1. Ou uditile ngahelipi oshili?

 OSHIWANA shaJehova oshi hole oshili, oyo i li mEendjovo daye. Eitavelo letu ola kanghamena koshili oyo. (Rom. 10:17) Otwa itavela kutya Jehova oye a tota po eongalo lopaKriste, “olo tali yambidida nokupopila oshili.” (1 Tim. 3:15) Ohatu dulika yo nehalo liwa kwaavo “tava kwatele komesho” mokati ketu, eshi tave tu yelifile oshili okudja mOmbiibeli, noku tu pa ewiliko li li metwokumwe nehalo laKalunga. — Heb. 13:17.

2. PaJakob 5:​19, oshike tashi dulu oku tu ningilwa, konima eshi twe lihonga oshili?

² Nonande otwa tambula ko oshili, nohatu dulika kewiliko, olo hatu pewa kehangano laKalunga, oshi na oupu tu pukifwe. (Lesha Jakob 5:19.) Satana ina hala tu kale twe lineekela Ombiibeli nosho yo ewiliko, olo hatu pewa kehangano laKalunga. — Ef. 4:14.

3. Omolwashike twa pumbwa okudiinina oshili? (Ovaefeso 6:​13, 14)

³ Lesha Ovaefeso 6:​13, 14. Mafiku, Ondiaboli otai ka longifa omitotolombo, opo i nwefe mo oiwana aishe i pataneke Jehova. (Eh. 16:​13, 14) Otai ka ninga yo eenghendabala da mana mo, opo i pukife oshiwana shaJehova. (Eh. 12:9) Onghee osha fimana okulihonga eyooloko pokati koshili noipupulu, nokukala hatu dulika koshili. (Rom. 6:17; 1 Pet. 1:22) Osho otashi ke tu kwafela, opo tu dule oku ka xupa poudjuu munene.

4. Oshike hatu ka kundafana moshitukulwa eshi?

 ⁴ Moshitukulwa eshi, ohatu ka tala komaukwatya avali, oo tae tu kwafele tu didilike mo oshili, oyo i li mOmbiibeli, notu tambule ko ewiliko, olo hatu pewa kehangano laKalunga. Opo nee ohatu ka kundafana oinima itatu, oyo twa pumbwa okuninga, opo tu diinine oshili.

OMAUKWATYA, OO TWA PUMBWA, OPO TU DIDILIKE MO OSHILI

5. Ongahelipi okutila Jehova taku tu kwafele, tu didilike mo oshili?

⁵ Okutila Jehova. Ngeenge otwa kala hatu tila Jehova monghedi ya yuka, ohatu ka kala tu mu hole, notashi ke tu kwafela tu henuke oku mu nyemateka. Otwa halelela okulihonga eyooloko pokati kaasho shi li mondjila naasho sha puka, pokati koshili noipupulu, opo tu dule okukala twa hokiwa kuJehova. (Omayel. 2:​3-6; Heb. 5:14) Inatu efa nande oumbada wokutila ovanhu, u tu ningife tu kale tuhe hole Jehova, molwaashi luhapu, osho hashi hafifa ovanhu ohashi nyemateke Jehova.

6. Ongahelipi oumbada wokutila ovanhu wa li wa ningifa omalenga omulongo a pengife oshili?

⁶ Ngeenge otwa kala twa tila ovanhu shi dulife okutila Kalunga, ohatu ka pukifwa. Natu ka taleni koshihopaenenwa shomalenga 12, oo a li a ka lava edu, olo Jehova a li a udanekela okupa Ovaisrael. Eendadi omulongo oda li da efa oumbada wokutila Ovakaanan, u di ningife di liteeke Jehova. Oda li da lombwela Ovaisrael vakwao da ti: “Itatu dulu oku ka lwifa ovanhu ovo, molwaashi ove na eenghono ve tu dule.” (Num. 13:​27-31) Pataleko lopanhu, Ovakaanan ova li ve na eenghono ve dule Ovaisrael. Ndele keshe, oo a li ta diladila kutya Ovaisrael itava dulu okufinda ovatondi vavo, ka li ta diladila kombinga yaJehova. Eendadi odo omulonga oda li da pumbwa okuyandja elitulemo kwaasho Jehova a li a hala Ovaisrael va ninge. Oda li da pumbwa okudilonga kwaasho e di ningila efimbo opo la di  ko. Nokungaho, oda li tadi ka mona kutya Ovakaanan kave na eenghono okuyelekanifa naJehova, Omunaenghono adishe. Mepingafano neendadi, odo dihe fi didiinini, Josua naKaleb ova li va hala okukala va hokiwa kuJehova. Ova li va lombwela oshiwana va ti: “Ngeenge Jehova okwe tu hokwa, ote ke tu twala filufilu medu olo, note ke li tu pa.” — Num. 14:​6-9.

7. Oshike tashi dulu oku tu kwafela, tu kale hatu tila Jehova? (Tala yo efano.)

⁷ Opo tu kale hatu tila Jehova, otwa pumbwa okukala hatu diladila kwaasho tashi mu hafifa, efimbo keshe hatu ningi etokolo. (Eps. 16:8) Ngeenge to lesha omahokololo Ombiibeli, lipula kutya, ‘Ngeno onda li monghalo ei, ngeno ohandi ningi etokolo lilipi? Pashihopaenenwa, diladila nee ngeno to pwilikine komalenga omulongo Ovaisrael, oo a li taa ti kutya Ovaisrael itava dulu okufinda Ovakaanan. Mbela ngeno owa itavela ehokololo lavo, nokukwatwa koumbada wokutila ovanhu? Ile ngeno owa twikila okukala u hole Jehova, nokulonga osho tashi mu hafifa? Epupi lOvaisrael aveshe, ovo va li ko pefimbo olo, kala li la itavela oshili, oyo ya popiwa kuJosua naKaleb. Oshidjemo, ola li la kanifa oufembanghenda wokuya mEdu lEudaneko. — Num. 14:​10, 22, 23.

8. Oukwatya ulipi twa pumbwa okukulika?

⁸ Elininipiko. Jehova oha hololele oshili ovo ve lininipika. (Mat. 11:25) Otwa li twe lininipika, eshi twa li hatu hongwa oshili. (Oil. 8:​30, 31) Ashike otwa pumbwa okulungama, tuha kwatwe kounhwa. Ounhwa otau dulu oku tu ningifa, tu diladile kutya omataleko etu oku li mondjila ngaashi ashike omafinamhango Ombiibeli, ile ewiliko, olo hatu pewa kehangano laJehova.

9. Oshike tashi dulu oku tu kwafela tu kale twe lininipika?

⁹ Opo tu kale twe lininipika, otwa pumbwa okudimbuluka kutya fye ovanininini okuyelekanifa naJehova. (Eps. 8:​3, 4) Ohatu dulu yo okwiilikana Jehova e tu kwafele, tu kale ovalininipiki, nohatu tambula ko osho hatu hongwa. Jehova ote ke tu kwafela, tu kale twa lenga Eendjovo daye nosho yo ewiliko, olo hatu pewa kehangano laye, ponhele yomataleko etu. Ngeenge to lesha Ombiibeli, konenena oitwa, oyo tai ulike kutya Jehova oku hole elininipiko, noku tonde ounhwa. Kala yo we lininipika, ngeenge owa pewa oshinakuwanifwa, osho tashi ku ningifa u kale u na eenghonopangelo donhumba.

OSHIKE TASHI DULU OKU TU KWAFELA TU DIININE OSHILI?

10. Jehova okwa li a longifa oolyelye, opo a yandje ewiliko koshiwana shaye?

¹⁰ Twikila okukala we lineekela ewiliko, olo tali di kehangano laJehova. Pefimbo lOvaisrael, Jehova okwa li a longifa Moses nosho yo Josua, opo va yandje ewiliko koshiwana shaYe. (Jos. 1:​16, 17) Osha li sha endela nawa Ovaisrael, eshi va li va tala ko kutya ovalumenhu ovo ove li ovakalelipo vaKalunga. Omido omafele konima yaasho, eshi eongalo lopaKriste la totwa po, ovayapostoli 12 ovo va li hava yandje ewiliko. (Oil. 8:​14, 15) Opo nee ongudu oyo oya ka tamunuka mo, ndele tai kwatele mo ovakulunhuongalo vamwe vomuJerusalem. Eshi eongalo la li la tambula ko ewiliko lovalumenhu ovo ovadiinini, “eitavelo lovamwatate momaongalo oo ola li la pamekwa, nomuvalu wavo owa enda tau hapupala efiku keshe.” (Oil. 16:​4,5) Kunena, nafye Jehova ohe tu nangeke noupuna, ngeenge hatu landula ewiliko, olo hali di kehangano laye. Ndele mbela Jehova ota ka kala e udite ngahelipi, ngeenge otwa anye okutambula ko  ovalumenhu, ovo a nangeka po? Opo tu nyamukule epulo olo, natu ka kundafane osho sha li sha ningilwa Ovaisrael, eshi va li va yuka mEdu lEudaneko.

11. Oshike sha li sha ningilwa vamwe mokati kOvaisrael, ovo va li va tukululila Moses oshibofa, oo a li a nangekwa po kuJehova, a kwatele komesho? (Tala yo efano.)

¹¹ Eshi Ovaisrael va li molweendo va yuka kEdu lEudaneko, pomhito imwe, ovalumenhu vamwe voinakuwanifwa ova li va pilukila po Moses, nokupopila mowii oshinakuwanifwa, osho a li a pewa kuJehova. Ova ti: “Ongudu aishe, sha hala okutya, ovanhu aveshe, oiyapuki, na Jehova oku li mokati kavo.” (Num. 16:​1-3) Nonande oshoshili kutya ongudu aishe koshipala shaJehova oya li iyapuki, Jehova okwa li a hoolola Moses oye a kwatele komesho mokati koshiwana shaYe. (Num. 16:28) Eshi ovanashibofa ovo va li tava kembaula Moses, paulelalela, ova li tava kembaula Jehova. Kava li va yandja elitulemo kwaasho Jehova a hala, ndele ova li tava yandje elitulemo kwaasho va hala, sha hala okutya, eenghonopangelo nosho yo oinakuwanifwa. Kalunga okwa dipaa ovanashibofa ovo nosho yo omayovi mahapu, oo a li tae va yambidida. (Num. 16:​30-35, 41, 49) Kunena, otu na oushili kutya Jehova ina hokwa ovo ve li omhinge newiliko, olo hali di kehangano laye.

12. Omolwashike twa pumbwa okutwikila okukala twe lineekela ehangano laJehova?

¹² Ohatu dulu okutwikila okukala twe lineekela ehangano laJehova. Ngeenge pa pumbwa okuningwa omalunduluko meudeko letu loshili yonhumba yOmbiibeli, ile onghedi, omo oilonga yOuhamba ya unganekwa, ovo tava kwatele komesho ihava ongaonga okuninga omalunduluko, oo a pumbiwa. (Omayel. 4:18) Ohave shi ningi, molwaashi ova hala okuhafifa Jehova komesho yoinima aishe. Ohava kendabala yo okuninga omatokolo, a kanghamena kEendjovo daKalunga, oshihopaenenwa, osho shi na okulandulwa koshiwana shaJehova ashishe.

13. “Oshihopaenenwa shi na sha neendjovo diwa” otashi ulike kushike, nongahelipi tashi dulu oku tu kwafela, tu diinine oshili?

 ¹³ “Diinina oshihopaenenwa shi na sha neendjovo diwa.” (2Tim. 1:13) “Oshihopaenenwa shi na sha neendjovo diwa” otashi ulike komahongo opaKriste, oo taa hangwa mOmbiibeli. (Joh. 17:17) Komahongo a tya ngaho oko kwa kanghamena oinima aishe, oyo twa itavela. Ehangano laJehova ole tu honga tu diinine oshihopaenenwa osho. Ngeenge otwa ningi ngaho, Jehova ote ke tu nangeka noupuna.

14. Oshike sha li sha ningifa Ovakriste vamwe va efe po okudiinina “oshihopaenenwa sheendjovo diwa”?

¹⁴ Oshike tashi dulu oku tu ningilwa, ngeenge otwa efa po okudiinina “oshihopaenenwa shi na sha neendjovo diwa”? Natu ka tale koshihopaenenwa. Pefimbo lovayapostoli, Ovakriste vamwe ova li va tandavelifa oipupulu kutya efiku laJehova ola fika. Otashi dulika pa li pe na onhumwafo i na sha naasho, oyo ovanhu va li tava diladila kutya oya shangwa komuyapostoli Paulus. Nopehe na okukonakona oushili, Ovakriste vamwe muTessalonika ova li va itavela oipupulu ya tya ngaho, noku i tandavelifa nokuli. Ngeno ova dimbulukile oinima, oyo Paulus a li e va honga, eshi e va talela po, ngeno inava pukifwa. (2 Tes. 2:​1-5) Paulus okwa li a pa ovamwaxe omayele, vaha itavele keshe osho tava udu. Opo e va kwafele shi na sha nonakwiiwa, okwa li a xulifa onhumwafo yaye onhivali kOvatessalonika neendjovo tadi ti: “Ame Paulus, ohandi mu tumine omakundo oo nda shanga ame mwene. Alushe meenhumwafo dange osho handi shange mo ngaho, opo mu shiive kutya aame nde di shanga.” — 2 Tes. 3:17.

15. Ongahelipi hatu dulu okuliamena komahokololo oipupulu, oo taa monika a fa oshili? Yandja oshihopaenenwa. (Tala yo omafano.)

¹⁵ Oshike hatu dulu okulihonga meendjovo, odo Paulus a li a shangela Ovatessalonika? Ngeenge otwa uda sha, osho shihe li metwokumwe naasho twe lihonga mOmbiibeli, ile ngeenge twa uda omahokololo, taa nyuwifa omatwi, otwa pumbwa okulongifa eendunge dokuyoolola. MuSoviet Union shonale, ovatondi vetu ova li va tandavelifa onhumwafo,  oyo kwa li taku ti kutya oya dja keembelewa detu da kula. Onhumwafo oyo oya li tai ladipike ovamwatate va tote po ehangano limwe vali le lifikamena. Oya li tai monika ya fa yoshili. Ashike ovamwatate ovadiinini kava li va pukifwa. Ova li va didilika kutya etumwalaka, olo li li monhumwafo oyo, itali tu kumwe naasho ve lihonga. Kunena, ovo ve tonde oshili, omafimbo amwe, ohava longifa ointaneta, ile omakwatafano okomalungula, opo ve tu ngwangwaneke, ile ve tu tukaule. Ponhele ‘yokungwangwana,’ ohatu dulu okuliamena mokukonakona noukeka osho hatu udu, ile hatu lesha, ngeenge oshi li ngoo metwokumwe naasho twe lihonga nale. — 2 Tes. 2:2; 1 Joh. 4:1.

16. Metwokumwe nOvaroma 16:​17, 18, oshike tu na okuninga po, ngeenge ope na umwe ta tandavelifa oipupulu?

¹⁶ Kala moukumwe naavo ve li yo ovadiinini kuJehova. Kalunga okwa hala tu mu longele twa hangana. Ohatu ka kala twa hangana, ngeenge otwa kala twa kanyatela oshili. Keshe, oo ta tandavelifa omahokololo oipupulu, ota etifa etukauko meongalo. Onghee Kalunga okwe tu londwela, tu ‘mu kukume.’ Ngeenge hasho, ohatu ka itavelifwa oipupulu. — Lesha Ovaroma 16:​17, 18.

17. Omauwa elipi hatu ka mona, ngeenge otwe lihongo oshili, noku i diinina?

¹⁷ Ngeenge otwe lihongo oshili, noku i diinina, ohatu ka kala tu na ekwatafano lopofingo naJehova, neitavelo letu otali ka kala la pama. (Ef. 4:​15, 16) Otashi ke tu amena komahongo oipupulu aSatana nomitotolombo daye, na Jehova ote ke tu amena poudjuu munene. Natu twikile okudiinina oshili, ‘na Kalunga kombili ota ka kala pamwe nafye.’ — Fil. 4:​8, 9.