Oumbangi otau ulike kutya Jesus okwa ninga Omupristeri Munene eshi a ninginifwa mo 29 O.P. Osho otu shi shii ngahelipi? Eshi Jesus a ninginifwa, okwa ulika kutya oku na ehalo okuyamba po omwenyo waye koaltari yopafaneko opo a longe ‘ehalo’ laKalunga. (Gal. 1:4; Heb. 10:5-10) Molwaashi oaltari yopafaneko oya kala po okudja peninginifo laJesus okuyuka komesho, otembeli inene yopamhepo, oyo tai faneke elongekido lelongelokalunga la koshoka laJehova olo la kanghamena kekuliloyambo, nayo oi na okukala ya totwa po pefimbo opo. Oaltari oya li oshitukulwa sha fimana shotembeli yopamhepo. — Mat. 3:16, 17; Heb. 5:4-6.

Otembeli inene yopamhepo oya li ya pumbwa omupristeri munene opo e i pashukile. Opo osho shi wanifwe po, Jesus okwa li a vaekwa ‘nomhepo iyapuki nokwa pewa eenghono.’ (Oil. 10:37, 38; Mark. 1:9-11) Ndele otu shi shii ngahelipi kutya Jesus okwa nangekwa po e li Omupristeri Munene konima yefyo neninginifo laye? Oshihopaenenwa shaAron nosho yo shovapristeri vanene ovo ve ke mu shikula, ovo va li hava yakula pawiliko lOmhango yaMoses, otashi tu kwafele tu nyamukule epulo olo.

Omhango oyo Jehova a pa Moses oya popya kutya omupristeri oye aeke a pitikwa a ye mOuyapukielela wetwalihangano, nolwanima omOuyapukielela motembeli. Edimo olo li yapukielela ola li la tukulwa ko netukulifolapi. Omupristeri munene okwa li ha tauluka ashike etukulifolapi olo mEfiku lEkwatakanifo. (Heb. 9:1-3, 6, 7) Ndele ngaashi ashike Aron naavo ve ke mu shikula va li va vaekwa ve li ovapristeri vanene ofimbo inava ‘pitila metukulifolapi lovene vene’ letwalihangano, Jesus naye okwa li a nangekwa po e li Omupristeri Munene motembeli inene yaJehova yopamhepo ofimbo ina fya, nolwanima okwa ‘pitila metukulifolapi, sha hala okutya mombelela yaye’ noku ka kala nomwenyo meulu. (Heb. 10:20) Omolwetomheno olo, omuyapostoli Paulus okwa popya a yukifa kuJesus te uya e li “omupristeri munene” opo nee “okwa ya metwali olo linene noliwa olo inali tungwa kovanhu,” sha hala kutya a “ya meulu.” — Heb. 9:11, 24.

Onghee hano, kape na eyooloko pokati kehangano lipe kutya onaini la kolekwa nonaini la tulwa moilonga. Omolwashike mbela? Eshi Jesus a londa a ya meulu nokwa yandja omwenyo waye wa wanenena ponhele yetu, okwa katuka onghatu yotete yomeenghatu nhatu oyo ya ulika kutya ehangano lipe ola kolekwa ile oli li paveta. Eenghatu odo da faafana ode shi ningifa yo tashi shiiva opo ehangano olo li tulwe moilonga. Eenghatu dilipi da kwatelwa mo?

Onghatu yotete, Jesus okwa holoka koshipala shaJehova; onhivali, Jesus okwa yandja ongushu yekuliloyambo laye kuJehova; noyaxuuninwa, Jehova okwa tambula ko ongushu yohonde yaJesus ya tika. Ofimbo eenghatu odo da li inadi katukwa, ehangano lipe kala li tali longo.

Ombiibeli inai tu lombwela kutya onaini naanaa Jehova a tambula ko ongushu yekuliloyambo laJesus. Onghee itatu dulu lela okupopya kutya onaini kondadalunde ehangano lipe la kolekwa nola tulwa moilonga. Ashike otu shi shii kutya Jesus okwa londa a ya meulu pa pita omafiku omulongo komesho yOpentekoste. (Oil. 1:3) Moule ashike wefimbo lixupi, Jesus okwa li a yandja ongushu yekuliloyambo laye kuJehova, na Jehova okwa li e i tambula ko. (Heb. 9:12) Oumbangi oo tau ulike kutya ehangano lipe ola hovela okulonga owa li we limonikila mo nawa pOpentekoste. (Oil. 2:1-4, 32, 33) Onghee ehangano lipe ola li la tulwa moilonga notali longo.

Oku shi ngonga pauxupi, ehangano lipe ola li la kolekwa nokutulwa moilonga konima eshi Jehova a tambula ko ongushu yohonde yaJesus ya tika. Onghee hano, ehangano olo ola li la hovela okuwilikwa kOmupristeri Munene, Jesus, oo ta longo e li Omupokati walo. — Heb. 7:25; 8:1-3, 6; 9:13-15.