opo a ka ulike nghee ha hafele onghalamwenyo e li Ondombwedi yaJehova. Ashike ofimbo olufo laye lokupopya inali fika, umwe womovanailonga vakwao okwe lipopya ye mwene kutya okwa kulila moukwaneumbo wEendombwedi daJehova. Okwa hovela okupopila mowii eitavelo letu. Angelena okwa ti: “Onda li nda tila. Ashike onde lipopila handi ti: ‘Mbela ohandi ka efa umwe a popye oipupulu kombinga yaJehova? Ile ohandi ka popila edina laye?’”

¹⁰ Konima eshi omunailonga pamwe naye a mana okupopya, Angelena okwa ilikana diva momutima. Opo nee, okwa lombwela omunailonga  pamwe naye nonghenda a ti: “Naame ondi na onakudiwa ya fa yoye. Onda kulila moukwaneumbo wEendombwedi daJehova, fiyo okunena ondi li umwe womuvo.” Nonande Angelena okwa li a tila, okwa li a ngungumana. Okwa li a ulikila ovanailonga pamwe naye omafano aye nosho yo ookaume kaye, eshi tava longele Jehova va hafa, nokwa li a dula oku va yelifila nefimaneko eitavelo laye. (1 Pet. 3:15) Oshidjemo osha li shike? Konima eshi Angelena a mana okupopya, omulumenhu oo okwa li a lundulula etaleko laye. Okwa li nokuli a popya kombinga yoimoniwa imwe iwa oyo a li a mona eshi a li omunyasha, eshi a li ha endafana nEendombwedi daJehova. Angelena okwa ti: “Jehova okwa wana okupopilwa. Oshi li oufembanghenda okupopila edina laye.” Nafye otu na oufembanghenda wokuhambelela nokutanga Jehova, nokuli nonande vamwe inave mu fimaneka.

11. Ongahelipi Ovakriste vashili va kala nokushikula efinamhango olo tali hangwa mEpsalme 96:8?

¹¹ Lesha Epsalme 96:8. Ohatu dulu okufimaneka Jehova hatu longifa oiniwe yetu. Ovalongeli vaJehova ova kala noku mu fimaneka monghedi oyo. (Omayel. 3:9) Pashihopaenenwa, Ovaisrael ova li va yandja omayambidido oo a kwafela mokutunga otembeli nosho yo oku i kaleka monghalo iwa. (2 Eeh. 12:​4, 5; 1 Omaf. 29:​3-9) Ovahongwa vamwe vaKristus ova li have mu yambidida nosho yo ovayapostoli vaye “tava longifa oiniwe yavo.” (Luk. 8:​1-3) Ovakriste vopefimbo lovayapostoli ova li yo va yandja oikwafa kOvakriste vakwao. (Oil. 11:​27-29) Kunena, nafye ohatu dulu okufimaneka Jehova mokuyandja omayambidido nehalo liwa.

12. Ongahelipi hatu dulu okutanga Jehova nomayambidido etu? (Tala yo efano.)

¹² Natu ka taleni koshimoniwa shimwe osho tashi ulike nghee hatu tange Jehova nomayambidido etu. Mo 2020, moZimbabwe omwa li mu na oshikukuta osho sha li sha kwata efimbo lile. Ovanhu vahapu ova li ve li pokufya, molwaashi kava li ve na oikulya, mwa kwatelwa omumwameme Prisca. Nonande okwa li ku na oshikukuta, Prisca okwa twikila nonghedindjikilile yaye yokuudifa mEtitatu nEtitano, nokuli nopefimbo lokulima. Ovashiinda shaye ova li have mu sheke, ngeenge a li ta i moukalele, ponhele yokuya mepya a ka lime. Ova li have mu ula tava ti: “Oto ka fya kondjala.” Prisca okwa li he va nyamukula nouladi ta ti: “Jehova ke na efiku a  efe ovapiya vaye.” Omafiku hamale, okwa li a pewa oikwafa kehangano letu. Ehangano ola dula okukwafela Prisca nosho yo vamwe omolwomayambidido oo hatu yandje. Ovashiinda shaPrisca ova li va kumwa nova li ve mu lombwela va ti: “Kalunga ke na efiku e ku efele, onghee otwa hala okulihonga kombinga yaye.” Vaheyali vomovashiinda shaye ova li va hovela okukala hava kala pokwoongala.

13. Ohatu tange ngahelipi Jehova okupitila melihumbato letu? (Epsalme 96:9)

¹³ Lesha Epsalme 96:9. Ohatu dulu okutanga Jehova okupitila melihumbato letu. Ovapristeri ovo va li hava longele Jehova motembeli ova li ve na okukala va koshoka palutu. (Ex. 40:​30-32) Nonande otwa pumbwa okukala twa koshoka palutu, osha fimana okukala tu na elihumbato la koshoka. (Eps. 24:​3, 4; 1 Pet. 1:​15, 16) Ombiibeli oya ti kutya natu lidule “omunhu mukulu,” ndele hatu djala “omunhu mupe.” Osho osha hala okutya ohatu henuka omadiladilo nelihumbato lii, olo ihali hafifa Jehova, nohatu diladila nokukatuka monghedi oyo tai ulike kutya ohatu hopaenene Jehova nomaukwatya aye mawa. (Kol. 3:​9, 10) Nokuli noohandimwe ovo hava longo oilonga ii otava dulu okulundulula nokudjala omunhu mupe kekwafo laJehova.

14. Oshike hatu lihongo moshimoniwa shaJack? (Tala yo efano.)

¹⁴ Natu ka taleni koshimoniwa shaJack, omulumenhu oo a li ha longo oukolokoshi nokwa nyika oshiponga, nokwa li a lukwa oshilukadina Ondemoni. Omolwoilonga inyanyalifi oyo a li a longa, okwa li a tokolelwa efyo. Ashike ofimbo a li a teelela oku ka dipawa, okwa li a dimina okukonakona Ombiibeli nomumwatate oo a li ha talele po odolongo omo a li e li. Nokuli nonande Jack okwa longa oinima ihapu ii, okwa li e lidula omunhu mukulu, nomokweendela ko kwefimbo okwa ka ninginifwa. Molwaashi Jack okwa li a lundulula elihumbato laye filufilu, mefiku omo a li ta ka dipawa vamwe vomovakeleli vodolongo ova li tava lili eshi tave mu lekele. Omupolifi oo a li ha longo modolongo okwa ti: “Jack okwa li umwe womovanadolongo ovo va li va nyika oshiponga. Ashike paife ito mu pewa luvali.” Oshivike osho sha shikula ko konima eshi Jack a dipawa, ovamwatate, ovo va li va alukila kodolongo va ninge okwoongala, ova li va shakena nomunadolongo umwe oo a li  pokwoongala oshikando shotete. Oshike sha li she mu linyengifa a ongale? Okwa li a kuminwa elihumbato laJack, nokwa li a hala okushiiva kutya oshike e na okuninga, opo a longele Jehova. Osha yela kutya elihumbato letu otali dulu okufimanekifa Tate yetu womeulu. — 1 Pet. 2:12.

JEHOVA OTA KA TUMBALEKIFA NGAHELIPI EDINA LAYE MONAKWIIWA I LI POPEPI?

15. Jehova ota ka tumbalekifa ngahelipi edina laye monakwiiwa i li popepi? (Epsalme 96:​10-13)

¹⁵ Lesha Epsalme 96:​10-13. Eevelishe daxuuninwa dEpsalme 96, oda popya Jehova e li Ohamba noha tokola pauyuki. Jehova ota ka tumbalekifa ngahelipi edina laye monakwiiwa i li popepi? Ote ke shi ninga okupitila mokutokola. Mafiku ota ka xulifa po Babilon Shinene, osho sha nyateka edina laye liyapuki. (Eh. 17:​5, 16; 19:​1, 2) Vamwe ovo tava ka kala po eshi Babilon Shinene tashi ka hanaunwa po otashi dulika ve ke tu waimine melongelokalunga lashili. Xuuninwa, puArmagedon, Jehova ota ka xulifa po ounyuni aushe waSatana, ta ka hanauna po ovo ve mu tonde nohava popi oipupulu kombinga yaye, nota ka xupifa aveshe ovo ve mu hole, hava dulika kuye nohave mu tumbalekifa. (Mark. 8:38; 2 Tes. 1:​6-10) Konima yeyeleko laxuuninwa olo tali ka shikula Epangelo lOmido Eyovi laKristus, Jehova ota ka yapulifa filufilu edina laye. (Eh. 20:​7-10) Pefimbo opo, “edu otali ka yadifwa eshiivo lokushiiva efimano laJehova ngaashi omeva a tuvikila efuta.” — Hab. 2:14.

16. Oshike wa tokola toko okuninga? (Tala yo efano.)

¹⁶ Itashi ka kala tuu shitunhula, eshi keshe umwe ta ka fimanekifa edina laJehova! Ofimbo twa teelela, natu kale hatu popi kombinga yaKalunga ketu, nokukatuka monghedi oyo tai mu tumbalekifa. Opo tu yandje elitulemo koshinakuwanifwa osho sha fimana, Olutuwiliki ola hoolola Epsalme 96:8 li ninge omushangwa wetu womudo womo 2025: “Fimanekeni Jehova omolwedina laye.”