Xe yaRehabeam, Salomo, okwa pangela Israel oule womido 40. (1 Eeh. 11:42) Salomo okwa fya mo 997 K.O.P. Ndele Rehabeam okwa dja muJerusalem a yuka kolundume laSekem a ka vaekwe e li ohamba. (2 Omaf. 10:1) Mbela okwa li a tila okushikula oshihopaenenwa shaSalomo oo a li e na ounongo muhapu? Mbela Rehabeam okwa li ta dulu okumona kutya ota dulu okupongolola po omaupyakadi?

Osha yela kutya ovanhu ovo va li ve uya kenangekepo laye muIsrael kava li ve udite ombili. Nomolwaasho lwopokati opo, ovakalelipo voshiwana ova li ve uya kuye noku mu lombwela omalipulo avo, va ti: “Xo okwe tu hepeka noku tu twika omutengi mudjuu, ndelenee ove pupaleka hano oudjuu nonghalamwenyo yetu, opo tu ninge ovapiya voye ovaduliki.” — 2 Omaf. 10:3, 4.

Otashi dulika Rehabeam a li e udite a mangwa. Ngeenge okwa wanifa po eemhumbwe dovanhu, ye, oukwaneumbo waye nosho yo ovo va li mombala otashi dulika va li ve na okweefa po oinima imwe yopamaliko nokuhapula shihapu kovanhu. Shimwe vali, ngeenge okwa anye, otashi dulika ovanhu ve mu tukulile oshibofa. Oku na okuninga po shike? Ohamba ipe oya li i na oku ka kundafana tete novakulunhu ovo va li ovayandjimayele vaSalomo. Ndele nande ongaho, Rehabeam okwa ka pula omayele kovanyasha vepupi laye. Molwaashi okwa li a shikula omayele ovanyasha ovo, okwa li a tokola okuungaunga novanhu nonyanya. Okwa nyamukula a ti: “Ame ohandi ka weda ko vali komutengi weni. Tate ngeenge e mu denga neengola, ame ohandi ke mu denga neengola domakiya.” — 2 Omaf. 10:6-14.

Oshike hatu lihongo mo? Ohatu ka mona alushe ounongo ngeenge otwa kala hatu pwilikine kovakulunhu ovo va pyokoka pamhepo. Molwaashi ove na owino, otashi dulika ve shii oidjemo yomatokolo notave ke tu pa omayele mawa. — Job 12:12.

Rehabeam okwa li a ongela etangakwaita laye li ka lwife omapata oo e mu tukulila oshibofa. Ashike Jehova okwa li a ya mo olunyala okupitila momuxunganeki Shemaia, a ti: “Inamu dengafana nOvaisraeli shaashi nye vamwe aveke. Shuneni amushe komaumbo, osheshi eshi sha ningwa ehalo lange.” — 1 Eeh. 12:21-24 *.

Rehabeam okwa li te lipula eendjovo odo a li a lombwelwa kuShemaia. Diladila kunghee osho sha li she mu limbililika. Mbela ovanhu ova li tava diladila shike kombinga yohamba oyo ya li ye va ningila omatilifo oku va denga “neengola domakiya” eshi ye lialuluka iha ninge sha omapata oo omulongo? (Yelekanifa 2 Omafimbo 13:7.) Ohamba netangakwaita layo ova li “va dulika keendjovo dOmwene ndele va shuna komaumbo.”

Oshike hatu lihongo mo? Oshi li pandunge okudulika kuKalunga nonande okuninga ngaho otaku dulu oku tu shekifa kuvamwe. Kalunga ota ka kala e tu hokwa noku tu nangeka noupuna ngeenge otwa kala hatu dulika kuye. — Deut. 28:2.

Rehabeam okwa li a mona oidjemo yashike? Okudulika kwaye okwa li kwa ya moshipala omhangela yaye yoku ka lwifa oshiwana shipe osho opo sha li sha totwa po, nokwa li a yandja elitulemo kokutungwa kwoilando yomapata aJuda naBenjamin, oo a li ta pangele natango. Okwa li a pameka oilando yonhumba “unene”. (2 Omaf. 11:5-12) Osho sha fimanenena oshosho kutya okwa li a dulika komhango yaJehova oule wefimbo lixupi. Eshi ouhamba womapata omulongo aIsrael, oo a li koshi yepangelo laJerobeam, a hovela okulongela oikalunga, vahapu ova li “va yambidida Rehabeam” eshi va li va shuna kuJerusalem va ka yambidide elongelokalunga lashili. (2 Omaf. 11:16, 17) Kungaho, okudulika kwaRehabeam okwa li kwa pameka okupangela kwaye.

Eshi Rehabeam a li a pameka epangelo laye, okwa li a ninga oshinima shimwe osho inashi teelelwa. Okwa li a efa po omhango yaJehova ndele ta waimine elongelokalunga loshipaani. Omolwashike mbela? Mbela okwa li a nwefwa mo kuina, oo a li Omuammoni? (1 Eeh. 14:21) Kashi na nee mbudi kutya omolwashike a ningila ngaho, oshiwana ashishe osha li she mu shikula. Jehova okwa li a pitika Sisak, ohamba yaEgipti, a kwate ko oilando ihapu yaJuda, nonande Rehabeam okwa li e i pameka. — 1 Eeh. 14:22-24; 2 Omaf. 12:1-4.

Onghalo oya ka naipala eshi Sisak nosho yo etangakwaita laye va ponokela Jerusalem, osho Rehabeam a li a pangela. Pomhito opo, omuxunganeki Shemaia okwe uya kuRehabeam nokovakulunhu ndele te va lombwele etumwalaka laKalunga ta ti: “Nye eshi mwa efa nge, naame ohandi mu yandje yo momake aSisak.” Rehabeam okwa li e linyenga ngahelipi koutekuduliko oo? Okwa li e linyenga monghedi iwa. Ombiibeli oya ti: “Ovakulunhu vaIsrael nohamba ve lininipika ndele tava ti: ‘Omwene Ye omuyuki.’” Onghee Jehova okwa xupifa Rehabeam nosho yo Jerusalem shiha hanaunwe po. — 2 Omaf. 12:5-7, 12.

Konima yaasho, Rehabeam okwa li a twikila okupangela ouhamba wokolukadi. Ofimbo ina fya, okwa li a tukulila nehalo liwa ovanamati vaye eeshali, opo aha ningife ovanamati vaye va tonde Abia, oo ta ka landula ko e li ohamba. (2 Omaf. 11:21-23) Moshinima eshi, Rehabeam okwa li a ulika ounongo oo a li ina ulika nande onale.

Nonande Rehabeam okwa li ngoo a ninga oinima imwe iwa, ka li a hokiwa kuJehova. Ombiibeli oya popya shi na sha nokupangela kwaye ya ti: “Okwa ninga osho inashi yuka.” Omolwashike mbela? Omolwaashi “ina ameka omutima waye okukonga Omwene.” — 2 Omaf. 12:14.

Diladila kwaashi: Rehabeam okwa li ashike ha dulika kuJehova peemhito dimwe. Okwa li yo ha ningi oinima iwa ponhele yoshiwana shaJehova. Ashike okwa li a dopa okukulika ekwatafano lopofingo naJehova ile ehalo lokuninga osho tashi mu hafifa. Nomolwaasho a li a waimina elongelokalunga loipupulu, nokuninga omapuko. Otashi dulika u lipule kutya, ‘Mbela eshi Rehabeam a li a tambula ko nawa epukululo laJehova, okwa li a nwefwa mo kuvamwe ponhele yoku shi ninga tashi di komutima nosho yo nehalo loku mu hafifa?’ (2 Omaf. 11:3, 4; 12:6) Lwanima, okwa li vali a hovela okulonga owii. Ka li tuu a yooloka ko kuxekulu, ohamba David! Oshoshili kutya David okwa li a ninga omapuko, ashike okwa li e hole unene Jehova, elongelokalunga lashili nosho yo okulidilulula  omolwomapuko aye. — 1 Eeh. 14:8; Eps. 51:1, 17; 63:1.

Ohatu dulu okulihonga sha kuRehabeam. Oshi shii okupandulwa ngeenge ovanhu tava kendabala okufila oshisho omaukwaneumbo avo nosho yo okulonga noudiinini moilonga yaJehova. Ndele opo tu kale twa hokiwa kuJehova, tete otu na okuyambidida elongelokalunga lashili nokukala mulo.

Osho otashi ka ningwa ashike ngeenge otwa kala tu hole Jehova nohole yomoule. Ngaashi ashike twa pumbwa okukala hatu tula oikuni pediko opo omundilo u kale wa tema, otwa pumbwa okukaleka ohole yetu yokuhola Jehova ya xwama mokukonakona Eendjovo daye pandjikilile, mokudilonga kwaasho twa lesha nosho yo mokudiinina okwiilikana. (Eps. 1:2; Rom. 12:12) Kungaho, ohole yetu yokuhola Jehova otai ke tu linyengifa tu kale hatu mu hafifa mukeshe osho hatu ningi. Otai ke tu linyengifa yo tu livele ombedi shili pomhito opo sha pumbiwa. Mepingafano naRehabeam, ohatu ka kala ovadiinini kelongelokalunga lashili. — Jud. 20, 21.