1. Oshike hatu dulu okuninga, opo tu hafife Jehova?

 DILADILA nee ngeno to pe umwe oo u hole oshali ye likalekelwa noi na oshilonga. Mbela ito ka kala tuu wa nyemata, ngeenge omunhu oo okwe i tuvikile ashike moshikopa nokukala ite i diladila vali! Mepingafano naasho, oto ka kala wa hafa, ngeenge omunhu a tya ngaho okwa longifa nawa oshali oyo noku ku pandula. Oshitwa oshi li peni? Jehova okwe tu pa Omona waye e tu file. Mbela iha kala tuu a hafa, ngeenge hatu ulike kutya otwe mu pandula, eshi e tu pa oshali i na ondilo, nokwe tu ulikila ohole, eshi e tu pa ekuliloyambo! — Joh. 3:16; Rom. 5:​7, 8.

2. Ohatu ka kundafana shike moshitukulwa eshi?

² Eshi eedula tadi ende da yuka komesho, otashi dulika tuha kale vali tu na olupandu loshali yekuliloyambo. Ohatu ka kala twa fa hatu tula oshali yaKalunga moshikopa. Otwa hafa eshi tu i na, ashike otwe i tula ponhele opo itatu dulu oku i mona. Opo osho shihe tu ningilwe, otwa pumbwa okukala hatu diladila kombinga yaasho Kalunga naKristus ve tu ningila. Oshitukulwa eshi otashi ke tu kwafela nghee hatu dulu okuninga ngaho. Ohatu ka kundafana kombinga yanghee hatu dulu okumona ouwa mekuliloyambo paife nosho yo monakwiiwa. Ohatu ka kundafana yo kutya oshike hatu dulu okuninga, unene tuu pefimbo lEdimbuluko, opo tu ulike kutya otwa pandula Jehova, eshi e tu ulikila ohole.

NGHEE HATU MONO OUWA MEKULILOYAMBO PAIFE

3. Ouwa umwe ulipi hatu mono paife omolwekuliloyambo?

³ Ohatu mono nale ouwa mekuliloyambo laKristus. Pashihopaenenwa, Jehova ohe tu dimine po omatimba etu, pakanghameno lekuliloyambo. Ihe tu dimine po molwaashi e na oku shi ninga. Ndele omolwaashi a hala oku shi ninga. Omupsalme umwe okwa ulika olupandu laye, eshi a imba a ti: “Osheshi ove, Omwene  Jehova, oumuwa, nowe lilongekida okudimina po.” — Eps. 86:5; 103:​3, 10-13.

4. Mbela Jehova okwa yandja ekuliloyambo koolyelye? (Lukas 5:32; 1 Timoteus 1:15)

⁴ Vamwe otashi dulika va kale ve udite kutya inava wana okudiminwa po kuJehova. Oshoshili kutya kape na umwe womufye a wana okudiminwa. Omuyapostoli Paulus okwa li e shii kutya ina “wana nokuli okwiifanwa omuyapostoli.” Ashike okwa ti: “Ondi li omuyapostoli omolwefilonghenda laKalunga.” (1 Kor. 15:​9, 10) Jehova ohe tu dimine po, ngeenge twe lidilulula. Omolwashike? Hamolwaashi ngeno twa wana okudiminwa po, ndele omolwaashi oku tu hole. Ngeenge oho kala u udite uhe na oshilonga, dimbuluka kutya Jehova ina yandja ekuliloyambo kovanhu ovo va wanenena, ndele okwe li yandja kovalunde, ovo va hala okulidilulula. — Lesha Lukas 5:32; 1 Timoteus 1:15.

5. Mbela osha yuka ngoo okudiladila kutya otwa wana okudiminwa po kuJehova? Shi yelifa.

⁵ Katu na okukala hatu diladila kutya Jehova oku na oku tu dimina po, molwaashi twe mu longela omido dihapu. Oshoshili kutya Jehova oha didilike oilonga aishe oyo twe mu longela. (Heb. 6:10) Okwe tu pa ekuliloyambo li li oshali, ndele ine li tu pa omolwoinima iwa oyo twe mu longela. Onghee, katu na okukala hatu diladila kutya, molwaashi otwa longela Jehova oinima iwa ihapu, otwa wana okudiminwa po kuye. Molwaashi kungaho, otwa fa hatu ti kutya Kristus ka li a pumbwa oku tu fila. — Yelekanifa Ovagalati 2:21.

6. Omolwashike Paulus a longela Jehova noudiinini?

⁶ Paulus okwa li e shii kutya ina wana okudiminwa po kuJehova, kashi na nee mbudi kutya okwe mu longela shi fike peni. Ndele mbela omolwashike a longela Jehova noudiinini? Okwa li a ninga ngaho, opo a ulikile Jehova olupandu omolwefilonghenda laye. (Ef. 3:7) Ngaashi Paulus, nafye ohatu twikile okulongela Jehova nouladi, hamolwaashi ngeno twa hala okukala twa wana okudiminwa po, ndele omolwaashi twa hala oku mu ulikila olupandu.

7. Ouwa umwe ulipi hatu mono mekuliloyambo paife? (Ovaroma 5:1; Jakob 2:23)

⁷ Onghedi imwe omo hatu mono ouwa mekuliloyambo paife oyoyo kutya ohatu dulu okukala tu na ekwatafano lopofingo naJehova. a Ngaashi sha popiwa moshitukulwa sha tetekela, inatu dalwa tu na ekwatafano naKalunga. Ndele omolwekuliloyambo, ohatu dulu okukala ‘tu na ekwatafano liwa naKalunga,’ nohatu ka ehena popepi naye. — Lesha Ovaroma 5:1; Jakob 2:23.

8. Mbela omolwashike tu na okupandula Jehova, eshi tu na oufembanghenda wokupopya naye meilikano?

⁸ Omolwekwatafano lopofingo olo tu na naJehova, ohatu dulu okwiilikana kuye. Jehova iha pwilikine ashike komailikano oshiwana shaye, ngeenge tashi ilikana shi li pokwoongala, ndele oha pwilikine yo komailikano a keshe umwe pauhandimwe. Eilikano otali dulu oku tu ngungumaneka noku tu pa ombili yopamadiladilo. Ndele oo hao ashike ouwa hatu mono meilikano. Otali dulu yo okupameka ekwatafano letu naKalunga. (Eps. 65:2; Jak. 4:8; 1 Joh. 5:14) Eshi Jesus a li kombada yedu, okwa li ha ilikana lwoikando, molwaashi okwa li e shii kutya Jehova ota pwilikine kuye nosho yo kutya eilikano otali ke mu kwafela a kale e na ekwatafano la kola naXe. (Luk. 5:16) Inatu pandula tuu eshi hatu dulu okupanga oukaume naJehova nokupopya naYe meilikano omolwekuliloyambo!

 NGHEE HATU DULU OKU KA MONA OUWA MEKULILOYAMBO MONAKWIIWA

9. Ovapiya vaJehova ovadiinini otava ka mona ngahelipi ouwa mekuliloyambo monakwiiwa?

⁹ Ongahelipi ovapiya vaJehova ovadiinini tava ka mona ouwa mekuliloyambo monakwiiwa? Otava ka mona omwenyo waalushe. Ovanhu vahapu ohava diladila kutya osho itashi shiiva, molwaashi ovanhu ova kala nokufya oule womido omayovi. Ashike elalakano laJehova lopehovelo ololo kutya okwa li a hala ovanhu va kale nomwenyo fiyo alushe. Ngeno Adam ka li a nyona, ngeno kape na ou ta diladila kutya itashi shiiva okukala nomwenyo fiyo alushe. Nonande paife otashi dulika shidjuu okwiitavela kutya ovanhu otava ka kala nomwenyo fiyo alushe, ohatu dulu okukala tu na elineekelo kutya ohatu ka kala nomwenyo fiyo alushe, molwaashi otu shii kutya Jehova okwa yandja Omona waye e tu file. — Rom. 8:32.

10. Ovavaekwa nosho yo eedi dimwe ove na eteelelo lilipi?

¹⁰ Nonande omwenyo waalushe ohatu ke u mona monakwiiwa, Jehova okwa hala tu kale hatu diladila kombinga yao paife. Ovavaekwa ova teelela nodjuulifi oku ka kala meulu, nokupangela edu alishe pamwe naKristus. (Eh. 20:6) Eedi dimwe oda teelela nodjuulufi oku ka kala moparadisa kombada yedu, omo itamu ka kala ouyehame noluhodi. (Eh. 21:​3, 4) Mbela ou li umwe womeedi dimwe, nou na eteelelo loku ka kala nomwenyo fiyo alushe kombada yedu? Ondjabi oyo oya denga mbada, ngaashi ashike ondjabi yokuya meulu. Jehova okwe tu shita tu kale nomwenyo kombada yedu. Onghee, okukala nomwenyo waalushe kombada yedu otashi ke tu hafifa.

11-12. Omanangeko noupuna amwe elipi twa teelela nodjuulufi oku ka hafela mOparadisa? (Tala yo omafano.)

¹¹ Faneka momadiladilo nghee onghalo tai ka kala, eshi u li moparadisa kombada yedu. Ito ka kala vali to lipula shi na sha nouyahame, ile efyo. (Jes. 25:8; 33:24) Jehova ote ke ku pa oinima aishe iwa oyo wa hala. Mbela owa hala okulihonga kombinga yoinamwenyo? Mbela owa hala okulihonga okushika oishikomwa? Ile  owa hala okulihonga okufaneka? Kape na omalimbililo kutya, moparadisa otamu ka pumbwa ovaduti vomatungo, ovatungi nosho yo ovanamapya. Natango, moparadisa otamu ka pumbiwa ovo tava ka kuna nokulongekida oikulya, tava ka nduluka po oilongifo, notava ka kala ve na oikunino noku i fila oshisho. (Jes. 35:1; 65:21) Eshi to ka kala nomwenyo fiyo alushe, oto ka kala u na efimbo lokuninga oinima aishe oyo, naikwao vali ya wedwa po.

¹² Itatu ka kala tuu twa hafa neenghono, eshi hatu hambelele ovo va nyumunwa! (Oil. 24:15) Faneka yo momadiladilo nghee to ka hafela okulihonga shihapu kombinga yaJehova mokukonakona oinima ihapu oyo a shita. (Eps. 104:24; Jes. 11:9) Naasho sha denga mbada oshosho kutya, ito ka nyona vali, onghee oto ka longela Jehova nopehe na oku mu pula e ku dimine po. Mbela oto ka hoolola ‘okuhafela ouwa woulunde wopakafimbo,’ ponhele yokuteelela u ka hafele omanangeko noupuna omonakwiiwa? (Heb. 11:25) Hasho nande! Omanangeko noupuna oo, oku dule kokule keshe osho hatu dulu okumona paife mounyuni ou. Dimbuluka kutya, haalushe hatu kala twa teelela Oparadisa. Efiku limwe lomomafiku ohatu ka kala mo shili. Ashishe osho otashi shiiva ashike, molwaashi Jehova oku tu hole neenghono nomolwaasho e tu pa Omona waye e tu file.

ULIKA KUTYA OWA PANDULA JEHOVA OMOLWOHOLE YAYE

13. Ongahelipi hatu dulu okupandula Jehova omolwohole yaye? (2 Ovakorinto 6:1)

¹³ Ongahelipi hatu dulu okuulikila Jehova kutya otwa pandula omolwekuliloyambo olo e tu pa? Omokupitifa komesho oku mu longela monghalamwenyo yetu. (Mat. 6:33) Komesho yaaishe, Jesus okwa fya, “opo ovo ve na omwenyo vehe liwapalele vali vo vene, ndele va wapalele Kristus oo e va fila nokwa nyumunwa.” (2 Kor. 5:15) Inatu hala nande okukwata okahetengi efilonghenda laJehova. — Lesha 2 Ovakorinto 6:1.

14. Ongahelipi hatu dulu okukala twe lineekela muJehova nokushikula ewiliko laye?

¹⁴ Ohatu dulu yoo okuulika kutya otwa pandula Jehova omolwohole yaye mokukala twe lineekela muye nokushikula ewiliko laye. Ngahelipi mbela? Ohatu dulu okuninga ngaho okupitila momatokolo oo hatu ningi. Pashihopaenenwa, otashi dulika to diladila ngeenge owa pumbwa ngoo shili okuya kehongo lopombada, ile ngeenge oto ka tambula ko ngoo oilonga yonhumba. Owa pumbwa okukonakona u tale kutya Jehova okwa hala u ninge shike. (1 Kor. 10:31; 2 Kor. 5:7) Ngeenge otwa kala twe lineekela muJehova, eitavelo letu nosho yo oukaume wetu naye otau ka kala wa kola. Ohatu ka kala tu na eteelelo la twa li na sha nonakwiiwa. — Rom. 5:​3-5; Jak. 2:​21, 22.

15. Ongahelipi hatu dulu okuulika olupandu pefimbo lEdimbuluko?

¹⁵ Ope na vali onghedi imwe omo hatu dulu okuulika kutya otwa pandula Jehova  omolwohole yaye. Onghedi oyo, okuninga ngaashi hatu dulu pefimbo lEdimbuluko tu ulike kutya otwa pandula Jehova, eshi e tu pa ekuliloyambo. Eshi hatu lilongekida oku ka kala pEdimbuluko, natu shive yo vamwe va ka kale po. (1 Tim. 2:4) Yelifila ovo wa shiva kutya oshike tashi ka ningwa po pEdimbuluko. Oto dulu oku va ulikila ouvidio, ngaashi Omolwashike Jesus a fya? nosho yo Kala ho dimbuluka efyo laJesus, tava hangwa ko jw.org. Ovakulunhuongalo nava shilipaleke kutya ova shiva ovo inave lipyakidila vali. Diladila ashike kehafo olo hali kala meulu nokombada yedu, ngeenge eedi dimwe daJehova, odo da kana, da alukila koshiunda shaye! (Luk. 15:​4-7) PEdimbuluko, shi ninga elalakano okupopifa ovanhu aveshe, unene tuu ovo opo tave uya ko oshikando shotete, ile ovo va ninga efimbo inava ongala. Nava kale ve udite va tambulwa ko. — Rom. 12:13.

16. Omolwashike tu na okutamununa mo oukalele wetu pefimbo lEdimbuluko?

¹⁶ Mbela ito dulu okutamununa mo oukalele woye pefimbo lEdimbuluko? Ngeenge owa ningi ngaho, oto ka ulika kutya owa pandula ashishe osho Kalunga naKristus ve ku ningila. Ngeenge otwa kala hatu i moukalele, ohatu ka mona nghee Jehova te tu kwafele nohatu ka kala twe mu lineekela. (1 Kor. 3:9) Shikwao vali, kala ho ningi elesho lOmbiibeli li na sha nEdimbuluko, to shikula elandulafano olo li li mokambo Konakona Omishangwa keshe efiku, ile elandulafano olo li li mokafo kokulongifwa pokwoongala. Oto dulu yo okulongifa eevelishe odo pekonakono loye lopaumwene.

17. Mbela oshike hashi hafifa Jehova? (Tala yo oshimhungu “ Eenghedi omo to dulu okupandula Jehova omolwohole yaye.”)

¹⁷ Oshoshili kutya, otashi dulika eenghalo doye dihe ke ku pitike u ninge ashishe osho sha popiwa moshitukulwa eshi. Ashike dimbuluka kutya, Jehova iha yelekanifa oilonga yoye naai yavamwe, ndele ponhele yaasho, oha tale osho shi li momutima woye. Oha kala a hafa, ngeenge to ulike olupandu omolwoshali i na ondilo, ekuliloyambo. — 1 Sam. 16:7; Mark. 12:​41-44.

18. Omolwashike hatu pandula Jehova Kalunga naJesus Kristus?

¹⁸ Ekuliloyambo ole shi ningifa tashi shiiva, opo tu dule okudiminwa po omatimba etu, tu pange oukaume naJehova notu na eteelelo loku ka kala nomwenyo fiyo alushe. Natu kale alushe hatu pandula Jehova omolwohole yaye, oyo ye mu linyengifa e tu pe omanangeko noupuna oo. (1 Joh. 4:19) Natu pandule yo Jesus oo e tu ulikila kutya oku tu hole, eshi e tu fila. — Joh. 15:13.