Omuudifi ina ninginifwa wedina Haykanush wokoArmenia okwa li a toola opasporta popepi neumbo laye. Mopasporta omwa li mu na oukalata vombaanga nosho yo oimaliwa ihapu. Okwa li a lombwela omushamane waye oo naye a li ina ninginifwa kombinga yaasho.

Ovalihomboli ovo kava li ve na ouxupilo muwa nova li meendjo. Ashike ova li va tokola okutuma oimaliwa oyo kondjukifi oyo ya li mopasporta. Omushamane oo a li a kanifa nosho yo oukwaneumbo waye ova li ve shi kuminwa neenghono. Haykanush nomushamane waye ova yelifa kutya Ombiibeli oyo have lihongo oyo ye va kwafela va kale ovanashili. Opo nee ova longifa omhito oyo va popye kombinga yEendombwedi daJehova noukwaneumbo oo noku va pa oifo.

Oukwaneumbo oo owa li wa hala oku pa Haykanush olupandu lopashimaliwa, ashike ka li e i tambula ko. Efiku la ka landula ko, omukulukadi waye okwa ka talela po Haykanush nomushamane waye keumbo lavo opo ve ke va pandule, nokwa li e mu indila a tambule okalinga kokawe.

Ngaashi oukwaneumbo oo, ovanhu vahapu ngeno ova kuminwa oushili waHaykanush nomushamane waye. Ndele mbela Jehova okwa li ngoo e shi kuminwa? Okwa li a tala ko ngahelipi ounashili wavo? Mbela eenghendabala davo dokukala ovanashili oda li ngoo tadi ti sha?

Omanyamukulo omapulo oo kamadjuu. Omolwashike mbela? Omolwaashi ovapiya vaKalunga ove shii kutya okuhopaenena omaukwatya aJehova osha fimana neenghono shi dulife okawe, oshingoli ile oinima imwe yopamaliko. Oshoshili kutya osho Jehova ha tale ko shi na ondilo osha yooloka ko kwaasho ovanhu va lenga. (Jesaja 55:8, 9) Ovapiya vaye ove shii kutya eenghendabala davo dokuhopaenena oukwatya waJehova odi na ondilo neenghono.

Osho ohatu dulu oku shi mona mwaasho Ombiibeli tai ti shi na sha neudeko lomoule nosho yo ounongo. Omayeletumbulo 3:13-15 oya ti: “Omunelao omulumenhu ou a mona ounongo, nomulumenhu ou te likongele eendunge. Osheshi oku di konga oku dule oshisilveri, noku di mona oku dule oshingoldo; Ondilo yado i dule okoralli, noinima yoye aishe i nondilo itai yelekwa nado.” Osha yela kutya Jehova okwa lenga omaukwatya oo shi dulife eliko keshe londilo.

Ongahelipi mbela shi na sha nokukala omunashili?

Jehova omunashili, ‘noiha fufya.’ (Titus 1:2) Okwa nwefa mo omuyapostoli Paulus a shangele Ovakriste Ovaheberi vomefelemudo lotete eendjovo edi: “Ilikaneni omolwetu, osheshi fye otu shi shii shili, otu nomaliudo mawa, eshi twa hala okweenda nawa omoinima aishe.” — Ovaheberi 13:18.

Jesus Kristus okwa tula po oshihopaenenwa shiwa shokukala omunashili. Pashihopaenenwa, eshi omupristeri omukulunhu Kajafas a ti, ‘Ohandi ku anifa kuKalunga omunamwenyo, u tu lombwele, ngenge oove Kristus Omona waKalunga,’ Jesus okwa li a popya oshili ndele te liholola kutya oye Messias. Okwa li a popya oshili nonande oku shi shii kutya omhangu otai dulu oku mu lundila kutya okwa tukana, ile kutya osho otashi dulu oku mu dipaifa. — Mateus 26:63-67.

Ongahelipi kombinga yetu? Mbela ohatu ka kala ngoo ovanashili ngeenge otwa lombwele omunhu wonhumba ouyelele inau lixwa po ile twe u lundulula opo tu limonene sha shopamaliko?

Otashi dulu okukala shidjuu okukala omunashili momafiku aa axuuninwa eshi ovanhu vahapu ‘ve lihole vo vene, novanalwisho voimaliwa.’ (2 Timoteus 3:2) Ngeenge onghalo yopamaxupilo oya naipala ile oilonga ya pumba, vahapu ohava diladila kutya okuvaka ile okukengelela inashi puka. Ovanhu vahapu osho hava ningi ngaho, tava diladila kutya ngeenge ou li omunashili, ito xupu. Ovakriste vamwe navo ova ninga omatokolo mai, va konga ‘eliko loulunde,’ naasho osha nyona po edina lavo liwa meongalo. — 1 Timoteus 3:8; Titus 1:7.

Ashike Ovakriste vahapu, ohava hopaenene Jesus. Ova mona kutya okukala ve na omaukwatya ngaashi aKalunga okwa fimana neenghono shi dulife okukala nomaliko ile nomauwa amwe e lili. Nomolwaasho ovanafikola Ovakriste ihava vake momakonakono opo va pite. (Omayeletumbulo 20:23) Okukala omunashili haalushe haku tu pefa ondjabi, ngaashi Haykanush a li a ningilwa. Ndele nande ongaho, Kalunga okwa ti osha yuka  okukala omunashili nohashi tu kaleke neliudo la koshoka, olo li li oshinima sha fimanenena.

Oshihopaenenwa shaGagik oshe shi ulika. Okwa ti: “Manga inandi ninga Omukriste, onda li handi longele ehangano la kula omo mwene wehangano iha futu oifendela ye lixwa po, ndele oha futu ko ashike kanini kwaasho ha mono mehangano laye. Molwaashi onda li omukulunhu mehangano omo, onda li nda pulwa ndi udafane nomukulunhu woifendela mepangelo nondi mu pe ombubo opo aha lopote oukengeleledi wehangano letu. Oshidjemo, onda li nde liningila edina lii lokuha kala omunashili. Eshi nde lihonga oshili, inandi twikila vali okuninga ngaho nonande oilonga oyo ohai futu nawa. Ponhele yaasho, onda li nda tameka ongeshefa yange mwene. Ongeshefa yange onde i shangifa okudja pehovelo nohandi futu oifendela yange aishe.” — 2 Ovakorinto 8:21.

Gagik okwa ti: “Oyuuyemo yange oya li ya ninipala, naasho osha li shidjuu okufila oshisho oukwaneumbo wange. Ndele nande ongaho paife onda hafa. Ondi na eliudo la koshoka koshipala shaJehova. Ondi li oshihopaenenwa shiwa kovanamati vange vavali, nopaife ohandi pewa oinakuwanifwa meongalo. Paife onde liningila edina liwa mokukala omunashili mokati kaavo hatu ngeshefa navo nosho yo ovakulunhu voifendela.”

Jehova oku hole ovo have mu fimaneke, moku hopaenena omaukwatya aye a denga mbada, mwa kwatelwa okukala omunashili. (Titus 2:10) Nongeenge otwa ningi ngaho, okwa udaneka kutya ote ke tu kwafela. Okwa nwefa mo ohamba David i shange tai ti: “Nghee nda li omumati fiyo onda kulupa, omuyuki inandi mu mona nande a efuwa, ile oludalo laye tali ehela oshifima.” — Epsalme 37:25.

Oshimoniwa shomudiinini Rut oshe shi ulika. Okwa kala omudiinini kuinamweno Naomi mokukala naye, ponhele yo ku mu fiya po molwaashi a kulupa. Rut okwa li a tembukila kuIsrael, oko a li a dula okulongela Kalunga kashili. (Rut 1:16, 17) Okwa li omunashili nokwa longa noudiinini eshi ta pupudulula, ta shikula elongekido lOmhango yeehepele. Sha faafana naasho David lwanima a ka didilika, Jehova ka li a efa Rut naNaomi. (Rut 2:2-18) Okwa li a fila Rut oshisho moinima ihapu ihe fi ashike yopainiwe. Okwe mu hoolola a ninge oshitukulwa shepata lohamba David nokuli nolaMessias omuudanekwa. — Rut 4:13-17; Mateus 1:5, 16.

Otashi dulu okukala shidjuu kovapiya vaJehova vamwe va mone oimaliwa ya wana eemhumbwe davo. Ndele ponhele yokukendabala va mone ekandulepo lomukundu lihe li pauyuki, ohava longo noudiinini nonelitulemo. Mokuninga ngaho, ohava ulike kutya omaukwatya aKalunga a denga mbada, ngaashi okukala omunashili, okwa fimana ku dule oinima yopamaliko. — Omayeletumbulo 12:24; Ovaefeso 4:28.

Ngaashi Rut, Ovakriste mounyuni aushe navo ova ulika kutya ova itavela kutya Jehova oku na eenghono doku va kwafela. Ove lineekela filufilu mwaau a udaneka ta ti: “Ihandi ku efa noitandi ku fii po nande.” (Ovaheberi 13:5) Jehova okwa ulika lwoikando kutya ota dulu nota ka kwafela ovo hava kala alushe ovanashili. Okwa kala alushe ha wanifa po eudaneko laye lokufila oshisho eemhumbwe da fimana dovapiya vaye. — Mateus 6:33.

Ovanhu otashi dulika va lenga okawe noinima imwe yopamaliko. Ashike ohatu dulu okukala noushili kutya Tate yetu womeulu okwa lenga oukwatya wetu wokukala ovanashili nosho yo omaukwatya amwe mawa, shi dulife omaliko keshe ondilo.