1. Otu na okutala ko ngahelipi omhito yokwiilikana kuJehova?

 OTWA pewa oufembanghenda munene wokupopya meilikano nOmushiti weulu nedu. Diladila kwaashi: Ohatu dulu okumbubulila Jehova omitima detu efimbo keshe nomelaka keshe, nopehe na okuninga oshilaye. Ohatu dulu okwiilikana kuye ngeenge tu li meembete moshipangelo, ile tu li modolongo, tu na elineekelo kutya Tate wetu omunahole ota ka pwilikina kufye. Onghee hano, katu na okukwata okahetengi oufembanghenda wa tya ngaho.

2. Ohamba David oya ulika ngahelipi kutya oya lenga oufembanghenda weilikano?

² Ohamba David oya li ya lenga oufembanghenda weilikano. Oya imbila Jehova ya ti: “Eindilo lange nali talwe kwoove, olo etwimino.” (Eps. 141:1, 2) Pefimbo laDavid, omatwimino mayapuki, oo a li haa longifwa kovapristeri melongelokalunga lashili, okwa li haa kala a longekidwa noukeka. (Ex. 30:34, 35) Eshi David a popya shi na sha nomatwimino, okwa li a hala okudiladila noukeka kwaasho a li ta ka popya meilikano naXe womeulu. Nafye otwa halelela okuninga ngaho. Otwa hala omailikano etu a kale a hokiwa kuJehova.

3. Otu na okukala noikala ya tya ngahelipi ngeenge hatu ilikana kuJehova, nomolwashike?

³ Ngeenge hatu ilikana kuJehova, otu na okuhenuka okukala twa fa twe mu ikilila unene. Ponhele yaasho, otu na okwiilikana kuye nefimaneko lomoule. Diladila shi na sha nomamoniko oo a li a ulikilwa Jesaja, Hesekiel, Daniel naJohannes. Omamoniko oo okwa yoolokafana, ashike oku na oshinima shimwe sha faafana. Aeshe otaa popi kombinga yaJehova, oo e li Ohamba ikumwifi. Jesaja okwa ‘mona Omwene a kala omutumba kolukalwapangelo la kula nola yeluka li na oshinge.’  (Jes. 6:1-3) Hesekiel okwa mona Jehova e li omutumba metemba laye, la dingililwa ‘kevadimo ngaashi outa wodula.’ (Hes. 1:26-28) Daniel okwa mona “Omuxungu” a djala oikutu itoka, nokolukalwapangelo laYe okwa li taku di omalaka omundilo. (Dan. 7:9, 10) Johannes okwa mona Jehova e li omutumba kolukalwapangelo la dingililwa kouta wodula wa fa emanya litwima omafo. (Eh. 4:2-4) Eshi hatu dilonga koshinge sha denga mbada shaJehova, otashi tu dimbulukifa oufembanghenda munene wokwiilikana kuye nanghee sha fimana okwiilikana kuye nefimaneko lomoule. Ndele otu na okwiilikana ngahelipi?

4. Oshike hatu lihongo meendjovo dopehovelo deilikano laJesus, olo tali hangwa muMateus 6:9, 10?

⁴ Lesha Mateus 6:9, 10. MEudifo lokOmhunda, Jesus okwa honga ovahongwa vaye nghee ve na okwiilikana monghedi oyo tai hafifa Kalunga. Konima eshi Jesus a popya kutya “omu na okwiilikana ngaha,” okwa tumbula tete oinima ya fimana oyo ya pamba elalakano laJehova. Oinima oyo ongaashi: okuyapulifwa kwEdina laYe, okuuya kwOuhamba, oo tau ka hanauna po ovapataneki aveshe vaKalunga, nomanangeko noupuna oo Jehova ta ka etela ovanhu kombada yedu monakwiiwa. Onghee hano, ngeenge otwa kala hatu kwatele mo oinima ya tya ngaho momailikano etu, ohatu ka ulika kutya ehalo laKalunga olo oshinima sha fimana kufye.

5. Jehova oha pwilikine ngoo komailikano etu, ngeenge hatu ilikana oinima yopaumwene?

⁵ Meendjovo deilikano odo Jesus a shikulifa ko, okwa ulika kutya osha yuka okwiilikana kombinga yoinima yetu yopaumwene. Ohatu dulu okupula Jehova e tu pe oipalwifa yefiku, e tu dimine po omatimba etu, e tu amene komayeleko noku tu xupife komunawii. (Mat. 6:11-13) Ngeenge otwa pula Jehova oinima oyo, ohatu ka ulika kutya otwa pumbwa ekwafo laye notwa hala oku mu hafifa.

6. Mbela otu na ashike okwiilikana kombinga yoinima oyo ya tumbulwa kondadalunde meilikano laJesus? Shi yelifa.

⁶ Jesus ina teelela ovashikuli vaye va kopele momutwe eendjovo odo di li moshihopaenenwa sheilikano laye. Momailikano makwao oo a ilikana, okwa tumbula oinima ya yoolokafana oyo a li te lipula nayo pefimbo  opo. (Mat. 26:39, 42; Joh. 17:1-26) Sha faafana, nafye ohatu dulu okwiilikana kombinga yakeshe shimwe osho hatu lipula nasho. Ngeenge hatu ningi etokolo, ohatu dulu okwiilikana tu pewe ounongo neudeko. (Eps. 119:33, 34) Fimbo inatu hovela oshinakuwanifwa shidjuu, ohatu dulu okwiilikana tu pewe ounongo neendunge dokuyoolola. (Omayel. 2:6) Ovadali otava dulu okwiilikanena ovana, nounona otava dulu okwiilikanena ovadali vavo. Atusheni ohatu dulu notu na okwiilikanena ovakonakonimbiibeli vetu nosho yo ovo hatu udifile. Ashike katu na ashike okukala hatu ilikana kuJehova e tu kwafele.   

7. Omolwashike tu na okutanga Jehova meilikano?

⁷ Otu na okudimbuluka okutanga Jehova momailikano etu. Kape na vali umwe a wana okutangwa e dule Kalunga ketu. Oku na ‘onghedi iwa noku yadi ekufilo.’ Oku li yo ‘omunalukeno, omunanghenda, omunanheni, omunene mouwanghenda nomoshili.’ (Eps. 86:5, 15) Onghee hano, otu na etomheno la kola lokutanga Jehova omolwomaukwatya nomolwoilonga yaye.

8. Ohatu dulu okupandula Jehova omolwoinima imwe ilipi? (Epsalme 104:12-15, 24)

⁸ Kakele kokutanga Jehova momailikano etu, ohatu dulu oku mu pandula omolwoinima ya denga mbada oyo e tu pa. Pashihopaenenwa, ohatu dulu oku mu pandula omolwomaluvala makumwifi, oo hatu mono keengala, eendja domaludi mahapu nehafo olo hatu mono okudja kookaume ketu kopofingo. Tate yetu omunahole oye e tu pa oinima ya tya ngaho, naikwao ihapu, opo tu kale twa hafa. (Lesha Epsalme 104:12-15, 24.) Naasho sha fimanenena, otu na okupandula Jehova omolweendja da henena dopamhepo odo he tu pe nomolweteelelo la denga mbada li na sha nonakwiiwa olo tu na.

9. Oshike tashi tu kwafele tu dimbuluke okupandula Jehova? (1 Ovatessalonika 5:17, 18)

⁹ Ohatu dulu okudimbwa noupu okupandula Jehova omolwoinima aishe oyo e tu ningila. Oshike tashi dulu oku tu kwafela tu dimbuluke? Oto dulu okushanga omusholondodo woinima yokondadalunde, oyo wa hala okwiilikana kombinga yayo nokukala ho tale efimbo nefimbo nghee Jehova a nyamukula omailikano  oye. Opo nee to ilikana u mu pandule, eshi e ku kwafela. (Lesha 1 Ovatessalonika 5:17, 18.) Diladila kombinga yaashi: Ohatu kala twa hafa nohatu kala tu udite tu holike, ngeenge vamwe ve tu pandula. Sha faafana, ngeenge otwa kala hatu dimbuluka okupandula Jehova eshi a nyamukula omailikano etu, otashi ke mu hafifa. (Ovak. 3:15) Ashike otu na vali etomheno la fimana olo tali tu linyengifa tu pandule Kalunga ketu?

10. Metwokumwe na 1 Petrus 2:21, omolwashike tu na okupandula Jehova, eshi a tuma Jesus kombada yedu?

¹⁰ Lesha 1 Petrus 2:21. Otu na okupandula Jehova, eshi a tuma Omona waye omuholike e tu honge. Ngeenge hatu lesha kombinga yonghalamwenyo yaJesus, ohatu lihongo shihapu shi na sha naJehova nanghee hatu dulu oku mu hafifa. Ngeenge otu na eitavelo mekuliloyambo laKristus, ohatu ka kala tu na ekwatafano lopofingo naJehova Kalunga nokukala tu na ombili naye. — Rom. 5:1.

11. Omolwashike tu na okwiilikana medina laJesus?

¹¹ Ohatu pandula Jehova eshi hatu dulu okwiilikana kuye okupitila mOmona waye. Jesus oku li oupitilo oo Jehova ta longifa, opo a nyamukule omailikano etu. Jehova oha pwilikine noha nyamukula omailikano oo haa ilikanwa medina laJesus. Jesus okwa ti: “Keshe osho tamu indile medina lange, ohandi shi mu pe, opo Omona a fimanekife Xe.” — Joh. 14:13, 14.

12. Onetomheno vali lilipi tu na okupandula Jehova omolwOmona waye?

¹² Jehova ohe tu dimine po omatimba etu pakanghameno lekuliloyambo laJesus. Omishangwa oda popya kombinga yaJesus kutya oku li “omupristeri munene, oo e li omutumba meulu kolulyo lolukalwapangelo laKalunga Omunefimano alishe.” (Heb. 8:1) Jesus oku li “omukwafi oo e li puTate.” (1 Joh. 2:1) Inatu pandula tuu eshi Jehova e tu pa Omupristeri Munene omunanghenda, oo ha udu ko omaunghundi etu nohe “tu ilikanene”! (Rom. 8:34; Heb. 4:15) Molwaashi inatu wanenena, ngeno kapa li ekuliloyambo laJesus, ngeno itatu dulu okweehena popepi naJehova okupitila meilikano. Onghee hano, otu na okudimina kutya itatu dulu okuulika olupandu letu filufilu omolwoshali i na ondilo oyo Jehova e tu pa, oshali yOmona waye omuholike.

13. Ongahelipi Jesus a ulika kutya oku hole ovahongwa vaye moufiku oo wa tetekela efyo laye?

¹³ Moufiku oo wa tetekela efyo laye, Jesus okwa ilikanena ovahongwa vaye efimbo lile, a pula Xe e “va amene komunawii.” (Joh. 17:15) Osho otashi ulike kutya Jesus oku va hole neenghono. Nonande okwa li e shii kutya oku li poku ka monifwa oixuna neenghono, okwa li natango te lipula shi na sha novahongwa vaye.

14. Ongahelipi hatu dulu okuulika kutya otu hole ovamwatate novamwameme?

¹⁴ Ngaashi Jesus, katu na ashike okukala hatu yandje elitulemo keemhumbwe detu. Ponhele yaasho, otu na okukala hatu ilikanene ovamwatate novamwameme pandjikilile. Ngeenge otwa ningi ngaho, ohatu ka dulika koshipango shaJesus shi na sha nokuholafana nokuulikila Jehova kutya otu hole ovaitaveli vakwetu. (Joh. 13:34) Okwiilikanena ovamwatate itashi mane po efimbo. Eendjovo daKalunga ode tu lombwela da ti kutya “eindilo lomuyuki oli na eenghono notali dulu okukwafela.” — Jak. 5:16.

15. Omolwashike tu na okwiilikanena ovaitaveli vakwetu?

¹⁵ Otwa pumbwa okwiilikanena ovaitaveli  vakwetu, molwaashi ova taalela omaupyakadi mahapu. Ohatu dulu okupula Jehova e va kwafele ve lididimikile omikifi, oiponga yopaushitwe, oita, omahepeko, ile omaupyakadi vali makwao. Ohatu dulu yo okwiilikanena ovamwatate novamwameme, ovo hava longo noudiinini, opo va kwafele ovo ve li momhumbwe. Otashi dulika u shii vamwe ovo va taalela omaupyakadi a tya ngaho. Omolwashike ito va tumbula komadina meilikano loye lopaumwene? Onghee hano, ngeenge otwa pula Jehova e va kwafele ve lididimike, ohatu ka ulika kutya otu hole shili ovamwatate.

16. Omolwashike tu na okwiilikanena ovo tava kwatele komesho mokati ketu?

¹⁶ Ovo tava kwatele komesho meongalo ohave shi pandula neenghono, ngeenge hatu va tumbula momailikano etu. Omailikano oo oku li ekwafo linene kuvo. Omuyapostoli Paulus okwa li e shii kutya okwa pumbwa vamwe ve mu ilikanene. Okwa ti: “Ilikanenei nge yo ndi pewe eendjovo diwa, opo ndi dule okupopya nouladi eshi handi udifa kombinga yoshiholekwa shiyapuki shi na sha nonghundana iwa.” (Ef. 6:19) Kunena, nafye otu na ovamwatate vahapu, ovo hava longo noudiinini, ovo tava kwatele komesho mokati ketu. Ohatu ka ulika kutya otu va hole, ngeenge otwa pula Jehova a nangeke noupuna oilonga yavo.

17-18. Opeemhito dilipi tashi dulika tu pulwe tu ilikane ponhele yavamwe, notu na okukaleka shike momadiladilo?

¹⁷ Omafimbo amwe, otashi dulika tu pulwe tu ilikane ponhele yavamwe. Pashihopaenenwa, omumwameme oo ta kwatele komesho ekonakonombiibeli otashi dulika a pule oo ta longo pamwe naye a ilikane ko. Omumwameme oo a waimina mukwao otashi dulika ke shii nawa kombinga yomukonakoni oo. Onghee otashi ka kala shiwa, ngeenge oye a xulifa neilikano pekonakonombiibeli olo. Osho otashi ke mu kwafela a shiive nawa osho e na okwiilikana kombinga yomukonakoni.

¹⁸ Omumwatate otashi dulika a pulwe a ilikane pelongekido loilonga yomomapya, ile pokwoongala. Ovamwatate ovo ve na oufembanghenda wokwiilikana ove na okukaleka momadiladilo elalakano lokwoongala. Eilikano kali fi omhito yokuyandja omayele, ile yokuninga omashiivifo. Omakwoongala mahapu  eongalo ohaa kala e na ominute nhano odo da nuninwa eimbilo neilikano, naasho osha ningwa, opo omumwatate oo ta ilikana a ha ilikane ‘eilikano lilelile,’ unene tuu pehovelo lokwoongala. — Mat. 6:7.

19. Oshike tashi ke tu kwafela tu kale twe lilongekidila efiku laJehova letokolo?

¹⁹ Otwa pumbwa okutala ko eilikano li li oshinima sha fimanenena monghalamwenyo yetu, eshi efiku laJehova letokolo tali ehene popepi. Jesus okwa popya shi na sha naasho a ti: “Kaleni oupafi nokwiilikana mwa mana mo efimbo keshe opo mu dule oku ka xupa eshi oinima aishe oyo tai ka ningwa.” (Luk. 21:36) Onghee hano, ngeenge otwa kala hatu ilikana pandjikilile otashi ka pameka eitavelo letu nohatu ka kala twe lilongekidila efiku laKalunga letokolo eshi tali ka fika.

20. Ongahelipi omailikano etu taa dulu okukala a fa omatwimino edimba liwa?

²⁰ Oshike twa kundafana fiyo opapa? Otwa lenga neenghono oufembanghenda oo tu na weilikano. Otu na okwiilikana kombinga yoinima ya fimanenena i na sha nelalakano laJehova. Otu na yo okupandula Omona waKalunga, Ouhamba oo u li mepangelo laye notu na okwiilikanena ovaitaveli vakwetu. Oshoshili kutya ohatu dulu okwiilikana kombinga yeemhumbwe detu dopalutu nosho yo dopamhepo. Ngeenge otwa kala hatu diladila noukeka shi na sha naasho hatu ka popya momailikano etu, ohatu ka ulika kutya otwa lenga oufembanghenda ou weilikano. Eendjovo detu otadi ka kala da fa omatwimino edimba liwa kuJehova nota ka kala ‘e di hokwa.’ — Omayel. 15:8.