1. Oshike osho Jehova a ninga po, diva konima eshi Adam naEva va nyona? (Genesis 3:15)

 DIVA eshi Adam naEva va nyona, Jehova okwa pa oludalo lavo eteelelo, okupitila mexunganeko olo lididilikwedi. Osho a popya otashi hangwa muGenesis 3:15. — Lesha.

2. Oshike shididilikwedi shi na sha nexunganeko olo?

² Exunganeko olo otali hangwa membo lotete lOmbiibeli. Ashike omambo makwao aeshe Ombiibeli okwa pamba exunganeko olo monghedi yonhumba, ile yongadi. Ngaashi ashike omwoongo wembo hau kala u kwetele kumwe omapandja aeshe embo, eendjovo odo di li muGenesis 3:15 nado oda ngonga oshikalimo shomambo aeshe Ombiibeli netumwalaka limwe, olo kutya Kalunga okwa li ta ka tuma Omuxupifi, oo ta ka hanauna po Ondiaboli novashikuli vayo aveshe ovakolokoshi. * Osho itashi ka kala tuu shitunhula kwaaveshe ovo ve hole Jehova!

3. Oshike hatu ka kundafana moshitukulwa eshi?

³ Moshitukulwa eshi, ohatu ka nyamukula omanyamukulo omapulo taa shikula e na sha nexunganeko olo li li muGenesis 3:15. Oolyelye va tumbulwa mexunganeko olo? Ongahelipi exunganeko olo la wanifwa? Nongahelipi hatu dulu okumona ouwa mulo?

4. Olyelye “eyoka,” notu shi shii ngahelipi?

⁴ Ovo va tambulwa muGenesis 3:14, 15 omwa kwatelwa “eyoka,” ‘oludalo’ leyoka, ‘omwalikadi’ nosho yo ‘oludalo’ lomwalikadi. Ombiibeli otai tu kwafele tu shiive keshe oo a tumbulwa  mexunganeko olo. * Natu hovele ‘neyoka.’ Eyoka lo venevene itali dulu okuuda ko osho Jehova a li ta popi moshikunino shaEden. Onghee hano, etokolo laJehova oli na okukala la li la yukifwa koshishitwa oshinaendunge. Jehova okwa li ta popi lela nalyelye? Ehololo 12:9 ola yelifa nawa kutya eyoka otali ulike naanaa kulyelye. Ehololo ola popya kutya “eyoka likulu” oSatana Ondiaboli. Ndele olyelye oludalo leyoka?

5. Oludalo leyoka otali ulike koolyelye?

⁵ Ngeenge Ombiibeli tai popi oludalo meityo lopafaneko, otai ulike kwaavo hava hopaenene filufilu umwe notava dulu okwiifanwa oludalo laye. Onghee hano, oludalo leyoka ola fikama po movaengeli ovo vehe fi ovadiinini nosho yo movanhu ovo hava pataneke Jehova Kalunga noshiwana shaye, ngaashi Satana. Omwa kwatelwa yo ovaengeli, ovo va li va fiya po oinakuwanifwa yavo meulu pefimbo laNoa nosho yo ovanhu ovakolokoshi, ovo have lihumbata ngaashi xe yavo, Ondiaboli. — Gen. 6:1, 2; Joh. 8:44; 1 Joh. 5:19; Jud. 6.

6. Omolwashike ‘omwalikadi’ ehe fi Eva?

⁶ Paife natu ka taleni kutya ‘omwalikadi’ oo olyelye. Omwalikadi oo ita dulu okukala Eva. Omolwashike mbela? Natu ka taleni ketomheno limwe. Exunganeko ola popya kutya oludalo lomwalikadi otali ka “nyanyaula” omutwe weyoka. Ngaashi twa kundafana, eyoka oli li omweengeli omukolokoshi, Satana, nokape na omunhu ina wanenena womoludalo laEva e na eenghono doku mu nyanyaula. Ndele ongahelipi Satana ta ka hanaunwa po?

7. Ngaashi sha popiwa mEhololo 12:1, 2, 5, 10, olyelye omwalikadi oo a tumbulwa muGenesis 3:15?

⁷ Embo laxuuninwa mOmbiibeli ole tu lombwela kutya omwalikadi, oo a tumbulwa  muGenesis 3:15, oye lyelye. (Lesha Ehololo 12:1, 2, 5, 10.) Omukainhu ou ke fi wopambelela. Okwa popiwa e na omwedi koshi yeemhadi daye nosho yo oshishani komutwe waye shi na eenyofi 12. Okwa dala okaana ke likalekelwa, sha hala okutya Ouhamba waKalunga. Ouhamba waKalunga ou li meulu, onghee omukainhu oo naye oku na okukala e li meulu. Omukainhu oo ota faneke oshitukulwa shomeulu shehangano laJehova, osho sha fikama po movaengeli ovadiinini. — Gal. 4:26.

8. Olyelye oludalo la fimanenena lomwalikadi, nonaini a hovela okuninga ngaho? (Genesis 22:15-18)

⁸ Eendjovo daKalunga otadi tu kwafele yo tu didilike mo oludalo la fimanenena lomwalikadi. Oludalo olo ola li tali ka dja moludalo laAbraham. (Lesha Genesis 22:15-18.) Ngaashi sha xunganekwa, Jesus oye lela oludalo lomulumenhu oo omudiinini. (Luk. 3:23, 34) Ashike oludalo oli na okukala li na eenghono di dule dopanhu, molwaashi otali ka nyanyaula nokuxulifa po filufilu Satana Ondiaboli. Onghee hano, eshi Jesus a li e na omido 30 lwaapo, okwa li a vaekwa nomhepo iyapuki e li Omona waKalunga. Eshi Jesus a vaekwa, okwa ninga oshitukulwa sha fimanenena sholudalo lomwalikadi. (Gal. 3:16) Konima yefyo nenyumuko laJesus, Kalunga okwe “mu dika oshishani shoshinge noshefimano” nokwe mu pa “eenghonopangelo adishe meulu nokombada yedu,” mwa kwatelwa eenghonopangelo ‘dokuxulifa po oilonga yOndiaboli.’ — Heb. 2:7; Mat. 28:18; 1 Joh. 3:8.

9-10. (a) Oolyelye vali ve li oshitukulwa sholudalo lomwalikadi, nohava ningi oshitukulwa osho naini? (b) Oshike hatu ka kundafana paife?

⁹ Kakele kuJesus, ope na vali vamwe ovo tava ka kala oshitukulwa sholudalo olo. Omuyapostoli Paulus okwa popya oshitukulwa sholudalo olo, eshi a li ta lombwele Ovakriste ovavaekwa Ovajuda nosho yo vomoiwana imwe, a ti: “Ngeenge omwa ninga ovahongwa vaKristus, omu li lela oludalo laAbraham, notamu ka fyuulula omaudaneko oo a udanekelwa Abraham.” (Gal. 3:28, 29) Ngeenge Jehova okwa vaeke Omukriste nomhepo iyapuki, omunhu oo oha ningi oshitukulwa sholudalo lomwalikadi. Onghee oludalo olo ola fikama po muJesus Kristus naavo tava ka pangela pamwe naye 144 000. (Eh. 14:1) Aveshe ovo ohava kendabala okudiladila nokukatuka ngaashi Xe yavo, Jehova Kalunga.

¹⁰ Molwaashi paife otu shii ovo va tumbulwa muGenesis 3:15, natu ka kundafaneni pauxupi nghee Jehova a kala nokuwanifa po exunganeko eli nonghee tali tu etele ouwa kunena.

11. Omeityo lilipi oludalo lomwalikadi la tuwa “moshififinwa”?

¹¹ Metwokumwe nexunganeko olo li li muGenesis 3:15, eyoka ola li tali ka twa oludalo lomwalikadi “moshififinwa.” Exunganeko olo ola wanifwa po, eshi Satana a li a longifa Ovajuda nosho yo Ovaroma va dipae Omona waKalunga. (Luk. 23:13, 20-24) Ngaashi ashike omunhu iha dulu okweenda, ile ha ende noudjuu oule wokafimbo ngeenge e na oshipute koshififinwa, sha faafana Jesus naye ka li ta dulu okuninga sha oule wokafimbo, omafiku atatu, eshi a li a fya e li mombila. — Mat. 16:21.

12. Ongahelipi nonaini omutwe weyoka tau ka nyanyaulwa?

¹² Ngeenge exunganeko olo la tumbulwa muGenesis 3:15 ola li tali ka wanifwa, osha yela kutya Jesus ka li ta ka menekela mombila. Omolwashike mbela? Omolwaashi metwokumwe nexunganeko olo, oludalo otali ka nyanyaula omutwe weyoka. Osho osha hala kutya Jesus okwa li e na oku ka nyumunwa.  Naasho osho sha li sha ningwa. Mefiku etitatu konima yefyo laye, Jesus okwa li a nyumuninwa omwenyo ihau fi meulu. Peufwafimbo laKalunga, Jesus ota ka nyanyaula nokuxulifa po Satana. (Heb. 2:14) Ovo tava ka pangela pamwe naKristus otava ka hanauna po ovatondi aveshe vaKalunga kombada yedu, sha hala okutya oludalo leyoka. — Eh. 17:14; 20:4, 10. *

13. Ongahelipi hatu dulu okumona ouwa mewanifo lexunganeko olo?

¹³ Ngeenge ou li omupiya waKalunga, oto mono ouwa mewanifo lexunganeko olo. Jesus okwe uyile kombada yedu e li omunhu wopambelela. Okwa li ha hopaenene filufilu omaukwatya aXe. (Joh. 14:9) Onghee hano, eshi twe lihonga kombinga yaJesus oshe tu ningifa tu shiive Jehova Kalunga nokukala tu mu hole. Otwa mona yo ouwa momahongo aJesus nomewiliko olo ha yandje kunena okupitila meongalo lopaKriste. Okwe tu honga nghee hatu dulu okukala nonghalamwenyo oyo tai hafifa Jehova. Atusheni ohatu dulu okumona ouwa mefyo laJesus, ile tu tye, eshi a tuwa moshififinwa. Ngahelipi mbela? Eshi Jesus a nyumunwa, okwa yandja ongushu yohonde yaye i li eyambo la wanenena, oyo tai “tu koshola omanyono etu aeshe.” — 1 Joh. 1:7.

14. Otu shi shii ngahelipi kutya exunganeko olo Jehova a popya moshikunino shaEden kala li la wanifwa po diva pefimbo opo? Shi yelifa.

¹⁴ Eendjovo odo Jehova a popya moshikunino shaEden otadi ulike kutya opa li pe na okupita oule wefimbo, opo exunganeko olo li wanifwe po pauyadi. Opa li pe na okupita efimbo, opo omwalikadi a dale oludalo olo la udanekwa, Ondiaboli i ongele ovashikuli vayo, nopo pa kale outondwe pokati keengudu odo mbali. Ngeenge otwa udu ko nawa exunganeko olo otashi ke tu kwafela, molwaashi ole tu londwela kutya ounyuni aushe, oo u li mepangelo laSatana, otau ka tonda oshiwana shaJehova. Lwanima, Jesus naye okwa ka pa ovashikuli vaye elondwelo la faafana. (Mark. 13:13; Joh. 17:14) Otwa mona filufilu ewanifo loshitukulwa shexunganeko olo, unene tuu momukokomoko weedula 100 da ka lupuka. Ngahelipi mbela?

15. Omolwashike ounyuni u tonde neenghono oludalo lomwalikadi shi dulife nale, nomolwashike tuhe na okutila Satana?

¹⁵ Diva konima eshi Jesus a nangekwa po e li Ohamba yopaMessias mo 1914, okwa umba mo Satana meulu. Paife Satana okwa ngabekelwa kombada yedu, a teelela okuhanaunwa po. (Eh. 12:9, 12) Ashike okwe lipyakidila neenghono. Satana okwa fula onya nota ponokele oshiwana shaKalunga. (Eh. 12:13, 17) Osho osha ningifa ounyuni u kale u tonde neenghono oshiwana shaKalunga. Katu na nandenande etomheno lokukala twa tila Satana novashikuli vaye. Ponhele yaasho, otwa tomhwa ngaashi omuyapostoli Paulus, oo a shanga a ti: “Ngeenge Kalunga oku li pamwe nafye, olyelye ta dulu oku tu finda?” (Rom. 8:31) Ohatu dulu okukala nelineekelo filufilu muJehova, molwaashi ngaashi twe shi mona, oshitukulwa shihapu shexunganeko olo li li muGenesis 3:15 osha wanifwa nale.

16-18. Ongahelipi Curtis, Ursula naJessica va mona ouwa, eshi va uda ko Genesis 3:15?

¹⁶ Eudaneko laJehova olo tali hangwa muGenesis 3:15 otali dulu oku tu kwafela tu ungaunge neyeleko keshe olo hatu shakeneke mokukalamwenyo kwetu. Curtis, oo e li omutumwa moGuam, okwa ti: “Omafimbo amwe,  ohandi ungaunga nomayeleko nosho yo noinima oyo hai nyemateke nge, nohai shi ningifa shidjuu kwaame okukala omudiinini kuJehova. Ndele eshi nda dilonga kexunganeko olo li li muGenesis 3:15, osha kwafela nge ndi kale nde lineekela Tate womeulu.” Curtis okwa teelela nodjuulufi, eshi Jehova ta ka xulifa po omaudjuu etu aeshe.

¹⁷ Ursula, omumwameme wokoBavaria, okwa popya kutya eudeko lexunganeko olo li li muGenesis 3:15, ole mu kwafela a kale a tomhwa kutya Ombiibeli oya nwefwa mo kuKalunga. Okwa mona nghee omaxunganeko aeshe a pambafana nexunganeko olo, noshe mu kumwifa neenghono. Okwa weda ko a ti: “Eshi nde lihonga kutya Jehova okwa ninga po sha divadiva, opo e tu pe eteelelo, osha ningifa nge ndi kale ndi mu hole unene, shi dulife nale.”

¹⁸ Jessica, wokoMicronesia, okwa ti: “Natango ohandi dimbuluka nghee nda li ndi udite oshikando shotete, eshi nda li nda didilika kutya onda mona oshili. Exunganeko olo li li muGenesis 3:15 ola wanifwa. Ola kwafela nge ndi dimbuluke kutya omaupyakadi oo hatu shakeneke paife, hao Kalunga a li a lalakanena. Ola pameka yo eitavelo lange kutya okulongela Jehova oku li oshinima sha denga mbada, osho handi dulu okumona paife, nokuli nomonakwiiwa.”

19. Omolwashike hatu dulu okukala noushili kutya oshitukulwa shaxuuninwa shexunganeko olo otashi ka wanifwa?

¹⁹ Ngaashi twe shi mona, Genesis 3:15 ota twikile okuwanifwa. Oludalo lomwalikadi noludalo leyoka, ova popiwa kutya ovo oolyelye. Jesus, oo e li oshitukulwa sha fimanenena sholudalo lomwalikadi, okwa veluka eshi a li a tuwa moshififinwa, nopaife oku li Ohamba ihai fi inaenghono. Jehova okwa hoolola hanga aveshe ovo tava ka pangela pamwe nOmona waye meulu. Molwaashi oshitukulwa shotete shexunganeko olo osha wanifwa, otu na elineekelo filufilu kutya oshitukulwa shaxuuninwa shi na sha nokunyanyaula omutwe weyoka, nasho otashi ka wanifwa yo. Ovapiya vaJehova ovadiinini otava ka kala va hafa neenghono, eshi Satana ta ka hanaunwa po. Ofimbo twa teelela osho shi ningwe, inatu shololeni. Kalunga ketu oku shii okulineekelwa. Ota ka etela ‘oiwana aishe kombada yedu’ omanangeko noupuna okupitila moludalo lomwalikadi. — Gen. 22:18.