1. Ngaashi sha ulikwa mu 3 Johannes 3, 4, oshike hashi tu hafifa?

OMUYAPOSTOLI Johannes ka li tuu a hafa eshi a uda kutya ovanhu ovo a kwafela ve uye moshili otava twikile okulongela Jehova noudiinini! Nonande ova li va taalela omaupyakadi mahapu, Johannes okwa li a kendabala ngaashi ta dulu opo a pameke eitavelo lOvakriste ovadiinini, ovo a li a tala ko ve li ovana vaye vopamhepo. Sha faafana, nafye ohatu kala twa hafa ngeenge ovana vetu, kutya nee ovopambelela ile ovopamhepo, ove liyapulila Jehova notava twikile oku mu longela noudiinini. — Lesha 3 Johannes 3, 4.

2. Elalakano laJohannes lokushanga eenhumwafo odo olashike?

² Mo 98 O.P., Johannes otashi dulika a li ha di muEfeso ile popepi nasho. Otashi dulika a li a tembukila ko konima eshi a dja moukwatwa kokanhunhu kaPatmos. Lwopefimbo opo, omhepo iyapuki yaJehova oya li ye mu nwefa mo a shange eenhumwafo nhatu. Elalakano leenhumwafo odo ola li okunyatipaleka Ovakriste ovo va pameke eitavelo lavo muJesus nova diinine oshili.

3. Omapulo elipi hatu ka kundafana?

³ Johannes oye aeke omuyapostoli a xuuninwa kombada yedu, nokwa li te lipula kombinga yomahongo oipupulu oo a li e lihanena momaongalo. * (1 Joh. 2:18, 19, 26) Ovashunimonima ova li tave liti kutya ove shii Kalunga, ndele kava li hava dulika koipango yaye. Paife natu ka konakoneni omayele a nwefwa mo oo Johannes a li a yandja. Eshi hatu a kundafana, ohatu ka mona omanyamukulo omapulo atatu taa shikula: Osha hala okutya ngahelipi okudiinina oshili? Omandangalati elipi hatu dulu okushakeneka? Nongahelipi hatu dulu okukwafelafana opo tu diinine oshili?

4. Metwokumwe na 1 Johannes 2:3-6 nosho yo 2 Johannes 4, 6, oshike sha kwatelwa mo mokudiinina oshili?

⁴ Opo tu diinine oshili, otwa pumbwa okushiiva oshili oyo tai  hangwa mEendjovo daKalunga, Ombiibeli. Shikwao vali, otwa pumbwa “okudiinina oipango [yaJehova],” sha hala okutya otu na okudulika kuyo. (Lesha 1 Johannes 2:3-6; 2 Johannes 4, 6.) Jesus okwa tula po oshihopaenenwa sha denga mbada shi na sha nokudulika kuJehova. Onghedi imwe ya fimana omo hatu dulu okudulika kuJehova omokushikula oshihopaenenwa shaJesus filufilu ngaashi tashi dulika. — Joh. 8:29; 1 Pet. 2:21.

5. Otwa pumbwa okukala twa tomhwa kushike?

⁵ Opo tu diinine oshili, otwa pumbwa okukala twa tomhwa kutya Jehova oye Kalunga koshili, nakeshe osho e tu lombwela mEendjovo daye Ombiibeli oshoshili. Otu na yo okukala twa tomhwa kutya Jesus oye Messias omuudanekwa. Kunena ovanhu vahapu ova limbililwa ngeenge Jesus okwa nangekwa po ngoo shili e li Ohamba yOuhamba waKalunga. Johannes okwa londwela kutya otapa ka kala “ovapukifi vahapu,” ovo tava ka pukifa ovo inave lilongekida okupopila oshili kombinga yaJehova naJesus. (2 Joh. 7-11) Okwa shanga a ti: “Olyelye omunaipupulu noina itavela kutya Jesus oye Kristus?” (1 Joh. 2:22) Onghedi imwe oyo tai dulu oku tu kwafela tuha pukifwe omokukala hatu konakona Eendjovo daKalunga. Ngeenge otwa kala hatu ningi ngaho, opo ashike hatu ka shiiva Jehova naJesus. (Joh. 17:3) Nokungaho, ohatu ka kala twa tomhwa kutya otwa mona oshili.

6. Ovanyasha Ovakriste ova taalela endangalati lilipi?

⁶ Ovakriste aveshe ova pumbwa okukala va lungama opo vaha pukifwe komahongo opanhu. (1 Joh. 2:26) Ovakriste ovanyasha ovo unene va pumbwa okulungamena omwiyo oo. Alexia, * omumwameme womido 25 wokoFrance, okwa ti: “Eshi nda li mofikola, onda li nda hongwa kombinga yoevolusi nosho yo omahongo amwe opanhu, nomahongo oo okwa li a ngwangwaneka nge nonda li nda limbililwa oshili. Omafimbo amwe, omahongo oo okwa li haa kala a hokwifa kwaame. Ndele onda li handi kala ndi udite kutya osha puka okulidimbika omahongo Ombiibeli nokwiitavela keshe osho nda li handi hongwa kovahongi.” Alexia okwa li a konakona embo Life—How Did It Get Here? By Evolution or by Creation? Konima yoivike inini, kali vali e na omalimbililo. Alexia okwa ti: “Eshi nda konakona ame mwene, onda mona kutya  Ombiibeli oya popya oshili. Onda mona yo kutya ngeenge onda kala metwokumwe nomifikamhango dayo ohandi ka kala nda hafa nondi na ombili.”

7. Omafininiko elipi tu na okukondjifa, nomolwashike?

⁷ Ovakriste aveshe, kutya nee ovanyasha ile ovakulunhu, ove na okukondjifa omafininiko okukala nonghalamwenyo yopavali. Johannes okwa popya kutya itatu dulu okudiinina oshili nopefimbo opo tuu opo otu na onghalamwenyo inai koshoka. (1 Joh. 1:6) Opo tu kale twa hokiwa kuJehova paife nomonakwiiwa, natu dimbuluke alushe kutya Jehova oha kala e wete ashishe osho hatu ningi. Nonande ovanhu otashi dulika vaha mone osho hatu ningi meholeko, Jehova oha kala e wete keshe shimwe. — Heb. 4:13.

8. Otwa pumbwa okuhenuka okuninga shike?

⁸ Otwa pumbwa okuhenuka etaleko lounyuni li na sha nokunyona. Omuyapostoli Johannes okwa shanga a ti: “Ndele ngeenge ohatu ti: ‘Ihatu nyono,’ ohatu lifufya nokatu na oshili.” (1 Joh. 1:8) Pefimbo laJohannes, ovashunimonima ova li hava ti kutya omunhu ota dulu okunyonena owina, ndele nopefimbo opo tuu opo ota kala e na ekwatafano liwa naKalunga. Nokunena, otwa dingililwa kovanhu ovo ve na etaleko la tya ngaho. Vahapu ohava ti kutya ova itavela muKalunga, ndele ihava tu kumwe netaleko laJehova li na sha nokunyona, unene tuu ngeenge tashi uya poshikundafanwa shi na sha nomilele. Oinima oyo Jehova a tala ko i li enyono, ovanhu ohava diladila kutya otava dulu oku i ninga opo va wanife po omahalo avo.

9. Ongahelipi ovanyasha tava dulu okumona ouwa ngeenge ova diinine osho shi li mOmbiibeli?

⁹ Ovanyasha Ovakriste otashi dulika va fininikwe va tambule ko elihumbato inali koshoka olo la tambulwa ko kovanafikola vakwao ile kovanailonga vakwao. Aleksandar osho a li a ningilwa ngaho. Okwa ti: “Oukadona vamwe vokofikola yetu ova li hava fininike nge ndi ye navo momilele. Ova ti kutya ame eshenge molwaashi nghi na okakadona. Ngeenge naave owa  taalela omashongo a tya ngaho, dimbuluka kutya ngeenge owa kala wa diinina oshili yOmbiibeli, oto ke liamena ove mwene, to ka amena oukolele woye, omaliudo oye noto ka amena ekwatafano loye naJehova. Efimbo keshe to kondjifa eshongo, otashi ka kala shipu kwoove okulonga osho sha yuka. Dimbuluka kutya, etaleko la tya ngaho lounyuni li na sha nomilele ola pengifwa kuSatana. Onghee hano, ngeenge owa henuka okudiladila ngaashi ounyuni, oto ‘findi omunawii.’ — 1 Joh. 2:14.

10. Ongahelipi 1 Johannes 1:9 te tu kwafele tu longele Jehova neliudo la koshoka?

¹⁰ Otu shi shii kutya Jehova oku na oufemba woku tu lombwela shi na sha nelihumbato inali koshoka. Nohatu ningi ngaashi hatu dulu opo tuha nyone. Ndele ngeenge otwa nyono, ohatu hepaulula omanyono etu kuJehova okupitila meilikano. (Lesha 1 Johannes 1:9.) Ashike ngeenge otwa nyono enyono la kwata moiti, ohatu ka konga ekwafo kovakulunhuongalo ovo Jehova a nangeka po ve tu file oshisho. (Jak. 5:14-16) Onghee, katu na okukala tu udite etimba omolwomanyono omonakudiwa. Omolwashike mbela? Omolwaashi Tate yetu omunahole okwe tu longekidila ekuliloyambo lOmona waye, opo tu dule okudiminwa po omatimba etu. Ngeenge Jehova okwa ti kutya ota ka dimina po ovanyoni ovo ve livela ombedi, osho ta ka ninga shili. Onghee hano, kape na osho tashi dulu oku tu imba tu longele Jehova tu na eliudo la koshoka. — 1 Joh. 2:1, 2, 12; 3:19, 20.

11. Ongahelipi hatu dulu okwaamena omadiladilo etu komahongo oo taa dulu okunghundipaleka eitavelo letu?

¹¹ Otu na okuhenuka omahongo ovashunimonima. Okudja ashike eshi eongalo lopaKriste la totwa po, Ondiaboli oya kala tai longifa ovapukifi vahapu, opo va kune omalimbililo momadiladilo ovapiya ovadiinini vaKalunga. Nomolwaasho otwa pumbwa okushiiva nghee hatu dulu okudidilika mo oshili noipupulu. *  Ovatondi vetu otava dulu okulongifa ointaneta ile omakwatafano opaintaneta opo ve tu ningife tuha kale twe lineekela muJehova nosho yo movamwatate. Ino itavela omitotolombo da tya ngaho, oda dja kuSatana! — 1 Joh. 4:1, 6; Eh. 12:9.

12. Omolwashike tu na okupameka eitavelo letu moshili oyo twe lihonga?

¹² Opo tu kondjife omaponokelo aSatana otu na okulineekela muJesus nosho yo monghandangala oyo ta dana mokuwanifa po elalakano laKalunga. Otu na okulineekela oupitilo oo Jehova ta longifa kunena. (Mat. 24:45-47) Otu na okupameka elineekelo letu mokukonakona pandjikilile Eendjovo daKalunga. Ngeenge otwa ningi ngaho, eitavelo letu otali ka kala la fa omuti oo u na omidi da ya moule. Paulus okwa popya eendjovo da yukila oko eshi a li ta shangele eongalo lokuKolossi. Okwa ti: “Molwaashi omwa itavela muKristus Jesus, Omwene wetu, twikileni oku mu hopaenena. Kaleni mu na eitavelo la pama nokutungila kuKristus oo e li ekanghameno.” (Kol. 2:6, 7) Ngeenge otwa longo noudiinini tu pameke eitavelo letu, Satana novayambididi vaye itava ka dula oku tu kelela tu kanyatele oudiinini wetu. — 2 Joh. 8, 9.

13. Oshike tu na okukala twa teelela, nomolwashike?

¹³ Otwa teelela ounyuni u kale u tu tonde. (1 Joh. 3:13) Johannes okwe tu dimbulukifa kutya “ounyuni aushe ou li mepangelo lomunawii.” (1 Joh. 5:19) Eshi exulilo lounyuni ou tali ehene popepi, Satana ota ka handuka shi dulife nale. (Eh. 12:12) Iha longifa ashike omaponokelo omonanguwi, ngaashi oinima oyo tai kokele melihumbato inali koshoka nosho yo oipupulu yovashunimonima ndele oha longifa yo omaponokelo a yukilila ngaashi omahepeko. Satana oku shii kutya oku na ko ashike okafimbo kaxupi, nomolwaasho ta kendabala okuya moshipala oilonga yetu yokuudifa ile okunyona po eitavelo letu. Onghee itashi kumwifa eshi oilonga yetu ya shilikwa ile ya ngabekwa moilongo imwe. Ashike nande ongaho, ovamwatate novamwameme ovo ve li moilongo oyo otave lididimike. Kashi na nee mbudi kutya Satana ota longifa oshilwifo shilipi, ohatu dulu okukala ovadiinini!

14. Onghedi imwe ilipi hatu dulu okukwafela ovamwatate novamwameme va diinine oshili?

¹⁴ Opo tu kwafele ovamwatate novamwameme va diinine oshili, otu na oku va ulikila olukeno. (1 Joh. 3:10, 11, 16-18) Katu na ashike okuulikilafana ohole ngeenge oinima tai tu endele nawa, ndele nongeenge pa holoka omaupyakadi. Pashihopaenenwa, mbela ou shii umwe oo a filwa omuholike waye ile a pumbwa okuhekelekwa ile ekwafo lokondadalunde? Mbela owa uda kutya ovaitaveli vakweni ova hangwa koshiponga shopaushitwe, nOlupale lavo lOuhamba ola pumbwa okutungululwa? Katu na ashike okuulikila ovamwatate novamwameme ohole ile olukeno mokupopya, ndele osho sha fimanenena, otwa pumbwa oku shi ulika moilonga.

15. Ngaashi sha popiwa mu 1 Johannes 4:7, 8, oshike twa pumbwa okuninga?

¹⁵ Ngeenge hatu ulikilafana ohole ohatu hopaenene Tate yetu womeulu omunahole. (Lesha 1 Johannes 4:7, 8.) Onghedi imwe hatu dulu okuulikilafana ohole omokudiminafana po. Pashihopaenenwa, umwe otashi dulika e tu udifa nai ndele te tu pe ombili. Ohatu ulike ohole moku mu dimina po nomokudimbwa enyono laye. (Kol. 3:13) Omumwatate wedina Aldo okwa li a taalela eshongo la faafana eshi a li a uda omumwatate umwe, oo a li a fimaneka, ta popile mowii omuhoko wavo. Aldo okwa ti: “Onda ilikana kuJehova lwoikando a kwafele nge opo ndiha kale netaleko lii li na sha nomumwatate oo.” Ashike, Aldo okwa li a ninga po vali oshinima shimwe. Okwa li a pula omumwatate  oo va ka longe pamwe naye moukalele. Ofimbo tava longo pamwe moukalele, Aldo okwa li a lombwela omumwatate nghee eendjovo daye de mu kuma. Aldo okwa ti: “Eshi omumwatate oo a uda kutya osha udifa nge nai, okwa li a pa nge ombili. Okutala komutono wewi laye onda li nda didilika kutya okwe livela ombedi shili. Konima yaasho otwa li vali twa panga oukaume.”

16-17. Otu na okukala twa tokola toko okuninga shike?

¹⁶ Omuyapostoli Johannes okwa li e hole neenghono ovamwaxe, nokwa li a hala va kale ve na eitavelo la pama; ohole yaye nosho yo okunakonasha navo kwaye oi li wetikile meenhumwafo odo a li e va shangela nhatu. Itashi pameke tuu okushiiva kutya ovalumenhu novakainhu ngaashi ye, ove li ovavaekwa ovo tava ka pangela pamwe naKristus meulu! — 1 Joh. 2:27.

¹⁷ Natu tuleni moilonga omayele oo twa kundafana. Natu kaleni twa tokola okudiinina oshili nokudulika kuJehova meenghedi adishe dokukalamwenyo. Natu kaleni yo hatu konakona Eendjovo daye, nokukala twe di lineekela. Kala u na eitavelo muJesus. Henuka omahongo opanhu nosho yo omahongo ovashunimonima. Kondjifa omafininiko okukala nonghalamwenyo yopavali nokuliyandja momanyono. Kala wa diinina omifikamhango dopaenghedi daJehova. Natu kwafeleni ovamwatate novamwameme va kale ovadiinini mokukala hatu va dimine po ngeenge ve tu udifa nai nokukwafela ovo ve li momhumbwe. Kashi nee mbudi kutya ohatu kondjo nomashongo a tya ngahelipi, ohatu dulu okudiinina oshili.