1. Etomheno le likalekelwa lilipi hali tu etele ehafo?

KASHI hafifa tuu okumona oshiwana shaJehova tashi ende tashi hapupala! Omudo wa ya, otwa ninga omakonakonombiibeli e dulife po 10 000 000. Osho otashi ulike kutya ovapiya vaKalunga otava efa ouyelele wavo u minikile. Diladila kovanhu omamiliyona ovo va ulika ohokwe nova li ve uya kEdimbuluko. Ova li ve lihonga nghee Kalunga e tu ulikila ohole eshi e tu pa ekulilo. — 1 Joh. 4:9.

2, 3. (a) Oupyakadi ulipi itau dulu oku tu imba tu kale “ngaashi eenyofi mounyuni”? (b) Okutala keendjovo daJesus odo di li muMateus 5:14-16, oshike hatu ka kundafana moshitukulwa eshi?

² Mounyuni aushe, oshiwana shaJehova ohashi popi omalaka a yoolokafana. Ashike osho ihashi tu imbi tu hambelele Tate yetu, Jehova, tu li moukumwe. (Eh. 7:9) Kashi na nee mbudi kutya ohatu popi elaka lilipi ile ohatu di peni, ohatu dulu okukala “ngaashi eenyofi mounyuni.” — Fil. 2:15.

³ Ekulo loshiwana shaKalunga, oukumwe oo hatu hafele nosho yo eenghendabala odo hatu ningi tu kale oupafi, ohai fimanekifa Jehova. Moshitukulwa eshi, ohatu ka kundafana nghee hatu dulu okweefa  ouyelele wetu u minikile moinima oyo itatu. — Lesha Mateus 5:14-16.

4, 5. (a) Kakele kokuudifa, ongahelipi hatu dulu okweefa ouyelele wetu u minikile? (b) Omauwa elipi haa etifwa kelihumbato letu liwa? (Tala efano pehovelo loshitukulwa.)

⁴ Oshitukulwa shi na oshipalanyole “Light in the Darkness,” mOshungonangelo ye 1 Juni 1925, osha ti: “Kape na oo ta dulu okukala omudiinini nomunashili kOmwene momafiku aa axuuninwa . . . kakele ngeenge oha longifa omhito keshe a efe ouyelele waye u minikile.” Osha yelifa sha ti: “Oku na okuninga ngaho mokulombwela ovanhu onghundana iwa, nokushikula ondjila youyelele.” Onghedi imwe omo hatu dulu okweefa ouyelele wetu u minikile omokuudifa onghundana iwa nokuninga ovanhu ovahongwa. (Mat. 28:19, 20) Shikwao vali, elihumbato letu lopaKriste otali dulu okufimanekifa Jehova. Ovanhu vahapu ohava konenene elihumbato letu. Okulimemesha nosho yo okupopifa ovanhu nohamu otaku ka ulika shihapu kutya ofye oolyelye, nohatu longele Kalunga a fa peni.

⁵ Jesus okwa lombwela ovahongwa vaye a ti: “Ndele ngeenge tamu i meumbo, li kundeni nombili.” (Mat. 10:12) Moshitukulwa osho Jesus novayapostoli vaye va li hava udifile unene, ovanhu ova li hava tambula momaumbo avo ovo vehe shii nale. Kunena, osho osha pumba moitukulwa ihapu. Ashike elihumbato loye liwa eshi to yelifa kutya owa endela shike, otali dulu okuningifa omuneumbo a kale e ku mangulukila. Oshiwa alushe okulimemesha. Ovamwatate novamwameme ovo hava udifa meenhele daaveshe tava longifa okatemba koishangomwa ova mona kutya okulimemesha ohaku nane ovanhu vahapu. Ngeenge owa ka udifa to longifa okatemba, oto ka mona kutya ovanhu ohave linyenge nawa ngeenge hatu limemesha noku va popifa. Otashi dulu oku ve linyengifa va kufe oishangomwa. Elihumbato loye liwa otali dulu oku ku kwafela u hovele eenghundafana navo.

6. Ongahelipi ovalihomboli ovanamido vamwe va li va tamununa mo oukalele wavo?

⁶ Ovalihomboli ovanamido vamwe vokuEngland ihava ka udifa vali eumbo neumbo omolwoukolele wavo oo tau kande omapunya. Ova li va tokola okweefa ouyelele wavo u minikile pondje yeumbo lavo. Ova li hava tula oshitaafula pondje yeumbo shi na oishangomwa yopaMbiibeli pefimbo opo ovadali hava ile ounona vavo pofikola oyo i li popepi navo. Okatalekonawa oka li ka ningifa vahapu va kufe po embo Questions Young People Ask—Answers That Work, Embo 1 neti-2, nosho yo oumbo vamwe. Omumwameme umwe omukokolindjila womeongalo lavo okwa li e va waimina. Elihumbato laye liwa nosho yo okunakonasha kwovalihomboli ovo okwa li kwe linyengifa omudali umwe a tambule ko ekonakonombiibeli.

7. Ongahelipi to dulu okukwafela ovo opo va tembukile moshitukulwa sheni?

⁷ Omido opo da di ko, eenhauki oda kala tadi taukile moilongo ihapu. Oshike to dulu okuninga opo u di kwafele di shiive Jehova nosho yo elalakano laye? Shotete, oto dulu okulihonga okupopifa ovo opo va tembukile moshitukulwa sheni melaka lavo. O-JW Language app oi li oshilongifo osho tashi dulu oku ku kwafela u ninge ngaho. Shikwao vali, oto dulu okulihonga omautumbulilo oo taa dulu oku va ningifa va pwilikine. Oto dulu oku va lombwela va ye ko-jw.org, noku va ulikila ouvidio nosho yo oishangomwa ya yoolokafana oyo i li melaka lavo. — Deut. 10:19.

8, 9. (a) Okwoongala kwetu kwomokati koshivike ohaku tu kwafele ngahelipi? (b) Ongahelipi ovadali tava dulu okukwafela ovana va kale hava kufa ombinga pokwoongala?

⁸ Jehova okwe tu pa pahole okafo Onghalamwenyo yopaKriste noilonga yokuudifa opo tu dule okupondola moukalele. Osho hatu lihongo mokafo oko ohashi tu kwafele tu kale tu na omukumo wokuninga omalishuneko nosho yo omakonakonombiibeli.

 ⁹ Vahapu ovo have uya oshikando shotete pokwoongala ohava mono nghee ounona tava kufa ombinga. Ovadali kwafeleni ovana veni va efe ouyelele wavo u minikile moku va honga va kale hava longifa oitya yavo vene ngeenge tava ningi omatyekosha. Omatyekosha avo taa di komutima otaa dulu okunanena ovo opo ve uya kokwoongala moshili. — 1 Kor. 14:25.

10. Elongelokalunga loukwaneumbo ohali dana onghandangala ilipi mokuxumifa komesho oukumwe?

¹⁰ Onghedi imwe omo hatu dulu okweefa ouyelele wetu u minikile omokuxumifa komesho oukumwe moukwaneumbo nosho yo meongalo. Onghedi vali imwe omo ovadali tava dulu okuninga ngaho oyo okukala hava ningi elongelokalunga loukwaneumbo pandjikilile. Omafimbo amwe vahapu ohava tale o-JW Broadcasting pelongelokalunga loukwaneumbo. Konima eshi mwa tala oprograma oyo, omolwashike itamu kundafana nghee mu na okutula moilonga oitwa oyo ya popiwa mo? Ngeenge omudali ta kwatele komesho elongelokalunga loukwaneumbo, oku na okudimbuluka kutya okaana kanini itaka dulu okupewa ewiliko la faafana naalo tali pewa okaana oko ke na omido omulongo nasha. Longifa nawa oishangomwa oyo hamu longifa pelongelokalunga loukwaneumbo opo oshilyo keshe moukwaneumbo shi mone mo ouwa. — Eps. 148:12, 13.

11-13. Ongahelipi atushe hatu dulu okuxumifa komesho oukumwe meongalo nosho yo okukwafela vamwe va efe ouyelele wavo u minikile?

¹¹ Ongahelipi ovanyasha tava dulu okuxumifa komesho oukumwe meongalo, nokutwa vamwe omukumo va efe ouyelele wavo u minikile? Ngeenge ou li Omukriste omunyasha, omolwashike ito litulile po elalakano lokupanga oukaume novanamido? Oto dulu oku va pula nefimaneko ve ku lombwele oimoniwa oyo va mona eshi va kala tava longele Jehova omido dihapu. Osho otashi ke ku twa omukumo, notashi ke mu linyengifa amushe mu efe ouyelele woshili u minikile. Atushe ohatu dulu okulitulila po elalakano lokutambula ko ovo have uya kokwoongala pOlupale lOuhamba. Okuninga ngaho otaku ka xumifa komesho oukumwe notaku dulu okulinyengifa ovaenda va efe ouyelele wavo u minikile. Oto dulu oku va popifa to limemesha nosho yo oku va kwafela va mone opo tava kala omutumba. Kendabala oku va kwafela va shiivafane navamwe meongalo, nokungaho otava ka kala va manguluka.

¹² Ngeenge owa pewa oshinakuwanifwa shokukwatela komesho oilonga yomomapya, oto dulu  okuninga shihapu u kwafele ovanamido va kufe ombinga moukalele. Mbela ope na oshitukulwa osho tashi va wapalele? Peemhito dimwe, oto dulu oku va pa va ka longe pamwe nomunyasha oo ta dulu oku va yambidida. Oto dulu yo okuulika kutya ou na ko nasha naavo itava dulu vali okulonga shihapu omolwokuhenoukolele nosho yo eenghalo odo hadi va ngabeke. Eendunge dokuyoolola nosho yo okunakonasha kwoye otaku dulu okukwafela ovanyasha novanamido, ovo ve na owino naavo vehe na owino, va udife onghundana iwa nouladi. — Lev. 19:32.

¹³ Omupsalme okwa shanga a ti: “Oshiwa nosha wapala shi fike peni, ovamwaxe ngeenge tava kala kumwe nombili.” (Lesha Epsalme 133:1, 2.) Eshi Ovaisrael va li hava kala pamwe naavo hava longele Jehova, ova li va mona ouwa muhapu eshi va kala hava endafana naavo ve na enwefemo liwa. Osha li sha fa omaadi okuvaeka oo a li haa pupaleke oshipa nohaa nyika nawa. Ohatu dulu okukala enwefemo liwa mokuxumifa komesho oukumwe mokati kovamwatate novamwameme. Ngeenge osho nale ho ningi, owa wana okupandulwa. Mbela ito dulu ‘okumbwalangadja’ mokushiiva nawa ovamwatate meongalo? — 2 Kor. 6:11-13.

14. Oshike to dulu okuninga opo u efe ouyelele woye u minikile momudingonoko weni?

¹⁴ Ongahelipi to dulu okweefa ouyelele woshili yOmbiibeli u minikile pomudingonoko weni? Eendjovo nosho yo oilonga yoye iwa otai dulu yo okunanena moshili ovanhu vomomudingonoko weni. Lipula kutya, ‘Mbela ovanhu vomomudingonoko wetu ohava tale nge ko ngahelipi? Mbela ohandi kaleke ngoo eumbo lange la yela opo li yandje efano liwa kovanhu vomomudingonoko? Mbela ohandi katuka ngoo eenghatu opo ndi kwafele vamwe?’ Ngeenge to popi nEendombwedi dikweni, omolwashike ito di pula kutya okunakonasha nosho yo elihumbato lado liwa ola kuma ngahelipi ovapambele, ovanhu vomomudingonoko, ovanailonga pamwe nado, ile ovanafikola vakwao? Otashi dulika u ka ude oidjemo iwa. — Ef. 5:9.

15. Omolwashike sha fimana okukala oupafi?

¹⁵ Ngeenge otwa hala ouyelele wetu u minikile filufilu, otu na okulungamena efimbo olo tu li mulo. Jesus okwa li a ladipika ovahongwa vaye lwoikando a ti: “Kaleni oupafi.” (Mat. 24:42; 25:13; 26:41) Ngeenge otwa itavela kutya ‘oudjuu munene’ ou li kokule nokuuya, itatu ka longifa naanaa omhito keshe tu kwafele vamwe ve lihonge kombinga yaJehova. (Mat. 24:21) Ponhele yokuvilima momudingonoko wetu, ouyelele wetu otau ka enda tau fiilile ile nokuli u dime filufilu.

16, 17. Oshike hatu dulu okuninga opo tu kale oupafi?

¹⁶ Atushe otwa pumbwa okukala oupafi unene tuu eshi omafimbo taa ende nokunaipala. Jehova ota ka katuka onghatu pefimbo la wapala. Inatu pumbwa okukala twa limbililwa. (Mat. 24:42-44) Ofimbo twa teelela, otwa pumbwa okulididimika nokukala oupafi. Kala ho lesha Eendjovo daKalunga efiku keshe, noino efa po okwiilikana. (1 Pet. 4:7) Kala ho dilonga koihopaenenwa iwa yovamwatate novamwameme ovo va mona ehafo eshi va kala ve li oupafi nova efa ouyelele wavo u minikile. Oshihopaenenwa shimwe shiwa oshi li mOshungonangelo yo 15 Aprili 2012, epandja 18-21, koshi yoshipalanyole “Onda kala ndi kwete koshikutu shomulumenhu Omujuda oule womido 70.”

¹⁷ Kala we lipyakidila noinima oyo tai tungu nokukala u na eendafano liwa. Osho otashi ke ku etela ehafo linene, notashi dulu okweendelelifa efimbo. (Ef. 5:16) Omido efele da pita, ovamwatate ova kala ve lipyakidila nova longa shihapu. Ashike kunena ohatu longo shihapu koshi yewiliko laJehova. Ohatu efa ouyelele wetu u minikile shi dulife nale.

18, 19. Ongahelipi ovakulunhuongalo tava dulu oku tu kwafela tu kale oupafi notwe lipyakidila? Yandja oshihopaenenwa.

 ¹⁸ Otashi pameke eitavelo okushiiva kutya nonande inatu wanenena ohatu dulu okulongela Jehova monghedi oyo a hokwa. Onghee hano, pandula Jehova omolwefiloshisho lovakulunhuongalo ovo ve li “eeshali [di li ovanhu,” NW]. (Lesha Ovaefeso 4:8, 11, 12.) Eshi to ka talelwa po komukulunhuongalo moshikando tashi landula, longifa omhito oyo u lihonge kounongo waye nou mone ouwa momayele aye.

¹⁹ Ovakulunhuongalo vavali vokuEngland ova li ka talela po ovalihomboli ovo va li ve na omaupyakadi. Omukulukadi okwa li e udite kutya ihava longele kumwe ngeenge tashi uya poinima yopamhepo. Omushamane waye okwa ti kutya ke fi omuhongi muwa, noka li ha unganeke elongelokalunga loukwaneumbo pandjikilile. Ovakulunhuongalo ova li va kwafela ovalihomboli ovo va yandje elitulemo koshihopaenenwa shaJesus. Okwa li ha file oshisho ovahongwa vaye nokuwanifa po eemhumbwe davo. Ovakulunhuongalo ova li va ladipika omushamane a hopaenene Jesus. Ova li va ladipika omukulukadi a kale omulididimiki. Ova li yo va pa ovalihomboli ovo omaetepo taa longo e na sha nanghee tava dulu okulongela kumwe opo va kale hava ningi elongelokalunga loukwaneumbo pamwe novana vavo vavali. (Ef. 5:21-29) Lwanima ovakulunhuongalo ova li va pandula omushamane omolweenghendabala daye. Ova li ve mu twa omukumo a twikile, nokukale e lineekela kutya omhepo iyapuki otai ke mu kwafele a kale ha kwatele komesho nawa oukwaneumbo moinima yopamhepo. Okunakonasha nosho yo eyambidido lovakulunhuongalo ola li la kwafela oukwaneumbo oo u efe ouyelele wavo u minikile.

20. Oshike to dulu okukala wa teelela ngeenge owa efa ouyelele woye u minikile?

²⁰ Omupsalme okwa imba a ti: “Keshe tuu ou ha tila Kalunga nota ende meendjila daye, oye omunelao.” (Eps. 128:1) Ngeenge owa efa ouyelele woye u minikile mokukwafela vamwe va longele Kalunga, mokulihumbata monghedi oyo tai xumifa komesho oukumwe nokukala oupafi, oto ka mona ehafo linene. Vamwe otava ka mona oilonga yoye iwa, notashi ke linyengifa vahapu va fimaneke Tate yetu. — Mat. 5:16.