“ETEYO olo olihapu, ndele ovalongi ovo ovanini, ilikaneni hano Omwene weteyo a tume ovatei meteyo laye.” (Luk. 10:2) Eendjovo odo da popiwa kuJesus omido 2 000 da ka dilongela, otadi holola nawa onghalo oyo i li moMyanmar kunena. Omolwashike mbela? MoMyanmar omu na ovaudifi 4 200 lwaapo ovo hava udifile ovanhu omamiliyona 55 onghundana iwa.

Ashike “Omwene weteyo,” Jehova, okwe linyengifa ovamwatate novamwameme omafele okudja koilongo ya yoolokafana, nova ya koshilongo osho shi li kOushilolukadi waAsia va kwafele moilonga yeteyo lopamhepo. Oshike she ve linyengifa va fiye po omaumbo avo? Oshike she va kwafela va tembuke? Nomanangekonoupuna elipi tava hafele? Natu ke shi taleni.

Omido donhumba da ka dilongela, Kazuhiro, omukokolindjila e likalekelwa womoJapan, okwa li a hangwa koshinhona nokwa li ehe shii apa e li ndele ta twalwa koshipangelo. Ndokotola okwa li e mu lombwela aha shinge otuwa oule womido mbali. Kazuhiro okwa li a kumwa. Okwa li e lipula a ti: ‘Ongahelipi handi dulu okutwikila okulonga osho ndi hole, okukokola ondjila? Okwa li a ilikana a mana mo ta pula Jehova e mu kwafele opo a twikile okukokola ondjila.

Kazuhiro okwa ti: “Konima yomwedi, kaume kange oo a li ta longele koMyanmar okwa li a uda onghalo yange. Okwa li a dengela nge ndele ta ti: ‘MoMyanmar ovanhu ohava longifa eebesa odo di li oyeendifo yaaveshe. Ngeenge owe uya oku, oto ka twikila noukalele woye nopehe na okushinga otuwa!’ Onda li nda pula ndokotola wange ngeenge onghalo yange otai pitike nge ngoo ndi ye koMyanmar. Ngha li nde shi teelela, ndokotola okwa li a lombwela nge a ti: ‘Ndokotola wouluvi a dja koMyanmar ota talele po moJapan paife. Ohandi ke mu lombwela kombinga yoye. Ngeenge owa hangwa natango koshinhona, ote ke kufila oshisho.’ Enyamukulo la ndokotola onda li nde li tala ko li li enyamukulo la dja kuJehova.”

Divadiva, Kazuhiro okwa li a tumina o-e-mail koshitaimbelewa shaMyanmar nokupopya kutya ye nomukulukadi waye ova hala oku ka longela koshitukulwa osho ve li ovakokolindjila. Konima ashike yomafiku atano, oshitaimbelewa osha li sha nyamukula kutya, “Ileni, otwa pumbwa ovakokolindjila vahapu!” Kazuhiro nomukulukadi waye, Mari, ova li va landifa po eetuwa davo mbali, tava kongo eevisa, ndele tava lande outekete vodila. Kunena, otava longo nehafo pamwe nongudu yelaka lokuudika  moMandalay. Kazuhiro okwa ti: “Oshimoniwa osho nosho yo eudaneko olo tali hangwa mEpsalme 37:5, olo la ti : ‘Ondjila yoye i tula meke lOmwene, u mu lineekele; Oye note shi ningi,’ ola pameka eitavelo letu.”

Mo 2014, otwa li twa mona oufembanghenda eshi moMyanmar mwa ningilwa oshoongalele she likalekelwa. Poshoongalele osho opa li ovanhu vahapu va dja kondje yoilongo. Umwe womuvo Monique, omumwameme e na omido 30 nasha a dja ko-United States, okwa ti: “Eshi nda dja koshoongalele, onda ilikana kuJehova kombinga yonghatu oyo ndi na okukatuka monghalamwenyo yange. Onda li yo nda popya novadali vange kombinga yomalalakano ange opamhepo. Atushe otwa li tu udite kutya ondi na okushuna koMyanmar, ashike osha li sha pula efimbo nomailikano ofimbo inandi ninga etokolo la xuunina.” Monique okwa yelifa kutya omolwashike.

“Jesus okwa li a ladipika ovashikuli vaye va ‘valule oitungifo.’ Onghee onda li nde lipula kutya, ‘ Ohandi dulu ngoo okutembuka? Ohandi dulu ngoo okuliyambidida moshilongo osho nopehe na okulongifa efimbo lihapu moilonga yokulikongela omboloto?’” Okwa ti: “Onda li nda mona kutya kandi na oimaliwa ya wana okutembula nge ndi ye koshilongo osho.” Ongahelipi a li a dula okutembuka? — Luk. 14:28.

Monique okwa ti: “Efiku limwe omuyandji wange woilonga okwa li a hala okumona nge. Onda li nda tila nonda li handi diladila kutya ohandi ka tewa mo moilonga. Ndele ponhele yaasho, okwa li a pandula nge omolwoilonga yange youdiinini. Okwa li a lombwela nge kutya ota pe nge obonasa, nokwa li a pa nge oimaliwa i fike pwaayo nda li nda pumbwa.”

Monique okwa kala ta longele moMyanmar okudja muDesemba 2014. Oku uditile ngahelipi oukalele waye eshi ta longele oko ku na omhumbwe inene? Okwa ti: “Onda hafa neenghono. Ondi na ovakonakonimbiibeli vatatu. Umwe womuvo oku na omido 67. Oha popifa nge alushe te limemesha noha papatele nge. Okwa li ta lili eshi e lihonga kutya edina laKalunga oJehova. Okwa ti: ‘Eshi osho oshikando shotete monghalamwenyo yange handi udu kutya edina laKalunga oJehova. Ove ou munini kwaame, ashike owa honga nge oshinima sha fimanenena osho nda li ndihe shii nale.’ Oku shi popya pauxupi, naame onda li nda lila. Oimoniwa ngaashi ei yokulongela oko ku na omhumbwe inene ohai mbilipaleke onghalamwenyo.” Efimbo opo la di ko, Monique okwa li a mona oufembanghenda wokuya kOfikola yOvaudifi vOuhamba.

Oshinima vali shimwe osho sha li she linyengifa vamwe vaye koMyanmar, ehokololo li na sha noshilongo osho olo li li membo lokomudo lEendombwedi daJehova (2013 Yearbook of Jehovah’s Witnesses). Omumwameme oo e na omido 30 nasha wedina Li okwa li nale ha di kOushilolukadi waAsia. Okwa li ha longo efiku alishe koilonga yokulikongela omboloto, ashike ehokololo olo li li membo lokomudo (Yearbook) ola li le mu linyengifa a ka longele koMyanmar. Okwa ti: “Mo 2014 eshi nda li nda ya koshoongalele she likalekelwa koYangon, onda li nda shakena novalihomboli ovo va li tava longele koshitukulwa shOvachina moMyanmar oko kwa li ku na omhumbwe inene. Molwaashi ohandi popi Oshichina, onda li nda tokola okutembukila koMyanmar ndi ka yambidide ongudu oyo i li ko. Onda li nde limanga kumwe naMonique, ndele hatu tembukile koMandalay. Jehova okwa li e tu nangeka noupuna eshi twa mona oilonga yetatafiku yokuhonga pofikola imwe, notwa li twa mona onhele i li popepi. Nonande oku na onghalo yomhepo ipyu nosho yo omaupyakadi vali amwe, ohandi hafele oukalele wange oku. Ovanhu moMyanmar ove na onghalamwenyo yanafangwa, eenghedi diwa nohava kala va halelela okupwilikina onghundana iwa. Oshitunhula okumona nghee Jehova ta endelelifa oilonga. Onda tomhwa kutya oshi li ehalo laJehova eshi ndi li koMandalay.”

Ovanhu ovo va ka longa oko ku na omhumbwe inene ova mona kutya omailikano okwa fimana. Diladila kuJumpei nosho yo omukulukadi waye, Nao, aveshe ove na omido 30 nasha. Ova li nale hava longele meongalo lelaka  lokuudika moJapan. Omolwashike va tembukila koMyanmar? Jumpei okwa ti: “Ame nosho yo omukulukadi wange otwa kala alushe tu na elalakano loku ka longa oko ku na omhumbwe inene kondje yoshilongo. Omumwatate umwe a dja meongalo letu lelaka lokuudika moJapan okwa tembukila koMyanmar. Nonande otwa li ashike twa ongela po oimaliwa inini, muMei 2010 otwa li twa tembuka. Ovamwatate novamwameme koMyanmar ova li ve tu tambula ko nehafo.” Mbela oku uditile ngahelipi oshitukulwa shelaka lokuudika koMyanmar? Okwa ti: “Oku na ovanhu vahapu ve na ohokwe. Ngeenge twa ulikile ovaneumbo veembolo ouvidio melaka lokuudika, ohava kala va kumwa. Otwa hafa neenghono eshi twa ninga etokolo lokuuya tu longele Jehova koshitukulwa oku.”

Jumpei naNao ova li va xupa ngahelipi pashimaliwa? Ova ti: “Konima yomido nhatu, otwa li twa longifa po oimaliwa yetu oyo twa li twa ongela, nokatwa li tu na oimaliwa ya wana yokufuta ohiila yomudo wa landula ko. Otwa li twa ilikana tashi di komutima. Ombadilila, otwa li twa shivwa koshitaimbelewa tu ninge ovakokolindjila ve likalekelwa vopokafimbo. Otwa li twe lineekela muJehova, notwa li twa mona kutya ine tu ekelashi. Okwa kala te tu file oshisho meenghedi dihapu.” Jumpei naNao ova li yo va ya kOfikola yOvaudifi vOuhamba efimbo opo la di ko.

Oshike sha li she linyengifa Simone, omumwatate oo e na omido 40 nasha, a dja koItaly, nomukulukadi waye, Anna, nosho yo omumwameme oo e na omido 30 nasha, a dja koNew Zealand, va tembukile koMyanmar? Anna okwa ti: “Onde linyengifwa kehokololo olo li li membo lokomudo (2013 Yearbook) li na sha naMyanmar.” Simone okwa ti: “Oshi li oufembanghenda munene okukala koMyanmar. Oku oku na onghalamwenyo yanafangwa, nohandi dulu okulongifa efimbo lihapu moilonga yaJehova. Oshitunhula okumona nghee Jehova he tu file oshisho ngeenge hatu longele oko ku na omhumbwe inene.” (Eps. 121:5) Anna okwa ti: “Onda hafa neenghono shi dulife nale. Otu na onghalamwenyo i li paunafangwa. Ohandi kala efimbo lihapu nomushamane wange, notu na ekwatafano la kola. Otwa mona yo ookaume vape ve li nawa. Ovanhu ihava ningi Eendombwedi okatongo, noshihafifa okushakeneka ovo ve na ohokwe moukalele.” Omeenghedi dilipi mbela?

Anna okwa ti: “Efiku limwe, onda li nda udifila omunafikola pomalandifilo nonda li nda ninga elongekido ndi shune ko vali kuye. Eshi nda shuna ko, okwa li e uya nakaume kaye. Oshikando sha landula ko vali, okwa li e uya navakwao. Lwanima, okwa ka etelela vali vahapu. Paife ohandi konakona navo aveshe vatano.” Simone okwa ti: “Ovanhu ovo hatu shakeneke moukalele ove na omhepo youkaume nohava kala va hala okuuda shihapu. Vahapu ove na ohokwe. Ihatu mono naanaa efimbo la wana lokukwafela ovanhu aveshe ovo ve na ohokwe.”

Ndele mbela eenghedi dilipi tadi longo da kwatelwa mokuninga etokolo lokutembukila koMyanmar? Mizuho, a dja koJapan, okwa ti: “Ame nomushamane wange, Sachio, otwa kala twa halelela oku ka longa koshilongo oko ku na omhumbwe inene, ndele katwa li tu shii kutya openi. Konima eshi twa lesha ehokololo kombinga yaMyanmar olo li li membo lokomudo (2013 Yearbook), otwa li twa kumwa koimoniwa itunhula notwa li twa  hovela okudiladila ngeenge otashi shiiva tu ka longele koMyanmar.” Sachio okwa weda ko a ti: “Otwa li twa tokola tu ka talele po oshivike shimwe koYangon, oshilando shinene osho shi li moMyanmar, tu ka tale kutya onghalo oya tya ngahelipi koshilongo oko. Etalelepo olo ola li le tu tomha kutya otwa pumbwa okutembukila koshitukulwa oko.”

Rodney nomukulukadi waye Jane, va dja koAustralia, aveshe ve na omido 50 nasha, nomonamati wavo, Jordan, nosho yo omonakadona wavo, Danica, ova kala tava longele koMyanmar oko ku na omhumbwe inene okudja mo 2010. Rodney okwa ti: “Otwa li twe linyengifwa kondjala yopamhepo oyo ovanhu ve na. Ohandi ladipike omaukwaneumbo amwe nao a kendabale oku ka longa keenhele oko ku na omhumbwe inene ngaashi koMyanmar.” Omolwashike mbela? “Osho osha li sha pameka oupamhepo wetu neenghono. Ovanyasha vahapu ova lenga eengodi, eetuwa, oilonga yavo nosho tuu. Ovana vetu otave lihongo oitya ipe oyo tava ka longifa moukalele. Ohava kendabala okulihonga nghee ve na okutomhafana naavo vehe shii Ombiibeli nanghee ve na okuyandja omanyamukulo pokwoongala kweongalo melaka lomoshitukulwa, nohava kufa ombinga momalipyakidilo opamhepo matunhula.”

Oliver, omumwatate e na omido 30 nasha a dja koUnited States, okwa yelifa kutya omolwashike ta popile unene oilonga oyo, a ti: “Okulongela Jehova konhele oyo uhe shii nale oshi na omauwa mahapu. Okutembukila kokule neumbo osha kwafela nge ndi kale nde lineekela muJehova, kashi na nee mbudi kutya ohandi lihange meenghalo da fa peni. Okulonga pamwe naavo ndihe shii nale ndele ove na eitavelo la fa lange, osha kwafela nge ndi mone kutya mounyuni omu kamu na sha sha fimana osho tashi dulu okuyelekanifwa nOuhamba waKalunga.” Kunena, Oliver nomukulukadi waye Anna, otava twikile okulongela noudiinini koshitukulwa oko ku na Ovachina.

Trazel, omumwameme e na omido 50 nasha a dja koAustralia, okwa kala ta longele moMyanmar okudja mo 2004. Okwa ti: “Ovo eenghalo davo tadi va pitike, ohandi va ladipike va ka longele oko ku na omhumbwe inene. Onda mona kutya ngeenge ou na ehalo loku ka longa oko ku na omhumbwe inene, Jehova oha nangeke noupuna eenghendabala doye. Inandi shi diladila nandenande kutya ohandi ka kala nonghalamwenyo ngaashi ei ndi na paife. Onghalamwenyo ya tya ngaho oi na omauwa mahapu notai mbilipaleke.”

Eendjovo daavo va ka longela oko ku na omhumbwe inene moMyanmar nadi ku linyengife u ka kwafele ovanamitimadiwa ovo ve li koitukulwa oko ihaku longwa. Heeno, ovo va ka longela oko ku na omhumbwe inene otava ifana tava ti: “Alikana ileni koMyanmar mu tu kwafele!”