OSHITUKULWA SHOKUKONAKONWA 3
EIMBILO 35 ‘Shiiveni oinima oyo ya fimanenena’
Ninga omatokolo oo taa hafifa Jehova
“Okutila Jehova oko efina lounongo, nokushiiva Omuyapuki elela oko eudeko.” — OMAYEL. 9:10.
ENENEDILADILO
Oto ke lihonga nghee to dulu okulongifa eshiivo, eudeko nosho yo eendunge dokuyoolola, opo u ninge omatokolo e li pandunge.
1. Eshongo lilipi atushe twa taalela?
EFIKU KESHE, otwa pumbwa okuninga omatokolo. Amwe omapu okuninga, ngaashi kutya oshike hatu ka lya pefimbo loshuumbululwa, ile kutya ohatu ka nangala efimbo peni. Ofimbo amwe, omadjuu okuninga. Otashi dulika a kume oukolele wetu, ehafo letu, ovapambele vetu nosho yo onghedi yetu yokulongela Jehova. Otwa hala okuninga omatokolo oo tae tu etele ouwa nosho yo ovapambele vetu. Naasho sha fimanenena oshosho kutya, otwa hala okuninga omatokolo oo taa ka hafifa Jehova. — Rom. 12:1, 2.
2. Oshike u na okuninga, opo u ninge omatokolo e li pandunge?
2 Oto ka ninga etokolo lopandunge, ngeenge (1) owa kongo ouyelele aushe oo wa kwatelwa mo, (2) owa diladila kutya Jehova okwa tala ko ngahelipi oshinima osho (3) nowa hoolola noukeka osho to ka ninga po. Moshitukulwa eshi, ohatu ka kundafana oinima oyo itatu; ohatu ka mona yo nghee hatu dulu okudeula eendunge detu dokuyoolola. — Omayel. 2:11.
KONGA OUYELELE AUSHE OO WA KWATELWA MO
3. Efaneko lilipi tali tu kwafele tu ude ko kutya omolwashike twa pumbwa okukonga ouyelele oo wa kwatelwa mo, ofimbo inatu ninga etokolo?
3 Tete owa pumbwa okumona ouyelele oo wa kwatelwa mo, opo u ninge etokolo li li mondjila. Omolwashike osho sha fimana? Natu shi faneke ngaha, natu tye nee ngeno omunaudu okwa ya kundokotola, molwaashi oku na ouyehame wa kwata moiti. Mbela ndokotola ota ka pa omunaudu omiti, ofimbo ine mu konakona, ile ine mu pula omapulo? Hasho nandenande. Naave oto ka ninga omatokolo e li mondjila, ngeenge tete owa diladila noukeka kombinga youyelele aushe oo wa kwatelwa mo. Ongahelipi to dulu okuninga ngaho?
4. Metwokumwe nOmayeletumbulo 18:13, oshike u na okuninga, opo u mone ouyelele aushe oo wa kwatelwa mo? (Tala yo efano.)
4 Oto dulu okumona ouyelele oo wa kwatelwa mo, ngeenge owa pula omapulo. Natu tye nee ngeno owa shivwa kokavilo. Mbela oto ka ya ko? Ngeenge oo e ka unganeka ku mu shii nawa, ile ku shii omalongekido oo a kwatelwa mo, oto ka pumbwa oku mu pula omapulo, ngaashi: “Openi nonaini okavilo taka ningwa? Otapa ka kala ovanhu vangapi? Olyelye te ke ka wilika? Oolyelye tava ka kala po? Oshike tashi ka ningwa po? Mbela otapa ka nuwa oikunwa yoalkoholi?” Omanyamukulo omapulo oo, otae ke ku kwafela u ninge etokolo lopandunge. — Lesha Omayeletumbulo 18:13.
Mona ouyelele aushe mokupula omapulo (Tala okatendo 4) a
5. Oshike u na okuninga po, konima eshi wa mona ouyelele oo wa kwatelwa mo?
5 Konima eshi wa mona ouyelele oo wa kwatelwa mo, diladila noukeka kombinga yonghalo oyo. Pashihopaenenwa, ongahelipi ngeenge owa shiiva kutya ovanhu vamwe, ovo ihava dulika komifikamhango daJehova, navo opo tava ka kala pokavilo opo, ile kutya otapa ka nuwa oikunwa yoalkoholi noita pa ka kala omunhu oo ta ka shilipaleka kutya ovanhu itava nu sha pitilila? Mbela oto diladila kutya pokavilo oko otashi dulika paha ka kale pe na elandulafano? (1 Pet. 4:3) Shikwao vali, oshike u na okuninga po, ngeenge okavilo otaka i moshipala okwoongala, ile oukalele woye? Ngeenge owa mono ouyelele aushe oo wa kwatelwa mo, otashi ka kala shipu okuninga etokolo li li mondjila. Ashike ope na natango oshinima shimwe osho u na okuninga. Ove ou shii nghee u uditile oshinima osho; ndele lipula kutya ‘Mbela Jehova oku shi udile ngahelipi?’ — Omayel. 2:6.
TALA KUTYA JEHOVA OKWA TALA KO NGAHELIPI OSHINIMA OSHO
6. She likolelela kuJakob 1:5, omolwashike twa pumbwa okwiindila Jehova e tu kwafele?
6 Pula Jehova e ku kwafele u ude ko nghee a tala ko oshinima osho. Jehova okwe tu udanekela oku tu pa ounongo, oo tau ke tu kwafela tu mone ngeenge etokolo lonhumba otali ke mu hafifa. Oha yandje ounongo wa tya ngaho “nehalo liwa kwaaveshe nopehe na okungongota.” — Lesha Jakob 1:5.
7. Ongahelipi to dulu okumona etaleko laJehova moshinima shonhumba? Shi faneka.
7 Ngeenge owa ilikana kuJehova e ku kwafele, yandja elitulemo kunghee te ku nyamukula. Natu shi faneke ngaha: Ngeenge owa kana konhele oko to i, otashi dulika u pule umwe womoshitukulwa e ku pukulule. Ndele mbela oto ka ya ofimbo ine ku kwafela? Hasho nandenande. Owa pumbwa okupwilikina kuye noukeka, eshi te ku pukulula. Sha faafana, konima eshi wa pula Jehova ounongo, kendabala okumona nghee e ku nyamukula, mokulihonga kutya eemhango nomafinamhango Ombiibeli elipi taa wapalele onghalo yoye. Pashihopaenenwa, eshi to tokola ngeenge oto i kokavilo oko ka popiwa metetekelo, oto dulu okutala kutya Ombiibeli otai ti ngahelipi shi na sha noivilo ihe na elandulafano, eendafano lii nosho yo kutya owa pumbwa okupitifa tete komesho Ouhamba, ponhele yoinima yoye yopaumwene. — Mat. 6:33; Rom. 13:13; 1 Kor. 15:33.
8. Oshike u na okuninga po, ngeenge owa pumbwa ekwafo, opo u mone ouyelele oo to kongo? (Tala yo efano.)
8 Natango, omafimbo amwe otashi dulika wa pumbwa ekwafo, opo u mone ouyelele oo to kongo. Otashi dulika u pewe omayele komumwatate, ile komumwameme a pyokoka. Ashike oto ka mona yo ouwa, ngeenge owa ningi omapekapeko kwoove mwene. Ope na ouyelele muhapu oo tau hangwa moilongifo yetu yokukonakona, ngaashi Elongifwambo lokukonga Omauyelele mOishangomwa yEendombwedi daJehova nosho yo embo Omishangwa odo tadi tu kwafele tu longele Jehova. Dimbuluka kutya elalakano loye okuninga etokolo olo tali ka hafifa Jehova.
Tala kutya Jehova okwe shi tala ko ngahelipi (Tala okatendo 8) b
9. Ongahelipi hatu dulu okukala noushili kutya etokolo letu otali ka hafifa Jehova? (Ovaefeso 5:17)
9 Ongahelipi hatu dulu okukala noushili kutya etokolo letu otali ka hafifa Jehova? Tete, otwa pumbwa oku mu shiiva nawa. Ombiibeli oya ti kutya ‘okushiiva Omuyapuki elela oko eudeko.’ (Omayel. 9:10) Eudeko lashili ohali di mokushiiva omaukwatya aJehova, elalakano laye nosho yo osho e hole, ile e tonde. Lipula kutya, ‘She likolelela kwaasho ndi shii kombinga yaJehova, etokolo lilipi handi dulu okuninga tali ke mu hafifa?’ — Lesha Ovaefeso 5:17.
10. Omolwashike omafinamhango Ombiibeli a fimana neenghono e dule omifyuululwakalo?
10 Opo tu hafife Jehova, omafimbo amwe otu na okuninga etokolo olo tali udifa nai vamwe. Pashihopaenenwa, ovadali vamwe otashi dulika va fininike okamonakadona kavo ka hombolwe komulumenhu oo a punapala, ile oo ta dulu okuyandja oyoonda oyo tava pula, nokuli nonande ke na ekwatafano la kola naJehova. Oshoshili kutya ova hala okamonakadona kavo ka filwe oshisho nawa painiwe, ndele mbela olyelye te ke ka kwafela ka kale ke na ekwatafano la kola naJehova? Jehova okwa tala ko ngahelipi oshinima osho? Enyamukulo ohatu li hange muMateus 6:33. Movelishe oyo, Ovakriste otava ladipikwa va ‘konge tete Ouhamba.’ Nonande otwa fimaneka ovadali vetu nosho yo ovanhu vomomidingonoko detu, osho sha fimanenena kufye okuninga omatokolo oo taa hafifa Jehova.
HOOLOLA NOUKEKA OSHO TO KA NINGA PO
11. Oukwatya ulipi wa popiwa mOvafilippi 1:9, 10 tau ke ku kwafela u diladile noukeka osho to ka ninga po?
11 Ngeenge owa mono kutya omafinamhango Ombiibeli elipi a kwatelwa mo metokolo loye, owa pumbwa okudiladila noukeka osho to ka ninga po. (Lesha Ovafilippi 1:9, 10.) Eendunge dokuyoolola otadi ke ku kwafela u diladile koilanduliko i na sha netokolo loye. Omafimbo amwe, oshipu okuninga etokolo nopehe na okwoongaonga. Ashike amwe ohaa pula efimbo okuningwa. Eendunge dokuyoolola otadi ke ku kwafela u ninge omatokolo e li mondjila, nokuli nomeenghalo odo da kitakana.
12-13. Ongahelipi eendunge dokuyoolola tadi ku kwafele u ninge etokolo lopandunge li na sha noilonga yokulikongela omboloto?
12 Diladila konghalo tai shikula. Natu tye nee ngeno oto kongo oilonga, opo u yambidide oukwaneumbo woye. Ope na eemhito dopavali doilonga. Owa diladila kouyelele aushe oo wa kwatelwa mo, ngaashi kutya oilonga oyoludi lilipi, otai ka hovela nokudimbuka pongapi, oto ka longa omafiku angapi moshivike nosho tuu. Oilonga aishe oyo yopavali oi li metwokumwe nomafinamhango Ombiibeli. Otashi dulika wa hokwa oshilonga shimwe, molwaashi u hole osho hashi longwa, ile molwaashi hashi futu nawa shi dule shikwao. Ofimbo ino ninga etokolo olo, owa pumbwa vali okudiladila koinima imwe.
13 Pashihopaenenwa, mbela oilonga oyo otai ke ku imba okuya kokwoongala? Mbela oilonga oyo otai ke ku imba u mone efimbo, opo u kwafele oukwaneumbo woye pamaliudo nosho yo pamhepo? Ngeenge owe lipula omapulo a tya ngaho, otashi ke ku kwafela u pitife komesho “oinima oyo ya fimanenena,” ngaashi okulongela Jehova nosho yo okufila oshisho oukwaneumbo woye, ponhele yokulikongela omaliko. Ngeenge owa ningi ngaho, oto ka dula okuninga etokolo olo Jehova ta ka nangeka noupuna.
14. Ongahelipi eendunge dokuyoolola nosho yo ohole tai ke tu kwafela tu henuke okupundukifa vamwe?
14 Eendunge dokuyoolola otadi ke tu kwafela yo tu diladile kunghee etokolo letu tali ka kuma vamwe, opo tu henuke oku ‘va pundukifa.’ (Fil. 1:10) Osho osha fimana, ngeenge hatu ningi omatokolo oinima yopaumwene, ngaashi okudjala nokuliwapeka. Pashihopaenenwa, otashi dulika tu hole okudjala nokuliwapeka monghedi yonhumba. Ndele mbela ongahelipi ngeenge onghedi yetu yokudjala nokuliwapeka otai pundukifa ovamwatate novamwameme, ile ovanhu momudingonoko? Eendunge dokuyoolola otadi ke tu kwafela tu fimaneke omaliudo avo. Ohole otai ke tu linyengifa tu ‘lalakanene ouwa wavo’ nokukala tu na ondjele. (1 Kor. 10:23, 24, 32; 1 Tim. 2:9, 10) Opo nee, ohatu ka ninga etokolo olo tali ulike kutya otu hole notwa fimaneka vamwe.
15. Oshike u na okudiladila ofimbo ino ninga etokolo la kwata moiti?
15 Ngeenge oto ningi etokolo la kwata moiti, diladila kwaasho to ka pumbwa okuninga, opo u li tule moilonga. Jesus okwe tu honga tu kale ‘hatu valula tu tale ngeenge otu na oitungifo ya wana.’ (Luk. 14:28) Onghee diladila kwaashishe osho sha kwatelwa mo, ngaashi efimbo, oiniwe nosho yo eenghendabala odo wa pumbwa okuninga. Peemhito dimwe, oto dulu okukundafana noilyo youkwaneumbo woye kombinga yaasho keshe umwe ta ka ninga, opo a yambidide etokolo loye. Omolwashike sha fimana okuninga eemhangela da tya ngaho? Otashi dulika shi ke ku kwafele u didilike omalunduluko amwe oo wa pumbwa okuninga, ile u tokole shimwe vali osho to ka ninga po. Ngeenge owa kwatele mo oshilyo keshe shoukwaneumbo nokupwilikina komaetepo avo, otashi ke ku kwafela u ninge etokolo li li mondjila. — Omayel. 15:22.
NINGA ETOKOLO OLO TALI KA PONDOLA
16. Eenghatu dilipi tadi ke ku kwafela u pondole metokolo olo to ningi? (Tala yo oshimhungu “ Nghee hatu dulu okuninga omatokolo e li mondjila.”)
16 Ngeenge owa ningi oinima aishe oyo ya popiwa metetekelo, oto ka ninga etokolo li li mondjila. Owa mona ouyelele aushe, nowa konakona omafinamhango oo tae ke ku kwafela u ninge etokolo olo tali hafifa Jehova. Oto dulu okupula Jehova e ku kwafele u pondole metokolo olo to ningi.
17. Oshike tashi ku kwafele u ninge omatokolo opandunge?
17 Nokuli nonande owa pondola momatokolo mahapu monakudiwa, dimbuluka kutya, opo u ninge omatokolo e li mondjila, ino pumbwa okulineekela meendunge doye ove mwene, ile mwaasho wa ninga monakudiwa, ndele owa pumbwa okulineekela muJehova. Oye ashike ta dulu oku ku pa eshiivo lashili, eudeko, eendunge dokuyoolola nosho yo ounongo. (Omayel. 2:1-5) Jehova ota dulu oku ku kwafela u ninge omatokolo oo tae mu hafifa. — Eps. 23:2, 3.
EIMBILO 28 Panga oukaume naKalunga
