1. Oshike Jehova a hala shi wanifwe po kunena?

 KUNENA, Kalunga okwa hala onghundana iwa yOuhamba i udifilwe kombada yedu alishe. (Mark. 13:10; 1 Tim. 2:3, 4) Ei oilonga yaJehova nosha fimana neenghono eshi a nangeka po Omona waye omuholike oye e i wilike. Ohatu dulu okukala noushili kutya koshi yewiliko laJesus, oilonga yokuudifa otai ka wanifwa po ngaashi Jehova a hala, ofimbo exulilo inali uya. — Mat. 24:14.

2. Oshike hatu ka kundafana moshitukulwa eshi?

² Moshitukulwa eshi, ohatu ka mona nghee Jesus ta longifa “omupiya omudiinini nomunaendunge” a yandje eendja dopamhepo nokuwilika ovashikuli vaye omolwoshikonga shinenenene shokuudifa mondjokonona aishe. (Mat. 24:45) Ohatu ka mona yo kutya ongahelipi keshe umwe womufye ta dulu okuyambidida Jesus nosho yo omupiya omudiinini nomunaendunge.

3. Jesus okwa pewa eenghonopangelo dilipi?

³ Jesus oye ta wilike oilonga yokuudifa. Ongahelipi hatu dulu okukala noushili u na sha naasho? Diva ofimbo Jesus ina shuna meulu, okwa li a ongala pamwe novashikuli vaye vamwe ovadiinini komhunda i li muGalilea. Okwe va lombwela a ti: “Onda pewa eenghonopangelo adishe meulu nokombada yedu.” Didilika osho a shikulifa ko, a ti: “Onghee hano, indeni mu ka ninge ovanhu vomoiwana aishe ovahongwa.” (Mat. 28:18, 19) Komesho yaaishe, Jesus okwa pewa eenghono dokuwilika oilonga yokuudifa.

4. Omolwashike hatu dulu okukala noushili kutya Jesus ota pashukile natango oilonga yokuudifa?

 ⁴ Jesus okwa popya kutya oilonga yokuudifa nokuninga ovanhu ovahongwa otai ka wanifwa po ‘moiwana aishe’ nonokutya ota kala pamwe novashikuli vaye “alushe fiyo omomafiku axuuninwa ounyuni ou.” (Mat. 28:20) Eendjovo odo otadi ulike filufilu kutya oilonga yokuudifa otai ka twikila okukala koshi yepashukilo laJesus fiyo opefimbo letu.

5. Onghandangala ilipi hatu dana mewanifo lEpsalme 110:3?

⁵ Jesus okwa li a tomhwa kutya pexulilo lounyuni otapa ka kala ovalongi va wana. Okwa li e shii kutya eendjovo dopaxunganeko domupsalme otadi ka wanifwa, odo tadi ti: “Oshiwana shoye oshe lilongekidila nehalo liwa unene, mefiku lehomono loye.” (Eps. 110:3) Ngeenge oho kufa ombinga moilonga yokuudifa, oto yambidida Jesus nosho yo omupiya omudiinini noto kwafele mokuwanifwa po kwexunganeko olo. Oilonga otai pula komesho, ashike ope na omashongo.

6. Eshongo limwe lilipi ovaudifi vOuhamba va taalela kunena?

⁶ Eshongo limwe olo ovaudifi vOuhamba va taalela, omapataneko. Ovashunimonima, ovawiliki vomalongelokalunga nosho yo ovanapolotika ohava lombwele ovanhu vahapu oipupulu i na sha noilonga yetu. Ngeenge ovapambele vetu, ovashiivikile nosho yo ovanailonga pamwe nafye ova nwefwa mo koipupulu ya tya ngaho, otashi dulika ve tu fininike tu efe po okulongela Jehova nokuudifa. Moilongo imwe, ovamwatate ohava ningilwa omatilifo, hava ponokelwa, ile va kwatwe po, nokutulwa nokuli modolongo. Ihashi tu kumwifa, ngeenge ovanhu tava ungaunga nafye monghedi ya tya ngaho. Jesus okwa xunganeka a ti: ‘Otamu ka tondwa koiwana aishe omolwedina lange.’ (Mat. 24:9) Outondwe wa tya ngaho, otau ulike kutya otwa hokiwa kuJehova. (Mat. 5:11, 12) Ondiaboli oyo tai wilike oilonga ii ya tya ngaho. Ashike Jesus oku na eenghono dinene di dule daSatana. Molwaashi Jesus ote tu yambidida, onghundana iwa otai udifilwa ovanhu vomoiwana aishe. Natu ka taleni koumbangi.

7. Oumbangi ulipi tau ulike kutya Ehololo 14:6, 7 otali wanifwa?

⁷ Tu li ovaudifi vOuhamba, otwa taalela vali eshongo limwe lokuudifila ovanhu vomalaka e lili noku lili. Memoniko olo a ulikila omuyapostoli Johannes, Jesus okwa xunganeka kutya pefimbo letu onghundana iwa otai ka finda eshongo olo. (Lesha Ehololo 14:6, 7.) Ngahelipi mbela? Otwe shi ningifa tashi shiiva, opo ovanhu vahapu va mone omhito yokutambula ko etumwalaka lOuhamba. Kunena, ovanhu mounyuni aushe otava dulu okulesha ouyelele wa kanghamena kOmbiibeli ko-website yetu yo jw.org, molwaashi oku na ouyelele momalaka e dulife 1 000. Okwa yandjwa epitikilo opo embo Nghee to dulu okuhafela onghalamwenyo fiyo alushe!, olo li li oshilongifo shetu sha denga mbada shokuninga ovanhu ovahongwa, li tolokwe momalaka e dulife po 700. Eendja dopamhepo oda yandjwa yo molupe louvidio, opo ku kwafelwe eembolo nosho yo meendada doshipofi, opo ku kwafelwe ovapofi. Otu wete nghee omaxunganeko taa wanifwa. Ovanhu “vomomalaka aeshe oiwana” otave lihongo okupopya “elaka la koshoka, NW” loshili yOmbiibeli. (Sak. 8:23; Sef. 3:9) Aishe oyo oya wanifwa po koshi yewiliko laJesus Kristus.

8. Oilonga yetu yokuudifa oya pondola shi fike peni fiyo opapa?

⁸ Kunena, ovanhu ve dulife 8 000 000 moilongo 240 otava endafana nehangano laJehova, nomudo keshe ovanhu omayovi omilongo ohava ninginifwa. Kakele komivalu odo,  ovahongwa vape otava kulike omaukwatya opaKriste, tava djala “omunhu mupe.” (Kol. 3:8-10) Vahapu ova efa po eenghedi inadi koshoka, elongifo leenghono, okatongo nosho yo omhepo youkwashiwana. Exunganeko olo li li muJesaja 2:4 otali wanifwa, olo tali ti: “Itave lilongo vali oukwaita.” Molwaashi ohatu longo noudiinini tu djale omunhu mupe, ohatu kwafele ovanhu va ehene popepi nehangano laKalunga nokuulika kutya ohatu shikula omuwiliki wetu Kristus Jesus. (Joh. 13:35; 1 Pet. 2:12) Omolwashike osho tashi ningwa? Omolwaashi Jesus ote tu pe ekwafo alishe olo twa pumbwa.

9. Metwokumwe naMateus 24:45-47, oshike sha xunganekwa shi na sha nefimbo lexulilo?

⁹ Lesha Mateus 24:45-47. Jesus okwa xunganeka kutya pefimbo lexulilo, ota ka nangeka po “omupiya omudiinini nomunaendunge,” opo a yandje eendja dopamhepo. Onghee otwa teelela omupiya a longe noudiinini pefimbo letu. Osho otwe shi limonena. Jesus okwa longifa okangudu kanini kovalumenhu ovavaekwa, opo va pe oshiwana shaKalunga nosho yo ovo ve na ohokwe ‘‘eendja pefimbo la wapala.’’ Ovalumenhu ovo inave litala ko ve dule ovaitaveli vakwao. (2 Kor. 1:24) Ponhele yaasho, ove shii kutya Jesus Kristus oye “ohamba nomupangeli” woshiwana shaye. — Jes. 55:4.

10. Oshishangomwa shilipi shomoishangomwa oyo ya ulikwa mefano she ku tomha, opo u ende mondjila oyo tai twala komwenyo waalushe?

¹⁰ Okudja mo 1919, omupiya omudiinini okwa kala ta nyanyangida oishangomwa i lili noku lili, oyo ya kwafela ovo ve na ohokwe va mone omhito yavo yotete yokulihonga oshili yEendjovo daKalunga. Mo 1921, omupiya okwa nyanyangida embo The Harp of God, opo li kwafele ovo ve na ohokwe ve lihonge  omahovelohongo Ombiibeli. Mokweendela ko kwefimbo, opa ka nyanyangidwa vali oishangomwa imwe. Oshishangomwa shilipi she ku kwafela u shiive nou kale u hole Tate yetu womeulu? Mbela embo “Let God Be True,” Oshili oyo tai twala komwenyo waalushe, Ove oto Dulu Okukala nOmwenyo Fiyo Alushe mOparadisa kombada yEdu, Eshiivo olo tali twala komwenyo waalushe, Ombiibeli otai hongo lela shike?, Oshike hatu lihongo mOmbiibeli?, ile oshishangomwa shetu shipe, Nghee to dulu okuhafela onghalamwenyo fiyo alushe! Oishangomwa aishe oyo oya nyanyangidwa, opo i tu kwafele tu ninge ovanhu ovahongwa noya kala ekwafo olo twa pumbwa, pefimbo opo ya pita.

11. Omolwashike sha fimana kufye atushe tu lihonge shihapu kombinga yaJehova nosho yo Ombiibeli?

¹¹ Ovanhu ovo vape ve na ohokwe havo ashike va pumbwa eendja da pama. Atushe otwe di pumbwa. Omuyapostoli Paulus okwa shanga a ti: “Eendja da pama odaava va kula.” Paulus okwa weda ko a ti, okutula moilonga osho hatu lihongo mOmbiibeli otashi tu kwafele tu “dule okutongola ouwa nowii.” (Heb. 5:14) Otashi dulu okukala shidjuu neenghono okudulika koiteelelwa yaJehova paife, molwaashi ovanhu vahapu ove na elihumbato la xutuka neenghono. Ashike Jesus ota shilipaleke kutya ohatu lihongo oinima oyo twa pumbwa, opo tu dule okupameka eitavelo letu. Nouyelele wa tya ngaho, owa kanghamena kEendjovo daKalunga da nwefwa mo, Ombiibeli. Omupiya omudiinini ota longekida nokutukula eendja da tya ngaho, koshi yewiliko laJesus.

12. Ngaashi Jesus, otwa fimanekifa ngahelipi edina laKalunga?

¹² Ngaashi Jesus, otwa fimanekifa edina laKalunga ngaashi sha pumbiwa. (Joh. 17:6, 26) Pashihopaenenwa, mo 1931, otwa li twa dimina tu ifanwe nedina lOpamishangwa Eendombwedi daJehova. Kungaho otwa ulika  nghee edina laKalunga la fimana kufye nonokutya otwa hala okwiifanwa nedina laTate wetu womeulu. (Jes. 43:10-12) Okudja muOktoba omudo oo tuu oo, edina laKalunga ola holoka kombada yakeshe oshifo eshi. Shikwao vali, edina laKalunga ola li la shunwa peenhele opo la li li na okukala mOmbiibeli yo-New World Translation of the Holy Scriptures. Osho osha yooloka ko filufilu keengeleka dOukwakriste odo da kufa mo edina laJehova momatoloko ado mahapu Eembiibeli.

13. Oshike she ku tomha kutya Jesus ota longifa “omupiya omudiinini nomunaendunge” kunena? (Johannes 6:68)

¹³ Jesus okwa dika po ehangano lididilikwedi kombada yedu, olo tali xumifa komesho elongelokalunga la koshoka, ta longifa “omupiya omudiinini nomunaendunge.” Ou uditile ngahelipi ehangano olo? Otashi dulika u udite ngaashi omuyapostoli Petrus, oo a lombwela Jesus a ti: “Otu ye vali kulyelye? Oove u na eendjovo domwenyo waalushe.” (Joh. 6:68) Mbela ngeno otu li peni kunena, ngeno katwa li hatu endafana nehangano laJehova? Kristus oha shilipaleke kutya otwa palulwa pamhepo okupitila mulo. Ohe tu deula yo, opo tu kufe ombinga pauyadi moukalele. Shikwao vali, ohe tu kwafele tu djale “omunhu mupe,” opo tu wapalele Jehova. — Ef. 4:24.

14. Ongahelipi wa mona ouwa, eshi u li oshitukulwa shehangano laJehova pefimbo eli lomukifi wekomba o-COVID-19?

¹⁴ Jesus oha yandje ewiliko lopandunge pomafimbo oudjuu. Ouwa u na sha newiliko olo owe limonikila eshi omukifi wekomba wo-COVID-19 wa hovela. Ofimbo vahapu mounyuni va li vehe shii osho ve na okuninga po, Jesus okwa shilipaleka kutya otwa pewa ewiliko la yela, opo tu kale twa amenwa. Otwa ladipikwa yo tu djale oumaska ngeenge tu li mokati  kovanhu nokulikala kokule. Ovakulunhuongalo ova dimbulukifwa va kale hava shilipaleke pandjikilile kutya keshe umwe meongalo okwa wanifilwa po eemhumbwe daye, opo a kale a amenwa, e na oukolele nokukala e na ekwatafano liwa naJehova. (Jes. 32:1, 2) Otwa pewa yo ewiliko la wedwa po nokutuwa omukumo okupitila meelaporta dOlutuwiliki.

15. Ewiliko lilipi twa li twa pewa li na sha nokwoongala nosho yo noilonga yokuudifa pefimbo lomukifi wekomba, nosha eta oidjemo ilipi?

¹⁵ Pefimbo lomukifi wekomba, otwa li yo twa pewa ewiliko la yela li na sha nanghee tu na okwoongala nokukufa ombinga moilonga yokuudifa. Otwa li twa hovela diva okwoongala kwopaKriste, oyoongalele inini naayo ya kula hatu longifa ointaneta. Otwa li yo twa hovela okuyandja oundombwedi mokushanga eenhumwafo nokudenga eengodi. Jehova okwa nangeka noupuna eenghendabala detu. Oitaimbelewa ihapu oya lopota ekulo linene lovaudifi. Shikwao vali, vahapu ova mona oimoniwa tai tungu pefimbo eli. — Tala oshimhungu “ Jehova oha nangeke noupuna oilonga yetu yokuudifa.”

16. Eshilipaleko lilipi twa pumbwa okukala tu na?

¹⁶ Vamwe otashi dulika va li ve udite kutya ehangano otali yandje unene elitulemo lihapu komukifi wekomba. Ashike konima yefimbo, ova ka mona kutya ewiliko olo va pewa oli li pandunge. (Mat. 11:19) Ngeenge otwa dilonga konghedi yopahole omo Jesus ta wilike oshiwana shaye, ohatu ka kala twa tomhwa filufilu kashi na nee mbudi kutya oshike tashi ka holoka po monakwiiwa. Jehova nOmona waye omuholike otava ka kala pamwe nafye. — Lesha Ovaheberi 13:5, 6.

17. Ou udite ngahelipi eshi to longo koshi yepashukilo laJesus?

¹⁷ Inatu nangekwa tuu noupuna okulonga koshi yewiliko laJesus! Otu li mehangano olo inali tukaulwa komufyuululwakalo, koukwashiwana nosho yo komalaka. Ohatu pewa ewiliko la denga mbada okudja mEendjovo daKalunga nedeulo olo twa pumbwa, opo tu udife. Ohatu kwafelwa pauhandimwe tu djale omunhu mupe nokulihonga okukala tu hole ovanhu aveshe. Otu na etomheno la femba lokukala tu udite etumba, molwaashi Jesus oye omuwiliki wetu.