1, 2. Ombiibeli oya xunganeka ngahelipi kutya oshiwana shaJehova otashi ka hapupala?

KOMBADA yedu oku na ehangano lovanhu ovo ve hole Jehova nova hala oku mu longela. Ovanhu ovo Eendombwedi daJehova. Nonande ohava ningi omapuko, Jehova ohe va wilike nomhepo yaye iyapuki. Natu ka taleni keenghedi dimwe omo e va nangeka noupuna.

² Momudo 1914, ovanhu ashike vanini va li hava longele Jehova. Ashike Jehova okwa nangeka noupuna oilonga yokuudifa. Osho osha kwafela ovanhu omamiliyona ve lihonge oshili yOmbiibeli ndele tava ningi Eendombwedi daye. Jehova okwa popya shi na sha nehapupalo olo eshi a ti: “Ou muningholi ota ka ninga eyovi, naau munini ota ningi oshiwana sha pama. Ame Omwene nda hala oku shi ninga diva pefimbo lasho.” (Jesaja 60:22) Kunena otu shi liwetele kutya exunganeko olo ola wanifwa. Oshiwana shaJehova oshinene. Nokuli oku na oilongo ihapu oyo i na ovakalimo vanini neenghono ve dulike koshiwana shaJehova.

3. Oshiwana shaKalunga osha ulika ngahelipi ohole?

 ³ Pefimbo eli lexulilo, Jehova okwa kwafela oshiwana shaye shi pameke ohole yasho yokuholafana. “Kalunga oye ohole,” noshiwana shaye ohashi mu hopaenene. (1 Johannes 4:8) Jesus okwa ladipika ovashikuli vaye va kale ve “holafane.” Okwe va lombwela vali a ti: “Opo tuu opo aveshe tave mu koneke kutya, nye ovalongwa vange, [ngeenge] mu holafane.” (Johannes 13:34, 35) Efimbo opo la di ko, ovapiya vaJehova ova ulikilafana ohole ya tya ngaho nokuli nopefimbo opo oiwana tai lwifafana. Pashihopaenenwa, pefimbo loita itivali younyuni, ovanhu hanga omamiliyona 55 ova li va dipawa. Ashike oshiwana shaJehova ina shi kufa nande ombinga moita oyo. (Lesha Mika 4:1, 3.) Osho oshe shi kwafela shiha kale ‘netimba lohonde yomunhu.’ — Oilonga 20:26.

4. Omolwashike ehapupalo loshiwana shaJehova li didilikwedi?

⁴ Oshiwana shaKalunga onghee ngoo tashi hapupala nonande oshi na omutondi omunaenghono, Satana. Oku li “kalunga kefimbo lounyuni eli.” (2 Ovakorinto 4:4) Satana oye ta nwefa mo omahangano opapolitika ounyuni ou nosho yo oikundaneki, nohe i longifa opo i ye moshipala okuudifwa kwonghundana iwa. Ashike ita dulu oku ya moshipala oilonga oyo. Satana oku shi shii kutya oku na ko ashike okafimbo kaxupi kongaho, nomolwaasho ha kendabala alushe oku tu efifa po okulongela Jehova. — Ehololo 12:12.

5. Omolwashike omafimbo amwe ovanhu have tu udifa nai? (Tala efano pehovelo loshitukulwa.)

⁵ Ovapiya vaKalunga ove lihonga kutya osha fimana okukala ve hole Kalunga nosho yo ovanhu vakwao. Jesus okwa ti: “Hola Omwene Kalunga koye nomutima woye aushe nomwenyo woye aushe neendunge doye adishe. Oshipango shinene noshotete osho tuu eshi. Noshitivali shi fike pusho, osheshi, Hola omukweni ngaashi ove u lihole mwene.” (Mateus 22:35-39) Ashike Ombiibeli otai ulike kutya ovanhu aveshe inava wanenena omolwoulunde waAdam. (Lesha Ovaroma 5:12, 19.) Onghee hano vamwe meongalo otashi dulika va popye ile va ninge sha osho tashi tu udifa nai. Ngeenge osho osha ningwa, oshike hatu ka ninga po? Mbela ohatu ka twikila ngoo okukala tu hole Jehova? Ohatu ka kala ngoo ovadiinini kuye nokoshiwana shaye? Ombiibeli oya popya shi na sha novapiya vaKalunga vamwe ovo va popile ile va ningile oinima ya yahameka vamwe. Natu ka taleni kutya oshike hatu lihongo mwaasho sha li she va ningilwa.

6. Omonghedi ilipi Eli a li a dopa okupa ovana vaye outekuduliko?

⁶ Pashihopaenenwa, Eli okwa li omupristeri omukulunhu waIsrael, ashike ovanamati vaye vavali kava li hava dulika keemhango daKalunga. Ombiibeli oya ti: “Ovana ovamati vaEli ova li ovapwidi. Vo inava yavala Omwene.” (1 Samuel 2:12) Eli okwa li e shi shii kutya ovanamati vaye ohava longo oilonga ii neenghono. Ashike ine va hanyena sha kwata moiti. Lwanima Jehova okwa ka handukila Eli novanamati vaye ovo vavali noi na ka pitika vali mepata laEli mu dje ovapristeri. (1 Samuel 3:10-14) Mbela ngeno owa li po pefimbo laEli nou shii kutya oha efa ovanamati va nyone, mbela ngeno oshe ku pundukifa? Mbela ngeno oshinima sha tya ngaho osha nghundipaleka  eitavelo loye ndele to efa po okulongela Jehova?

7. David okwa li a nyona enyono la kwata moiti lilipi, na Jehova okwa li a ninga po shike shi na sha nalo?

⁷ David okwa li e na omaukwatya mawa lela, nomolwaasho Jehova a li e mu hole neenghono. (1 Samuel 13:13, 14; Oilonga 13:22) Ashike naye okwa li a nyona. Eshi Uria a li a ya kolwoodi, David okwa li a ya momilele nomukulukadi waUria wedina Batseba, nokwa ninga omufimba. David ka li a hala ovanhu va shiive osho a ninga. Nomolwaasho kwa li a tuma a ifanenwe Uria, nokwa li te mu heke a ye keumbo laye. David okwa li a hala Uria a ye keumbo a ka nangele nomukulukadi waye Batseba opo ku tiwe oufimba owaUria. Ashike Uria ka li a ya keumbo. Onghee hano David okwa li a unganeka opo Uria a dipawe molwoodi. Molwaashi David okwa li a nyona sha kwata moiti, ye noludalo laye ova ka hangika koilanduliko inyikifoluhodi. (2 Samuel 12:9-12) Ashike Jehova okwa li e mu fila onghenda ndele te mu dimine po. Okwa li e shii kutya David okwa hala okulonga osho sha yuka. (1 Eehamba 9:4) Ngeno oko wa li pefimbo olo, ngeno owa kala u uditile ngahelipi osho David a ninga? Mbela ngeno owa efa po okulongela Jehova?

8. (a) Ongahelipi omuyapostoli Petrus a dopa okuwanifa po osho a popya? (b) Nonande Petrus okwa li a nyona, omolwashike Jehova a li a twikila oku mu longifa?

⁸ Oshihopaenenwa shimwe vali shopaMbiibeli oshomuyapostoli Petrus. Jesus okwa li a hoolola Petrus a ninge omuyapostoli. Ashike nande ongaho Petrus okwa li a popya nokwa ninga oinima ihe li mondjila. Pashihopaenenwa, Petrus okwa li a popya  kutya nande vamwe ova ka fiye po Jesus, ye kape na fiku e ke mu fiye po. (Markus 14:27-31, 50) Ashike konima eshi Jesus a li a kwatwa po, ovayapostoli aveshe, mwa kwatelwa Petrus, ova li ve mu fiya po. Opo nee Petrus okwe ke likala Jesus lwoikando itatu ta ti kutya ke mu shii. (Markus 14:53, 54, 66-72) Ashike Petrus okwa li a uda nai neenghono eshi a ninga ngaho. Jehova okwa li e mu dimina po nokwa twikila oku mu longifa. Ngeno owa li omuhongwa pefimbo olo nou shii osho Petrus a ninga, mbela ngeno owa twikila ngoo okulineekela Jehova?

9. Omolwashike u na elineekelo kutya Kalunga oha ningi alushe osho sha yuka?

⁹ Otwa mona moihopaenenwa oyo kutya ovapiya vaJehova vamwe ova li va ninga oinima ii nova yahameka vakwao neenghono. Ngeenge osho osha ningwa kunena, mbela oto ka ninga po shike? Mbela oto ke liteeka po okwoongala nokufiya po Jehova noshiwana shaye? Ile oto ka diladila kutya Jehova omunanghenda notashi dulika a teelela omunyoni e livele ombedi? Ashike omafimbo amwe otashi dulika omunyoni a nyona sha kwata moiti ndele ine livela ombedi. Mbela oto ka kala ngoo u na elineekelo kutya Jehova oku shii osho sha ningwa po nota ka ninga po sha pefimbo la wapala? Otashi dulika a yukife oinima ndele omunhu ta kondwa mo meongalo ngeenge osha pumbiwa? Owa itavela ngoo kutya Jehova oha ningi alushe osho shi li mondjila noshi li pauyuki?

10. Jesus okwa li e na eudeko lilipi li na sha nepuko laJudas Iskariot nolaPetrus?

¹⁰ MOmbiibeli omu na omahokololo mahapu aavo va li ovadiinini kuJehova nokoshiwana shaye nonande ova li mokati kovanhu ovo vamwe vomuvo va ninga omapuko a kwata moiti. Jesus oku li oshihopaenenwa sha denga mbada. Konima eshi a kala ta ilikana oufiku aushe a kwafelwe kuXe, okwa hoolola ovayapostoli vaye 12. Ashike umwe womuvo, Judas Iskariot, lwanima okwe ke mu kengelela. Omuyapostoli Petrus naye okwa li e mu lidimbika ta ti ke mu shii. (Lukas 6:12-16; 22:2-6, 31, 32) Jesus ka li nande a pa Jehova ombedi ile ovahongwa vaye eshi vamwe va li ve mu udifa nai. Ponhele yaasho, Jesus okwa kala e na ekwatafano lopofingo naXe nokwa li a twikila oku mu longela noudiinini. Jehova okwa li e mu nangeka noupuna eshi e mu nyumuna, nolwanima okwe mu ninga ohamba yOuhamba waye meulu. — Mateus 28:7, 18-20.

11. Ombiibeli oya xunganeka shike shi na sha novapiya vaJehova vopefimbo letu?

¹¹ Oshihopaenenwa shaJesus otashi tu hongo tu kale ovadiinini kuJehova nokoshiwana shaye. Notu na omatomheno mawa oku shi ninga. Otu shi wete kutya Jehova ota wilike ovapiya vaye mefimbo eli lexulilo. Ote va kwafele va udife oshili mounyuni  aushe, novo aveke tava longo oshilonga osho. Ova hangana yo nova hafa omolwaashishe osho Jehova he va hongo. Jehova okwe shi yelifa a ti: “Tala, ovapiya vange otava ka kuwilila ehafo lokomutima.” — Jesaja 65:14.

12. Otu na okutala ko ngahelipi omapuko avakwetu?

¹² Otwa hafa shili eshi Jehova he tu wilike nohe tu kwafele tu ninge oinima ihapu iwa. Mepingafano naasho, ovanhu vomounyuni waSatana kave na ehafo nokave na eteelelo lonakwiiwa. Kashi li pandunge okufiya po Jehova noshiwana shaye molwaashi ashike umwe meongalo a ninga ile a popya sha shii. Ponhele yaasho, otu na okukala ovadiinini kuJehova nokulandula ewiliko laye. Otu na yo okulihonga nghee tu na okutala ko nonghee tu na okulinyenga komapuko avamwe.

13, 14. (a) Omolwashike tu na okulididimikilafana? (b) Eudaneko lilipi tu na okukaleka momadiladilo?

¹³ Oshike u na okuninga po ngeenge omumwaxo okwa popya ile a ninga sha osho she ku udifa nai? Ombiibeli oya ti: “Ino endelela okulihandukifa nomwenyo woye, osheshi ehandu tali kala monhulo yelai.” (Omuudifi 7:9) Atusheni inatu wanenena nohatu ningi omapuko. Onghee hano, inatu teelela ovamwatate va kale alushe hava popi ile hava ningi ashike osho shiwa. Noitashi ka kala shiwa okukala ashike hatu lipula nomapuko avo. Ngeenge otwa ningi ngaho, otashi dulika tuha kale vali twa hafa eshi hatu longele Jehova. Shi nyemateka, eitavelo letu muJehova oli na oupu li nghundipale, notashi dulika tu fiye po ehangano laye. Osho otashi ke tu ningifa tuhe mu longele vali noitatu ka kala vali tu na eteelelo lokuya mounyuni mupe.

¹⁴ Oshike tashi dulu oku ku kwafela u twikile okulongela Jehova nehafo ngeenge vamwe va ninga sha she ku udifa nai? Dimbuluka alushe eudaneko laye tali hekeleke, olo tali ti: “Tala, Ame ohandi shiti omaulu mape nedu lipe. Inya yonale itai dimbulukuwa vali, nongaashi kape na ou te i diladila momutima waye.” (Jesaja 65:17; 2 Petrus 3:13) Jehova ote ke ku pa omanangekonoupuna oo ngeenge owa kala omudiinini kuye.

15. Jesus okwa ti natu ninge shike ngeenge vamwe va ninga omapuko?

¹⁵ Oshoshili kutya inatu fika natango mounyuni mupe. Onghee hano, ngeenge otwa udifwa nai, otwa pumbwa okudilonga kwaasho Jehova a hala tu ninge. Pashihopaenenwa, Jesus okwa ti: “Ngenge hamu kufile po ovanhu omanyono avo, Xo yeni meulu ote mu kufile po yo; ndelenee ngenge itamu dimine po ovanhu, naXo yeni ita dimi po omanyono eni.” Eshi Petrus a li a pula Jesus ngeenge otu na okukufila po vakwetu ‘lu-7,’ Jesus okwa nyamukula ta ti: “Ame  ihandi ku lombwele lu-7, ndelenee lwo-77.” Jesus okwe tu honga tu kale alushe hatu dimine po vakwetu. — Mateus 6:14, 15; 18:21, 22.

16. Josef okwe tu tulila po oshihopaenenwa shiwa shilipi?

¹⁶ Oshihopaenenwa shaJosef otashi tu hongo nghee tu na okulinyenga ngeenge vamwe ve tu udifa nai. Josef nondenge yaye ovo aveke ovana vaJakob ovo a li e na naRakel. Jakob okwa li e na vali ovana omulongo, ndele okwa kala e hole unene Josef shi dulife ovana aveshe. Osho osha li she va ningifa va kale va twila Josef ondubo. Ova li nokuli ve mu tonda fiyo ve mu landifa po moupika ndele ta twalwa kuEgipti. Konima yomido dihapu, ohamba yaEgipti oya li ya lenga Josef oye a ninge omupangeli omunaenghono moshilongo osho molwaashi oya li ya kuminwa oilonga iwa yaJosef. Lwanima ovamwaxe vaJosef ove ke uya kuEgipti va lande oikulya omolwondjala oyo ya li ko. Eshi va mona Josef inave mu dimbuluka, ashike Josef okwe va dimbuluka. Nonande ova li ve mu hepeka, ine va handukila, ndele ponhele yaasho okwa li e va tala po a mone ngeenge ova lundulula ngoo shili oikala yavo. Eshi Josef a mona kutya ova lundulula oikala yavo, okwe liholola kutya ye omumwaxe, ndele te va hekeleke. Okwe va lombwela ta ti: “Inamu kala mwa tila. Ame ohandi ke mu kalela noshisho, nye noludalo leni.” — Genesis 50:21.

17. Oshike to ka ninga po ngeenge vamwe ova ningi omapuko?

¹⁷ Ino dimbwa kutya atusheni ohatu ningi omapuko, naave otashi dulika u udife vamwe nai. Onghee hano ngeenge owa didilike kutya owa handukifa mukweni, tula moilonga omayele Ombiibeli. Mu pula e ku dimine po, noku kendabala u pange ombili naye. (Lesha Mateus 5:23, 24.) Ohatu kala twa hafa ngeenge vakwetu ve tu dimina po. Onghee hano, nafye osho tu na okuninga ngaho. Ovakolossi 3:13 oya ti: “Lididimikilafaneni, diminafaneni po omanyono, ngenge mwa ningafana nomukweni, ngaashi [Jehova, NW] e mu dimina po, osho nanye yo mu ninge.” Ngeenge otu hole ovamwatate shili, itatu ka kala twe va handukila omolwomapuko a ningilwe nale. (1 Ovakorinto 13:5) Nongeenge ohatu dimine po vakwetu, Jehova naye ote ke tu dimina po. Onghee hano ngeenge vakwetu va ninga omapuko, natu va kenukile ngaashi Tate yetu Jehova he tu kenukile. — Lesha Epsalme 103:12-14.